Luk 13

Zobọ Vbe Ọkhọ Ra, Ne U Ya Uhunmwu Khiọre

1Ẹghẹ nii, iran eso vbe evba kegha na iyẹn ma Jesu vbene Pailet gbele emwa Galili eso hẹ vbe iran wa zọ ese ghe Osanobua. 2Jesu wanniẹn tama iran wẹẹ, “Wa yayi ighẹ vbene a gbele iran na wa rhie maa ighẹ iran ọre ọ ru orukhọ sẹ emwa Galili nekpa hia? 3Ẹ i re erriọ! Ne I tama uwa nian wẹ deghẹ i re te uwa dobọ orukhọ yi, erriọ wa hia gha vbe wulo. 4Iran evairrọvbugie ni wulo vbe ihie siẹn rhu iran vbe Siloam vbe vbo? Wa yayi ighẹ ọnii rhie maa ighẹ iran ọre ọ ru orukhọ sẹ emwa ni rre Jerusalẹm hia? 5Ẹ i re erriọ, ne I tama uwa nian wẹ deghẹ i re te uwa zobọ vbe orukhọ na ru, erriọ wa hia gha vbe wulo.”

Itan Erhan Ohọ Ne Ọ Ma Mọ

6Jesu keghi kpa itan na ma iran: “Okpia ọkpa kegha mwẹ erhan ohọ vbe uwu ogba azara ẹre. Rẹn keghi ya gha gualọ ọmọ vbe uhunmwu ẹnrẹn, sokpan ọ ma miẹn. 7Rẹn na rhunmwuda ọnii tama ne ọ gbearoghe ogba nii wẹẹ, ‘Ghe ke ukpo eha gha dee ọre I kegha gualọ ọmọ vbe uhunmwu erhan ohọ na, I ma miẹn. Tọn ẹn fua, vbọzẹ ne ọ gha na gha mu otọ kua kẹkan.’ 8Sokpan ne ọ gbe aro ghe ogba nii keghi wanniẹn wẹẹ, ‘Arowa mwẹ, he zẹ ọre obọ nẹ vbe ukpo na ọkpa kẹkan, I gha do guọlọ uvun lẹga ẹre, I ghi zẹ ekẹn nekhui yọ. 9A deghẹ ọ ghi mọ ukpo ne ọ dee, ọ wa maa, sokpan deghẹ ọ ma ghi mọ, u sẹtin tọn ẹn fua.’ ”

Jesu Sinmwi Okhuo Ne Asuke Vbe Ẹdẹ Ikẹtin

10Vbe Ẹdẹ Ikẹtin ọkpa, Jesu kegha ma emwa emwi vbe uwu Ọgua ediọn. 11Okhuo ọkpa ne ọ khuọnmwi ke ukpo evairrọvbugie gha dee keghi rre evba, orhiọn dan ne ọ rre uwu ẹre ọre ọ si emianmwẹ na ye ọre egbe. Te ọ ghi so uke, ẹ i sẹtin nien egbe ua. 12Jesu ghi bẹghe ẹre, ọ tama rẹn wẹẹ, “Okhuo na, a rhan ruẹn hin obọ emianmwẹ ruẹn re.” 13Rẹn keghi rhie obọ yan rẹn, ọwarọkpa nii okhuo nii keghi nien egbe ua, ọ na gha rho Osanobua vbe uyi. 14Ohu keghi mu enọ gbe aro ghe Ọgua ediọn rhunmwuda ighe Jesu sinmwi ọmwa vbe Ẹdẹ Ikẹtin, rẹn keghi rhunmwuda ọnii tọn urhu mu tama emwa hia wẹẹ, “Ikpẹdẹ ehan ọre a ya winna, ẹghẹ ni ọre uwa gha na gha rre ne a do gha mu uwa egbe rran ighẹ ẹ i re Ẹdẹ Ikẹtin.”

15Nọyaẹnmwa keghi wanniẹn tama rẹn wẹẹ, “Wa ne emwa ẹkẹ vbe iwẹnwẹn, wa rhan ẹmila ra ẹsin uwa vbe Ẹdẹ Ikẹtin, wa ghi vbe siẹe ladian ya wọn amẹ. 16Ghe ovbi Ebraham na, ukpo evairrọvbugie ọre ọ ye ne Setan ghi mu ẹẹn gba, ọ ma ke ne a rhan rẹn vbe Ẹdẹ Ikẹtin ra?” 17Ewanniẹn ne ọ rhie yọ na keghi wa ya ekhue mu avbe eghian rẹn hia, sokpan ẹko kegha sẹ emwa hia ọyẹnmwẹ rhunmwuda iwinna ọyunnuan ne ọ winnaẹn.

