Levitikọs 14

Akhuẹhuan Ọmwa Ne Ọ Khuọnmwi Emwirregbekẹn

1E Nọyaẹnmwa keghi mwamwa ẹn ne Mosis. 2Vbene a gha ya gha ru ẹmwẹ ọmwa na a sinmwi hin emianmwẹ ikpakpa egbe ne ọ mu ohan hẹ, vbe ẹdẹ ne a ra ta ẹe ighẹ awua ighi guẹe, a ghi rhie ẹre bu ohẹn gha dee. 3Ohẹn ghi rhie ẹre lahin agọ rre ya ghe ẹre egbe. A deghẹ emianmwẹ nii fo, 4ọ ghi wẹ ne a viọ ahianmwẹ eva ne awua i ye rre, ke ẹe kevbe erhan sida, okun ne ọ baa eso kevbe ovbi erhan ebe afọ. 5Ohẹn ghi wẹ ne a gbe ọkpa vbe ahianmwẹ nii ye uwawa ne amẹ ne a da sa ke ẹzẹ rre ye. 6Ọ ghi mu ahianmwẹ nọkpa, ọ ghi fi ẹe ye esagiẹn ahianmwẹ ne a gbe nii, ke ẹe kevbe erhan sida nii, kevbe okun ne ọ baa nii ke ovbi erhan ebe afọ nii. 7Ọ ghi sanmwẹ esagiẹn nii yan ọmwa ne a ra khuẹ hin emwirregbekẹn rre, igba ihinrọn, ọ ghi ta ẹe wẹ ẹ i ghi mwẹ awua. Ọ ghi sẹ ahianmwẹ ne a ma gbe nii rae ne ọ tin la oha gha rrie. 8Ọmwa nii ghi họ ukpọn rẹn, ọ ghi zẹ eto ẹre hia kua, ọ ghi ya khuẹ, ẹghẹ nii, ọ ghi do gha re ne ẹ i ghi mwẹ awua. Ọ sẹtin la uwu agọ sokpan, ọ ghi di owa ẹre ya ọ te sẹ ikpẹdẹ ihinrọn. 9Vbe ikpẹdẹ ne ogihinrọn, ọ ghi vbe dọlegbe zẹ eto, ẹtu, ifuẹn aro kevbe ehe ne eto ghi ye vbe egbe ẹre hia; ọ ghi họ ukpọn rẹn, ọ ghi khuẹ, ẹghẹ nii, ọ ghi do gha re ne ẹ i ghi mwẹ awua. 10Vbe ikpẹde nogierẹnrẹn, ọ ghi viọ ivbi ogho eva kevbe ovbi ohuan amwẹ ọkpa, iran ghi gha re ne ẹ i mwẹ okan, uwan irhuarhua isẹn ne a ya ofigbọn ọliv gbe, ke ẹe kevbe ukhiọnmwẹ ọgọ ọghe ofigbọn ọliv. 11Ohẹn ghi rhie ọmwa na, ke ẹe kevbe emwi izẹọhẹ na, gha rrie onurho Owa Ukpọn Ile. 12Iyeke ọnii ohẹn ghi mu ọkpa vbe ivbi ogho nii, ọ ghi ya ẹe zọ ese zẹ vbe ese a hae werriegbe ke ẹe kevbe ukhiọnmwẹ ọgọ ofigbọn ọliv nii, ọ ghi viọ ẹre rre zẹ vbe ihaoko kpataki gie Nọyaẹnmwa ne avbe ohẹn. 13Ọ ghi gbe ovbi ohuan amwẹ nii vbe ehe ne a na gbele aranmwẹ ese orukhọ ke ọghe ese ne a giẹn uan. Ọ ghi ru ẹe vberriọ, rhunmwuda, izọese a hae werriegbe, zẹ vbene ese orukhọ vbe ye, avbe ohẹn ọre ọ yanrẹn, emwi ne ọ huanrẹn ẹsẹse ọre nọ. 14Ohẹn ghi rhie vbe esagiẹn ovbi ohuan amwẹ nii, ọ ghi rhi ẹre ye etọghọ ehọ obọ erha ọmwa, ikpinhianhọ nogie ọghe obọ erha ọmwa, kevbe ikpinhianwẹ ne ogie ọghe owẹ erha ọmwa ọmwa ne a ra ya khian ne ẹ i ghi mwẹ awua nii. 15Ohẹn ghi rhie vbe ofigbọn ọliv nii, ọ ghi sa ẹe ye atataobọ obọ iye ọmwa ọghe irẹn tobọ ẹre. 16Ọ ghi fi ikpinhianbọ obọ erha ọmwa ọghọe yọ, ọ ghi sanmwẹ eso vbọ ye evba igba ihinrọn vbe sirra e Nọyaẹnmwa. 17Ọ ghi rhie vbe ofigbọn nii ne ọ rre ọre atataobọ kevbe esagiẹn ovbi ohuan amwẹ nii, ọ ghi rhie ẹre ye eto ọghe ehọ obọ erha ọmwa kevbe ikpinhianwẹ ne ogie ọghe owẹ obọ erha ọmwa ọghe ọmwa ne a ra kha ighẹ ẹ i ghi mwẹ awua nii. 18Ọ ghi hihiẹ ne ọ ghi dekẹ vbe ofigbọn ne ọ rre ọre obọ yan ọmwa nii uhunmwu, odẹ vbenian ọ re ọ gha ya ru iruemwi akpehuan.

