Levitikọs 13

Uhi Emianmwẹ Ikpakpa Egbe

1E Nọyaẹnmwa keghi ye avbe uhi na ne Mosis. 2De ghẹ ọmwa mwẹ ẹtẹ vbe egbe, uruvba ra emwi nọ hinmwiaẹn ne ọ gha sẹtin do khian emianmwẹ ikpakpa egbe ne ọ mu ohan, a ghi rhie ẹre bu ohẹn Errọn gha dee. 3Ohẹn ghi ghe ne ẹtẹ ghe, a deghẹ eto ni rrọ do khian ni fuọfua, a na miẹn wẹ ẹtẹ nii dinmwi la uwu egbe gberra ikpakpa egbe ne ọ lẹga ẹre, emianmwẹ ikpakpa ne ọ mu ohan nọ, ohẹn ghẹ ghi ghe ọmwa nii ghe nẹ, ọ ghi ta ẹe wẹ ọ ma huan. 4Sokpan a deghẹ ikpakpa egbe ne ọ hinmwiaẹn nii fuọfua ighẹ ọ yevbe ne ọ ma dinmwi ghe otọ gberra ikpakpa egbe ni lẹga ẹre, ighẹ eto ni rrọọ ma he vbe khian nọfua, ohẹn ghi wẹ ne irẹn ọkpa ya gha rre ihe ọkpa la ikpẹdẹ ihinrọn. 5Ohẹn ghi vbe dọlegbe ghe ẹre egbe ghe vbe ikpẹdẹ ne ogihinrọn. A deghẹ, zẹ vbene irẹn miẹn ọẹn ighẹ ẹtẹ nii ma he fiwerriẹ, ọ ma he vbe vẹ yọ, ọ ghi vbe dọlegbe wẹ ne irẹn ọkpa gha rre ihọkpa la ikpẹdẹ ihinrọn ọvbehe. 6Ọ gha ghi sẹ ikpẹdẹ ne ogihinrọn, ohẹn ghi vbe dọlegbe ghe ẹre ghe vbe ikpẹdẹ ne ogihinrọn, a deghẹ ẹtẹ nii kakae vbe aro ighẹ ọ ma vẹ yọ, ọ ghi ta ẹe wẹ awua rhọkpa i guẹe, ẹtẹ kekan nọ. Ọmwa nii ghi họ ukpọn rẹn, ọ ghi gha re ne ẹ i mwẹ awua. 7Sokpan a deghẹ ẹtẹ nii do vẹ, iyeke vbe ohẹn ghe ẹre ghe nẹ ọ na kha wẹẹ awua i guẹe, ọ ghi dọlegbe ya miẹn ohẹn. 8Ohẹn ghi dọlegbe ghe ẹre egbe a deghẹ ọ vẹ, ọ ghi ta ẹe wẹ awua guẹe, emianmwẹ ikpakpa ne ọ mu ohan nọ. 9Ọmwa gha khuọnmwi emianmwẹ ikpakpa ne ọ mu ohan, a ghi rhie ẹre bu ohẹn gha dee. 10Ne ọ ghe ẹre egbe ghe. A deghẹ eto nọ fua rre ọre ikpakpa egbe, ighẹ ọ fi eto nii rrọ werriẹ khian nọfua, ighẹ ọ vbe ro rre, 11emianmwẹ ikpakpa ne ẹ i fo nọ. Ohẹn ghi ta ẹe wẹ ọ mwẹ awua; a ghi vbe wẹ ne irẹn ọkpa ya gha rre ihọkpa, rhunmwuda aro da ẹe nẹ wẹ ọ mwẹ awua. 12A deghẹ emianmwẹ ikpakpa nii ghi vẹ, ọ na wa gba ọmwa nii egbe ke uhunmwu ya sẹ ikpinhianwẹ, 13ohẹn ghi dọlegbe ghe ẹre, ọ gha miẹn wẹ, ọ gele wa gba ẹre egbe nẹ, ọ ghi ta ẹe wẹ ọmwa nii i mwẹ awua. Ikpakpa egbe ẹre khian nọfua nẹ, awua i ghi guẹe. 14Sokpan ẹghẹ ne ẹtẹ nii ke fan aro ua, ọre awua kegha rre ọre egbe, ọ khian ne ọ mwẹ awua. 15Ohẹn ghi dọlegbe ghe ẹre, a deghẹ ọ miẹn wẹ ọ gbe ẹtẹ ne ọ fan aro ua, ọ ghi ta ẹe wẹ ọ ma huan, ẹtẹ ne ọ fan aro ua, rhie maa emianmwẹ ikpakpa ne ọ mu ohan nọ, ọmwa nii mwẹ awua.

