Genesis 29

Jikope Sa doka Paddani Aramu

1Jikope sa zo nukoro la no sa doka te vodu te oyra boysi te neva sa pukae me ngada. 2Te ngoyni noyene oye sa mi la no da soy kieke bi quara sa ku gei, no da soy, tulu vaua sipi ka bokolo te tavelea, bati te bi quara ta, ka la vaturipi ni bi oyra vaua sipi oyra boysi ka miatoyke sipi susupae tava. Kieke katora lata sa kupene jopae quara. 3Sada oyra vaua sipi ka araququni beito me, oyra boysi ka miatoyke sipi ka bekele vaoyle katora te jopae bi quara no ka sope bi no ka koyna oyra sipi. Beito ta oyra ka bekele vavelini la katora te jopae bi quara.

4Sinani Jikope sa tanani la oyra boysi ka mia toyke sipi, <<Ram likaqu, be boysi ni ram?>> sa voy.

<<Rami boysi ni Harani,>> ka voy.

5Sa voy goyti oye te kue oyra, <<Kam utini Lebani, babunuleikea Naoa ba?>> Sa voy.

<<Rami kami utini oye,>> ka voy.

6Sinani Jikope sa tanani oyra, <<Sa kuo vanoyi tani ne ba?>> sa voy.

Oyra ka voy <<Oye sa kuo vanoyi to, mia la toytuquole oye Riseli sa koype me oyra vaua sipi gei,>> ka voy.

7Sa voy goyti Jikope <<Mia! Gnada aba kuo zaka; korovita sadae vo mam araququni ni vaua sipi. Ram mam dada koyna ne bi oyra sipi no mam koype vavelini la oyra te ngoyni moyra akia,>> sa voy.

8Ka voy goyti oyra, <<Rami kama majala mami pasina moyra me araququni beito ne oyra taba vaua sipi, no katora te jopae bi quara moyra bekele. Sinani rami mami sope bi mami koyna oyra sipi,>> ka voy.

9Sada Jikope aba sa vakangiere oyra, Riseli sa me doka, sa koype me vaua sipi te tamae, bati oye sa quole mia toyke sipi. 10Sada Jikope sa mia Riseli toytuquole Lebani, vavinia sinae, no oyra sipi te Lebani vavinia sinae, oye sa zo la no sa bekele sia katora te jopae bi quara no sa sope koyna bi oyra sipi te Labani vavinia sinae. 11Sinani Jikope sa noko Riseli no sa ukulu te qila. 12Oye sa soynani Riseli aro toraea tamam, no toytuleike Ribeka. Sa voy ta oye, Riseli sa jikele la no sa la soynani tamae.

13Sada Lebani sa ase vatanae Jikope, toytuleike vavinia, oye sa dada sa la tepere oye. Lebani sa kange oye no sa noko oye no sa koype la oye te toke, no Jikope sa soynani oye taba oyra pita sa doka moyna. 14Sa voy goyti Lebani te kue oye, <<Re ko peta madaka qu no senini qu ro,>> sa voy.

Jikope sa Reike Lia No Riseli

Rokusua ta, Jikope sa kuo koype oye te totongonia ukene.

15Sa voy goyti Lebani te kue oye, <<Sa tuna re ko toraqu vatasuku ro, ba re kama jaju ulomo mo koyna aqo ro. Mo soynani aqo ro be me voy ngutam,>> sa voy.

16Sinani Lebani sa kuo keri toytuquole; kajia ka vataritingini Lia, no soa ka vataritingini Riseli. 17Lia sa mataromoso, ba Riseli sa miminoyi no kaluole. 18Jikope sa noyne Riseli no oye sa voy, <<Aro me jaju koyna amo re vetu ave no re mo kea aqo ro Riseli mo soquole soa,>> sa voy.

19Sa voy goyti Lebani, <<Sa noyi koyini aro me koyna amo re Riseli sada aro me koyna boysi veke. Re mo kuo to te kue ro,>> sa voy. 20Si Jikope sa jaju vetu ave soy me pale Riseli, ba vetu ave sa seva to kavia tava te kue oye bati oye sa noyne Riseli.

21Sinani sa voy goyti Jikope te kue Lebani, <<Kea aqo qo quolekutae. Sa beito qo sada, no aro ko soyko me vakapoyto oye,>> sa voy.

22Si Lebani sa surini me oyra boysi taba te ngoyni noyene no sa joyjuni kieke naki arareki. 23Ba te viluvilu, Lebani sa koype la toytuquole oye Lia no sa koyna Jikope, no Jikope sa vakapoyto oye. 24No Lebani sa koyna toytuquole oye Lia, ona nabulu quole kakelikini Zilipa me ona quolesika oye.

25Te saruku, da soy oye sa mia oye Lia moyna! Si sa voy goyti Jikope te kue Lebani, <<Be sa voy re ko joyjuni pita goyti te kue ro ne? Aro ko jaju koyna amo re soy me reike Riseli. Be sa voy re ko vaqoylo aqo ro ne?>> sa voy.

26Lebani sa vatavele la, <<Kama tamana ni vo te vodu goyti te moyra kea soquole soa dakana moyra kea kajia ne. 27Me soporo ne vuikia kolania arareki te Lia; aro me koyna vele amo re Riseli soquole soa ba re mo jaju koyna aqo ro vetu vele ave,>> sa voy.

28Jikope sa tuqini to, sa vasepere vuikia kolania arareki te Lia, no Lebani sa koyna vele oye Riseli me ona quolekutae. 29Lebani sa koyna toytuquole oye Riseli, ona nabulu quole ka kelikini Bilah me ona quolesika. # 30Sa voy ta oye, Jikope sa vakapoyto vele Riseli, no oye sa noyne koyini oye Lia. No oye sa jaju vele koyna Lebani vetu vele ave.

Oyra Toytu Jikope

31Sada Iaova sa mia Jikope kama noyne vo Lia, oye sa deke pipisia Lia me vere vataba, ba Riseli sa moymoyre. 32Lia sa araeiro no sa vapuodo kieke toytuleike. Oye sa vataritingini Rubeni, bati oye sa voy, <<Iaova sa mia qo taka. Sinani qo leikekutae me noyne aqo ro,>> sa voy.

33Sinani oye sa iro noypo so, no sada oye sa vapuodo keike toytuleike no sa voy goyti oye, <<Bati Iaova sa ase aro kama noyne doyra aqo, si oye sa koyna vele aqo ro kieke vele goyti.>> Lia sa vataritingini oye Simioni.

34Lia sa iro noypo so, sada oye sa vapuodo kieke toytuleike sa voy goyti oye, <<Sinani te sada goyti qo leikekutae me keko aqo ro bati aro ko vapuodo koyna oye tulu toytuleike.>> Si, sa vataritingini oye Livai.

35Oye sa iro noypo so, sada oye sa vapuodo keike toytuleike sa voy goyti oye, <<Te sada goyti aro me vasera Iaova,>> sa voy ta oye, sa vataritingini oye Juda. No oye sa beito tungenea so.

Currently Selected:

Genesis 29: BAA

Highlight

Copy