19Ẹghẹ nii, ohẹn ghi zọ ese orukhọ, o ghi ru iruemwi akpehuan. Iyeke ọnii, ọ ghi gbe aranmwẹ ọghe ese na giẹn uan. 20Ọ ghi ya ẹe, ke ẹe, kevbe izẹọhẹ ọka fi ohan vbe aka. Odẹ vberriọ ọre ohẹn gha ya ru iruemwi akpehuan, ọmwa nii ghi gha re ne ẹ i ghi mwẹ awua.

21Deghẹ ovbiogue ọre ọmwa nii khin ighẹ obọ ẹre i gba gberra ọnii ọ ghi mu ovbi ogho ọkpa kẹkan gha die akpehuan ọghọe zẹ vbe izẹọhẹ a hae werriegbe, emwi ihaoko kpataki ọghe Nọyaẹnmwa ne avbe ohẹn, ọ ghi mu uwan eva kẹkan ọghe irhuarhua ne a ya ofigbọn ọliv gbe, zẹ vbe izẹọhẹ ọka deba ukhiọnmwẹ ọgọ ọghe ofigbọn ọliv. 22Ọ ghi vbe viọ idu ra elikhukhu eva rre, ọkpa ọghe izọese orukhọ, nọkpa ọghe ese na giẹn uan. 23Vbe ikpẹdẹ nogierẹnrẹn ọghe akpehuan rẹn, ọ ghi viọ ẹre bu ohẹn gha die onurho Owa Ukpon Ile. 24Ohẹn ghi mu ovbi ohuan nii ke ẹe kevbe ofigbọn ọliv, o ghi ya zẹ ọhẹ kpataki gie Nọyaẹnmwa ne avbe ohẹn. 25Rẹn ghi gbe ovbi ohuan nii, ọ ghi rhie vbe esagiẹn ọnrẹn ye etọghọ ehọ obọ erha ọmwa, ikpi-nhianbọ ne ogie obọ erha ọmwa, kevbe ikpinhianwẹ ne ogie owẹ erha ọmwa ọmwa nii. 26Ohẹn ghi sa vbe ofigbọn nii ye obọ iye ọmwa irẹn tobọ irẹn. 27Ọ ghi ya ikpinhianbọ obọ erha ọmwa rẹn miẹn eso vbọ ye evba nii vbe sirra Nọyaẹnmwa. 28Ọ ghi sa vbe ofigbọn nii lele dọmwadẹ ehe ne ọ vbe rhie esagiẹn ọnrẹn lele, etọghọ ehọ obọ erha ọmwa, ikpinhianbọ ne ogie obọ erha ọmwa, kevbe ikpinhianwẹ ne ogie obọ erha ọmwa ọghe ọmwa nii. 29Ọ ghi mu ofigbọn ne ọ ghi ke ẹe vbe atataobọ ẹre rhurhẹ ye ọmwa nii uhunmwu, odẹ vberriọ, ọ ghi ru iruemwi akpehuan. 30Iyeke ọnii, ọ ghi gbe ọkpa vbe uwu idu ra elikhukhu nii. 31Zẹ vbe izọese orukhọ, kevbe nọkpa zẹ vbe izọese ese na giẹn uan, deba ihaoko ọka. Odẹ vberriọ, ohẹn ghi ru iruemwi akpehuan. 32Ọna ọrọre uhi ne ọmwa ne ọ khuọnmwi emianmwẹ ikpakpa egbe ne ọ mu ohan, sokpan nẹ ẹ i ra sẹtin hae vbene a fian yọ zẹẹ vbe ọghe akpehuan rẹn.

