Genesis 42

Oyra Likae Josepa ka zo la Ijipi

1Sada Jikope sa utini sa kuo vuiti te vodu ni Ijipi, oye sa voy goyti te kue oyra toytuleike, <<Be sa voy ram kam aramivale napu tanamina ne?>> 2No sa voy vele goyti oye, <<Vanata! Aro ko ase sa kue vuiti te vodu ni Ijipi; Mam zo la gei no mam la ngota koyna ita, soy ita mata tu kasi dia lei,>> sa voy.

3Oye si, mano oyra likae Josepa ka zo juolo la moyra la ngota vuiti te vodu ni Ijipi. 4Ba Jikope kama peqani una vo Bejimani, likae Josepa, me koype una oyra, bati oye sa isini moyna voy sa la doka vele ka pita taka te kue oye. 5Oyra toytuleike Izireli ka zo una oyra boysi ka zo te ngota vuiti, bati sada saqosaqo sa doka vele te vodu ni Kenani soy.

6Josepa sa buoe te vodu ni Ijipi, sa ngungutae vuiti te kue oyra taba ona boysi. Sa voy ta oye, sada oyra likae Josepa ka me doka, oyra ka kapata juolo la te lua te tarakenakae oye. 7Sada Josepa sa mia oyra likae, oye sa mia utini oyra, ba oye sa seva to kama utini moyna vo oyra, no oye sa ngeoro tobalani oyra.

<<Be ngoyni kam tae me ram ne?>> sa voy.

Oyra ka vatavele la, <<Rami kami tae me te vodu ni Kenani kami soyko ngota pitanaki,>> ka voy.

8Josepa sa mia utini oyra likae, ba oyra kama mia utini doyra oye. 9Oye sa noyne velini oyra ona parika qoyloa moyna oyra, no sa voy goyti oye te kue oyra, <<Ram kam boysi karovo! Kam soyko me mia ngoyni sa mimilakae mami vodu,>> sa voy.

10Oyra ka vatavele la, <<Kareo, mami buoe, rami mo nabulu kami me mami ngota pitanaki. 11Rami taba kami toytuleikea keike boysi to. Rami mo nabulu kami boysi tutuna, kama boysi karovo mami>> ka voy.

12Sa voy goyti Josepa te kue oyra, <<Kareo, ram kam soyko me mia ngoyni sa mimilakae mami vodu,>> sa voy.

13Ba ka voy goyti oyra, <<Rami mo nabulu kami kamake manokeri, sa keike to tamae mami, te vodu ni Kenani. So sua sa kuo me te kue tamae mami sinani, no keike likae mami sa kareo,>> ka voy.

14Sa voy goyti Josepa te kue oyra, <<Sa seva to pita aro ko soynani ram: Ram kam boysi karovo! 15No sa seva goyti, aro me pada ram: Te ona kuo buoe Pero ram kama majala mina kesini ngoyni goyti, sada likae mina sa so sua kama me doka vo goyti, sa voy. 16Mam peqani la keike te ram, me la koype me likae mina; ram vele mam me kuo te pade aranukoso, soy moyra pada mina ngeoro moyra mia moyna ram kam soyna pita tutuna. Ba sada kama voy mina ta ne, te ona kuo buoe Pero sa tuna to ram kam oyra boysi karovo moyna to!>> sa voy 17No Josepa sa toyro oyra te pade aranukoso tulu tava.

18Te vatulua tava, sa voy goyti Josepa te kue oyra, <<Bati ko padapadani ro Bangara si: ram mam joyjuni pita goyti soy mina tu. 19Sada ram kam oyra boysi tutuna, keike to likae mina me kuo goyti te pade aranukoso, ram vele mam zo la no mam iro la koyna vuiti oyra mina pupu ka kuo taka. 20Ba ram mam kinikini me likae mina sa so sua te kue ro, voy oyra mina ngeoro moyra va tuna no ram kasi mina lei.>> Goyti oyra ka tuqini moyra joyjuni.

21Oyra ka arangeoro napu tanadoyra ka voy, <<Sa tuna moynato, ita kata tepere toyini taka te pita kata joyjuni te kue likae dia. Ita kata mia noyqata poyu oye sa tepere sada oye sa pine dia arasasaoto te ona tu, ba ita kama vanata dia, sa voy ta soy oye, noyqata poyu sa me te kue ita sinani te,>> ka voy.

