Genesis 31

Jikope sa Poykini Lebani

1Jikope sa ase oyra toytuleike Lebani ka soyna, <<Jikope sa pale beito tabae pisipita te tamaemami no sa pale tabae ona tutupari te pita sa tungene tamaemami.>> 2Jikope sa mia la tarakenakae Lebani no sa pulisi ni kama seva moyna vo sa voy tarakenakae oye.

3Sinani sa voy goyti Iaova te kue Jikope, <<Mo seipele vele la te vodu te oyra tamam no te kue oyra toram, no aro me una amo re,>> sa voy.

4Oye si, Jikope sa peqani la vatana te kue Riseli no Lia muru juolo me te barue ngoyni ka kue oyra ona pitapupura. 5Sa voy goyti oye te kue oyru, <<Aro ko mia tarakenakae tamaemibu te kue ro kama seva vo sa voy moyna, ba Bangara te tamaqu ro sa una aqo ro. 6Rabu kabu utini aro ko jaju vakarapota koyna tamaemibu, 7ba tamaemibu sa tatakiu ni aqo ro no sa soka ngutaqu ro mano sada. Sa seva ta oye, Bangara kama vamoyuni vo oye me vataka aqo ro. 8Sada oye sa soyna, <Ngutam re oyra ka kadokado,> no tabae oyra toytu pita pupura varoqa ka kadokado; no sada oye sa soyna, <Oyra ka seara ne ngutam re,> no tabae oyra toytu ka seara. 9Si Bangara sa pale kesini te kue tamaemibu oyra vaua pitapupura no sa kea aqo ro.

10<<Te sada oyra pita pupura ka aratepiri aro ko parika no da soy, aro ko mia taba oyra qoti leike ka tepere oyra qoti quole ka seara, ka kadokado no ka supisupi. 11Matizana te Bangara sa voy goyti te kue ro te qo parika, <Jikope,> sa voy. Aro ko tuqini la, <Aro goyti.> 12No sa voy goyti oye, <Mo mi puka no mo mia taba qoti leike ka tepere oyra qoti quole ka seara, ka kadokado no supisupi, bati aro ko mia taba pita Lebani sa joyjuni te kue re. 13Aro ko Bangara ni Beteli, ngoyni re ko jelangani tabu oela te kieke katora vojele no ngoyni re ko joyjuni moyna mo moynini te kue ro. Sinani re mo kesini vodu goyti no mo vele napu la te mo vodu vatasuku,> >> sa voy.

14Sinani Riseli no Lia kuru vatavele la, <<Raru sa kareo kenae maru voy maru tungene te tatama te tamae maru. 15Be sa voy oye sa vasevani raru boysi kuokapa? Kama ngungutae vo to raru, ba oye sa vajaju beito pita ka boyri ni raru. 16Sa tuna to taba oyra tutupari Bangara sa pale kesini te kue tamae maru ne, maru tugnene raru no oyra maru so soy. Sa noyi to, joyjuni to ka pita Bangara sa soynani amo,>> kuru voy.

17Sinani Jikope sa vagoye oyra ona so no oyru ona quolekutae te oyra kamele. 18No oye sa vazo kineke la vaua doyra oyra ona pita pupura, sa iro beito tabae oyra pisipita oye sa pale te vodu ni Paddani Aramu,#31.18 Te oyra sada rokusua ngoyni goyti ka kelikini Mesopotamia. me zola te kue tamae oye Aisake te vodu ni Kenani.

19Sada Lebani sa zo moyna la te ngoyni ka kue oyra ona pitapupura sa la pote voyrangae doyra oyra sipi, Riseli sa soko oyra bangara mololo te pupu te tamae. 20Jikope sa tatakiu ni Lebani boysi ni Aramu, kama soynani vo oye, sa paki to. 21Si, oye sa paki koype taba pita oye sa tungene, no oye sa koydo vuru, no sa zo voy la te vodu supu te kolabae Qileadi.

