Genesis 32

Jikope sa Vanama me Tepere Iso

1Jikope sa zo nukoro la te ona zo, no oyra matizana te Bangara ka tepere oye. 2Sada Jikope sa mia oyra matizana, oye sa voy goyti, <<Goyti oyra vai aratara te Bangara!>> Sa voy ta oye si, oye sa vataritigini ngoyni ta Mahanaimi.#32.2 Te ngelu ni Iburu lolopoa ngeoro Mahanaimi ne keri toypaka.

3Jikope sa peqani kineke la oyra boysi ka iro vatana te kue likae oye Iso te kolabae Seyo, vodu ni Edomu. 4Oye sa varuini oyra: <<Goyti pita ram mam la soynani qo buoe Iso: <Mo nabulu Jikope sa voy goyti, Aro ko kuo koype Lebani no sa doka to sinani. 5Aro ko tungene bulumakao oyra dongki, no sipi no qoti, no oyra sika leike no sika quole. Sinani aro ko peqani vatana goyti te kue re qo buoe voy re mo kemani aqo,> >> sa voy.

6Sada oyra boysi ka iro vatana ka vele napu me te kue Jikope, ka voy goyti oyra, <<Rami kami la doka te kue likam Iso, no sinani oye sa zome me tepere amo re, no oye sa kinikini me vati ubi boysi,>> ka voy.

7Jikope sinani sa isi varoka no sa totoqu, oye sa ota oyra boysi ka zo koype oye te keri kua, no oyra ona vaua sipi, no qoti no oyra bulumakao no oyra kamele soy. 8Oye sa nanana seva goyti, <<Sada Iso sa me no sa voye kua kinaka vakeria kua sa kuo me paki,>> sa voy.

9Sinani Jikope sa vivisi, sa voy goyti oye, <<Bangara te tamaqu Ebarahami, Bangara te tamaqu Aisake, re Iaova, ko soynani moyna aqo, <Mo seipele vele la te mo vodu no te kue oyra toram, no aro me rakisini amo re,> 10Aro kama gaevo aqo tabae mo vato noyi no mo kuo vanadu re ko vatakabola moyna te kue mo nabulu. Aro ko iro to qo puru sada aro ko koydo vuru ni Jodani goyti, ba sinani aro ko kinikini keri kua goyti. 11Mo vakavele aqo te koyrisia likaqu Iso, aro ko vivisi, bati aro ko isi moyna voy oye sa me no aratara te kue ro, no sa seva to oyra quole no oyra so. 12Ba re ko soyna moyna, <Sa tuna aro me rakisini amo re, no aro me koyna amo oyra sokutu arasumam me seva dongae oyra karakone te masi, sa taka ngeae,> >> ko voy.

13Te kose noyene Jikope sa kuo te ngoyni noyene, oye sa vene kavia pita pupura me koyna likae oye Iso; 14keriubi oyra qoti quole no karabite qoti leike, keriubi sipi quole no karabite sipi leike, 15tolongonu kamele quole no oyra toytu, vatingulu bulumakao quole no mano bulumakao leike no karabite dongki quole no mano dongki leike. 16Oye sa toyro te kue oyra ona nabulu moyra miatoyke, susupae kuae doyra oyra vau, no sa soynani oyra ona nabulu, <<Kado latu te tarakenaka qu ro, no mam vataqala arakaluoboroa susupae doyra oyra vaua pita pupura,>> sa voy.

17Oye sa varuini nabulu sa kinaka, <<Sada likaqu Iso sa tepere amo re no sa tana, <Ada mo buoe re, no be mo zo voy, no ada sa tungene oyra pita pupura re ko kinikini me?> 18no re mo voy goyti, <Mo nabulu Jikope sa tungene oyra pita pupura goyti. Oye sa peqani me oyra pita pupura goyti sa seva kieke keke te kue qo buoe Iso, no oye sa rokisini me rami,> >> mina voy.

19Oye sa varuini noypo vakeria, vatulua no te kue oyra taba vele ka zo koype oyra vaua pita pupura <<Ram mam soyna to pita araviri te kue Iso sada kam tepere oye, sa voy. 20No ram mam soyna, <Vanata! Mo nabulu Jikope sa rokisini me rami.> >> Bati oye sa noyne, <<Aro me vatalasirini oye oyra keke aro ko peqani kineke la; rokusu sada aro ko tepere oye, moyna oye me kolani aqo ro,>> sa voy 21Si, oyra ona keke Jikope sa peqani kineke la, ba tani sa kuo te ngoyni sa toypakae te kose noyene.

Jikope sa Aratara koype Bangara

22Te kose noyene Jikope sa vanama no koype keri ona quolekutae, keri ona sikaquole no manokeike toytuleike no ka kadu te vuru ni Jeboki. 23Sada oye sa peqani vakoydo soypa oyra koydu vuru, oye sa peqani vakoydo vele taba oyra pita oye sa tungene. 24Tani to Jikope sa kuo veke, no keike boysi sa me arabongu koype oye doka te saruku lolongoro. 25Sada boysi noyene sa mia utini oye kama karapota koye vo oye, oye sa voye la kuokuopetea Jikope sa tajolu sada oye sa arabongu koype boysi noyene. 26Sa voy goyti boysi noyene, <<Mo soypalure aqo ro me zo, bati sa saruku lolongoro.>>

Ba Jikope sa vatavele la, <<Aro kama voyqo soypalure amo re, sada re aba kama manani mo aqo,>> sa voy.

27Boysi noyene sa tanani oye, <<Ada taritongom re ne?>> sa voy.

Oye sa vatavele la, <<Jikope>> sa voy.

28Sinani sa voy goyti boysi noyene, <<Taritongom re sinani kama Jikope vo, ba Izireli, bati re ko petolo koype Bangara no oyra boysi no ko palata,>> sa voy.

29Sa voy goyti Jikope <<Ke! Mo soynani vele aqo ro taritongom.>> Ba sa voy goyti oye, <<Be sa voy re ko tana taritongoqu ro ne?>> Sa voy.

Sinani oye sa manani Jikope te ngoyni noyene.

30Sa voy ta oye, Jikope sa vataritingini ngoyni ta Penieli, bati sa voy goyti oye, <<Aro ko mia Bangara kuru aravakomatae, no aro aba ko tu,>> sa voy.

31Ngada sa puka me sada oye sa kesini Penieli, no oye sa jokoviuru bati sa tajolu kuokuopetea. 32Ta te sa voy oye, oyra boysi ni Izireli kama oyke doyra zio sa kuo te kuokuopete doka te sada sinani, bati kuokuopetea Jikope ka voye vatanga te doylia.

Currently Selected:

Genesis 32: BAA

Highlight

Copy