16Sokpan ẹtẹ nii gha rrie, ọ na do dọlegbe gha fuọfua, ọmwa nii ghi bu ohẹn gha khian. 17Ọ ghi dọlegbe ghe ẹre egbe, a deghẹ ẹtẹ nii do gha fuọfua ẹi mwẹ awua, ohẹn ghi ta ẹe wẹ ẹ i mwẹ awua, 18a deghẹ uruvba ne ọ mu ọmwa ghi rrie nẹ, 19ọ na vbe sẹ okiekie, ehe ne ọ hinmwiaẹn nọfua ra ne ọ yevbe ne ọ huonrhue ghi na vbe rhie egbe ma vbe ehe ne uruvba nii te ye, ọ ghi bu ohẹn gha khian. 20Ohẹn ghi ghe ẹre egbe, a deghẹ evba nii yevbe ne ọ gbe la uwu ẹre sẹ ikpakpa egbe ni lẹga re, ighẹ eto ni rrọ na vbe gha fuọfua, ọ ghi ta ẹe wẹ ọ mwẹ awua. Emianmwẹ ikpakpa ne ọ mu ohan ọre ọ ladian vbe uwu uruvba nii. 21Sokpan ohẹn gha ghe ẹre ighẹ eto ne a rrọọ ma he fiwerriẹ khian nọfua, ighẹ ọ ma vbe gberra sẹ ikpakpa egbe ni lẹga ẹre, sokpan ọ yevbe ne ọ mwẹ ẹhuan, ohẹn ghi ya rhie irẹn ọkpa ye ihọkpa la ikpẹdẹ ihinrọn. 22A deghẹ ọ vẹe yọ, ohẹn ghi kha wẹ awua gue ẹe, ọ hẹ emianmwẹ. 23Sokpan a deghẹ evba nii ma fiwerriẹ, ighẹ ọ ma vbe vẹ, aro ọmaẹn uruvba ne ọ mu ẹẹn kẹkan nọ, ohẹn ghi ta ẹe wẹ, ẹ i mwẹ awua.

24Vbe ekpa ọmwa ne erhẹn giẹnrẹn, a deghẹ ẹwẹn ọgbọngbọn nii na gha fuọfua ra ọ na gha baa rriẹrriẹ, 25ohẹn ghi ghe ẹre ghe, a deghẹ eto ni rre evba khian nọfua, ọ na vbe gberrie sẹ ikpakpa egbe ni lẹga ẹre, emianmwẹ ne ọ mu ohan nọ, te ọ suẹn vbe ẹwẹn erhẹn nii, ohẹn ghi ta ẹe wẹ awua guẹe. 26Sokpan, adeghẹ eto ni rrọ ma khian nọfua, ighẹ ọ ma vbe gberrie sẹ ikpakpa egbe ni lẹga ẹre, sokpan ọ keghi mwẹ ẹhuan, ohẹn ghi ya rhie irẹn ọkpa ye ihọkpa la ikpẹdẹ ihinrọn. 27Ohẹn ghi dọlegbe ghe ẹre ghe vbe ikpẹdẹ ne ogihinrọn, a deghẹ te ọ ghi rhie ha egbe, emianmwẹ ikpakpa egbe ne ọ mu ohan ọre nọ, ohẹn ghi ta ẹe wẹ ọ mwẹ awua. 28Sokpan, a deghẹ evba nii ma fiwerriẹ, ọ ma biẹ ba egbe ighẹ ọ ma vbe gha mwẹ ẹhuan, te ọ hinmwiaẹn kẹkan, ohẹn ghi ta ẹe ighẹ ẹ i mwẹ awua rhunmwuda aro ọmaẹn kẹkan nọ.