Lebani sa Koyle Rokisini Jikope

22Sa paqolo soypa tulu tava, Lebani sa utini Jikope sa paki moyna. 23Oye sa koype oyra torae no sa koyle rokisini Jikope vetu tava no sa la tepere oye te vodu supu ni Qileadi. 24Sinani Bangara sa me takabula te kue Lebani boysi ni Aramu te kose te ona parika no sa soynani oye, <<Mo banani kasi mo soyna neto kapita noyi ba roka te kue Jikope,>> sa voy.

25Jikope sa joyjuni moyna ona toypaka pua te vodu supu ni Qileadi sada Lebani no oyra torae ka doka te kue oye no ka toypaka vele te ngoyni noyene. 26Sa voy goyti Lebani te kue Jikope, <<Ata pita ko joyjuni re? Re ko tatakiu ni aqo ro no ko koype keri toqu quole ro ko vasevani ka pale vaseka oyru te kana. 27Be sa voy re ko zo soko no ko tatakiu ni aqo ro? Be sa voy kama soynani mo aqo ro, soy aro me peqani vazo amo te kima no me vakolani amo re kera no qiqilae doyra oyra pita tatara? 28Re kama vamoyo mo aro me noko no kukuloyini ne oyra babanoqu no toququole. Re ko joyjuni pita tolutolu. 29Aro sa kuo qo karapota me vatakani amo re; ba kosene Bangara te tamam sa voy goyti te kue ro, <Mo banani kasi mo soyna ka pita sa noyi ba roka te kue Jikope,> sa voy. 30Re ko zo bati re ko soyko mo vele napu la te toke te tamam. Ba be sa voy re ko soko oyra qo bangara mololo ne?>> Sa voy.

31Jikope sa vatavele la te kue Lebani, <<Aro ko isi, bati aro ko noyne moyna re mo pale velini keri tomquole te kue ro no mo sede oyru. 32Ba moyna re ko mia ka oye sa iro oyra mo bangara mololo, oye me lei to. Te tarakenake doyra oyra toraedia, re mo poyta ka pita re ko tungene sa kuo te kue ro; no sada re ko mia mo pale.>> Jikope kama utini vo Riseli sa soko moyna oyra bangara mololo ne.

33Sa voy ta oye Lebani sa puka la te luoboroa toypaka pua te Jikope no sa la te luoboroa toypaka pua te Lia no te luoboroa toypaka pua te keri quolesika, ba oye kama mia vo ka pita. Rokusua sa kesini toypaka pua te Lia, oye sa paru la te toypaka pua te Riseli. 34Riseli sa pale moyna oyra bangara mololo te oyra doyra pupu no sa poyro la te paparua pua ka vagoye te kamele no sa tongene puke la oyra. Lebani sa poypoyta vaga te tabae oyra pita te luoboroa toypaka pua ba kama mia vo ka pita.

35Sa voy goyti Riseli te kue tamae, <<Kasi moma re, qo buoe, Aro kama majala qo me deire te tarakenakam re; aro sa pale aqo moro te oyra quole.>> Si oye sa poypoyta ba kama mia vo oyra bangara mololo te ona pupu.

36Jikope sa moma no sa kare Lebani. Sa voy goyti Jikope te kue Lebani, <<Ata ka jaju roka ko joyjuni ro ne? Ata zaqala ko joyjuni ro soy oye re ko koyle rokisini aqo ro ne? sa voy. 37Sinani re ko salenge beito moyna tabae oyra qo aquru, ata pita te mo toke re ko me mia? Mo voyko goyti te tarakenakae doyra oyra toram re no aro, soy oyra moyra aratanaeni ka oye sa tutungono te kue itu, sa voy.

