Genesis 43

Vakeria zozo Te vodu ni Ijipi

1Sinani sada saqosaqo aba sa karapota te vodu. 2Si sada oyra ka oyke bito oyra vuiti ka iro moyna me te vodu ni Ijipi, sa voy goyti tamae doyra te kue oyra, <<Mam vele napu la mam la ngota noypo koyna ita ngoyni pitanaki,>> sa voy.

3Ba sa voy goyti Juda te kue oye, <<Boysi noyene sa ngeoro vakarapota no sa vabanabanani rami, <Ram sa taka mam me mia tarakenakaqu sada likae mina kama zo una me vo ram.> 4Sada re ko tuqe mo peqani likae mami me koype rami, rami mami la ngota koyna amo pitanaki, sa voy 5Ba sada re kama peqani mo oye ne, rami sa taka mami zo la, bati sa voy goyti boysi ta te kue rami, <Ram sa taka mam me mia tarakenakaqu sada likae mina kama zo una me vo ram,> >> sa voy.

6Sa voy goyti Jikope, <<Be sa voy ram kam vame taka goyti te kue ro kam soynani boysi noyene sa kuo vele keike likae mami kam voy ne?>> sa voy.

7Oyra ka vatavele la, <<Boysi noyene sa poro tanani rami zozoa mami no kuokuo te dia tuni tatama. Oye sa tanani rami, <Be sa voy tamae mina aba sa tu ba?> <Ram sa kuo vele keike likae mina ba?> sa voy. Rami kami tuqini to oyra ona tana oye. Be me voy oye mami utini rami pita oye me soynani rami, <Mam koype me likae mina me voy ne>?>> ka voy.

8Sinani sa voy goyti Juda te kue Izireli tamae, <<Mo peqani soleike me koype aqo ro no rami mami zo to sinani, soy oye rami no re no oyra mami so soy mata tu no kasi dia lei. 9Aro ko puini me asetoyini oye; re mo vasutuni aqo ro me miatoyke oye. Sada aro kama koype vavelini me qo oye te kue re no kama me vadoka vanoyi qo oye te tarakenakam re ne, aro me pale ngutae qo zaqala te tarakenakam re te ngavae qo tu, sa voy. 10Be voy kami zo moyna ne, kami la soypa no vele napu me vakeria sada pasi sinani te,>> sa voy.

11Sinani sa voy goyti tamae doyra Izireli te kue oyra, <<Sa voy ta ne, mam joyjuni pita goyti: Mam poyro oyra vevere noyi sua te vodu goyti te oyra mina baeke me seva keike keke mam la koyna boysi noyene, ngoyni poporae azu no ngoyni lukae qoyta, kavia pita nanabu noyi, no basa, kavia saqa no kaku soy. 12Kisa siliva ram mam iro la me keri sada tunurinia, bati ram mam iro vavelini noypo la kisa siliva oyra ka poyro vavelini moyna te oyra mina baeke. Moyna voy oyra ka poyro vazaqele. 13Mam kinikini likaemina no mam tapadeire no mam vele napu la te kue boysi noyene sinani. 14No tani Bangara varavaranga me koyna ram aravamangana te tarakenakae boysi ta, soy oye me vavelini me likae mina no Bejimani me vele koype me ram. Te kue ro sada aro ko pale voyra te leinae doyra oyra ko noyne oyra, aro me pale to voyra ta te luruni oyra ka lei,>> sa voy.

15Si oyra kamake ka iro oyra keke no keri sada tunurinia kisa siliva, no ka koype vele Bejimani. Oyra ka tapadeire no ka tasoybaka juolo la Ijipi no ka la takabula te kue Josepa. 16Sada Josepa sa mia Bejimani sa koype me oyra, oye sa soynani nabulu sa mata te ona toke, <<Mo koype la oyra boysi goyti te qo toke, mo voyevale pitapupura no mo vamoja; oyra moyra aki koype aqo ro te kanaka ini,>> sa voy.

