Roiti 9

I Paula sa gabala

(Roiti 22.6-16; 26.12-18)

1Ego ko i Saula sa kole singo mangininiria sa nona paranga vaivamatagutu ko mina vamateria sira na sepele tana Bangara sau. Ko sa lao sisa tana kuta iama lavata, 2ko sa teparia sira na leta mai lao tadira pa ruma vavaikamudi pa Damasikasi, ko vei mina bati poaria sira qai tutia na Soana tana Bangara, poni sa mina piuria, marene na rereko, ko mina toni muleniria pa Jerusalema sau.

3Ego ko pa ona rerege lao ko sa tata kamua pa Damasikasi isa, sa sa malara votu lame vasiboro pa noka sa kai kabere ko sa gona vailivutai lao tana. 4Poni sa vukele gore pa peso sisa, beto sa nongoria sa kai ovovele pira sau, <<Saula! Saula! Ai sa vei ko qu komitisiu ara sao?>> sau.

5Poni sa oe lao sisa, <<I sei sao, Bangara?>> sau.

Poni pira sau sisa, <<Ara si Jisu isa qu korapa komitia ao. 6Ba mu turu, ko mu tome lao pa gugusu pa Damasikasi, ko ketakoi tu kode mina taule vanigo sisa muna roitinia ao,>> sau.

7Ko ira na tinoni qai somana tutia i Saula sa qai turu ke vagala gu koledia. Qai nongoriadia tugu sa na ovovele, ba qaike batia na tinonina. 8Beto sa turu pa peso si Saula, ko mi vadoravia sa na matana sau, ba sake boka babata. Ko qai arua gu na limana beto qai tita laonia pa Damasikasi sisa. 9Ko kue rane sake babata, sake teteku na buku sisa.

10Ego ko na suverena tugu pa Damasikasi sa kai sepele, na isongona i Hananiasi. Ko na Bangara sa paranga tana pa dodogoro, <<Hananiasi!>> saunia.

<<Api sara, Bangara,>> sau sisa.

11Poni sa paranga lao tana sa na Bangara, <<Mu turu, ko mu lao pa soana na isongona Tuvisi, ko mu nyaqoa pa ruma tai Jiudasi sa kai tinoni pa Tasosi, na isongona i Saula. Ura sa korapa vavara sisa, 12ko sa tei batia tu isa pa dodogoro sa kai tinoni na isongona i Hananiasi sa tome ko sa vaoponia na limana sisa ko mi babata ligu sau,>> sau.

13Poni sa oe lao si Hananiasi, <<Bangara, qa tei nongoronia tu tadira kubo tinoni ara na veveina sa na tinoni api, ko na kubo ngangangulu sa tei roitiniria tu tadira na tinoni tamu pa Jerusalema sapi. 14Ko kopira sa sa teku neqi tadira na kuta iama sisa, ko mina piu tekuria sira doru qai vatarasaego ao,>> sau.

15Poni sa paranga lao tana sa na Bangara, <<Mu lao gu, ura api sa na tinoni tavilena taqu ko mina pogoso laonia na isongoqu tadira na tinoni karovodi, tadira na babangara, beto ko tadira na tinoni Izireli. 16Ura ara mana vabatinia sira na vitigi mina gosoro talenia na isongoqu ara sisa,>> sau sa na Bangara.

17Poni sa taloa lao si Hananiasi, ko sa lao tugu kamua sa na ruma sa suveria i Saula, ko sa vaoponia na limana sisa. Beto sa pira saunia, <<Saula, tasiqu, na Bangara, isa i Jisu sa votu tamu totonai qu korapa lalamemua ao pa soana, sa sa garunusiu sara, ko ao mu boka babata ligu beto ko mu tavapugelenia na Gagala Tabuna sau,>> sau. 18Pana totoso tugu isa sa vukele pa matana i Saula sa kai sa sa vei na kadena na igana, ko sa babata ligu sisa. Beto sa turu ko sa tapaputaiso sisa, 19beto pa liguna sa teteku poni sa neqi ligu sa na tinina.

I Saula sa tarae pa Damasikasi

Ego ko sa suvere tavitiria ira qai vasosotoa na Bangara pa Damasikasi ka vivisa rane mai tu si Saula. 20Ego beto nake sovaina sa sa podalai tarae vevelania gu i Saula tinganai vei ruma vavaikamuna si Jisu, ko i Jisu tugu sa na Tuna na Tamasa sau. 21Ko ira doru qai nongoria isa sa qai gabara beto, ko pira qarigu, <<Qokolo, api tugu sa na tinoni sa komiti vivikereria ira pa Jerusalema, ira qai vatarasaea nisongona tugu na Bangara api! Ko na kuta lame tana lani sa mina piu tekuria sira na tinoni vevei ira ko mina toni mule laoniria tadira na kuta iama sau!>> qarigu.

22Ba sake mako gore sa na neqina na tarae ti Saula, ko sa varuraria sira na tinoni Jiu qai suvere pa Damasikasi beto sa vilasa vakakabere vaniria sa i Jisu sa na Karisito sauniria.

