Leviticus 14

Vavadalo te Moro roka sa voye Koykoypa

1Iaova savoy te kue Mosese, 2goyti oyra tamana te kue boysi sa pale moro roka sa voye koykoypa te sada oye sa dalo, sada oye ka koype la te kue boysi sisiama: 3Boysi sisiama me zo la te paqarania ngoyni ka kue no me ile oye. Sada boysi ta sa joleke te moro roka sa voye koykoypa, 4boysi sisiama me soynani oyra mara iro me koyna boysi mara vadoylo, keri roroko tu muru dalo no kavia nako seda, nukoso mesiri no azu aesopu. 5Sinani boysi sisiama me soynani oyra, kieke te keri roroko mara voyevale te sarapokae bi dalo sa kuo te sireke lua. 6Boysi sisiama me pale roroko sa tu no me vatopeke toringini azu seda, nukoso mesiri no aesopu, te madakae roroko ka voyevale te sarapokae bi dalo. 7Vetu sada oye me repeni madaka boysi mara vadoylo te moro roka sa voye koykoypa no me soyna vatakabola boysi ta sa dalo. No oye me vazo noypo roroko sa tu.

8Boysi mara vadoylo me tobo oyra ona bubute, me tire sia voyrangae no me sieqe te bi; sinani oye me dalo. Bito ta oye sa majala vele napu te ngoyni ka kue, ba oye me kuo te paqarania ona toypaka pua vetu tava. 9Te vavetua tava oye me tire sia voyrangae; me tire boytu, me tire vomia, me tire voyranga te lenga matae no tabae to voyrangae. Oye me tobo ona bubute no me sieqe te bi, no oye me dalo.

10Te vaviua tava oye me iro la keri lami lieke no kieke lami quole sa kieke avea doyra, kasi vo makomako senini doyra, me iro toringini tulu kilo palava ka lomirini oela olivi ona vavakatu vere, no 0.3 lita oela olivi. 11Boysi sisiama sa soyna vatakabola oye sa dalo me koype la oye mara vadoylo no me iro la oyra ona keke oye te vakomamanae Iaova te ngoyni ka puka tae te toypaka variere.

12Boysi sisiama me pale kieke te oyru lami lieke no 0.3 lita oela me vavakatua sa seva kieke vavakatu supaka, oye me kajara puka ni la te vakomamanae Iaova sa seva vavakatu kajara puka. 13Oye me voyevale lami te ngoyni tataboyna ka voyevale ni vavakatu zaqala no vavakatu katunuro. Saseva vavakatu zaqala, vavakatu supaka ona boysi sisiama; sa tataboyna sua. 14Boysi sisiama me pale kavia madakae vavakatu supaka no me tilini boylongoa talanga dekanae boysi mara vadoylo, totuku lata koyrisi dekanae no kukubesea nikini dekanae. 15Boysi sisiama me pale 0.3 lita oela, me jilingini ngoynisoi te tetepara koyrisi moyria tani, 16me vatopeke tomanasuae pirokete koyrisi dekanae te oela te teteparae koyrisi, no me repeni kavia madaka te vakomamanae Iaova vetu sada. 17Boysi sisiama me toyro la kavia oela sa kuo sua te tetepara koyrisi te boylongoa talanga dekanae, te totukua koyrisi dekanae no te kukubesea nikini dekanae boysi mara vadoylo, te sarapokae madakae vavakatu supaka. 18Sikia oela te koyrisi boysi sisiama me toyro la te boytu boysi mara vadoylo no me sioroni ona zaqala oye te vakomamanae Iaova.

19Boysi sisiama me vavakatua vavakatu zaqala no me sioroni boysi mara vadoylo te moro roka sa voye koykoypa. Bito ta, boysi sisiama me voyevale vavakatu katunuro 20no me vavakatua te sara barasi taboyna, no me toyro toringini la vavakatu vere, no me sioroni oye, no oye me dalo.

21Sada oye sa boysi oza no sa takani me joyjuni oyra pita goyti ne, oye me pale kieke lami lieke me ona vavakatu supaka mara kajarani poka me sioroni ona zaqala, me kea toringini kieke kilo palava me toringini 0.3 lita oela ona vavakatu vere. 22no keri kokoru kau ba keri kokoru qutuni, oye sa majala joyjuni, kieke ona vavakatu zaqala no kieke ona vavakatu katunuro.

