Roiti 7

Na paranga ti Sitivini

1Ego beto sa nanasia na kuta iama lavata si Sitivini, <<Ai sa vei, qai sosoto tugu sira doru sakasa qai jutunigo ira pira?>> saunia.

2Poni sa oe lao si Sitivini, pira sau, <<Ka visa turaqu beto na tamaqu, mu nongoro lamesiu! Na Tamasa lavata qi vatadogoronia mekana tana tamada i Ebarahami totonai tu qi korapa suvere isa pa Mesapotamia, totonai qi oqoro lao suvere pa Harani sisa. 3Ko pira qiu sa na Tamasa tana, <Mu taloa pa mua gugusu sosoto beto tadira na mua bubutu tinoni, ko mu lao suveria na ia mana vabatinigo ara,> qiunia.#Popodalaina 12.1.

4Poni qi taloa pa gugusu tadira na tinoni Kaladia si Ebarahami, ko qi lao suvere pa Harani. Pa liguna tu qi mate na tamana beto sa qi pojania na Tamasa sisa ko qi rijo lame suveria sa na ia qu korapa suveria agou lani kopira. 5Ba na Tamasa qike vania kai iapeki isisongo babi kai kobu peso sa pa ia api; goto qi taringungutinia sa isa beto ira na tutina isa vuka risa tu sa mai isongia, ba pa totoso isa qi oqoro pore na tuna si Ebarahami. 6Pira qi paranga vei sa na Tamasa ti Ebarahami, <Ira na tutimu ao sa mai lao suvere vei na tinoni karovodi pa kai goto gugusu, ko mai tavapinausu na tangangangulu sira ka made gogoto aoro. 7Ba pa liguna isa mana vakilasia ara sa na puku tinoni sa vapinausuria ira, ko mai tavavotu riu sira pa gugusu isa ko mai kamu suvere vatarasaesiu sara pa ia api,> qiu sa na Tamasa. 8Beto na Tamasa qi vania kai vinagigilana na ona paranga vinaego sisa, ko na vinagigilana na paranga vinaego isa sa i Ebarahami qi tapobe. Ko tonai qi podo si Aisake poni sa i Ebarahami ba qi pobea tugu sisa tonai qi vesu ranena, ko i Aisake ba qi pobea mutugu si Jekopi, ko i Jekopi ba qi poberia mutugu sira ka manogarua tuna marene, ira ka manogarua tamada gita pa moa.

9Ego ko qai kokonoa tugu ira ka visa tamada inara si Josepa na tasidi sosoto, ko qai vavainia ko pa Ijipi tu qi gore suvere. Ba na Tamasa qi suvere somana tana, 10ko qi vasarea pa doruna na ona tapata, beto qi vania tugu vei na gigalai beto qi tadoro valavata pa moena i Pero, na bangara Ijipi. Beto ko i Pero qi vaqavunaia pa Ijipi beto pa ona ruma sisa. 11Ego beto qi raja pa doruna na gugusu Ijipi beto pa Kenani sa kai songe lavata, ko qi kamuria na tapata lavata sira na tinoni, ko kepore ketakoi bai teku gagani sira na tamada totonai.

12Ego totonai qi nongoronia i Jekopi sa pa Ijipi sa koleona na gagani qarigu, poni qi garunu vagoreria sira na tamada na totoso momoe. 13Ego na vinarua totoso qai gore, poni sa i Josepa qi ule vakabere vaniria na boko tugana sa na veveina mekana. Ko totonai sa qi gigilaria i Pero sira pa tatamana ti Josepa. 14Ego beto qi kuku vagorea i Josepa si Jekopi na tamana, beto ira doru tatamana; ira ka vitungavulu lima sira doru. 15Ko qi rijo gore pa Ijipi si Jekopi, ko ketakoi qi mate sisa beto vei tugu ira na boko tamada gita. 16Na kokobu tinidi sa qai tapogoso mule sae pa Sukemi, ko qai tagolomo pa leo bevi isa i Ebarahami tu qi vaini poata tadira na tuna i Hamoa pa Sukemi.

17Ego totonai qi tata sa na totoso beto mina vagore votua na Tamasa sa nona taringunguti sa ule votunia tai Ebarahami, sa qai mota tugu lalaodia sira na tinoni tadagita ko qai soku pa Ijipi. 18Ego qi turu bei pa Ijipi sa kai goto bangara isa qike gigilai si Josepa. 19Qi tutiniria na ona roroqu na bangara isa sira na oda tinoni ko qi nganguluria sira na tamada, beto qi vakoleniria na vavanau ko qai vakole votu paleria sira na dia koburu melalu ko qai tavamate pale. 20Pana totoso isa qi podo si Mosese, ko kai koburu babata jongana tana Tamasa sisa. Kue popu qi tapausu pa ruma tana tamana sisa, 21beto totonai qi tavavotu riu sisa pa ruma tana tamana, poni sa qi buti tekua na tuna rereko i Pero sisa ko qi pausia beto qi kopu veinia na tuna sosoto sisa. 22Ko qi tavagigalai pa doruna na vaivagigalai pa Ijipi si Mosese, ko kai tinoni boboka pa paranga beto pa roiti sisa.

