Genesis 41

Oyra parika Te Pero

1Sa paqolo soypa la keri ave totongoni, Pero sa parika. Da soy! Tani sa deire te tavelea vuru ni Naili, 2no mia! Ka usoro me te vuru vetu bulumakao ka mimi noyi, no kusuru, oyra ka me oyke sisiu. 3Da soy! Rokusua doyra oyra ta, vetu vele bulumakao ka mimi roka no veiqo ka usoro napu me te vuru ni Naili no ka deire una oyra bulumakao ka usoro kinaka moyna te tavelea vuru. 4No oyra bulumakao ka mimi roka no veiqo ka rupo beito to oyra vetu bulumakao ka mimi noyi no kusuru. No Pero sa joykava.

5Oye sa pam napu no sa parika vakeria sada: Da soy! Vetu petae vuiti ka tu vanoyi no miqa vanoyi ka puto me te keike to oyzu. 6Da soy! Rokusua doyra oyra ta, vetu vele petae vuiti ka subo me no oyra ka pizoyutu no sa vanala oyra vovosele sa tae me te kadalesana. 7Oyra vetu petae vuiti ka pizoyutu ka kono beito la oyra vetu petae vuiti ka tu vanoyi, totongonia joyka. No pero sa joykava no sa utini oye sa parika moyna to.

8Te saruku ona nanana oye sa matumatu, no oye sa keleike araququni ni oyra ona boysi roverove no oyra boysi tarueni Ijipi. Pero sa soynani oyra oyra ona Parika, ba kareo to ka boysi sa majala lopo koyna oye.

9Sinani boysi sa miatoyke luka vaini sa soynani Pero, <<Tava ini aro ko noyne velini oyra qo alatoko. 10Pero sa momani moyna keri ona nabulu, oye sa toyro aqo ro no boysi sa mata te vamoja bereti te pade aranukoso te kue buoe te oyra palata. 11Te keike kose raru karu parika no sa aravekea maru parika no sa araveke lolopoa soy. 12Keike boysi varoqa ni Iburu sa kuo una raru, oye ona nabulu buoe te oyra palata. No raru karu soynani oye maru parika, no oye sa lopo koyna raru, no oye sa lopo vanoyi koyna raru zozoa maru parika. 13Oyra pita oye sa lopo te kue raru ka voto beito to: Re ko vadere noypo aqo ro te qo jaju, no boysi sa vamoja bereti ko zeqa valei soy,>> sa voy.

14Pero sa peqani la vatana, no oyra ka dada koype vajele Josepa te pade aranukoso. No sada oye sa tire soypa vomia no sa soka oyra ona bubute soy, oye sa puka la te kue Pero.

15Sa voy goyti Pero te kue Josepa, <<Aro ko parika no kareo to ka oye sa majala lopo qo parika. Ba aro ko ase ka soynani aqo, sada re ko ase ka parika, re ko majala lopo ka voy.>>

16Josepa sa vatavele la te kue Pero, <<Kama aro vo, ba Bangara me vatakabola te kue re Pero lolopu re ko soyko,>> sa voy.

17Sa voy goyti Pero, <<Te qo parika aro ko deire te tavelea vuru ni Naili, 18no da soy! Vetu bulumakao ka kusuru no mimi noyi, ka usoro me te vuru no ka oyke sisiu. 19Da soy! Rokusua doyra oyra ta, vetu vele bulumakao ka usoro me, oyra ka viqo no mimi roka varoka. Aro kama mia moyna qo te tabae vodu ni Ijipi oyra bulumakao ka mimi roka sa seva ta. 20Oyra bulumakao pela ka mimi roka ka rupo beito to vetu oyra bulumakao kusuru ka usoro kinaka me. 21Ba sada oyra ka kono vajele oyra, kareo ka susuka te senini doyra sa seva oyra ka oyke ka pita: oyra aba sa araviri moyna to mimi rokae doyra. Sinani aro ko joykava.

22<<Te qo parika da soy! Aro ko mia vele vetu petae vuiti ka totongoni no ka miqa, ka puto me te keike to oyzu. 23Da soy! Rokusua doyra oyra ta ka pisukolo vele me vetu petae vuiti, oyra ka nala no pizoyutu te vovosele sa tae me te kadalesana. 24No oyra peta vuiti ka pizoyutu ka kono beito la vetu oyra peta ka noyi. Aro ko soynani oyra boysi roverove qo parika, ba kareo ka oye sa majala lopo koyna aqo,>> sa voy.

25Sinani sa voy goyti Josepa te kue Pero, <<Keri parika te Pero sa keike to adoa no sa araviri to. Bangara sa vatakabola ni amo re Pero pita oye me joyjuni. 26Vetu bulumakao kusuru ne ka vetu ave; no vetu petae vuiti ka totongoni vanoyi ka vetu ave; parika goyti sa keike to adoa no sa araviri to. 27Oyra vetu bulumakao ka pela, ka mimi roka ka takabula rokusu ka vetu ave, sa seva to oyra vetu petae vuiti ka pizoyutu sa vanala oyra vovosele ni te kadalesana: Oyra ka vetu avea sada saqosaqo.

28<<Saseva aro ko soynani amo re Pero: Bangara sa vatakabola ni amo re Pero pita oye me joyjuni. 29Vanata! Moyra me doka vetu ave noyi me masuru pitanaki te vodu ni Ijipi, 30beito ta moyra me vele vetu avea sada saqosaqo. No moyra vakosepe beito taba ave noyi, no sada saqosaqo me varoka to vodu. 31Oyra sada masurua pitanaki te vodu kama noyne velini vele doyra, bati sada saqosaqo me doka ne, me roka sua. 32No zozoa soy oye re Pero ko parika keri sada ne, sa vatakabola Bangara sa vanoydo moyna pita goyti, no Bangara kama muini vo me vavoto oyra pita goyti, sa voy.