Irhunrhun Vbe Uwowa

33E Nọyaẹnmwa keghi tama e Mosis kevbe Errọn wẹẹ, 34“Wa gha sẹ otọ Kenan ne I ra mu ne uwa ne ọ gha re ọghe uwa, I gha si irhunrhun ne ọ vẹ ye uwa owa.” Ẹre Nọyaẹnmwa ghi na ru emwamwa na ne iran. 35Ọmwa ne ọ miẹn irhunrhun vbe owa ẹre, ọ ghi gha khian ya tama Ohẹn. 36Ohẹn ghi wẹ ne a viọ emwi hia hin owa nii rre rẹn te do ghe nene irhunrhun ghe, ne a ghẹ miẹn ehe na ta ẹe ighẹ awua rre emwi hia nii ghi rre owa nii. Iyeke ọnii, ọ ghi gha rrie owa nii, 37ọ ghi ya ghe nene irhunrhun ghe, a deghẹ a miẹn iheso ne ọ ye vbe ebebe ra ne ọ ba rriẹrriẹ ne ọ yevbe ne ọ wa re la uwu ekẹn nii khian. 38Ọ ghi kpao vbe owa nii rre, ọ ghi rhie urho ẹre khui la ikpẹdẹ ihinrọn, 39vbe ikpẹdẹ nogihinrọn ọ ghi dọlegbe gha khian ya ghe ẹre ghe, a deghẹ irhunrhun nii ghi vẹ yọ. 40Ọ ghi wẹ ne a mu okuta ne a na miẹn irhunrhun nii ladian ne a ya mu ẹẹn fi ehe ne awua ye vbe a gha ladian ore ẹvbo nẹ.

41Vbe iyeke ọnii, ọ ghi wẹ ne a khiakhia egbekẹn nii rre owa nii hia ne a ya hihiẹ emwi ne a bannọ vbọ ye ehe ne awua ye vbe a gha ladian ore ẹvbo nẹ. 42A ghi ya okuta ọvbehe rọ ne a viọ hin rre, a ghi ya ekẹn ọvbehe siẹn ighẹ egbekẹn nii. 43A deghẹ irhunrhun vbe dọlegbe la owa nii, iyeke vbe a munọ okuta nii hin rre nẹ, a kevbe vbe khiakhia egbekẹn, ne a na vbe dọlegbe siẹn. 44Ohẹn ghi gha khian ya ghe ẹre, a deghẹ ọ vẹe, owa nii mwẹ awua. 45A ghi dunmwu ẹn ruan, avbe okuta nii rrọọ kevbe erhan, kevbe emwi ne a ya siẹn, a ghi viọ ẹre hin ore ẹvbo rre gha rrie ehe ne awua ye. 46Ọmwaikọmwa ne ọ la owa nii vbe ẹghẹ ne a na khui ẹre, ghi gha re ne awua gue ọ te ya sẹ ẹghẹ ota. 47Ọmwaikọmwa ne ọ lovbiẹ vbọ, ra ne ọ rri evbare vbe owa nii, ghi ya họ ukpọn rẹn.

48Ohẹn gha rre do ghe ẹre, a na miẹn wẹ irhunrhun nii ma ghi dọlegbe ladian iyeke vbe a ghi dọlegbe sin owa nii nẹ, ọ ghi ta ẹe wẹ awua i ghi rre owa nii, rhunmwuda a wabọ irhunrhun nii uan nẹ. 49A gha ra kpe owa nii huan, ọ ghi viọ ahianmwẹ eva, erhan sida eso, okun ne ọ baa eso, kevbe erhan ebe afọ. 50ghi gbe ọkpa vbe ahianmwẹ nii ye uwawa ne amẹ ne a da sa ke ẹzẹ rre ye. 51Ọ ghi rhie erhan sida nii, ọ ghi fi ẹe ye uwu esagiẹn ahianmwẹ ne a gbe nii, kevbe amẹ ne a da sa ke ẹzẹ rre nii, ọ ghi miẹn rẹn ye owa nii igba ihinrọn. 52Odẹ vbenian, ọ ghi ya ye esagiẹn ahianmwẹ nii, amẹ ne da sa nii, ahianmwẹ ne ọ ma wu, erhan sida, ebe afọ kevbe okun ne ọ baa nii, kpe awua hin owa nii rre. 53Iyeke ọnii, ọ ghi gie ahianmwẹ nọ ma wu nọ rrọ nii tin la ore ẹvbo nii la oha gha rrie. Odẹ vbe nian ọ gha ru iruemwi akpehuan ọghe owa nii, ọ ghi do gha re ne awua i ghi ye.

54Ena ọ re uhi vbe ekpa emianmwẹ ikpakpa egbe ne ọ mu ohan ọghe ukpọn ra owa. 55-56Ẹtẹ, uruvba ra ehe ne ọ hinmwiaẹn. 57Ne a miẹn ehe na rhie ma vbe awua a gha rre emwi kevbe awua i rrọọ.

Currently Selected:

Levitikọs 14: EDO96

Highlight

Copy