22Sa voy goyti Rubeni, <<Kama soynani moyna qo ro ram te kasi joyjuni ka pita zaqala te kue soleike ne ba? Ba ram kam pejae mina vanata! Sinani ita mata pale takae jaju ita kata joyjuni te kue oye.>> 23Oyra kama noyne utini doyra Josepa sa utini pita oyra ka soyna, bati sada oyra ka vakingiere oye, keike boysi sa vakoydo doyra ngelu.

24Josepa sa taleiqe veke te kue oyra no sa toto qila, ba sa taleiqe vele napu la no oye sa vakingiere noypo oyra. Oye sa vene Simioni moyra pale no moyra nukese oye te tarakenakae matae doyra.

25Josepa sa voytuni oyra ona nabulu moyra poyro vapoda vuiti te oyra doyra baeke, no moyra toyro vavelini te susupae oyra doyra baeke kisa siliva, no moyra koyna oyra beasa te doyra zo. Sada ka joyjuni beito soypa koyna oyra pita goyti, 26oyra ka vagoye vuiti te oyra doyra dongki no ka tapaki vele napu la.

27Te ngoyni oyra ka nuodoa sada sa kose, keike te oyra sa deke ona baeke me pale pitanaki me purini ona dongki sa voy, no sa mia ona kisa siliva sa kuo te jopae ona baeke. 28Oye sa soynani la oyra likae, <<Qo kisa siliva ka vaveleni noypo me koyna aqo. Sa kuo te qo baeke,>> sa voy.

Pongoa doyra sa totoqu no ka arataleiqe napua tanadoyra no ka aratanatana, <<Ata pita Bangara sa joyjuni te kue ita goyti ne?>> ka voy.

29Sada oyra ka me doka te kue tamae doyra Jikope te vodu ni Kenani, oyra ka soynani oye taba pita sa doka te kue oyra. Ka voy goyti, 30<<Boysi sa buoe ni vodu noyene sa ngeoro tobalani rami no sa vatepini rami kami kareve vodu sa voy. 31Ba kami voy goyti rami te kue oye, <Rami kami boysi tutuna; kama boysi karovo mami. 32Rami kami kamake manokeri, sa keike to tamaemami. Keike likae mami sa lei, no likae mami sa so sua sa kuo koype latu tamae mami te vodu ni Kenani,> kami voy.

33<<Savoy goyti boysi sa buoe ni vodu noyene te kue rami, <Me seva goyti soy oye aro me vatuna ram kam oyra boysi tutuna: Keike te ram me kuo koype me aqo ro; no ram mam iro la pitanaki koyna oyra mina pupu ka saqo no mam zo. 34Ba ram mam kinikini me te kue ro likae mina sa so sua, soy aro me vatuna ram kama oyra boysi karovo mina ba kam oyra boysi tutuna. No sa seva ta oye, aro me vavelini latu likae mina, no ram kam talopu mam me ngunguta te vodu goyti,> >> sa voy.

35Sa voy ta oye, sada oyra ka jilingini oyra doyra baeke, te susupae doyra baeke sa kue me karukua kisa siliva! Sada oyra no tamae doyra soy ka mia karukua kisa, oyra ka isi varoka. 36Sa voy goyti tamae doyra Jikope te kue oyra, <<Ram kam soyko me valuru bito ro oyra qo so. Josepa sa kareo moyna la, no Simioni sa kareo vele no ram kam soyko me koype vele Bejimani. Taba oyra pita goyti ka varoka aqo ro!>> sa voy.

37Ba sa voy goyti Rubeni te kue tamae, <<Re mo voyevale keri toquleike ro sada aro kama koype vavelini meqo oye te kue re. Mo vasoypani aqo ro me asetoyke oye, no aro me koype vavelini me oye,>> sa voy.

38Ba sa voy goyti Jikope, <<Toquleike ro kama majalavo me zo koype ram; likae oye sa lei moyna no oye kieke to tani sa kuo sua. Sada oye sa la tepere taka te sada ram kam zo, ram mam vapaleni aqo ro ko valaka noyqata me la te vongene,>> sa voy.

Currently Selected:

Genesis 42: BAA

Highlight

Copy