Leviticus 15

Moro roka sa vapoto boysi

1Iaova savoy te kue Mosese no Eroni, 2Vakangiere oyra boysi ni Izireli no mibu soynani oyra: Sada ka lieke sa soraka ne, soraka kama dalo vo. 3Moyna sa julo taru te senini ba sa kukupana, moro ta sa vapoto oye. Goyti savoy adoa moro te seninia boysi lieke sa vapoto oye.

4Ka visu sa bokoloa boysi lieke sa soraka kama dalo vo, no ka pita oye sa tongene kama dalo vo. 5Ka oye sa tebe ona visu oye me tobo moyna to ona bubute no me sieqe te bi, no oye kama dalo vo me doka te vilu. 6Ka oye sa tongunu te ka pita sa tongene boysi lieke sa soraka me tobo moyna to ona bubute no me sieqe te bi, no oye kama dalo vo me doka te vilu.

7Ka oye sa tebe boysi lieke sa soraka me tobo moyna to ona bubute no me sieqe te bi, no oye kama dalo vo me doka te vilu.

8Sada boysi lieke sa soraka sa koso ka boysi sa dalo, boysi ta me tobo moyna to ona bubute no me sieqe te bi, no oye kama dalo vo me doka te vilu.

9Susupae pita sa tongene oye sada oye sa gae te pita zozo me poto, 10no ka oye sa tebe ka pita sa kuo te sarajuloa oye kama dalo vo me doka te vilu; ka oye sa pale poka oyra pita ta me tobo moyna to ona bubute no me sieqe te bi, no oye kama dalo vo me doka te vilu.

11Sada boysi sa soraka kama kasika vo sa tebe ka oye ne, boysi noyne me tobo moyna to oyra ona bubute no me sieqe te bi, no oye kama dalo vo me doka te vilu.

12Sireke lua sa tebe boysi sa soraka mara pisosia, no ka pita ka joyjuni ni azu oye sa tebe mara qolo te bi.

13Sada boysi noyene sa dalo te soraka, oye me ngea vavetua tava me kue ona vavadalo; oye me tobo moyna to ona bubute no me sieqe to tani te bi dalo, no oye me dalo. 14Te vaviua tava oye me pale moyna to keri kokoru kau ba keri kokoru qutuni varoqa no me zo me te vakomamanae Iaova te ngoyni ka puka tae te toypaka variere no me kea boysi sisiama ona keke. 15Boysi sisiama me vavakatua oyra pita ta, kieke ona vavakatu zaqala no kieke ona vavakatu katunuro. Te zoka goyti boysi sisiama me joyjuni sioroa zaqala te boysi sa soraka te vakomamanae Iaova.

16Sada kieke boysi lieke sa juolo lukae, oye me sieqe moyna to totongonia senini te bi, no oye kama dalo vo me doka te vilu. 17Ka bubute ba ka bubute ka joyjuni ni koypae ka pita sa kaboa lukae boysi lieke mara tobo moyna to te bi, no kama dalo vo me doka te vilu. 18Sada kieke boysi sa pam koype kieke quole no sa julo lukae doyru, oyru muru sieqe moyna to te bi, no oyru kama dalo doyru me doka te vilu.

19Sada kieke quole sa julo taru madakae, ona kuo poto oye te sada te boysi quole me doka te vetu tava, no ka boysi sa tebe quole ta kama dalo vo me doka te vilu.

20Ka pita oye sa bokoloa te sada oye sa pale moro ni quole kama dalo vo, no ka pita oye sa tongene kama dalo vo. 21Ka oye sa tebe visu te quole ta me tobo ona bubute no me sieqe te bi, no oye kama dalo vo me doka te vilu. 22Ka oye sa tebe ka pita sa tongene quole noyene me tobo ona bubute no me sieqe te bi, no oye kama dalo vo me doka te vilu. 23Moyna visu ba ka pita oye sa tongene, sada ka oye sa tebe ne, oye kama dalo vo me doka te vilu.

24Sada kieke boysi lieke sa pam koype oye no madakae oye sa julo sa tebe lieke noyene,lieke ta kama dalo vo vetu tava; ka visu lieke ta sa bokoloa kama dalo vo.

25Sada kieke quole sa taba tava sa julo madakae kama julo vo te sada oye sa pale moro ni quole ba madakae oye sa julo taru sa koye sada oye sa pale moro ni quole, oye kama dalo vo te sada madaka sa juolo, me seva te sada oye sa pale moro ni quole. 26Ka visu oye sa bokoloa te sada madaka sa juolo taru kama dalo vo, sa seva to ona visu te sada oye sa pale moro ni quole, no ka pita oye sa tongene kama dalo vo, sa seva te sada oye sa pale moro ni quole. 27Ka oye sa tebe oyra pita ta kama dalo vo; oye me tobo moyna to ona bubute no me sieqe te bi, no oye kama dalo vo me doka te vilu.

28Sada madaka sa nuodo juoloa, oye me ngea vetu tava, no te rokusua ta oye me dalo. 29Te vaviua tava oye me pale moyna to keri kokoru kau ba keri kokoru qutuni varoqa no me iro me te kue boysi sisiama te ngoyni ka puka tae te toypaka variere. 30Boysi sisiama me vavakatua keri kokoru kieke ona vavakatu zaqala no kieke ona vavakatu katunuro. Te zoka goyti boysi sisiama me sioroni ona zaqala oye te vakomamanae Iaova te ona kuo poto oye te sada madaka kama nudo vo julo.

31Rabu mibu miatoyke oyra boysi ni Izireli mara mia utini oyra pita sa vapoto oyra, voy oyra kasi doyra lie te doyra zaqala te vamaberea ngoyni sa takabulae qo kuokuo ro te kue oyra.

32Goyti oyra tamana te boysi lieke sada sa soraka ba ka oye kama dalo vo bati sa juolo lukae, 33te kue ka quole sa pale moro ni quole, te kue ka lieke ba ka quole sa soraka, no te kue ka lieke sa pam koype ka quole kama dalo vo.

Currently Selected:

Leviticus 15: BAA

Highlight

Copy