Luk 14

Jesu Sinmwi Okpia Ọkpa Ne Ọ Khuọnmwi

1Ẹdẹ ọkpa, vbe Ẹdẹ Ikẹtin, Jesu keghi ya rri evbare vbe owa Farisi kpataki ọkpa, emwa ni bun kegha baba Jesu. 2Okpia ọkpa ne obọ ẹre vbe owẹ ọre hinmwiaẹn keghi bu Jesu rre. 3Jesu keghi yama avbe iran ni ma emwa Uhi kevbe avbe Farisi wẹẹ, “Uhi ima gele kha ne a gha sinmwi ọmwa vbe Ẹdẹ Ikẹtin ra ọ ma kha vberriọ?”

4Sokpan ehia keghi hunwan, Jesu keghi mu okpia nii, ọ na sinmwi ẹn, ọ na wẹ ne ọ gha rri owa. 5Ọ keghi khama iran wẹẹ, “Gha nọ vbe uwu uwa ne ovbi ẹre ra ẹmila ẹre gha de fi uhae vbe Ẹdẹ Ikẹtin ne ẹ i ra si ẹe ladian vbe ọwarọkpa nii?” 6Sokpan a ma miẹn ne ọ sẹtin rhie ewanniẹn ye ọre ẹmwẹ na.

Azemwiobọ Kevbe Imuegberriotọ

7Jesu ghi ghe vbene emwa ne a tie re sinmwi egbe ye ehe ne ọ maa sẹ hẹẹ, ọ keghi kpa itan na ma iran, 8“Ọmwa gha tie ruẹ ye ehe evbare irhiọha ghẹ ya tota ye ehe ne ọ maa sẹ ehia, rhunmwuda a sẹtin miẹn wẹ a vbe tie emwa ne ọ sẹ ruẹ. 9Ọmwa ne ọ yan owa ne ọ tie uwa eva gha ghi rre, ọ ghi do tama ruẹn wẹẹ, ‘Kpaegbe nẹẹn tota ye emwa.’ Ẹghẹ nii ekhue ghi mu uẹn, u ghi ya tota ye odieke gbaan. 10Ne ọ maa sẹ ọrọre wẹẹ, a gha tie ruẹ, ya tota ye odieke gbaan, ne a miẹn wẹ ọmwa ne ọ tie ruẹ gha ghi rre, ọ ghi tama ruẹn wẹ, ‘Ọse mwẹ, larre do tota ye ehe ne ọ maa sẹ vbe edinran.’ Ẹghẹ nii, u ghi ye gẹdẹgbẹẹ vbe aro iran ne a tiere nii. 11Rhunmwuda, ọmwa ne ọ tọn egbe mu, a gha mu ẹn rriotọ, ọmwa ne ovbe mu egbe ẹre rriotọ, a gha tọẹn mu.”

12Jesu keghi tama ne ọ yan owa wẹẹ, “U gha le evbare tie emwa sẹ owa, ghẹ gha tie avbe etuẹn ne ikpia ra ẹgbẹe ruẹ ra emwa ẹdogbo ruẹ ni fe, rhunmwuda iran gha vbe tie ruẹ sẹ owa. iran ghi ha osa emwi ne u ru nuẹn. 13U gha le evbare, ya tie avbe ivbiogue, avbe arọe, avbe uke kevbe arhuaro, 14a gha fiangbuẹ, rhunmwuda iran i sẹtin ha ruẹ use. Osanobua gha ha ruẹ osa vbe ẹghẹ ne a gha na huẹn avbe emwata kpaegbe vbe idin.”

Itan Eghọ Nọkhua

(Matiu 22:1-10)

15Ọkpa vbe uwu emwa ni rre evba ghi họn ẹmwẹ na, ọ wẹẹ, “Ọ ma kan iran ni gha rri evbare vbe Arriọba Osanobua.”

