Roiti 8

I Saula sa komitia na ekelesia

1Ego ko pa ranena tugu isa sa sa podalai takomiti vivikere sa na ekelesia pa Jerusalema, ko ira doru tinoni vasosoto sa qai okoto tapiara lao vei tu pa ia pikata gugusu pa Jiudia beto pa Sameria, goto ira na tinoni tagarunudi gu sa qaike riu. 2Goto kaki ira na tinoni sa neqi na dia rarange sa qai lao lukana roromai beto qai riu golomia sa na kokobu tinina i Sitivini. 3I Saula sa mi vamanyao pale sa na ekelesia sau, ko sa tome memekaria sira na ruruma tadira na tinoni, ko sa ragata vovotuniria sira doru qai vasosotoa na Bangara, maqota na marene, ko sa vatomeria pa ruma vaipiu.

Na nongoro jongana sa tatarae pa Sameria

4Ego ko ira tugu qai okoto tapiara lao vei doru eqa sa qai vavakatonia lekogo sa na paranga tana Bangara. 5Ko kame ira si Pilipi. Sa lao sisa pa gugusu pa Sameria, ko sa tarae vevelania tadira na tinoni ketakoi sa na veveina na Karisito. 6Ego ko totonai qai nongoria beto qai batiria sira na roiti vaivagabaradi sa roitiniria i Pilipi, poni sa qai mekarai vainongoro vatataleniria ira na puku minete tinoni sira na tinarae ti Pilipi. 7Ira soku sa koleria na gagala ikeredi sa qai lukana gagagateana totonai sa ijiju votu paleria isa tadira sira na gagala ikeredi, beto soku ira sa mate kale kaki kobu tinidi beto qai qao sa qai tasalana tugu. 8Ko qai qera beto sira doru pa gugusu isa.

9Ego na suverena tugu pa gugusu isa sa kai tinoni poreona potana vaivagabara, na isongona i Saimone. Ko sa tei dori sovai tu qai kole gagabarania ira na tinoni Sameria sira na ona roiti vaivagabaradi sa kole roroitiniria pa ona potana. Ko mekana ba sa pojai sa kai tinoni poreveveina jola sisa sau. 10Ko na gugusu doruna, ikete na lavata, sa perangana qai kole vainongoro lao vatalenia sisa, beto pira qaqarigu, <<Api tugu sisa na neqi tana Tamasa, isa sa tagigala na Neqi Lavata,>> qaqarigu. 11Ko na totoso kakasana sa qai kokole nonongoro vatalea ira sisa, ura sa kokole valoposo gabaraniria na ona potana. 12Ba totonai qai vasosotoa ira sa na nongoro jongana na veveina na binangara tana Tamasa beto na veveina na isongona i Jisu Karisito sa taraenia i Pilipi, poni sa qai paputaiso beto sira, na maqota na marene. 13Ko i Saimone mekana ba sa somana vasosoto tugu ko sa paputaiso beto sa kole tututia si Pilipi. Ko tonai sa batiria isa sira na roiti vaivagabaradi beto na roiti neqidi lalavata ti Pilipi, poni sa kole gagabaraona.

14Ego totonai qai nongoronia ira na tinoni tagarunudi pa Jerusalema sa na veveina qai tei teku vasosotoa tu ira pa Sameria sa na paranga tana Tamasa, poni sa qai garunu goreniria tadira sira Pita i Jone. 15Ko totonai qai gore kamu, poni sa qai vavaraniria sira qai vasosoto ko mai tekua na Gagala Tabuna qarigu. 16(Ura qai tapaputaiso gu pa isongona i Jisu na Bangara sira, goto sa oqoro goreria na Gagala Tabuna.) 17Ko qai vaoponiria na limadi ira Pita i Jone sira, ko qai tekua sa na Gagala Tabuna.

18Ego totonai sa batia i Saimone sa totonai qai vaoponiria na limadi ira na tinoni tagarunudi poni qai tekua na Gagala sira na tinoni, poni sa pogoso lame vaniria na poata sira karu, 19ko pira sau, <<Ara ba mu vanisiu tugu sa na neqi ina, ko isa ma vaoponia na limaqu poni mi tekua tugu sa na Gagala Tabuna,>> sau.

20Poni sa oe lao tana si Pita, <<Na mua poata siliva beto ao sa mu mate manyaomiu! Ura qu roroqua muna vainia na poata ao sa na vaivana tana Tamasa. 21Kepore na iamu beto nake somanamu pa roiti qe korapa roitinia agei api sao, ura na bulomu sa sake gosoro pa dodogoro tana Tamasa. 22Mu gabala ko mu loa pale sa na mua roiti ikikerena api beto ko mu vavara lao tana Bangara, ko isa mi taleosonigo sa na mua roroqu ikerena sa kole pa bulomu. 23Ura qa batia ara sa sa pugeligo na kokono nyonyorogua beto qu korapa tapiu pa mua sela sao,>> saunia.

