Genesis 45

Josepa sa vautinini noypo tani te kue oyra Likae

1Sinani Josepa sa taka me pale toyro ona noyqata te tarakenakae doyra oyra ona nabulu si, sa voy goyti oye, <<Mam juolo kesini tarakenakaqu!>> Si kareo to ka oye me kuo koype oye sada oye sa vautinini noypo tani te kue oyra likae. 2No Josepa sa qila ukulu vakarapota no taba oyra boysi ni Ijipi ka ase oye, no oyra te toke te Pero ka ase qilae.

3Sa voy goyti Josepa te kue oyra likae, <<Aro Josepa! aba sa tu tamaqu ro?>> Ba oyra likae oye sa taka moyra tuqini oye, bati oyra ka totoqu ka kuo te tarakenakae oye.

4Sinani Josepa sa soynani oyra likae, <<Nukoro vatanga me te kue ro,>> sa voy. Sada oyra ka vatanga la, sa voy goyti oye, <<Aro likae mina Josepa, oye ram kam ngungutae la aqo Ijipi! 5No sinani, ram moyna kam noyqata no aravamoma napu tanamina bati kam ngungutae aqo ro te ngoyni goyti, bati Bangara sa peqani kineke me aqo ro te ngoyni goyti me vakavele taba tu. 6Sinani kati keri avea sada saqosaqo te vodu, no loyma vele ave aba sa kuo me, me kareo titiba no me kareo papala. 7Ba Bangara sa peqani kineke me aqo ro me vanama koyna ram te vodu ni te lua oyra boysi moyra saete ram te sadae taka poyu goyti, sa voy.

8<<Si kama ram vo kam peqani me aqo ro te ngoyni goyti ba Bangara. Oye sa vakeike tamae aqo ro te kue Pero, me buini ona pade buoe no me kinikini tabae vodu ni Ijipi, sa voy 9No sinani ram mam dada vele zo puka la te kue tamaqu ro no mam soynani oye, <Goyti vatana sa soyna me tomleike Josepa: Bangara sa vabuoe aqo ro te tabae vodu ni Ijipi. Re mo dada zo juolo me; kasi koyki, sa voy. 10Ram mam me kuo te kolabae Qoseni no mam vatenge aqo ro. Ram, oyra mina so no oyra babunu mina no oyra mina sipi no bulumakao no taba oyra pita ram kam tungene soy. 11Aro me miatoyke ram te ngoyni ta, bati loyma avea sada saqosaqo aba sa kuo me; Moyna voy ram no oyra mina taotao no oyra pita kam tungene soy kam tepere taka,> sa voy.

12<<No vanata! Ram kam mi ni te matae mina, no te matam re likaqu Bejimani, tutuna to aro Josepa goyti, oye aro ko vakangiere ram. 13Mam soynani tamaqu ro taba karapota aro ko pale te vodu ni Ijipi goyti no taba pita ram kam mia ni matae mina soy. Sinani ram mam dada koype vajele me tamaqu ro te ngoyni goyti,>> sa voy.

14Sinani Josepa sa kange likae oye Bejimani sa qila no Bejimani sa kange likae oye Josepa sa qila. 15No oye sa noko oyra likae no sa qila te kue oyra. Beito ta oyra likae ka vatoritori oye.

16Sada vatana sa doka te toke te Pero oyra likae Josepa ka me doka, Pero no oyra ona boysi matamata sa soani doyra kima. 17Sa voy goyti Pero te kue Josepa, <<Mo soynani oyra likam, <Mam joyjuni pita goyti: Mam vagoye oyra pitanaki te oyra mina pita pupura no mam vele la te vodu ni Kenani, 18no mam la koype me tamae mina no oyra mina tatama mam vele me te kue ro. Aro me koyna ram vodu noyi sua te vodu ni Ijipi no ram kam majala kemani masurua vodu ta.>

19<<Ram mam soynani oyra, <moyra joyjuni pita goyti: Mam iro kavia pita zazaduku ni Ijipi soy mam vagoye ni oyra mina so no oyra mina balava no mam la koype ni me tamae mina no mam zo me. 20Kasi totoquni taba oyra pita kam tungene, bati taba oyra pita noyisua ni Ijipi me mina ram,> >> sa voy.

21Si Oyra toytuleike Jikope ka joyjuni pita goyti. Josepa sa koyna oyra pita zazaduku, sa seva pita Pero sa voytuni oye, no oye sa koyna oyra beasa te doyra zo. 22Susupae doyra oye sa koyna oyra bubute varoqa, ba te kue Bejimani oye sa koyna tulu ubi kisa siliva no loyma bubute varoqa. 23No goyti pita Josepa sa peqani koyna tamae: mano dongki leike ka vagoyeni taba pita noyisua ni Ijipi no mano dongki quole ka vagoye oyra poytu no bereti no kavia vele oyra beasa te ona zo. 24Sinani oye sa peqani vazo oyra likae, no sada oyra ka zo, oye sa soynani oyra, <<Kasi aravatoqesoro sada kam zo te zoka!>> Sa voy.

25Si oyra ka kesini Ijipi no ka zo puka la te kue tamae doyra te vodu ni Kenani. 26Kavoy goyti oyra te kue Jikope, <<Josepa aba sa tu! Oye sa kinikini tabae vodu ni Ijipi.>> Jikope sa mimilaka ona nanana; oye kama vatuna vo oyra. 27Ba sada oyra ka soynani oye taba oyra pita Josepa sa soynani oyra, no sada oye sa mia oyra pita zazaduku Josepa sa peqani la te vodu ni Ijipi moyra vagoyeni la oye, ona nanana tamae doyra Jikope sa karapota napu. 28No sa voy goyti Jikope, <<Aro ko vatuna! Toquleike ro Josepa saba tu. Aro me zo la me mia soypa oye sinani me lei,>> sa voy.

Currently Selected:

Genesis 45: BAA

Highlight

Copy