38<<Aro ko kuo koype amo re karabite ave sinani. Oyra mo sipi no qoti kama saqi lei ne doyra to, no aro kama oyke ne qo to ka Ramu te vaua mo pita pupura. 39Aro kama iro velini me qo pita pupura ka voye vale oyra pita peru te kue re, aro to ko lipo ka pita pupura sa lie. No re ko soynani aqo ro me soka ka pita pupura ka soko te kose ba tava no aro ko soka. 40Aro ko seva: Te tava sa oyke aqo voyla no te kose sa oyke aqo lulum no pam sa paki kesini mata qu soy. 41Sa seva ta, te karabite ave aro ko kuo koype pupu te re. Aro ko jaju koyna amo re manovati ave te keri tomquole no unomo ave soy me pale mo vaua pitapupura, ba re ko soka nguta qu mano sada. 42Be voy Bangara te tamaqu, Bangara te Ebarahami no Bangara aravaisi te Aisake kama kuo una vo aqo ro, be voy re ko vazo saru aqo ro. Ba Bangara sa mia qo taka no jaju voyla te koyrisiqu, no kosene oye sa poyeni amo re,>> sa voy.

43Lebani sa vatavele la te kue Jikope, <<keri quole goyti kuru toqu ro, oyra so ne, ka so ta ro, oyra vaua pita pupura goyti ka kini ta ro. Taba oyra pita re ko mia goyti sa kini ta ro beito to. Ba ata pita aro me joyjuni te kue oyru keri toqu quole no oyra babanoqu ka puodo te kue oyru? 44Zo me sinani re no aro matu vadere vato- arapokitini, soy me lalae miae tutuna te arakaluboroa do itu,>> sa voy.

45Si, Jikope sa pale katora no sa vadere sa seva kieke katora vojele. 46Sa voy goyti oye te kue oyra torae, <<Quqene me kavia katora.>> Si, oyra ka pale me oyra katora no ka quqene te puturu, no oyra ka aki te teqia puturu katora. 47Lebani sa vataritingini ngoyni ta Jeqa Sahaduta,#31.47 Te ngelu ni Aramaiki lolopoa ngeoro Jeqa Sahaduta ne puturu. no Jikope sa vataritingini Qalidi.#31.47 Te ngelu ni Iburu lolopoa ngeoro Qalidi ne puturu

48Sa voy goyti Lebani, <<Puturu katora goyti sa lalae miae tutuna te arakaluborom re no aro tava ini,>> sa voy ta oye si ka kelikini Qalidi. 49Kakelikini vele ngoyni ta Mizipa, bati oye sa voy, <<Tani Iaova me mia toyke amo re no aro te sada itu katu kuo araoylea. 50Sada re ko vatakani keri toqu quole ro ba ko reke vele ka oyra quole, kareo ka oye sa kuo una itu, ba re mo noyne velini Bangara sa mia tutuna te arakaluborom re no aro soy,>> sa voy.

51Sa voy vele goyti Lebani te kue Jikope, <<Mia! Goyti puturu katora no mia! Goyti katora vojele aro ko vadere te kue re no aro. 52Puturu katora goyti sa lalae miae tutuna, no katora vojele goyti sa lalae miae tutuna, soy aro kasi qo koye puturu goyti soy me vatakani amo re no re kasi mo koye puturu goyti no katora vojele te neva te ro soy mo vatakani aqo ro. 53Tani Bangara te Ebarahami no Bangara te Naoa, no Bangara te oyra tamae doyra, me aratanaeni itu.>> Si, Jikope sa maulu te luoboroa toritongoa Bangara te tamae oye Aisake.

54Oye sa kea la kieke vavakatu te vodu supu no sa surini oyra torae moyra me una te aki. Rokusua sada oyra ka aki, oyra ka pam te vodu supu te kose noyene.

55Te saruku pipi tava belanae Lebani sa noko oyra babunu no keri toytuquole no sa manani oyra. No oye sa kesini oyra no sa seipele vele napu te kumala.

Currently Selected:

Genesis 31: BAA

Highlight

Copy