29A deghẹ ẹtẹ rre okpia ra okhuo uhunmwu ra agbanmwẹ, 30ohẹn ghi ghe ẹre. A deghẹ ọ ye vbe ne ọ gbe la uwu ẹre sẹ ikpakpa egbe ni lẹga ẹre, ighẹ eto ni rrọ na vboo, ọ keghi vbe ye hunyẹnhunyẹn, emianmwẹ ikpakpa ne ọ mu ohan nọ, ọ ghi ta ẹe wẹ ọ mwẹ awua. 31A deghẹ ohẹn ghe ẹre, ọ na miẹn wẹ ẹtẹ nii ma gberrie sẹ ikpakpa egbe ni lẹga ẹre, sokpan wẹ eto ni rrọ ma ye maa, ọ ghi ya rhie irẹn ọkpa ye ihọkpa la ikpẹdẹ ihinrọn. 32Ohẹn ghi do dọlegbe ghe ẹtẹ nii vbe ikpẹdẹ ne ogihinrọn, a deghẹ ọ ma vẹ, eto ni vboro i vbe rrọọ, ọ ma vbe gbe rrie sẹ ikpakpa egbe ni lẹga ẹre, 33ọmwa nii ghi zẹ eto ni lẹga ẹtẹ nii, ohẹn ghi ye vbe rhie irẹn ọkpa ye ihọkpa la ikpẹdẹ ihinrọn ọvbehe. 34Vbe ikpẹde ne ogihinrọn, ohẹn ghi do dọlegbe ghe ẹtẹ nii, adeghẹ ọ ma vẹ, ọ ma vbe gberrie sẹ ikpakpa egbe ni lẹga ẹre, ọ ghi ta ẹe wẹ ẹ i mwẹ awua. Ọmwa nii ghi ya họ ukpọn rẹn, ọ ghi gha re ne ẹ i mwẹ awua. 35Sokpan, a deghẹ ẹtẹ nii do vẹ vbe a ta ẹe nẹ wẹ ẹ i mwẹ awua, 36ohẹn ghi dọlegbe ghe ẹre ghe, a deghẹ ẹtẹ vẹe, a i ghi vbe zẹdẹ gha gualọ eto ne ọ vboro vbọ. vbe ne a i na gbe awẹawẹ, ọ mwẹ awua. 37Sokpan deghẹ ohẹn ya ghe ighẹ ẹtẹ ma vẹ, eto ne ọ maa vbe zọ vbọ, ẹtẹ nii rrie nẹ, ohẹn ghi ta ẹe wẹ ẹ i mwẹ awua.

38Deghẹ ọre okpia ra okhuo, ighẹ emwi nọfua solo lele ẹre egbe, 39ohẹn ghi ghe ọmwa nii ghe. A deghẹ ehe ne ọ ye nii ye bisibisi vbe ufuọfuamwẹ, ama ne emwi khiokhio ye ikpakpa egbe kẹkan nọ, ọmwa nii i mwẹ awua.

