Levitikọs 15

Awua Egbe Ne Ọ Gin Amẹ

1E Nọyaẹnmwa keghi ru emwamwa na ma e Mosis kevbe Errọn, 2ne ivbi Izrẹl. Deghẹ ekia ọmwa na gha gin amẹ, amẹ ne ọ gin nii, awua nọ, 3a deghẹ te ọ gin ladian vbe ekia nii ra te ọ khiọ ẹre. 4Ukpo ne ọ tota yi ra ne ọ lovbiẹ yi. Awua rrọọ. 5Ọmwa ne ọ rhirhi ya egbe kan ukpo ẹre. 6Ra ne ọ tota ye emwi ne ọmwa nii tota yi, ghi ya họ ukpọn rẹn, ọ ghi ya khuẹ, ọ ghi gha re ne ọ mwẹ awua ọ te ya sẹ ota. 7Ọmwa ne ọ rhirhi ya obọ kan ọmwa ne egbe ẹre gin nii, ghi ya họ ukpọn irẹn, ọ ghi ya khuẹ, ọ ghi vbe gha re ne ọ mwẹ awua ya sẹ ota. 8deghẹ ọmwa nii tu asẹn ku ọmwa ne awua i gue, ọmwa nii ghi ya họ ukpọn rẹn, ọ ghi ya khuẹ, ọ ghi gha re ne awua gue yasẹ ota ọ. 9Emwi ne a ya tota ye ẹsin ra aga ike aga ne ọmwa ne egbe ẹre gin tota yan, awua rrọọ. 10Ọmwa ne ọ rhirhi ya obọ kan emwi ne ọmwa nii tota yi, awua guẹe, ọ te ya sẹ ota. Ọmwa ne ọ rhirhi mu emwi ne ọmwa nii tota yi, ọ ghi ya họ ukpọn rẹn, ọ ghi ya khuẹ, ọ ghi gha re ne awua gue, ọ te ya sẹ ota. 11Deghẹ ọmwa ne egbe ẹre gin ya obọ kan ọmwa vbene ọ ma na ka kpe obọ nẹ, ọmwa nii ghi ya họ ukpọn rẹn, ọ ghi ya khuẹ, ọ ghi gha re ne awua gue ya sẹ ota. 12Uwawa ne ọmwa nii a rhirhi ya obọ kan, a ghi guọghọe rua, ọkpan ne ọ rhirhi vbe ya obọ kan, a ghi kpe ẹe.

13A ghẹ ghi sinmwi ọmwa nii nẹ vbe egbe ne ọ gin nii, ọ ghi mudia nẹ la ikpẹdẹ ihinrọn, iyeke ọnii, ọ ghi ye amẹ ne a da sa vbe ẹzẹ họ ukpọn, ọ ghi vbe ya khuẹ, rẹn ghi do gha re nẹ i mwẹ awua. 14Vbe ikpẹdẹ nogierẹnrẹn, ọ ghi viọ idu eva ra elikhukhu eva gha rrie onurho Owa Ukpọn Ile, ọ ghi viọ iran ne ohẹn. 15Ohẹn ghi gbe ọkpa vbọ zẹ vbe ese orukhọ kevbe nọkpa zẹ vbe ese na giẹn uan. Erriọ ọ gha ru iruemwi akpehuan, ne ọmwa nii. 16A deghẹ eku o re ọ ladian vbe egbe ọmwa, ọ ghi khuẹ egbe hia, ọ ghi gha re ne awua gue ya sẹ ota.

17Emwikemwi ne a ya ukpọn ra ohian ru ne eku nii kharha yi, a ghi họ ẹre, ọ ghi gha re ne awua ye yasẹ ota. 18Ọmwa gha gu okhuo ru emwi nẹ, ke irẹn kevbe nene okhuo ghi ya khuẹ, iran ghi gha re ne awua gue yasẹ ota. 19Okhuo gha mu obọ mwẹ, ọ ghi khian ne awua gue la ikpẹdẹ ihinrọn. Ọmwa ne ọ rhirhi ya obọ kan rẹn, awua guẹe rhinrin yasẹ ota. 20Emwi ne ọ rhirhi a tota ra lovbiẹ yi vbe ẹghẹ ne ọ na mu obọ mwẹ nii khian ne awua ye. 21-23Ọmwa ne ọ rhirhi ya obọ kan ukpọn ẹnrẹn ra emwikemwi ne ọ tota yi, ọ ghi ya họ ukpọn rẹn, ọ ghi vbe ya khuẹ, rẹn ghi vbe gha re ne awua gue rhinrin ọ te ya sẹ ota. 24Deghẹ ọmwa guẹe ru emwi vbe ẹghẹ ne ọ na mu obọ mwẹ nii, ọmwa nii khian ne awua gue la obọ awua ne okhuo nii mwẹ rre; ọ ghi gha re ne awua gue la ikpẹdẹ ihinrọn, ukpọn ne irẹn vbe lovbiẹ yi khian ne awua ye. 25A deghẹ vbe ọ lahin ẹghẹ ne ọ ya mu obọ mwẹ, ighẹ te esagiẹn gha tue okhuo vbe omwa ikpẹdẹ eso, ra te egbe ne ọ tue ẹre gberra ẹghẹ ne ọ mu obọ mwẹ la vbe otọ, ẹghẹ ne ọ tue ẹre la vbe otọ nii, awua guẹe zẹ vbe ne ọ ye vbe ẹghẹ ne ọ ya mu obọ mwẹ. 26Ukpọn ne ọ lovbiẹ yi kevbe emwikemwi ne ọ tota yan vbe uwu ẹghẹ na, khian ne awua ye. 27Ọmwa ne ọ vbe ya obọ kan iran, awua guẹe, ọ ghi ya họ ukpọn rẹn, ọ ghi vbe khuẹ, ọ ghi gha re ne awua gue ya sẹ ota. 28Utuemwẹ gha ghi dobọ yi nẹ, ọ ghi ye mudia la ikpẹdẹ ihinrọn, iyeke ọnii, ọ ghi do khian ne awua i ghi gue. 29Vbe ikpẹdẹ nogierẹnrẹn, ọ ghi viọ idu eva ra elikhukhu eva bu ohẹn gha rriẹ onurho Owa Ukpọn Ile. 30Ohẹn ghi gbe ọkpa vbọ zẹ vbe izọese orukhọ, ke nọkpa zẹ vbe izọese na giẹn uan. Odẹ vbenian ọre ọ gha na ru iruemwi akpehuan nẹẹn.

31E Nọyaẹnmwa keghi tama e Mosis wẹ ne ọ yan ma ivbi Izrẹl vbe ekpa ọghe emwi awua iran, ne iran ghẹ ya mu awua la Owa Ukpọn Ile, ne ọ rre adesẹneva agọ. Iran gha ru ẹe, a gha gbele iran an. 32Ena ọrọre emwamwa vbe ekpa ọmwa ne egbe ẹre tue ra ne ọ miẹn eku ladian. 33Kevbe okhuo vbe ẹghẹ ne ọ ya mu obọ mwẹ, ra okpia ne ọ gu okhuo ne ọ mwẹ awua ru emwi.

Currently Selected:

Levitikọs 15: EDO96

Highlight

Copy