23Ego totonai qi madengavuluputa aorona, poni qi pidoko lame pa roquna i Mosese sa na roroqu ko mi lao tu ovikiria mai sira na tavitina ira na tinoni Izireli qiu. 24Ko tonai qi lao kamu poni qi batia sa kai tinoni Ijipi qi korapa mamajai sa kai tinoni Izireli. Poni qi lao tu isa ko qi tokania sa na tinoni Izireli, ko qi maja vamate pale sa na tinoni Ijipi. 25Qi kole roroqua i Mosese sa palu kode mai dogoro vakaberia ira na tavitina sa na Tamasa kode mina varoitia sisa ko mina ruvataria sira qiu, ba qaike boka doro vakaberia ira sa qi vei isa. 26Qi rane gu mule neqa poni qi batiria sira karu tinoni Izireli qai korapa vaipera. Poni qi lao toke vabuleria isa sira karu, pira qiuniria, <Ei, karu qokolo, agou karu sa na tamatasi gu, ko muke vaikomiti!> qiuniria.

27Ba kame ira karu isa qi vaimoenia na vaipera sa qi juju varijoa si Mosese, beto pira qiunia, <I sei sa vilego ko muna mamatanigei beto muna vavaitutinigei agei na tinoni sao? 28Qu nyorogua vai veinisiu na tinoni Ijipi pa nyoro ara sao?> qiunia. 29Poni qi uku si Mosese totonai qi nongoria na paranga api, ko qi riu tu suvere veiona na tinoni karovona pa gugusu pa Midiani. Ko ketakoi qi vaporeria isa sa karu tuna marene.

30Ego pa liguna ka madengavulu aorona isa ketakoi, poni qi votu tana pa qega pa kubo pa Saenai sa kai mateana pa kai gou qi vurungu memea vei na iku. 31Ko totonai qi batia poni qi gabara si Mosese, ko qi rerege tata lao ko mi dogoro vatalea qiu poni sa qi nongoria isa sa na ovovelena na Bangara, pira qiu, 32<Ara sa na Tamasa tadira na tamamu; na Tamasa tadira Ebarahami, i Aisake, beto i Jekopi,> qiu. Qi matagutu vivitigi si Mosese ko qike boka dogoro vatalea.

33Beto qi paranga lao tana sa na Bangara, <Mu ruvata vagoreria na sadolo pa nenemu, ura na ia qu korapa turua ina sa na peso madina. 34Qa tei batia tu ara sa na vitigi tadira na qua tinoni qai korapa pa Ijipi beto qa tei nongoria tu ara sa na lukana uuidi, ko qa gore lagere sara ko mana aloria. Ko kopira mana garunu gorenigo pa Ijipi ara sao,> qiu sa na Bangara.

35Ko i Mosese tugu api, isa qai kilu palenia ira beto pira qai paranga veinia, <I sei sa vilego ko muna mamatanigei beto muna vavaitutinigei agei sao?> qarigunia, sa isa tugu sa qi garunia na Tamasa ko isa sa na dia tinoni mamata beto qi ruvataria pa vaitokai tana mateana qi votu pa iku qi vuvurungu pa gou. 36Isa tugu i Mosese api sa qi toni votuniria beto qi roitiniria na roiti beto na vinagigila vaivagabaradi pa Ijipi, pa Kolo Jimiri, beto pa qega, pa korapana ka madengavulu aoro.

37I Mosese tugu api sa pira qi poja veiniria ira na tinoni Izireli, <Kai tinoni kokorotai vevei ara ko na tinonimiu sosoto agou sa mina vaturu vanigou na Tamasa,> qiu. 38Ko i Mosese sa na somanana tugu tadira na vaikamu tinoni pa qega, ira na tamada, beto ko qi somana vavavakato tavitia na mateana pa kubo pa Saenai. Ko isa qi tekua sa na vavanau toana, beto qi soni vakamu lamea tadagita.