Itan Ikpẹ Mọstad

(Matiu 13:31-32; Mak 4:30-32)

18Jesu keghi kha wẹẹ, “De emwi ne Arriọba Osanobua khọe? De emwi ne I gha yae gie? 19Ọ yevbe ikpẹ mọstad ne ọmwa ọkpa ya kọ ye ugbo ẹre, ovbi erhan nii keghi wan, ọ keghi do khian okperhan, avbe ahianmwẹ keghi ya gha bọlọ oko ye abọ ẹre.”

Itan Ọghe Yist

(Matiu 13:33)

20Jesu keghi vbe dọlegbe nọ wẹẹ, “De emwi ne I gha ye Arriọba Osanobua gie? 21Ọ yevbe yist ne okhuo ọkpa rhie ya gua ọkpan irhuarhua ọkpa, rhirhi ehia ke do hue kugbe.”

Urho Ne Wẹnrẹn

(Matiu 7:13-14, 21-23)

22Jesu kegha lele igue kevbe avbe okpe ẹvbo khian, ọ kegha ma emwa emwi, ọ na gha hẹko khian rrie Jerusalẹm. 23Orhunmwu ọkpa keghi nọ rẹn wẹẹ, “Enọwanrẹn, ibozẹghẹ ọre a gha miẹnfan ra?”

24“Jesu wanniẹn tama iran wẹẹ, ziga ne u la onurho ne wẹnrẹn la owa, ne I khama ruẹn wẹẹ, emwa ni bun ọre ọ gha hia ne iran la owa sokpan iran i sẹtin. 25Ọdafẹn ne ọ yan owa gha guakpao, ọ ghi ya khui urho, ẹghẹ nii, wa ghẹ ghi mudia ye ore gha tie, ‘Enọwanrẹn, kie ne ima!’ rẹn ghi wanniẹn tama uwa wẹẹ, ‘I ma rẹn ehe ne uwa ke rre.’ 26Wa ghi wanniẹn tama rẹn wẹẹ, ‘Ma gu uẹ re, ma vbe gu uẹ daa, u do ma emwa emwi vbe ẹvbo ima.’ 27Rẹn ghi dọlegbe tae wẹẹ, ‘I ma rẹn ehe ne uwa ke rre, wa kpao vbe ehe ne I ye rre, wa ne emwa orukhọ!’ 28Eve kevbe irriakọn nọkhua khian gha nọ vbe uwẹ a ya bẹghe Ebraham, Aizik, kevbe Jekọb deba avbe akhasẹ hia vbe Arriọba Osanobua, vberriọ, a sẹ uwẹ rae ye ore. 29Emwa gha ke odẹ ahọ kevbe orrie, odẹ okuọ kevbe ekẹn rre, iran ghi tota gha rri evbare vbe Arriọba Osanobua. 30Iran ni re ikaro nian gha khian ikiekie, iran ni kiekie gha khian ikaro.”

Vbene Jesu Ho Ẹmwẹ Jerusalẹm He

(Matiu 23:37-39)

31Ẹghẹ nii ọre avbe Farisi eso na bu Jesu rre, iran tama rẹn wẹẹ, “Kpao vbe emwa rre ne u gha rrie ehe ọvbehe rhunmwuda Hẹrọd ho ne ọ gbe uẹ ua.”

32Jesu wanniẹn tama iran wẹẹ, “Wa ya tama umuọkhọkhọ nii wẹẹ, ‘I gha khulo avbe Orhiọn esu ladian, I ghi vbe sinmwi avbe ọkhọnmwẹ ẹrẹna kevbe akhuẹ, vbe ikpẹdẹ ne ogieha, I gha winna iwinna mwẹ fo.’ 33Vbene ọ rhirhi a gha ye hẹ, okhian ọre I ye ye, ẹrẹ akhuẹ kevbe irakhuẹ, rhunmwuda, ẹ i re emwi ne ọ gbae ne a gbe akhasẹ ye ehe ọvbehe gberra adesẹ ore Jerusalẹm.

34“Eu! Jerusalẹm, Jerusalẹm! Wẹ ne ọ gbele avbe akhasẹ kevbe avbe odibo ne Osanobua gie ẹre uhunmwu bu ruẹ gha dee! Inu igba I he te gha ho ne I tan ifuẹn mwẹ ga emwa ruẹn vbe ne iye ọkhọkhọ tan ifuẹn gue ivbi ẹre, sokpan u ma kue. 35Ghe nian, owa ruẹ khian ne a he ye otọ. Ne I tama ruẹn u ighi dọlegbe miẹn mwẹ ọvbehe, ọ te do sẹ ẹghẹ ne u gha na kha wẹ, ‘Ne Osanobua fiangbe ọmwa ne ọ dee vbe eni Nọyaẹnmwa.’ ”

Currently Selected:

Luk 13: EDO96

Highlight

Copy