Leviticus 16
16
Tava mara siere zaqala
1Iaova sa soynani Mosese te rokusua kuru lie keri toytu lieke Eroni sada oyru kuru la vatanga te vakomamanae Iaova. 2Iaova savoy te kue Mosese: Soynani likam Eroni kasi vo me te ka sada oye sa vene me lame te ngoyni sa tataboyna sua te rokusua puae dodu te tarakenakae kukupanae doulua vato arapokitini, ba sada kama voy vo ne oye me lie, bati Aro ko takabula te toba te sarapokae kukupanae doulua vato arapokitini.
3Goyti me voy Eroni me puka te ngoyni tataboyna: oye me iro me bulumakao lieke varoqa ona vavakatu zaqala no sipi lieke ona vavakatu katunuro. 4Oye me vapoka bubute lineni ngava no me vapoka bubute lineni toko te senini; oye me bokobokoa lineni no me vapoka vavau lineni. Goyti oyra bubute taboyna; si oye me sieqe moyna to te bi sinani oye me vapoka. 5Oyra boysi ni Izireli mara kea keri qoti lieke ona vavakatu zaqala no kieke sipi lieke ona vavakatu katunuro.
6Eroni me kea bulumakao me ona vavakatu zaqala tani me sioro ni ona zaqala tani no oyra ona pupu soy. 7Sinani oye me pale keri qoti no me kea la te vakomamanae Iaova te ngoyni ka puka tae te toypaka variere. 8Oye me sia katora kodukodu te keri qoti- kieke katora ona Iaova no kieke katora ona qoti me talopu. 9Eroni me iro me qoti sa votoa katora kodukodu te Iaova no me vavakatu ni vavakatu zaqala. 10Ba qoti sa votoa katora kodukodu sa seva qoti sa talopu mara iro vatu me te vakomamanae Iaova mara vajaju te sioroa zaqala mara vazo te kadalesana.
11Eroni me iro me bulumakao me ona vavakatu zaqala tani me sioroni ona zaqala tani no ona pupu soy, no oye me voyevale bulumakao ona vavakatu zaqala to tani 12Oye me pale sireke tepatepa sa pudae kau te sara barasi taboyna te vakomamanae Iaova no keri puda koyrisi pita nanabu noyi no me iro la oyra pita goyti te ngoyni tataboyna sua. 13Oye me toyro la pita nanabu noyi te nako te vakomamanae Iaova, no kanua pita nanabu noyi me boyre kukupanae dolu vato arapokitini, voy oye kasi vo lie. 14Oye me pale ngoynisoi madakae bulumakao te pirokete koyrisi me repe ni te kukupanae dolu vato arapokitini, sinani oye me repe ni ngoynisoi madaka vetu sada te tarakenakae kukupanae dolu vato arapokitini.
15Oye me voyevale qoti ona vavakatu zaqala te oyra boysi no me iro la madakae te rokusua dodu taboyna no me joyjuni pita sa seva oye sa joyjuni te madakae bulumakao: Oye me repeni la te tarakenakae kukupanae dolu vato arapokitini. 16Te zoka goyti oye me joyjuni jaju vavadalo te ngoyni sa tataboyna sua bati sa poto tae tu poto no vavakioto te oyra boysi ni Izireli, ata ka adoa zaqala oyra ka joyjuni. Oye me joyjuni sa seva to te toypaka variere, bati sa kuo koype oyra te oyra doyra tu poto. 17Kareo ka boysi me puka te toypaka variere te sada me la joyjuni vavadalo Eroni te ngoyni sa tataboyna sua me doka te sada oye me juolo, oye me vavadalo koyna tani, ona pupu no boysi taba ni Izireli.
18Bito ta oye me julo me te sara barasi taboyna te vakomamanae Iaova no me joyjuni vavadalo. Oye me pale ngoynisoi madakae bulumakao no qoti no me toyro la te oyra kekeoa sara barasi taboyna. 19Oye me vapujere pirokete koyrisi te madaka no me repeni ngoynisoi te sara barasi taboyna vetu sada me vadoylo no vatoybo sara barasi taboyna te tu poto te oyra boysi ni Izireli.
20Sada Eroni sa bieto vavadalo te ngoyni tataboyna sua, te toypaka variere, no te sara barasi taboyna, oye me iro me qoti tu te kue Iaova. 21Oye me vakapete keri koyrisi te boytu qoti tu no me varingini oyra jaju roka, vavakioto no zaqala te oyra boysi ni Izireli no me toyro la te boytu qoti. Boysi sa taveni me vazo la qoti te kadalesana. 22Qoti me iro la zaqala te oyra boysi te ngoyni kama kue vo boysi; no boysi noyene me vazo la qoti te kadalesana.
23Bito ta Eroni me puka la te toypaka variere no me jue bubute lineni ngava sa vapoka te sada oye sa puka la te ngoyni sa tataboyna sua, no oye me toyro bubute te ngoyni ta. 24Oye me sieqe te bi te ngoyni taboyna no me vapoka ona bubute tani. Bito ta oye me juolo me no me joyjuni vavakatu katunuro te tani no vavakatu katunuro te oyra boysi, me sivere ona zaqala tani no oyra boysi ni Izireli. 25Oye me noyko vele voae vavakatu zaqala te sara barasi taboyna.
26Boysi sa vazo qoti sa talopu me tobo moyna to ona bubute no me sieqe te bi, te rokusua ta oye sa majala puka me te ngoyni ka kue. 27Bulumakao no qoti ona vavakatu zaqala, oye madakae ka iro me te ngoyni tataboyna sua me sivere zaqala, koykoypa, zio no kobae doyru mara iro vajele te paqarania ngoyni ka kue mara noyko bieto to. 28Boysi sa noyko oyra pita ta me tobo moyna to ona bubute no me sieqe te bi, te rokusua ta oye sa majala puka me te ngoyni ka kue.
29Goyti tamana me kuo sua te kue ram taba sadasada. Te vamanoa tava te vavetua ukene ram kasi mina oyke pitanaki no turepe bi no moyna kam joyjuni ka jaju, moyna oyra boysi ni Izireli ba oyra boysi kuokapa ka kuo koype ram, 30bati te tava goyti boysi sisiama me vavakatu voy me sivere mina zaqala, me vadoylo ram. Bito ta, te vakomamanae Iaova, ram mam dalo te oyra mina zaqala. 31Tava noyene sa tava mamana, no ram kasi mina oyke pitanaki no turepe bi; tamana goyti me kuo sua te kue ram taba sadasada. 32Boysi sisiama ka vatoybo no ka vene me soka tamae sa seva kota sisiama me joyjuni jaju vavadalo. Oye me vapoka bubute lineni sa taveni te kue oyra boysi sisiama 33no me vavakatu me vadoylo ngoyni tataboyna sua, toypaka variere no sara barasi taboyna, no oyra boysi sisiama no boysi taba ni Izireli.
34Goyti sa kieke tamana me kuo sua te kue ram: Vavadalo mara joyjuni kieke sada te kieke ave me vadoylo zaqala te boysi taba ni Izireli.
No Mosese sa joyjuni bieto oyra pita Iaova sa voytuni te kue oye.
Currently Selected:
Leviticus 16: BAA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
