Leviticus 13

Oyra tamanae Moro te Koykoypa

1Iaova savoy te kue Mosese no Eroni, 2Sada ka oye sa buili ba sa vieviero ba sa dedemiki koykoypae no sa vamakasoyna seninia ne, oye mara koype la te kue Eroni boysi sisiama ba te kue kieke te oyra toytu lieke Eroni sa boysi sisiama. 3Boysi sisiama me ile tapa te koykoypae boysi, no sada polu te tapa sa tasuka sa sile no tapa sa koye la koykoypa ne, ta moro te koykoypae seninia boysi. Sada boysi sisiama sa ile oye, boysi sisiama me soyna vatakabola boysi noyene kama dalo vo. 4Sada tapa te koykoypae boysi ta sa sile ba kama koye la vo koykoypa no polu kama tasuka vo te sile, boysi sisiama me toyro vike boysi ta vetu tava. 5Te vavetua tava boysi sisiama me ile oye, no sada oye sa mia tapa kama tasuka vo no kama koybo vo koykoypa, oye me toyro vike boysi ta vetu vele tava. 6Te vavetua tava boysi sisiama me ile noypo oye, no sada tapa sa kaqoto no kama koybo vo koykoypa, boysi sisiama me soyna vatakabola oye sa dalo; ta sa vieviero to. Boysi ta me tobo ona bubute, no oye me dalo. 7Ba sada tapa sa koybo noypo koykoypae boysi ta te rokusua sada oye sa la takabula, oye me la takabula napu te kue boysi sisiama. 8Boysi sisiama me ile oye, no sada tapa sa koybo koykoypa, oye me soyna vatakabola boysi ta kama dalo vo; tapa ta sa voye koykoypae senini.

9Sada ka oye sa pale tapa sa voye koykoypae senini, oye mara koype moyna la to te kue boysi sisiama. 10Boysi sisiama me ile oye, no sada buili sa kuo te koykoypa sa soka vasile polu no sada sa voyra luboroa buili, 11ta moro sa taka me alasapu no boysi sisiama me soyna vatakabola boysi ta kama dalo vo. Boysi sisiama kasi vo toyro vike boysi ta, bati oye kama dalo vo.

12Sada moro sa koybo bieto koykoypae boysi ta no, sa mia bieto boysi sisiama, sa sapene bieto koykoypae boysi sa moro toto te boytu sa doka te nikini, 13boysi sisiama me ile oye, no sada moro sa sapene bieto totongonia senini oye sa alasapu, oye me soyna vatakabola boysi ta sa dalo, bati moro sa tasuka sa siele, boysi ta sa dalo. 14Ba moyna ka sada tapa sa takabula te senini oye, oye kama dalo vo. 15Sada boysi sisiama sa mia tapa te senini boysi ta, oye me soyna vakabola boysi ta kama dalo vo. Tapa te senini kama dalo vo. 16Sada tapa sa tasuka no sa sile, oye me zola te kue boysi sisiama. 17Boysi sisiama me ile oye, no sada tapa sa tasuka sa sile, boysi sisiama me soyna vatakabola boysi ta sa dalo; sinani oye me dalo.

18Sada ka boysi sa buili koykoypae no sa kopeso napu, 19no te rokusua ta sada ngoyni sa kue moyna buili, sa takabulae leve sile ba mesiri, oye me la takabula moyna to te kue boysi sisiama. 20Boysi sisiama me ile, no sada tapa sa takabula sa koye la koykoypa no polu te tapa sa tasuka sa sile, boysi sisiama me soyna vatakabola boysi ta kama dalo vo. Ta moro sa voye koykoypa sa takabula te ngoyni sa kue buili. 21Ba, sada boysi sisiama sa ile koykoypae oye, sa kareoa polu sile no tapa kama koye vo koykoypa no sa kaqoto, boysi sisiama me toyro vike boysi ta vetu tava. 22Sada tapa sa koybo koykoypa, boysi sisiama me soyna vatakabola oye kama dalo vo; ta moro sa voye koykoypa. 23Ba sada tapa kama tasuka vo no kama adanga vo, ta levea to buili, no boysi sisiama me soyna vatakabola oye sa dalo.

24Sada ka oye sa katu koykoypae no leve mesiri ba sile sa takabula te ngoyni sa katu no sa sororoa zio, 25boysi sisiama me ile leve te koykoypa, no sada polu te leve sa tasuka sile no tapa sa koye koykoypa, ta moro sa voye koykoypa sa koybo ngoyni sa katu. Boysi sisiama me soyna vatakabola boysi ta kama dalo vo. 26Ba sada boysi sisiama sa ile no sa kareoa polu sile te leve no sada tapa kama koye vo koykoypa no sa kaqoto, sinani boysi sisiama me toyro vike oye vetu tava. 27Te vavetua tava boysi sisiama me ile oye, no sada tapa sa adagna te koykoypa, boysi sisiama me soyna vatakabola boysi ta kama dalo vo; ta moro sa voye koykoypa. 28Sada leve kama tasuka vo no kama koye vo koykoypa ba sa kaqoto, ta ne, buili te ngoyni sa katu, no boysi sisiama me soyna vatakabola oye sa dalo; ta levea to ngoyni sa katu.