17Nabulu sa joyjuni pita Josepa sa soynani oye no sa koype la oyra kamake te toke te Josepa. 18Sinani oyra kamake ka isi sada ka kinikini la oyra te ona toke oye. No oyra ka nanana, <<Oyra ka kinikini me ita goyti te zozoa kisa siliva ka vavelini me te oyra dia baeke te sada kinaka. Oye sa soyko me kuloni no vangale ita no me pale vaseka ita no me pale oyra dia dongki,>> ka voy.

19Si oyra ka me te kue nabulu sa mata te toke te Josepa, no kame vakangiere oye te mataqamanae toke. 20Ka voy goyti oyra <<Ke buoe, rami kami me moyna goyti mami ngota pitanaki kami voy. 21Ba sada kami doka te ngoyni rami kami nudoa te kose, rami kami deke oyra mami baeke no da soy, susupae boysi sa mia ona kisa siliva te jopae ona baeke, dongae mami kisa siliva sa araviri to padae. Si, rami kami iro vavelini me. 22No rami kami iro vajele noypo vele me udinia kisa siliva mami ngotani pitanaki. Rami kama utini mami ka oye sa toyro kisa siliva te mami baeke,>> ka voy.

23Oye sa voy <<Sa noyi to! Kasi isi. Mina Bangara, no Bangara te tamae mina sa koyna ram tutupari te oyra mina baeke; Aro ko pale moyna kisa siliva ram kam kea me,>> sa voy. Sinani oye sa kinikini vajele me Simioni te kue oyra.

24Nabulu sa kinikini la oyra kamake te toke te Josepa, no sa koyna oyra bi moyra qoluni nikini doyra no sa vanama pitanaki te oyra doyra dongki. 25Oyra ka vanama doyra keke moyra koyna Josepa sada oye me doka te kanaka, bati oyra ka ase moyna moyra aki una oye te ona toke.

26Sada Josepa sa me te toke, oyra ka koyna oye keke oyra ka iro moyna la te luoboro toke, no oyra ka kapata juolo la te lua te tarakenakae oye. 27Oye sa tanani oyra zozoa doyra kuokuo, no sinani oye sa voy, <<Be sa voy tamaemina sa valaka kam soynani moyna aqo ro ne? Oye aba sa tu ba?>> sa voy.

28Oyra ka vatavele la, <<Tamaemami mo nabulu aba sa tu no sa tu vanoyi,>> ka voy. No oyra ka kapata juolo ka padapada ni oye.

29Sada Josepa sa mi vaga no sa mia likae oye Bejimani, sa keike to sinae doyru, oye sa tana, <<Oye goyti likae mina so sua oye kam soynani aqo ro ne?>> sa voy. No sa voy goyti oye, <<Bangara me rakisini amo re toquleike.>> 30No Josepa sa ngesingesi te qila sada oye sa mia peta likae, no oye sa juolo vadada sa poyta ngoyni oye me qilae. Oye sa puka la te ona kuqulomo veke tani no sa qila.

31Sada oye sa sumatana soypa tarakenakae, oye sa juolo napu la, no oye sa puso velini ona noyqata, no sa voy goyti, <<Kena pitanaki,>> sa voy.

32Oyra ka kena vike koyna oye, no ka kena vike koyna oyra kamake sa kieke kuo, no oyra boysi ni Ijipi ka aki una oye ka tongunu veke tanadoyra, bati oyra boysi ni Ijipi sa taka moyra aki koype oyra boysi ni Iburu, bati ado sa seva ta sa taboyna te kue oyra boysi ni Ijipi. 33Oyra kamake leike ka tongunu te tarakenakae Josepa, ka vagasa oyra te aratutoloa avea doyra, sa toto te kue soleike puodo kinaka no sa doka te kue oye sa so sua; oyra ka aramivale napu tanadoyra no ka puoloso. 34Sada ka ota te kue oyra pitanaki te tevolo te Josepa, no tauta sa pale Bejimani sa loyma sada poyua oyra vele ka pale. Si oyra ka aki no ka turepe luka vaini una oye.

Currently Selected:

Genesis 43: BAA

Highlight

Copy