Leviticus 20

Oyra takae Zaqala

1Iaova savoy te kue Mosese, 2Soynani oyra boysi ni Izireli: Ka boysi ni Izireli ba ka boysi kuokapa sa me kuo Izireli sa kea ka toytu te kue Moleki mara voyevale moyna to. Oyra boysi taba te kumala mara vane ni oye katora. 3Aro me vititotakani boysi ta no Aro me vavaikuodoko boysi ta te kue oyra ona boysi; bati oye sa kea oyra toytu te kue Moleki, oye sa vapoto qo ngoyni taboyna no sa vasoyloyini ritogno qu ro. 4Sada oyra boysi taba kama malasara ni doyra boysi ta sa kea kieke te oyra toytu te kue Moleki no oyra kama voyevale doyra oye, 5Aro me aratara koype boysi ta no ona tatama no me vavaikuodoko oyra te kue oyra doyra boysi, oye no tabae doyra oyra ka koype oye te vazakae Moleki.

6Aro me aratara koype boysi sa la te kue oyra ka vorevore ka vakangiere no ka vazaka potae doyra oyra boysi lie, no Aro me vavaikuodoko oye te kue oyra ona boysi.

7Vadoylo noypo tanamina no mina vatoybo mina tu, bati Aro Iaova mina Bangara. 8Vauteve no koype oyra qo vatovato. Aro Iaova, ko vatataboyna ram.

9Sada ka oye sa doynguni tamae ba sinae, oye mara voyevale moyna to. Oye sa doynguni tamae ba sinae, no oye me lie tae ona jaju.

10Sada kieke lieke sa vurusue te kue quolekutae te kieke lieke vele ba quolekutae te udinia, oyru kuru vurusue mara voyevale kire to oyru.

11Sada kieke lieke sa voybo quole kutae te tamae, oye sa sele tamae. Lieke no quole kuru aravabu mara voyevale moyna to oyru; oyru muru lie tae doyru zaqala.

12Sada kieke lieke sa voybo ravae quole, oyru mara voyevale moyna to oyru. Pita oyru kuru joyjuni sa zaqala; oyru muru lie tae doyru zaqala.

13Sada kieke lieke sa voybo kieke lieke vele seva kieke lieke sa voybo kieke quole, oyru kuru joyjuni pita sa zaqala. Oyru mara voyevale moyna to oyru; muru lie tae doyru zaqala.

14Sada kieke lieke sa reke kieke quole no sinaea quole noyene soy ne, ta sa zaqala. Lieke no oyru tamasoyna soy mara sebe oyra te nako, voy kareo ka boysi zaqala me kuo koype ram.

15Sada kieke lieke sa voybo pitapupura, oye mara voyevale, no ram mam voyevale pitapupura ne soy.

16Sada kieke quole sa voybo pitapupura , voyevale to quole no pitapupura soy. Oyru mara voyevale kire to oyru; muru lie tae doyru zaqala.

17Sada kieke lieke sa reke vavini, toytu quole tamae ba sinae, no oyru kuru aravabu, oyru kuru joyjuni pita sa aravamamaqatae. Oyru muru vaikuodoko moyna to te tarakenakae doyra oyra doyru boysi. Oye kama padapadani vo vavini no me pale takae ona zaqala.

18Sada kieke lieke sa pam koype kieke quole te sada oye sa pale moro ni quole no sa voybo oye, oye sa popo juoloa madaka te senini quole ta, no quole sa pale sia pupua te senini. Oyru muru vaikuodoko moyna to te kue oyra doyru boysi.

19Kasi voybo likae sinam ba vavini tamam, sada ko voy ta ne re ko mia vajele oyru sinam lata; mam pale bieto to takae pita kam joyjuni.

20Sada kieke lieke sa voybo ona quole kutae tamae lata, oye sa mia vajele tamae lata. Oyru muru pale takae jaju kuru joyjuni; Oyru me kareo toytu doyru me doka te sada muru lie.

21Sada kieke lieke sa rekeroyo ona quole kutae likae, Jaju kuru joyjuni oyru sa poto; oye sa miavajele likae. Oyru kasi doyru tugnene so.

22Ram mam vauteve oyra qo vatovato no tamana no mam koype soy, voy vodu Aro me koype ni la ram mam la kue kasi vo dolani sia ram. 23Ram moyna to kam zole popoloto te oyra tubia boysi aro me sure sia te tarakenekae mina. Bati oyra ka joyjuni taba pita goyti, kama vakima vo aqo ro. 24Ba Aro ko voy te kue ram, ram mam tugnene doyra vodu; Aro me koyna ram sa seva mina vodu vatasuku, vodu masuru no tutupari. Aro Iaova mina Bangara, ko veleke ram te kue oyra tubia boysi.

25Savoy ta si ram mam veleke oyra pitapupura ka dalo no kama dalo doyra no mam veleke oyra roroko kama dalo doyra no ka dalo soy. Kasi vapoto ni noypo tana mina ka pitapupura ba roroko ba ka pita sa qaqara te lua, oyra pita aro ko veleke kama dalo doyra te kue ram 26Ram mam kuo tataboyna te kue ro bati aro, Iaova, ko tataboyna, no ko veleke ram te kue oyra tubia boysi vele kam qo boysi vatasuku.

27Kieke lieke ba quole sa vorevore te kue potae doyra oyra boysi ka lie moyna ne mara voyevale moyna to. Ram mam vane ni oyra katora; oyra mara taka tae doyra zaqala.

Currently Selected:

Leviticus 20: BAA

Highlight

Copy