29Sada kieke lieke ba quole sa tapa boytu ba ngoyle, 30boysi sisiama me ile tapa, no sada tapa sa koye koykoypa no polu te tapa sa duru no mimilaka, boysi sisiama me soyna vatakabola boysi ta kama dalo vo; ta tapa, moro sa voye koykoypa te boytu ba gnoyle. 31Ba sada boysi sisiama sa ile adoa tapa goyti, kama koye vo koykoypa no sa kareoa polu poto, sinani boysi sisiama me toyro vike boysi ta vetu tava. 32Te vavetua tava boysi sisiama me ile tapa, no sada tapa kama adanga vo no sa kareoa polu duru no kama koye vo koykoypa, 33oye me tire sia polu te aralequtua tapa, ba kasi vo tire ngoyni sa kue tapa, no boysi sisiama me toyro vike oye vetu vele tava. 34Te vavetua tava boysi sisiama me ile tapa te senini oye, no sada tapa kama adanga vo te koykoypa no kama koye vo koykoypa, boysi sisiama me soyna vatakabola boysi ta sa dalo. Oye me tobo ona bubute, no oye me dalo. 35Ba sada tapa sa adanga te koykoypa te rokusua oye sa soyna vatakabola boysi ta sa dalo ne, 36boysi sisiama me ile oye, no sada tapa sa adanga te koykoypa, boysi sisiama kasi vo ile vele polu duru; boysi ta kama dalo vo. 37Sada, moyna, te ona aratanae oye, tapa kama tasuka vo no polu poto sa puto te tapa, tapa sa kaqoto. Oye sa dalo, no boysi sisiama me soyna vatakabola boysi ta sa dalo.

38Sada kieke lieke ba quole sa dure koykoypae, 39boysi sisiama me ile oyru, no sada dure kama sile vanoyi vo, ta lala ulomo to sa koybo koykoypa; boysi ta sa dalo.

40Sada kieke boysi sa zosi voyrangae no sa vio, oye sa dalo. 41Sada oye sa zosi voyranga te kinakae boytu no sa vio tarakenakae, oye sa dalo. 42Ba sada tapa te vioa ba neneqae oye sa mesiri no sile, ta moro roka sa voye boytu ba neneqae oye. 43Boysi sisiama me ile oye, no sada tapa sa buili te boytu ba neneqae oye sa mesiri no sile seva moro roka sa voye koykoypa, 44boysi ta sa moro no kama dalo vo. Boysi sisiama me soyna vatakabola oye kama dalo vo bati tapa sa kuo te boytu.

45Boysi sa pale moro roka sa seva ta te koykoypa me vapoka pua rikarika, kasi vo sore voyrangae, me sapene sarajuloa tarakenakae no me ngeoro vakarapota, kasi me vatanga te kue ro! Moro roka sa kuo te kue ro sa majala kadu te kue ka boysi! 46Sada moro roka te koykoypa aba sa kuo taru te senini oye ne boysi ta kama dalo vo. Oye me kuo veke moyna to; oye me kuo te paqarania ngoyni ka toypakae.

Oyra tamana te zozoa rosu

47Sada ka bubute sa rosu- moyna ka bubute vulu ba lineni, 48ka bubute ka soyra ni pua lineni ba vulu, bubute ka soyra ni koykoypae ka pita- 49no sada rosu tutu ba mesiri sa kuo te bubute soysoyra ka soyra ni koykoypae ka pita, sa majala zadava no mara vatere moyna to te kue boysi sisiama. 50Boysi sisiama me ile rosu no me toyro vike bubute sa rosu vetu tava. 51Te vavetua tava boysi sisiama me ile, no sada rosu sa koybo bubute soysoyra ka soyra ni koykoypae ka pita, ata ka ngoyni ka vajaju voyna; bubute ta kama dalo vo bati sa rosu. 52Oye me sebe bubute, ba bubute ka soyra vanoyinoyi ni vulu ba lineni, ba ka bubute ka soyra ni ka koykoypa no sa rosu; oyra bubute ta mara sebe sia.

53Ba sada, sa ile boysi sisiama, rosu kama koybo vo bubute, 54oye me soyna vakarapota bubute sa rosu mara tobo. Sinani oye me toyro vike bubute ta vetu vele tava. 55Te rokusua mara tobo bubute sa rosu, boysi sisiama me ile bubute, no sada rosu kama tasuka vo, pita ulomo kama koybo vo bubute, bubute ta sa poto. Moyra sebe te nako, moyna sa rosu te kieke to neva ba keri neva. 56Ba sada, sa ile boysi sisiama, rosu sa vanatao ngoyni te rokusua sada ka tobo bubute, oye me reka sia tutuni sa rosu te bubute. 57Ba sada rosu sa takabula napu te oyra bubute, sa vatakabola rosu sa koybo bieto oyra pita soysoyra ta, no totongonia oyra pita ta mara sebe te nako. 58Bubute soysoyra noyinoyi, ba ka koykoypa ka soyra ka tobo no sa takabulae rosu, mara tobo noypo moyna to, no sinani me dalo.

59Goyti oyra tamana te zozoa rosu te ka adoa oyra bubute soysoyra, mara soyna vatakabola sa dalo ba kama dalo vo.

Currently Selected:

Leviticus 13: BAA

Highlight

Copy