Genesis 44

Kema Siliva sa kuo te luboro Baeke

1Sinani Josepa sa voytuni nabulu sa miatoyke ona toke, <<Mo vapodani pitanaki oyra doyra baeke pasi oyra ka majala iro, no mo poyro vavelini la kisa siliva te susupae boysi te jopae ona baeke. 2Mo poyro qo kema siliva te jopa baeke te oye sa so sua, mo poyro una kisa siliva oye sa ngotani pitanaki soy,>> sa voy. No nabulu sa joyjuni pita Josepa sa soyna. 3Te saruku longoro, oyra ka vazo la oyra kamake no oyra doyra dongki soy. 4Sada oyra ka ba kesini kumala lata korovita zo vakoyu la doyra, Josepa sa soynani ona nabulu sa perini ona toke, <<Tapadeire no mo zo rokisini la oyra kamake, no sada re ko la tepere oyra mo soynani oyra, <Be sa voy ram kam sokani pita roka jaju noyi ne? 5Kama kema goyti vo qo buoe sa turepe ni bi, no oye sa vajaju te roverove ne? Goyti sa pita roka sua ram kam joyjuni,> >> sa voy.

6Sada nabulu sa la doka te kue oyra, oye sa soynani noypo oyra ngeoro goyti. 7Ba oyra ka voy goyti te kue oye, <<Be sa voy qo buoe sa soyna oyra pita ta ne? Rami mo nabulu kami pokitini mami ngeoro te kue re, kama joyjuni mami ka pita sa seva ta! 8Rami kami iro vavelini me te vodu ni Kenani kisa siliva kami mia sa kuo te luoboroa jopae oyra mami baeke. Si be sa voy rami mami soko siliva ba qolu te ona toke mo buoe re ne? 9Sada re ko mia keike te rami mo nabulu sa pale pita noyene, oye me lei to. No rami vele mami kuo sika te kue re qo buoe soy,>> ka voy.

10Sa voy goyti oye, <<Sa noyi to, me voto sa seva ram kam soyna. Ba moyna ka oye sa pale kema noyene, oye me qo sika ro; no ram vele mam talopu,>> sa voy.

11Tabae doyra ka dada vajele susupae oyra doyra baeke te lua no ka deke. 12Sinani nabulu sa poypoyta, sa toto te kue oye sa kaji sua no sa doka te kue oye sa so sua. No kema sa mia te baeke te Bejimani. 13Te sada goyti, oyra ka reka oyra doyra bubute. No oyra ka vagoye velini oyra doyra aquru te dongki, no ka vele napu te kumala lata.

14Josepa aba sa kuo te toke sada Juda no oyra likae ka puka la te toke, no oyra ka suru la te lua te tarakenakae oye. 15Sa voy goyti Josepa te kue oyra, <<Be sa voy ram kam joyjuni pita goyti ne? Kama utini mina ram te boysi sa seva aqo ro sa majala utini oyra pita kukupika ram kam joyjuni?>> Sa voy.

16Sa voy goyti Juda, <<Ata pita mami soyna rami te kue re qo buoe? Ata pita rami mami soyna? Ata pita mami joyjuni rami me takabula mami tutuna? Bangara sa vapuqele moyna oyra zaqala te rami mo nabulu. Rami sinani mami sika te re qo buoe, rami no oye sa pale kema soy,>> sa voy.

17Ba sa voy goyti Josepa, <<Kareo aro sa taka me joyjuni pita sa seva ta! Oye to boysi ka mia sa pale kema te me qo sika ro. Tabae mina ram mam vele napu la te kue tamaemina te luoboroa bole,>> sa voy.

18Sinani Juda sa la te kue Josepa no sa soynani oye: <<Kei! Qo buoe, mo vamoyo mo nabulu me ngeoro te kue ona buoe. Kasi momani mo nabulu, bati re ne ko araviri to tani Pero, sa voy. 19Qo buoe, re ko tanani oyra mo nabulu, <Be sa voy sa kuo tamae mina ba likae mina ba?> ko voy. 20No rami kami tuqini, <Tamae mami rami sa kaji, no keike toytuleike sa puodo te kue oye sada oye sa valaka. Likae oye sa lei, no keike to oye sa kuo sua oyru keri soleike kuru keike puodo te kue sinae doyru, no tamae sa noyne oye,> sa voy.

21<<Sinani re ko soynani rami mo nabulu, <Mam la koype vajele me oye soy aro me mia to taqo,> ko voy. 22No rami kami soynani amo re qo buoe, <Soleike ne, sa taka me kesini tamae, bati sada oye sa kesini oye ne, tamae ini me lei to.> 23Ba re ko soynani rami mo nabulu, <Sada rami kama koype vajele me mami likae mami sa so sua ne, rami kama majala mami mia noypo vele matam re.> 24Sada rami kami zo puka napu la te kue tamae mami mo nabulu, no kami soynani oye oyra pita ko soyna re qo buoe.

25<<No sinani tamae mami sa voy, <Mam zo napu no mam la ngota koyna ita ngoyni soi pitanaki,> sa voy. 26Ba kami voy goyti rami, <Rami sa taka mami zo juolo la. Sada sa zo una rami likae mami sa so sua ne mami zo juolo la. Rami kama majala mami mia matae boysi noyene, sada kama una vo rami likae mami sa so sua,> sa voy.

27<<Savoy goyti mo nabulu re tamae mami te kue rami, <Ram kam utini qo quolekutae Riseli sa vapuodo koyna aqo ro keri toquleike. 28Keike te oyru sa kareo moyna la no aro ko voy, <<Oyra pitaperu ka doyle vasoini moyna oye.>> No aro kama mia vele qo oye, sa voy. 29Sada re ko koype kesini vele keike to goyti te kue ro, no ka pita taka sa doka vele te kue oye, ram mam vame noyqata me dokae ro te vongene,> sa voy.

30<<Si sinani, sada soleike kama una vo rami sada aro ko vele napu la te kue mo nabulu tamaqu ne, ona tu tamaqu sa kilepaqo te tu te toytuleike, 31sada oye kama mia vo to soleike me zo una rami, oye ini me lei to. Rami mo nabulu ini mami vadokani tamae mami me juolo la te vongene te noyqata. 32Aro mo nabulu ko puini te kue tamaqu me asetoyke soleike. Ko voy goyti ro, <Sada aro kama koype vavelini me qo soleike te kue re, aro me pale taka te tarakenakam re, tamaqu, te nagavae qo tu!> sa voy.

33<<No sinani, vamoyo mo nabulu me kuo goyti, me mo sika re sukae soleike, no vamoyo oye me vele koype oyra likae. 34Be me voy ro me majala zo puka la te kue tamaqu sada soleike kama una vo aqo ro ne? Kareo! Kasi vamoyo aqo ro me mia aravamoyu me doka te kue tamaqu,>> sa voy.

Currently Selected:

Genesis 44: BAA

Highlight

Copy