Genesis 30

1Sada Riseli sa utini oye sa taka me toyro koyna Jikope ka so, oye sa mesini likaequole. Si sa voy goyti oye te kue Jikope, <<Mo koyna aqo ro so, ba aro ini me lei!>> Sa voy.

2Jikope sa momani Riseli no sa voy goyti <<Be sa voy aro ko araviri Bangara, oye sa sedeni amo re mo tungene ka so ba?>> Sa voy.

3Sa voy goyti Riseli, <<Goyti Bilah, qo quolesika. Re mo vakapoymo oye soy oye me tungene koyna aqo ro oyra so no te kue oye aro vele me zari qo tunitatama,>> sa voy.

4Sa voy ta oye si, Riseli sa koyna Jikope Bilah ona nabulu sa seva quolekutae. Jikope sa vakapoymo oye, 5no Bilah sa araeiro no sa vapuodo koyna oye kieke toytuleike. 6Sinani sa voy goyti Riseli, <<Bangara sa aratanaeni aqo ro; oye sa ase voanga qu no sa koyna aqo ro kieke soleike.>> Sa voy ta si, oye sa vataritingini oye Dani.

7Bilah nabulu te Riseli sa araeiro napu no sa vapuodo koyna Jikope vakeria toytuleike. 8Sa voy goyti Riseli <<Aro ko aratara varoka te kue likaqu quole no aro ko palata.>> Si, Riseli sa vataritingini oye Napatalae.

9Sada Lia sa mia utini oye sa beito tungenea so, oye sa koyna Jikope, Zilipa ona quolesika sa seva quolekutae. 10Zilipa ona nabulu Lia sa vapuodo koyna Jikope kieke toytuleike. 11Sa voy goyti Lia, <<Aro ko mangana!>> Si, sa vataritingini oye Qadi.

12Zilipa nabulu te Lia sa vapuodo koyna Jikope vakeria toytuleike. 13Sa voy goyti Lia, <<Ke aro ko kola sua! Oyra quole moyra kelikini aqo ro kola.>> Si, oye sa vataritingini oye Asa.

14Te sadae papala vuiti, Rubeni sa la te barue no sa la poyta kavia pita titiba ka keilikini Madareki, sa iro la te kue sinae oye Lia. Sa voy goyti Riseli te kue Lia, <<Kei mo koyna aqo ro kavia madareki te tomleike,>> sa voy.

15Ba sa voy goyti Lia te kue oye, <<Aba kama gaevo re ko palekesini qo leikekutae ba? Sinani mo pale vele Madareki te qo so ko voy ba?>>

Sa voy goyti Riseli, <<Sa noyi to! Jikope me pam koype amo re kose ini, ngutae ona Madareki tomleike,>> sa voy.

16Sada Jikope sa vele napu me te barue te vilu noyene, Lia sa juolo la sa la tepere oye. <<Re mo me pam koype aqo ro, bati aro ko ngotani moyna amo re ona madareki toquleike,>> sa voy. Si, Jikope sa la vakapoymo oye te kose noyene.

17Bangara sa vanata Lia, no oye sa iro so no sa vapuodo koyna Jikope valoymae toytuleike. 18Sa voy goyti Lia, <<Bangara sa koyna aqo ro porae bati ko kea qo quolesika te kue qo leikekutae.>> Si, oye sa vataritingini oye Aesaka.

19Lia sa araeiro napu no sa vapuodo koyna Jikope vaunomoa toytuleike. 20Sinani sa voy goyti Lia, <<Bangara sa koyna aqo ro kieke keke noyi. Te sada goyti qo leikekutae me vamata aqo ro, bati aro ko vapuodo koyna oye unomo toytuleike.>> Si oye sa vataritingini oye Zebuloni.

21Sa paqolo soypa kavia sada oye sa vapuodo kieke soquole no oye sa vataritingini oye Daena.

22Sinani Bangara sa noyne velini Riseli; no sa vanata oye no oye sa deke pipisia Riseli me vere vataba. 23Oye sa araeiro no sa vapuodo kieke toytuleike no sa voy goyti oye, <<Bangara sa pale kesini qo mamaqatae.>> 24Oye sa vataritingini oye Josepa, no sa voy goyti, <<Tani Iaova me koyna aqo ro kieke vele toquleike,>> sa voy.