16Jesu keghi tama rẹn wẹẹ, “Okpia ọkpa le evbare nọkhua, ọ keghi tie emwa ni bun ẹsẹse. 17Ọ ghi sẹ ẹghẹ ne a ya rri evbare, ọ gie ne a khama iran ne ọ tiere wẹẹ, ‘Wa gha dee ighe a mu egbe nẹ.’ 18Ọkpọkpa vbe uwu iran keghi suẹn gha zẹ okeke. Ne okaro tama ọguọmwadia nii wẹẹ, ‘I dẹ ugbo ọkpa, ẹ i mwẹ I ma ya ghe ẹre, lahọ ghẹ gui.’ 19Ọvbehe keghi vbe kha wẹẹ, ‘I dẹlẹ ẹmila ne a ya gua igbe, I ra ya danmwẹ iran ghe, lahọ ghẹ gui.’ 20Ọvbehe kevbe kha wẹẹ, ‘Te I da rhie okhuo na, rhunmwuda ọnii, I i sẹtin rre.’ 21Ọguọmwadia nii keghi ya na iyẹn emwi na ma arowa ẹre. Ohu keghi kakabọ mu ne ọ yan owa nii, ọna tama ọguọmwadia ẹre wẹẹ, ‘Ẹgiẹgiẹ, gha rrie adesẹ idunmwu kevbe ivbiodẹ ni re ẹvbo na, ya viọ avbe ivbiogue rre, avbe arọe, arhuaro kevbe uke.’ 22Ọguọmwadia nii keghi vbe rre do tama rẹn wẹẹ, ‘Enọwanrẹn, a ru nẹ vbe ne u gie, sokpan evba ma he ye vẹn.’ 23Arowa nii keghi khama ọguọmwadia nii wẹẹ, ‘Gha rrie ivbiodẹ kevbe odẹ nekhua ọghe ẹvbo na, viọ ẹvbo rre, ne owa mwẹ miẹn ehe na vuọn. 24Ne I tama uwa hia, iran ne a tiere nii, ne ọ gha ghi ye unu kan evbare mwẹ, ẹ i rrọọ.’ ”

Vbene Ẹmwẹ Ọrhuanegbe Baa Hẹ

(Matiu 10:37-38)

25Emwa keghi gha bi lele Jesu khian, rẹn keghi gbe aro ghe iyeke ọ wẹẹ, 26“Ọmwa ne ọ bu mwẹ rre, ẹ i sẹtin ru ọrhuanegbe mwẹ, deghẹ i re te ọ khuiwu erha ẹe, iye ẹe, amwẹ ọnrẹn, ivbi ẹre, etiọnrẹn ne ikpia kevbe etiọnrẹn ne ikhuo. 27Ọmwa ne ọ ma mu ugbugbe ẹre ne ọ lele mwẹ, ẹ i sẹtin ru ọrhuanegbe mwẹ. 28Deghẹ ọkpa vbe uwu uwa ra bọ owa, ọ ghi tota ka roro igho ne ọ gha gbe nẹ, ne ọ miẹn ehe na rẹn a deghẹ rẹn mwẹ igho ne ọ gha gba ẹre. 29Deghẹ ọ ma ru vberriọ, na ghẹ i miẹn wẹ ugbẹn vbe ọ gha ghi gbe ẹyotọ nẹ, ọ ma miẹn igho ya bọ owa ni fo, emwa ni miẹn emwi ne ọ sunu ghi gha ta ẹre giẹ, 30wẹ, ‘Okpia na suẹn owa gha bọ, sokpan ọ ma sẹtin bọe fo.’ 31A deghẹ ọba ọkpa viọ ivbiyokuo arriaisẹn igbe rrie okuo ne ọ ya gu ọba ne ọ mwẹ ivbiyokuo arriaisẹn vbe ihe ugie gbinna, te ọ gha ka tota rorọe nẹ a deghẹ rẹn wo vbe egbe sẹ ne ọ gha mu aro da ọba nii. 32Deghẹ ọma ru vberriọ, urria ọre ọ ra na gie uhunmwu ya vba ọba nọkpa, Ọ ghi rinmwian ẹn wẹ ne ọ gie iran mu ẹzọ ye otọ.” 33Jesu keghi kha wẹẹ, “Erriọ ọ wa ye zẹ, ne ọ gha sẹtin ru ọrhuanegbe vbe uwu uwa i rrọọ a deghẹ Ọ ma sẹ emwi nẹ ọ mwẹ hia rae.

Umwẹ Ne Ọ Ku Ẹki

(Matiu 5:13; Mak 9:50)

34“Umwẹ maa, sokpan orhiẹnrhiẹn ọnrẹn gha fafa nẹ, emwi ne a gha ya ruẹe ne ọ do gha rhiẹnrhiẹn i rrọọ. 35Ẹ i ghi maa ne otọ kẹkan ra ekẹn nekhui ne a ya kọ emwiokọ, te a ghi ra mu ẹn kua. Ne ọ mwẹ ehọ ne a ya họn, gie ẹe họn!”

Currently Selected:

Luk 14: EDO96

Highlight

Copy