24Poni sa tepa lao si Saimone, pira sau, <<Ego, mu vavara lao vanisiu tu tana Bangara ropi, ko mike taroiti taqu sisa qugunia ao ina,>> sau.

25Ego pa liguna qai poja vaneneqinia beto qai vaivagigalainia ira karu sa na paranga tana Bangara, poni sa qai gabala mule pa Jerusalema. Pana dia rerege mule sa qai kole vavakatonia sa na nongoro jongana tinganai vei gugusu pa Sameria.

I Pilipi beto na tinoni Itiopia

26Ego kai mateana tana Bangara sa sa lame ti Pilipi, ko pira sau, <<Mu turu ko mu taloa sae keta pa kale gorena pa soana sa koko pa Jerusalema ko sa gore vei pa Qaza, na soana qega,>> saunia. 27Poni sa taloa si Pilipi ko sa riu. Ko pa ona rerege sa lao kamua isa sa kai tinoni Itiopia. Kai tinoni mamata poreveveina sisa, beto kai nabulu sa kopuniria na isisongo ti Kanadesi, na kalao pa Itiopia. Na iviva api sa sae somanania na vinatarasaena na Tamasa pa Jerusalema, 28ko pa totoso isa sa sa korapa mule riuona. Ko sa korapa koi gogoreona pa ona totopili sisa, beto sa korapa titiroa isa sa na buka ti Aisea na tinoni kokorotai. 29Poni pira sau ti Pilipi sa na Gagala, <<Mu lao ko mu rerege tata pa totopili ina,>> saunia.

30Poni sa abutu tata lao pa totopili si Pilipi sau, poni sa nongoria sa korapa titiroa isa sa na kukuti ti Aisea na tinoni kokorotai, ko sa nanasia, <<Ai vei qu gigilaimua tugu ao na ginuana sisa qu korapa tiroa ina?>> saunia.

31Poni sa oe lao sa na iviva isa, <<Qokolo, ko bi mija tu! Kepore kai tinoni bi vakabere vanisiu vei pira, sa ai vei beto mana boka vakaberia?>> sau. Ko sa kukua si Pilipi, poni sa kesa si Pilipi ko sa toqo tavitia pa totopili.

32Na kobu kukuti ti Aisea sa kole tiroa isa sa pira sau,

<<Sa kai muqisi podeke vei na sipi sa tatoni lao ko mina takubolo vamate sisa,

beto sa vei tugu na lami sake vaqeu pa moena na tinoni sa ngangabuturia na vurungu sipi,

poni sa isa ba sake isongo vaqeu podeke tugu.

33Sa tavakea pa ngangangulu beto sake tatoka totonai qai pitua.

Kepore kai tinoni bi gigilai na tutina,

ura sa tateku pale pa peso sa nona toa,>> sau. #Aisea 53.7-8.

34Ego ko sa nanasa laoia na iviva api si Pilipi, <<Mu ule vanisiu, na veveina i sei sa sa pojai na tinoni kokorotai api? Na veveina mekana tugu, ba kai goto tinoni tu?>> sau. 35Poni sa podalai vavakato tugu pa titiro api si Pilipi, ko sa vakabere lao vania sa na nongoro jongana na veveina i Jisu.

36Ego ko pa korapana na dia rerege gore pa soana ira karu sa qai kamua sa kai ia sa kolea na pie, poni sa sa paranga lao ti Pilipi sa na iviva api, <<Dotu ko, inana gu sa na pie! Ai sa vei ko manake boka tapaputaiso sara?>> sau.#8.36 Kaki kukuti kokoleidi sa qai valaoa na pikata 37, pira sau: Poni pira sau si Pilipi, <<Vei muna vasosoto pa doru bulomu, poni ko boka gu,>> sau. Poni pira sau sa na iviva, <<Ara qa vasosotoa si Jisu Karisito sa na Tuna na Tamasa,>> sau. 38Ko sa vanosoa na iviva sa na totopili, ko qai mekarai gore pa pie sira kao Pilipi, ko sa paputaisoia i Pilipi sisa.

39Totonai qai paro pa pie sira karu, poni sake ruavo tugu oqanai toni variua na Gagalana na Bangara si Pilipi, ko na iviva api sake bati ligua si Pilipi. Beto sa tonia na soana ko sa qeqera mi riuona sa na tinoni isa. 40Goto i Pilipi sa pa gusu pa Azotasi mule sa tabata. Ko sa rerege vavakatonia isa sa na nongoro jongana tadira doru gugugusu, tinganai sa kamu tu pa Sizaria.

Currently Selected:

Roiti 8: LGA

Highlight

Copy