23Te vaviua tava oye me iro me oyra pita goyti voy mara vadoylo ni oye te kue boysi sisiama te ngoyni ka puka tae te toypaka variere, te vakomamanae Iaova. 24Boysi sisiama me pale lami ona vavakatu supaka, me pale toringini 0.3 lita oela, no me kajarani poka te vakomamanae Iaova sa seva kieke vavakatu kajara puka. 25Oye me voyevale lami ona vavakatu supaka no me pale kavia madakae no me toyro te boylongo talanga dekanae, te totuku koyrisi dekanae no te kukubese nikini dekanae boysi mara vadoylo. 26Boysi sisiama me jilingini ngoynisoi oela te luboro tetepara koyrisi moyria, 27no te tomanasua pirokete koyrisi dekanae me repeni ngoynisoi oela sa kuo te tetepara koyrisi vetu sada te vakomamanae Iaova. 28Ngoynisoi oela sa kuo te teteparae koyrisi oye me toyro la te oyra ngoyni sa toyruni moyna madakae vavakatu supaka- sa seva te boylongo talanga dekanae, te totuku koyrisi dekanae no te kukubese nikini dekanae boysi mara vadoylo. 29Sikia oela sa kuo te teteparae koyrisi boysi sisiama me toyro la te boytu boysi mara vadoylo, me sioroni oye te vakomamanae Iaova. 30Boysi sisiama me vavakatua kokoru kau ba kokoru qutuni varoqa, sa majala joyjuni boysi mara vadoylo, 31kieke ona vavakatu zaqala no kieke ona vavakatu katunuro, mara toringini vavakatu vere. Te zoka goyti boysi sisiama me sioroni boysi mara vadoylo te vakomamanae Iaova.

32Goyti oyra tamana te ka oye sa pale moro roka sa voye koykoypa no kama boysi majala vo no kama majala vo joyjuni oyra pita sa taveni te vavakatua ona vavadalo.

Vavadalo te rosu

33Iaova savoy te kue Mosese no Eroni, 34Sada ram kam puka te vodu ni kenani, vodu aro ko koyna ram mina tungene, no aro ko toyro rosu sa zadava te toke te vodu ta, 35boysi sa tungene toke me zo moyna to no me soynani boysi sisiama, Aro ko mia pita sa seva rosu te qo toke. 36Boysi sisiama me voytuni toke me pasa sinani oye me zo la me ile rosu, voy kareo ka pita te luboro toke mara soyna vatakabola kama dalo vo. Te rokusua ta boysi sisiama me puka la no me ile toke. 37Oye me ile rosu te dodu, no sada sa tutu ba mesiri lala sa takabula sa lavora koye sarapokae dodu, 38boysi sisiama me julo te mataqamanae toke no me kupene toke vetu tava. 39Te vavetua tava boysi sisiama me vele la me ile toke. Sada rosu sa zadava te dodu, 40oye me soynani oyra mara pesekesia katorae dodu sa rosu no mara sia la te ngoyni kama dalo vo te paqarania kumala. 41Boysi sisiama me voytuni oyra mara pire tabae dodu te luoboro toke no oyra puopo ka piresia mara sia la te ngoyni kama dalo vo te paqarania kumala. 42Savoy ta oye oyra mara pale oyra katora mara sokani oyra katora ka sia no mara pale lua varoqa no mara vakamere ni toke.

43Sada rosu sa takabula napu te pade te rokusua ka pesekesia katora no ka vure no ka kamere soy pade, 44boysi sisiama me la no me ile toke no, sada rosu sa koybo toke, sa vatakabola rosu ta sa taka mara vabieto; toke ta kama dalo vo. 45Toke mara pirosia oyra katorae, oyra tiba no taba kakamarae no mara iro kesini te kumala mara la sia te ngoyni kama dalo vo.

46Ka oye sa puka la te toke te sada sa kukupana toke, kama dalo vo me doka te vilu. 47Ka oye sa pam ba sa aki te luboro toke noyene me tobo oyra ona bubute.

48Ba sada boysi sisiama sa ile rosu kama koybo vo toke te rokusua ka kamere toke, oye me soyna vatakabola toke sa dalo, bati rosu sa nuro. 49Te vadoyloa toke oye me pale keri roroko no kavia nako seda, nukoso mesiri no aesopu. 50Oye me voyevale kieke te oyru keri roroko te sarapokae bi sa dalo sa kuo te sireke lua. 51Sinani oye me pale azu seda, aesopu, nukoso mesiri no roroko tu, me vatopeke te madakae roroko sa lie no te bi dalo, no me repe ni toke vetu sada. 52Oye me vadoylo ni toke madakae roroko, bi dalo, roroko tu, nako seda, aesopu no nukoso mesiri. 53Sinani oye me vazo roroko tu te ngoyni sa melae te paqarania kumala. Te zoka goyti oye me joyjuni sioroa toke, no toke me dalo.

54Goyti oyra tamanae moro roka sa voye koykoypa, tapa sa koyraka, 55rosu sa kabo te bubute ba toke, 56no buili, tapa ba leve, 57voy mara mia utini pita sa dalo ba kama dalo vo . Goyti oyra tamanae moro roka sa voye koykoypa no rosu.

Currently Selected:

Leviticus 14: BAA

Highlight

Copy