Oyra Pitapupura te Jikope ka zadava

25Te rokusua Riseli sa vapuodo Josepa, sa voy goyti Jikope te kue Lebani, <<Mo peqani vavelini aqo soy me vele napu te qo vodu vatasuku. 26Mo koyna aqo ro keri qo quolekutae no oyra qo so, oyra aro ko jaju tae koyna amo re, no aro me zo. Re ko utini aro taba jaju ko joyjuni moyna koyna amo re.>>

27Ba sa voy goyti Lebani te kue oye, <<Sada re ko kemani aqo ro ne, moyna ko zo, aro ko utini te roverove Iaova sa manani aqo ro bati re ko me kuo te kue ro.>> 28No oye sa voy goyti, <<Mo soyna ngutam no aro me ngota.>>

29Sa voy goyti Jikope te kue oye, <<Re ko utini ngoyni sa voy aro ko jaju vakarapota koyna amo re no oyra mo vaua pitapupura ka zadava te qo aramitoyke ro. 30Pita soito re ko tugnene korovita me qo ro, ba sinani sa ngenge puka varoka, no Iaova sa manani amo re te oyra ngoyni aro ko kobe. Ba sinani sa gae aro me vazopoka vele kuokuo te qo tatama,>> sa voy.

31Sa voy goyti oye, <<Ata pita aro me koyna amo re?>>

Sa voy goyti Jikope te kue oye, <<Aro kama soyko qo re mo koyna aqo ka pita. Ba re mo joyjuni koyna aqo ro pita goyti, aro me asetoyke la vaua oyra mo pitapupura no perini oyra, sa voy. 32Mo vamoyo aqo me zuole luoboroa vaua doyra oyra mo pitapupura tava ini no me pale vaoyle susupae doyra oyra toytu sipi ka kadokado ba ka supisupi, susupae doyra oyra toytu sipi ka poto, no susupae doyra oyra qoti varoqa ka supisupi ba ka kadokado. Oyra ta to nguta qu ro. 33No te sada aba kuo me re ko majala utini vanoyi moyna aro ko tutuna, sada re ko ile nguta ko ngotani aqo ro. Sada sa kuo te kue ro ka qoti kama kadokado vo ba kama supisupi vo ba ka sipi kama poto vo, re mo utini aro ko soko oyra pitapupura ta,>> sa voy.

34Sa voy goyti Lebani, <<Sa noyi to, itu matu joyjuni pita re ko soyna.>>

35Te tava noyene to Lebani sa pale kesini beito oyra qoti leike ka seara ba supisupi, no taba oyra qoti quole ka kadokado ka supisupi (tabae doyra oyra ka sile) no oye sa pale kesini vele taba oyra sipi poto soy. Oye sa vamiatoykini oyra toytuleikea tani. 36Sinani, oye sa zo gae tulu tava koyua te arakaluboroa tani no Jikope, te sada noyene Jikope sa asetoyke oyra sipi te Lebani. 37Jikope sa pale voyqe azu popola, modo no azu suosuoe no sa ulo sia koypae soy me takabula me silea no luoboroa azu sile te oyra voyqe. 38Oye sa toyro oyra voyqe noyene te oyra parepare, soy me vakomana la vaua pitapupura te sada kame turepe bi, sada oyra pita pupura ka vanama ni aratepiri no ka me turepe bi, 39oyra pitapupura ka aratepiri te tarakenakae oyra voyqe. No oyra ka vapuodo toytu seara ba kadokado ba supisupi. 40Jikope sa ota vike oyra toytu sipi no sa vataleiqe la oyra te neva sa kue oyra vaua pitapupura te Lebani ka poto, ba ka kadokado, sa seva goyti, oye sa ota ona vaua pitapupura tani no sa toyro vaoyleni oyra vaua sipi te Lebani. 41Sada oyra pitapupura quole karapota ka soyko aratepiri, Jikope sa toyro oyra voyqea azu te parepare te tarakenakae doyra oyra pitapupura soy oyra moyra aratepiri vatanga te oyra voyqe, 42ba sada oyra pita pupura ka mimilaka, oye kama toyro vo oyra te ngoyni ta. Si oyra pita pupura ka mimilaka ka vele la te kue Lebani no oyra ka karapota ka kuo te kue Jikope. 43Te zoka goyti Jikope sa ngenge puka vanoyi tutuparia no sa tungene taba oyra vaua sipi, no taba quole sika no leike sika, no oyra kamele no oyra dongki soy.

Currently Selected:

Genesis 30: BAA

Highlight

Copy