39Ego ba qai daidia vatabea ira na tamada si Mosese, goto qai kilu palea tu beto na bulodi qi gabala muleona pa Ijipi. 40Beto pira qarigunia si Eroni, <Mu roiti vanigita kaki oda tamasa ko mai tonigita moko. Goto isa i Mosese api, isa sa toni votunigita pa Ijipi, sa kopira taqeke gigilai na manugu sa beka sa varajania!> qarigu. 41Ko pa totoso ira sa qai roitinia ira sa kai beku bulumakau, ko qai vavakukuvu lao tana beto ko qai qerania sa na roitina na limadi gu mekadi. 42Poni qi kiluniria na Tamasa sira ko qi loa laoniria ko qai vatarasaeria sira na seru pa noka, vei sa takuti pa buka tadira na tinoni kokorotai, isa pira sau,

<Ka visa tinoni Izireli, nake taqu qu pogoso lameniria sira na miu vaivana beto na vavakukuvu

pa korapana ka madengavulu aoro pa qega.

43Na ruma aqaqo vavakukuvuna gu tana tamasa Moleki sa qu pogosia agou,

beto ko na beku kirena tu i Raipani, na miu tamasa seru,

beto ira tu na beku qu roitiniria mekamiu sa qu vatarasaeria.

Ko kode mana adu vapila lalamenigou ara pa gugugusu soudi, pa kai kale laona pa Babiloni sagou,> sau.#Emosi 5.25-27.

44Na ruma aqaqo tabuna, isa na vagigilana na Tamasa qi somana tadira, sa qai isongia pa qega ira na tamada pa moa. Na aqaqo tabuna isa sa qi taroiti tuti vei tugu isa na Tamasa qi garununia i Mosese ko mina roiti tuti veinia isa na kirena qi vabatinia. 45Ko isa sa na aqaqo tabuna qai teku vakarovia ira na tamada pa moa, ko pa totoso tai Josua qai pogosia tugu sisa totonai qai tome lao ko na Tamasa qi jupe variuria sira na puku tinoni qai suvere pa gugusu api. Ko na aqaqo tabuna isa sa qi kole kamua tu na totoso ti Devita. 46Ko na Tamasa qi qerania si Devita, ko qi tepa laoa isa sa na Tamasa ko mi roitinia sa kai ruma tabuna tana Tamasa ti Jekopi qiu. 47Ba i Solomone tu qi vaturu vania na ruma sisa. 48Ba na Tamasa ululuna jola sa sake suvere pa ruma sa taroiti pa limana na tinoni, sa vei sa pojai na tinoni kokorotai, isa pira sau,

49<Na oka sa na qua totoqona bangara,

goto na peso sa na qua tetetena.

Ko na ruma ai veveina mule sa muna vaturu vanisiu ao, sau sa na Bangara,

babi ai ia miminerena veveina sa taqu?

50Ai vei? Nake pa limaqu mekaqu ara qa roitiniria sira doru sakasava pira?>#Aisea 66.1-2. sau.

51Boko duduvili! Sa patu na bulomiu beto sake jonga tavonga na talingimiu sagou! Agou sa doru totoso qu upele pale na Gagala Tabuna, qai vei tugu ira na tamamiu sa qu vei tugu sagou! 52I sei mai sa kai tinoni kokorotai baike koti ngangulia ira na tamamiu? Qai vai paleria sira qai kokorotainia na lame tana nabulu tuvisina, ko kopira na nabulu tuvisina isa sa agou qu gabala kanai beto qu vamatea. 53Ba agou tugu sa qu teku vakarovia sa na vavanau qai valameria na mateana ba quke tutia tu sa na vavanau isa,>> sau si Sitivini.

I Sitivini sa tagona vamate

54Ego ko totonai qai nongoria ira na meba pa kauniseli sa na paranga ti Sitivini, poni sa qai tagigiri vivitigi ko qai gagatakae tu. 55Ba i Sitivini, sa tapugelenia na Gagala Tabuna, sa sa enga sae pa noka sau, poni sa batia sa na malakapi tana Tamasa beto sa batia si Jisu sa korapa turuona pa kale matuana na Tamasa. 56Beto pira sau, <<Dotu ko! Qa batia na oka sa tarevanga, ko na Tuna na Tinoni sa korapa turuona pa kale matuana na Tamasa,>> sau.

57Ego totonai sa qai kuku iranga, ko qai suqutuniria na limadi sa na talingidi, beto ko qai mekarai abutu totoai lao sisa. 58Qai ragata votunia pa peguruna na gugusu, beto qai kole buti tarini patu sisa. Ira na tinoni qai somana lame dogoria na tagonana i Sitivini sa qai vagoreria na dia poko ko qai vakoleria pa kekere nenena kai tinoni koregana, na isongona i Saula. 59Ko totonai qai korapa gogonai ira, poni sa pira sa vavara kiu alili vei si Sitivini, <<Kei, Bangara Jisu, mu teku vakarovia na gagalaqu,>> sau.

60Pa liguna sa poja vei inara, poni sa toqo sori tutungu pa peso, ko sa vevela vei pira, <<Kei Bangara, muke anye tariniria ira pira sa na dia sela api,>> sau, beto sa loai sa na singo.

Currently Selected:

Roiti 7: LGA

Highlight

Copy