Leviticus 21

Tamanae doyra oyra boysi Sisiama

1Iaova savoy te kue Mosese, Soynani oyra boysi sisiama, oyra toytulieke Eroni, Boysi sisiama kasi vo vapoto noypo tani te tebea momoqutua ka boysi sa lie te ona pupu, 2torae sa vategne to oye sa majala tebe, sa seva sinae ba tamae, toytulieke ba toytu quole, likae, 3ba vavini sa nakonako sa kielepaqo te kue oye bati oye sa kareo ona lieke kutae, te kue oye sa majala oye vapoto noypo ni tani. 4Oye kasi vo vapoto noypo tani te kue boysi sa arareki me te doyra tatama sa lie.

5Oyra boysi sisiama kasi doyra tire voyranga te boytu doyra ba tomana suae vomia doyra ba pote seninia doyra. 6Oyra mara tataboyna te kue doyra Bangara no kasi doyra vasoyloyini ritognoa doyra Bangara. Bati oyra ka kea oyra keke ka joyjuni te kue Iaova te nako, pitanaki te doyra Bangara, oyra mara tataboyna.

7Oyra kasi doyra reke oyra quole ka poto te tu aravabu ba ka vavelini oyra doyra lieke kutae, bati oyra boysi sisiama ka tataboyna te kue doyra Bangara. 8Vasevani oyra sa seva ka tataboyna, bati oyra ka kea pitanaki te mina Bangara. Toyro te mina nanana oyra ka tataboyna, bati Aro Iaova ko tataboyna, Aro ko vatataboyna ram.

9Sada toytu quole boysi sisiama sa vapoto tani te aravabu, oye sa sele tamae, oye mara sebe te nako.

10Kota sisiama, oye kieke sa una oyra likae ka jilingini oela boytu no ka vatoybo me vapoka bubute lata te boysi sisiama, kasi vo vamoyo voyrangae me kalapepiri ba kasi vo reka ona bubute seva oyra ka noyqata. 11Oye kasi vo puka te ngoyni sa kue momoqutua boysi sa lie, sa seva to te kue tamae ba sinae. Oye kasi vo vapoto noypo tani, 12oye kasi vo kesini ngoyni taboyna te ona Bangara ba vapoto ngoyni taboyna, bati oye ka vatoybo ni oela taboyna te ona Bangara. Aro Iaova.

13Quole oye me reke me quole mamaruku moyna to. 14Oye kasi vo reke kieke quole naboko, kieke quole sa vavelini ona lieke kutae, ba kieke quole sa vapoto ona tu te aravabu, ba me reke quole mamaruku te ona juojulo tani, 15voy oye kasi vo vapoto oyra toytu te kue oyra ona boysi. Aro Iaova, ko vatataboyna oye.

16Iaova savoy te kue Mosese, 17Soynani Eroni: Te oyra sapoko aba ka kuo me ne kareo to kieke te oyra sokutu arasumam re sa majala me vatanga no kea pitanaki te kue ona Bangara sada oye sa makomako. 18Kareo ka boysi sa makomako sa majala me vatanga: boysi sa kuba ba jokoleke, sa kalavequlu tarakenakae ba sa taviusu senini; 19boysi sa papaliku nikini ba koyrisi, 20ba boysi sa puqu totakae ba boysi sa toko sa vavalu, ba boysi sa kuala matae, ba boysi sa kue moro te koykoypae senini ba boysi sa zaluku bobae. 21Kareo ka boysi te juojulo te Eroni boysi sisiama sa makomako me vatanga me kea keke ka joyjuni te kue Iaova te nako. Oye sa makomako; oye kasi vo me vatanga ba kasi vo kea pitanaki te ona Bangara. 22Oye sa majala oyke pitanaki sa tataboyna sua te ona Bangara, sa seva to pitanaki taboyna; 23oye ba bati oye sa makomako, oye kasi vo la vatanga te pua dodu ba kasi vo doka te sara barasi taboyna, voy oye kasi vo vapoto qo ngoyni taboyna. Aro Iaova, ko vatataboyna oyra.

24Si Mosese sa soynani Eroni no oyra toytulieke no boysi taba ni Izireli oyra pita goyti.

Currently Selected:

Leviticus 21: BAA

Highlight

Copy