Genesis 40

Josepa sa Lopo Parika Te Pade Aranukoso

1Sa paqolo soypa kavia sada, boysi sa miatoyke luka vaini te buoe lata no boysi sa mata te vamoja bereti te buoe lata ni Ijipi kuru vamoma doyru buoe, buoe lata ni Ijipi. 2Pero sa momani keri ona boysi matamata, boysi sa miatoyke luka vaini no boysi sa mata te vamoja bereti, 3no oye sa toyro oyru te pade aranukoso, te toke te buoe te oyra palata, te pade aranukoso ka toyruni to Josepa. 4Buoe te oyra palata sa vasoypani Josepa me perini oyru, no oye sa miatoyke oyru.

Sa paqolo kavia sada, sada oyra ka kuo te pade aranukoso, 5susupae doyru oyru keri boysi, oye sa miatoyke luka vaini, no boysi sa mata te vamoja bereti te buoe lata ni Ijipi, kuru kuo te pade aranukoso kuru parika keike to kose, no susupae doyru oyru sa aravekea doyru parika no kama araviri vo lolopoa.

6Sada Josepa sa me te kue oyru te saruku belanae, oye sa mia oyru kuru mi matumatu. 7Si oye sa tanani keri boysi matamata te Pero kuru kuo una oye te pade aranukoso te toke te ona buoe, <<Be sa voy rabu kabu mi noyqata ini ne?>> sa voy.

8Oyru kuru vatavele la, <<Raru karu susupa parika, no kama kuo vo ka oye me lopo koyna raru.>>

Savoy goyti Josepa te kue oyru, <<Tani to Bangara sa majala lopo zozoa parika. Soynani aqo ro mibu parika,>> sa voy.

9Si boysi sa miatoyke luka vaini sa soynani Josepa ona parika. Sa voy goyti oye, <<Te qo parika aro ko mia oyzu vaini te tarakenaka qu, 10no oyzu vaini sa tulu voyqea. Sada sa subo me, sa zari voyrangae no sa takabula me boyboylia no oyra joykae ka miqa. 11Aro ko pale toyro kema te Pero no ko pale oyra petae vaini, ko poqo te kema te Pero no ko voyko la kema te koyrisi oye,>> sa voy.

12Sa voy goyti Josepa, <<Goyti talopua mo parika. Oyra tulu voyqe ka tulu tava. 13Beito tulu tava Pero me lopo amo re no me vadere noypo amo te jaju ko kue moyna, no re mo koyna noypo oye ona kema sa seva re ko joyjuni moyna sada re ko miatoyke moyna ona luka vaini. 14Ba sada re ko la kuo vanoyi, mo noyne velini aqo ro; mo soynani Pero soy oye me lopo aqo ro te pade aranukoso goyti. 15Bati aro ka ngota soko moyna aqo te vodu te oyra Iburu, no sada aro ko me kuo te ngoyni goyti, aro kama joyjuni qo ka pita sa gae moyra toyro toyini aqo te ngoyni sa remini te pade aranukoso,>> sa voy.

16Sada boysi sa mata te vamoja bereti sa mia Josepa sa noyi ona lolopu, oye sa voy goyti te kue Josepa, <<Aro vele ko parika: Mia! Tulu tangae bereti ko voyko poka te boytoyqu. 17Te tanga sa kuo zaka sua sa kue taba adoadoa bereti te Pero, ba oyra roroko ka me oyke beito bereti te tanga ko voyko poka te boytoyqu,>> sa voy.

18Sa voy goyti Josepa, <<Goyti talopua mo parika. Oyra tulu tanga ka tulu tava. 19Beito tulu tava, Pero me koype vajele amo re no me zeqa amo te azu. No oyra roroko moyra me oyke beito ziom re,>> sa voy.

20Te vatulua tava sa voto tava puodo te Pero, no oye sa joyjuni koyna oyra ona boysi matamata keike aki poyu. Oye sa lopo me boysi sa miatoyke ona luka vaini no boysi sa mata te vamoja bereti te tarakenakae doyra oyra ona boysi matamata: 21Oye sa vadere noypo boysi sa miatoyke luka vaini te jaju oye sa joyjuni moyna soy me kea noypo Pero ona kema te koyrisi oye, 22ba oye sa zeqa valei to boysi sa mata te vamoja bereti, sa voto to pita Josepa sa soyna moyna sada oye sa lopo doyru parika.

23Ba boysi sa miatoyke luka vaini kama noyne velini vo Josepa; oye sa vakosepe to Josepa.

Currently Selected:

Genesis 40: BAA

Highlight

Copy