23Ego qai jola kubo rane, poni sa qai vaikamu sira na Jiu ko qai kuonia ko mai vamatea sisa qarigu. 24Ba qai vavakato vania ira kaki tinoni si Saula sa na veveina qai kuonia. Qai kole kokopu totoniria ira sira na atakamanadi na toba pa gugusu na rane na bongi, ko mai vamatea sisa qarigu. 25Ba qai tonia ira na ona sepele kai bongi si Saula, ko qai vavotu veinia pa kai tapururuna na tobana na gugusu, beto qai vasikulu gorea pa kai mane.

I Saula sa suvere pa Jerusalema

26Ego tonai sa kamu pa Jerusalema si Saula, poni sa kole popodekia ko bi somana tavitiria ira na tinoni tana Bangara ketakoi sau, ba qai kole matagutunia ira sisa, ura qaike vasosotoa ira sa kai tinoni tana Bangara sisa. 27Poni sa aru tekua i Banabasi sisa ko sa toni laonia tadira na tinoni tagarunudi sisa, beto ko sa vakabere vaniria i Banabasi sisa vei i Saula sa batia si Jisu pa soana beto ko i Jisu sa paranga tana. Beto ko sa vavakato vaniria mutugu isa sisa vei sa tarae vaneneqinia i Saula pa Damasikasi sa na isongona i Jisu.

28Ego ko sa somana tavitiria ira na tinoni tana Bangara si Saula, ko sa boka lekogo votu tome pa Jerusalema, beto sa kole tarae vaneneqinia isa sa na isongona na Bangara. 29Sa parangaria beto sa guaria tugu vei sira na tinoni Jiu qai parangania na paranga Qiriki, poni qai popodekia ko mai vamatea tugu qarigunia ira sisa. 30Ba totonai qai nongoro vaia ira na tinoni qai vasosotoa na Bangara sa vei isa, poni sa qai toni gorenia pa Sizaria si Saula beto qai garunu variua pa Tasosi.

31Ego ko pa totoso isa sa suvere pa bule sa na ekelesia doruna pa Jiudia, pa Qalili, beto pa Sameria. Ko sa iolo beto sa toa sae pa pangagana na Bangara beto pa vaivaneqi tana Gagala Tabuna, ko sa pidoko sae sa na ekelesia.

I Iniasi sa tasalana

32Ego sa kamua kai totoso sa kole rerege lao doru eqa ovikiria ira na gugusu si Pita, poni sa gore kamuria sira na tinoni tana Tamasa pa Luda. 33Ko ketakoi sa gosoria isa sa kai tinoni na isongona i Iniasi, sa kole laona gu pa lovu ka vesu aoro, ura sa mate kale na tinina. 34Poni sa paranga lao tana si Pita, <<Iniasi, sa tei salanigo tu i Jisu Karisito sao! Mu tatakole ko mu aru vatalea na mua lovu,>> saunia. Poni sake ruavo tugu tatakolena sisa. 35Totonai qai batia ira doru tinoni qai suvere pa Luda beto pa Saroni sa sa tasalana vei i Iniasi, poni sa qai gabala lao tana Bangara sira.

I Dokasi sa tavatoa mule

36Ego na suverena pa gugusu pa Jopa sa kai rereko sa somana vasosotoa na Bangara, na isongona i Tabita. (Na isongona isa pa paranga Qiriki si Dokasi.) Soku roiti jongadi beto na vavaiia tokaniria ira na tinoni vaivasevidi sa sa roroitiniria isa. 37Ko pa totoso isa sa sa kamua na mo sisa ko sa mate, ko qai ogonia na kokobu tinina beto sa qai sae vakolea pa lose pa nulu. 38Ego pa Jopa sa sake sou pa Luda, ko totonai qai nongoronia ira na tinoni tana Bangara sa i Pita sa sa korapa gu pa Luda, poni sa qai garunu valaoria sira karu tinoni, ko qai tepa vivitigia si Pita, <<Muke veinigei, mu sisiqarai lame tamigei pa Jopa!>> qarigunia.

39Poni sa taloa si Pita ko sa tutiria ira karu. Totonai sa kamu isa poni sa qai toni saenia pa lose pa nulu. Qai turu vavailivutainia ira doru nanaboko si Pita, ko qai kole lukana, beto qai vabatinia isa sira na pokogojodoruru beto kaki goto poko mule sa pitiria i Dokasi totonai sa korapa suvere tavitiriaona.

40Ego sa iju votuniria pa lose i Pita sira doru beto sa toqo sori tutungu ko sa vavara, beto sa balinga mule pa kokobu tinina na rereko ko pira sau, <<Tabita, mu tatakole!>> saunia. Poni sa vadoravaria sa na matana, ko totonai sa batia si Pita poni sa tatakole sisa. 41Sa alaka laonia na limana si Pita, ko sa bako vaturua. Beto sa sa kukuria sira na tinoni tana Tamasa beto ira na boko nanaboko ko sa loa lao vaniria na tei toa mulena tu sisa.

42Ego ko na nongorona isa sa rerege doru eqa pa gugusu pa Jopa ko ira soku tinoni sa qai vasosotoa na Bangara. 43Beto sa suvereona mai tu kubo rane pa Jopa si Pita tana kai tinoni sa roroitinia na kopo manugu, na isongona i Saimone.

Currently Selected:

Roiti 9: LGA

Highlight

Copy