33<<Sinani re mo vene keike boysi sa tarue no majamajala no mo vamata oye te vodu ni Ijipi. 34Re mo vene vele oyra boysi matamata moyra vato vakeike te vodu, no oyra moyra pale keike loyma te oyra taba boyboylia lua te vodu ni Ijipi te vetu avea masuru. 35Oyra moyra quqene beito taba pitanaki te vetu oyra ave noyi moyra me doka sinani, no re mo voytuni oyra moyra sute vuiti te oyra kumala lata, moyra toyro te pade pitanaki. 36Pitanaki ta, moyra sute soy me saete vodu ni Ijipi, no me jaju te sadae vetu avea sada saqosaqo me doka te vodu ni Ijipi, soy vodu kasi vo kuo taka te sadae sada saqosaqo,>> sa voy.

37Veveni goyti sa asa noyi te kue Pero no taba oyra ona boysi matamata. 38No Pero sa tanani oyra ona boysi matamata, <<Be ngoyni mata miani ka oye me seva boysi goyti, potae Bangara sa kuo te kue oye ne?>> sa voy.

39Sa voy goyti Pero te kue Josepa, <<Sa seva goyti Bangara sa vatakabola te kue re taba pisipita goyti, kama kuo velevo ka oye sa majamajala no tarue seva amo re. 40Re to mo mata te qo pade buoe, no taba oyra qo boysi moyra vauteve mo vato. Te totongununa te buoe lata to ko buoe koyi ni amo re ro,>> sa voy.

Josepa Sa Kuo Mata Ijipi

41Si Pero sa soynani Josepa, <<Mia! Aro sinani ko vamata amo re te totongonia vodu ni Ijipi,>> sa voy. 42Sinani Pero sa jupe te totukua moto sa kue lalae buoe no sa vazongo te totukua Josepa. Oye sa vabubuteni Josepa oyra bubute lineni noyinoyi no sa vakoyluni oye keike kakalu qolu te kokunua. 43Oye sa vene Josepa me gae puka te vakeria ona sekitulutulu buoe, no oyra leike taba ka vavanga te tarakenakae, <<Deire pa!>> ka voy. Sa seva goyti, oye sa vene Josepa me matani totongunia vodu ni Ijipi.

44Sa voy goyti Pero te kue Josepa, <<Aro Pero, oye ba sada re kama soyna mo ka pita, kareo ka oye me aleve koyrisi ba nikini te tabae vodu ni Ijipi,>> sa voy. 45Pero sa koyna Josepa taritongo Zepenati- Panea, no oye sa koyna Josepa Asinata toytuquole Potipera, boysi sisiama ni Oni me ona quolekutae. No Josepa sa zo la, sa tae vaga te tabae vodu ni Ijipi.

46Josepa sa tolongonu avea sada oye sa nabulu ni Pero buoe lata ni Ijipi. No Josepa sa kesini Pero sa tae vaga te tabae ngoyni te vodu ni Ijipi. 47Te luoboroa vetu oyra ave masuru, lua sa vapuqele me taba boyboylia. 48Josepa sa quqene beito taba pitanaki te vetu ave masuru te vodu ni Ijipi no sa sute araququni ni te oyra kumala lata. Te susupae kumala lata oye sa tebani pitanaki te oyra barue te aralequtua. 49Josepa sa sute taba sua vuiti, sa seva to menea karakone te masi; sa taba si, oye sa bito koyroa, bati sa koyini no sa taka sua padae.

50Korovita doka doyra oyra avea sada saqosaqo, Josepa sa tungene keri toytuleike kuru puodo te kue Asinata toytuquole Potipera, boysi sisiama ni Oni. 51Josepa sa vataritingini ona soleike puodo kinaka oye Manasa bati sa voy goyti oye, <<Bangara sa vamoyo aro me vakosepe beito taba taka aro ko tepere moyna, no taba oyra pupu te tamaqu soy,>> sa voy. 52Vakeria ona soleike oye sa vataritingini Eparemu, bati sa voy goyti oye, <<Bangara sa vavere vataba aqo ro te vodu aro ko tepereni taka,>> sa voy.

53Oyra vetu ave masuru te vodu ni Ijipi ka me doka te beibeitoa, 54no ka toto me oyra vetu ave sada saqosaqo, sa seva Josepa sa soyna moyna. Sada saqosaqo sa doka te tabae oyra vodu veke, ba te totongonia vodu ni Ijipi sa zaria pitanaki. 55Sada taba oyra boysi te vodu ni Ijipi ka toto saqo te sada saqosaqo, oyra boysi ka qila te kue Pero ka pine pitanaki. Pero sa soynani oyra boysi taba ni Ijipi, <<Ram mam la te kue Josepa no mam joyjuni pita oye sa soynani ram,>> sa voy.

56Sadae sada saqosaqo sa koybo totongonia vodu, Josepa sa deke oyra pade ngoyni ka quqinini moyna pitanaki no sa ngungutae vuiti te kue oyra boysi ni Ijipi, bati sada saqosaqo sa karapota varoka te totngonia vodu ni Ijipi. 57No taba boysi te oyra vodu vele ka me Ijipi ka me ngota vuiti te kue Josepa, bati sada saqosaqo sa karapota varoka te tabae vodu ni te lua.

Currently Selected:

Genesis 41: BAA

Highlight

Copy