Leviticus 22

1Iaova savoy te kue Mosese, 2Soynani Eroni no oyra toytulieke mara padapada ni oyra keke taboyna oyra boysi ni Izireli ka vatoybo me te kue ro, soy oyra kasi doyra vasoyloyini ritongo tataboyna qu ro. Aro Iaova.

3Soynani oyra: Te oyra sapoko aba ka kuo me ne, sada kieke te oyra sokutu arasumae mina ram kama dalo vo no sa me vatenge keke taboyna oyra boysi ni Izireli ka vatoybo te kue Iaova, boysi ta me vaikuodoko te kue ro. Aro Iaova.

4Sada kieke sokutu arasumae Eroni sa pale moro roka sa voye koykoypa ba sa soraka, oye kasi vo oyke keke taboyna me doka te sada oye me joleke. Oye kama dalo vo sada oye sa tebe senini pita sa lie ba ka oye sa juolo lukae, 5ba sada oye sa tebe ka pita sa qaqara sa vapoto oye, ba sa tebe ka boysi sa vapoto oye, oye ba kama dalo vo. 6Boysi sa tebe oyra pita sa seva ta kama dalo vo me doka te vilu. Oye kasi vo oyke ka keke taboyna me doka te sada oye me sieqe soypa te bi. 7Sada sa jolupu la ngada, oye me dalo, no te rokusua ta oye sa majala oyke keke taboyna, bati ta oyra ona pitanaki oye. 8Oye kasi vo oyke ka pita sa lie to tani ba ka doyle oyra pita peru bati oyra pita ta ini mara vapoto oye. Aro Iaova.

9Oyra boysi sisiama mara miatoyke oyra pita ko soynani oyra ro voy oyra kasi doyra zaqala no lie tae vasoyloyinia oyra qo vato. Aro Iaova, ko vatoybo oyra.

10Boysi kama suomoto vo te tatama te boysi sisiama kama mao vo me oyke keke taboyna, ba boysi sa la tude boysi sisiama, ba boysi sa ngota boysi sisiama sa jaju koyna oye kama mao vo me oyke keke taboyna. 11Ba sada boysi sisiama sa ngota ni kisa ona sika, ba sada kieke sika sa puodo te tatama te boysi sisiama, sika ta sa majala oyke ona pitanaki oye. 12Sada toytu quole boysi sisiama sa reke kieke boysi kama sumoto vo te jujulo te sisiama, quole ta kama majala vo oyke pitanaki taboyna. 13Ba sada kieke toytu quole boysi sisiama sa naboko ba sa vavelini ona lieke kutae, no sa kareo toytu, no sa vele napu te kue tamae sa seva sada aba quole varoqa moyna, quole ta sa majala oyke pitanaki te tamae. Boysi kama pale vo mao kama majala vo oyke pitanaki ta.

14Sada ka oye kama mia tae vo no sa oyke pitanaki taboyna ne, oye me soka pitanaki sa oyke no me kea koyini kieke loyma vele soy te kue boysi sisiama. 15Boysi sisiama kasi vo sele keke taboyna ka kea te kue Iaova oyra boysi ni Izireli 16te vamoyoa doyra oyra boysi kama sisiama doyra ka oyke pitanaki taboyna no sada ka voy ta ne oyra ka zaqala no mara pale takae jaju oyra ka joyjuni. Aro Iaova, ko vatoybo oyra pitanaki ta.

Oyra vavakatu kama tuqini vo Bangara

17Iaova savoy te kue Mosese, 18Soynani Eroni no oyra toytulieke no tabae doyra oyra Izireli: Sada kieke te ram moyna boysi ni Izireli ba boysi kuokapa sa kuo koype ram sa kea kieke keke me ona vavakatu katunuro te kue Iaova, moyna me vavoto ona pui ba sa seva kieke keke te ona vato tani, 19ram mam kea bulumakao lieke, sipi lieke ba qoti lieke kama makomako vo voy Iaova me tuqini mina keke. 20Kasi iro me ka pitapupura sa makomako, bati sa taka Iaova me tuqini. 21Sada ka oye sa iro me bulumakao ba sipi me kieke vavakatu arakitaki te kue Iaova te vavotoa ona pui ba sa seva kieke keke te ona vato tani, pitapupura ta kasi vo makomako voy me tuqini Iaova. 22Kasi kea te kue Iaova pitapupura sa kuba, sa jokoleke ba sa leve senini, ba ka adoa vele moro sa kuo te koykoypae doyra. Kasi voyko la te sara barasi taboyna ka pitapupura sa seva ta sa seva kieke vavakatu ka joyjuni te kue Iaova te nako. 23Sada ram kam kea kieke keke te mina vato tana mina kieke bulumakao ba kieke sipi sa ngava kale ba toko kale nikini, Iaova kama tuqini vo voy be voto pui kam puini moyna. 24Ram kasi mina kea te kue Iaova kieke pitapupura bobae sa maura, sa rasi, sa rika ba sa poti. Ram kasi mina joyjuni pita goyti te mina vodu vatasuku, 25no ram kasi mina tuqini moyna to oyra pitapupura sa seva ta te kue boysi kuokapa no ram kasi mina kea oyra pitapupura ta sa seva pitanaki te mina Bangara. Oyra pitapupura ta kama tuqini vo Iaova, bati sa toko ba ngava kale nikini no sa makomako.

26Iaova savoy te kue Mosese, 27sada kieke toytu bulumakao, kieke lami ba kieke toytu qoti sa puodo, pitapupura ta me kuo koype sinae vetu tava. Te vaviua tava, sinani Iaova me tuqini pitapupura ta sa seva kieke keke ka joyjuni te kue Iaova te nako. 28Kasi voye kieke kao ba kieke sipi no toytua doyru te kieke to tava.

29Sada ram kam vavakatua vavakatu ngeoro kima te kue Iaova, vavakatu te zoka sa tuqini Iaova. 30Vavakatu ta mara oyke bieto moyna to te tava ta; kasi toyro ne to kieke menea me doka te saruku. Aro Iaova.

31Mam vauteve no koype soy oyra qo tamana. Aro Iaova. 32Kasi vasoyloyini taritongo tataboyna qu ro. Oyra boysi ni Izireli mara tuqini Aro ko tataboyna. Aro Iaova, ko vatoybo ram 33no ko koype kesini ram Ijipi me mina Bangara. Aro Iaova.

Currently Selected:

Leviticus 22: BAA

Highlight

Copy