40-41Eto ọmwa gha khuọn kua vbe odieke ra odaro uhunmwu, ọnii ma mu awua gie ẹe. 42Sokpan, a deghẹ ẹtẹ nọ ye vbe ne a ya emwi ne ọ baa woo nọfua na ladian vbe akpan nii, emianmwẹ ikpakpa ne ọ mu ohan nọ. 43Ohẹn ghi ghe ẹre, a deghẹ ẹtẹ ne ọ yevbe ne a ye emwi ne ọ baa woo nọfua ke gha rrọọ, 44ohẹn ghi ta ighẹ ọ mwẹ awua rhunmwuda emianmwẹ ne ọ mu ohan ọ rre ọre uhunmwu. 45Ọmwa ne ọ khuọnmwi emianmwẹ ikpakpa egbe nọ muohan ghi gha yọ osọnmwẹ ukpọn, ọ ghi sẹ eto ne a ma salọ rae ye uhunmwu, ọ ghi ya emwi gue ototọ ugbaro ẹre, ọ ghi gha tu khian wẹẹ, “Awua awua.” 46Ẹghẹ ne ọ ya gha khuọnmwi emianmwẹ, awua gue ẹe, rẹn ọkpa vbe ẹhi ẹre ghi ya gha rre agọ ne ọ ma sikẹ ehe ne emwa nekpa ye.

Emwamwa Vbe Ọghe Emwi Ne Ọ Sirhunrhun

47Ukpon gha sirhunrhun, ọ re ọghe eto ohuan nọ ra eto ovbiohuẹ, 48ra ehe ne ọ rhirhi a gha khin vbe eto ohuan ra eto ovbiohuẹ, ra ohian ẹmila ra emwi ne a ya ohian ẹmila ru. 49Deghẹ te ọ ru ebebe ra te ọ baa, irhunrhun ne ọ vẹ khian nọ, ọ kere ne a ya mu ẹẹn ma ohẹn.

50Ohẹn ghi ghe ẹre, ọ ghi ya rhie emwi nii hin rre la ikpẹdẹ ihinrọn. 51Ọ ghi vbe dọlegbe ghe ẹre vbe ikpẹdẹ ne ogihinrọn, adeghẹ irhunrhun nii vẹ yọ, emwi nii ma huan. 52Ohẹn ghi giẹn ọnrẹn uan, rhunmwuda, irhunrhun ne ọ vẹ nọ, erhẹn ọ re ọ kere ne a ya fuẹn ọnrẹn ọnrẹn uan. 53Sokpan ohẹn gha ghe ẹre ighẹ irhunrhun nii ma vẹ yọ vbe emwi nii, 54ọ ghi wẹ ne a họ ẹre, ne a rhie ẹre hin rre la ikpẹdẹ ihinrọn ọvbehe. 55Ọ ghi ghe ẹre, a deghẹ ọ ma he fi ama rẹn werriẹ, a gha rhe miẹn wẹẹ, ọ ma vẹ yọ, awua ye nọ, wa ghi giẹn emwi nii uan, ọre odaro ẹre ra iyeke ẹre ọ re ọ ye. 56Sokpan a deghẹ ohẹn ghi dọlegbe ghe ẹre ọ na miẹn wẹ ọ fi ama werriẹ ghe ne ọ fafaa, ọ ghi yanghaẹn hin ukpọn nii ra ohian ẹmila nii rre. 57A deghẹ nene irhunrhun ghi vbe dọlegbe ladian, te ọ vẹ khian nii, wẹ ne nọyan rẹn giẹn emwi nii uan.

58Ọ gha họ emwi nii, ama nii na ghi lahin rre, ọ ghi vbe dọlegbe họ ẹre, emwi nii i ghi mwẹ awua. 59Emwamwa vbe ekpa irhunrhun ne ọ rre ukpọn, ọre eto ohuan nọ ra eto ovbiohuẹ, ra ehe ne ọrhirhi gha ye vbe eto ohuan, ra eto ovbiohuẹ ra emwikemwi ne a ya ohian ẹmila ru, ọre ọna khin.

Currently Selected:

Levitikọs 13: EDO96

Highlight

Copy