प्रेरितां चे काम 23

1पौलुस ने महासभा सनु ध्यानारीत ङेखती कर केहले कि, “हे माई भऊ, मैं आज़ तक नरीकारा चे वास्ते बेलकोल इमानदारी लारे जीवन बिताला।” 2हनन्याह महायाजक ने, वानु जको पौलुस चे लारे भिलते ले, पौलुस चे मुँहा उपर थप्पड़ मारणे ची आज्ञा ङिली। 3#मत्ती 23:27,28बल्ति पौलुस ने ओनु केहले कि, “चूने ची पुतली कंध, नरीकार तनु मारी। तु व्यवस्था चे अनुसार माया न्यां करने चे वास्ते ब़ेहला, ते बल्ति का व्यवस्था चे विरोध मनु थप्पड़ मारणे ची आज्ञा ङी पला?”

4जको लारे भिलते ले, वाणे पौलुस नु केहले कि, “का तु नरीकारा चे महायाजक नु बुरे-भले किही?”

5पौलुस ने केहले, “हे भऊ, मनु तां पता कोनी हुता कि हा महायाजक छै पवित्रशास्त्र मां लिखले पले कि, ‘आपणे बन्दा चे प्रधान नु बुरे ना केह।’ ”

6 # प्रेरि 26:5; फिलि 3:5 तब पौलुस ने ईं जाणती कर कि, हेक दल सदूकिया ते ङुजा फरीसिया चा छै, महासभा मां ऊंची अवाजी लारे केहले, “हे भऊ, मैं फरीसी ते फरीसिया चे वंश चा छै, मरले आला ची आस ते पुनरुत्थान चे बारे मां माया मुकदमा हुवे पला।”

7जिसे बेले हा बात केहली तां फरीसिया ते सदूकिया चे आपस मां झग़ड़ा हुं लाग़ती गेला, ते सारी सभा मां फूट पड़ती गेली। 8#मत्ती 22:23; मरकु 12:18; लूक 20:27कांकि सदूकी तां हा किही कि, ना तां पुनरुत्थान छै, ना स्वर्ग़दूत छी, ते ना ही आत्मा छै। पर फरीसी यां सारीया बाता नु मनते।

9बल्ति ओठे बङी अफरा-तफरी मचती गेली, फरीसिया ची ओर कनु कोच्छ शास्त्री खड़े हुती कर झग़ड़ते हुले हा किहुं लाग़ले कि, “अम्ची नजर मां ईं बन्दे बेकसूर छै, अगर हो सग़े कि कुई पवित्र आत्मा ने जा खौद्द स्वर्ग़दूत ने ही ओचे लारे बातचीत करली हो।”

10जिसे बेले ओठे घणा झग़ड़ा हुं लाग़ला, सैनापति ऐ ङरा कनु कि बन्दी पौलुस चे टुकड़े-टुकड़े ना करती नाखो, सैनापति ने आपणी सैना नु हा आज्ञा ङिली कि, तले उतरती कर पौलुस नु वांची आधी महु जबरदस्ती काढ़ती कर छावणी मां गेहती जावा।

11ओही राती नु प्रभु ने पौलुस चे गोढु आती कर केहले कि, “हिम्मत राख, कांकि जिसड़ी तु यरुशलेम मां माई ग़वाही ङिली, यूंही करती कर तनु रोम मां वी ग़वाही ङेणी पड़ी।”

पौलुस नु मारणे ची योजना

12जिसे बेले ङिओ हुला, तां कोच्छ यहूदिया ने ऐका करती गेला, ते कसम खाली कि, “जब तक अम्ही पौलुस नु मारती ना नाखु बल्ति तक अम्ही कहीं खऊं-पिऊं नी।” 13जाणे कसम खाली हुती वे कम से कम चालीस जणा कनु वी ज्यादा शामिल हुती गेले। 14वाणे प्रधान याजका कनु ते बङका कनु जती कर केहले कि, “अम्ही हा ठानती गेले कि जब तक अम्ही पौलुस नु मारती ना नाखु ओ बेले तक अम्ही कहीं वी नी खऊं-पिऊं। 15ऐवास्ते हमा महासभा समेत सैनापति नु समझावा कि, पौलुस नु दुधे गोढु गेहली आओ, यूंही मनती गे कि जिंवे तु ओचे बारे मां ठीक-ठाक जांच-पड़ताल करने चाहवी, ते अम्ही ओचे पुज़णे चे पेहले ओनु मारती नाखु।”

16पर पौलुस चे भाणजे ने ये मारती नाखणे ची बाते चे बारे मां सुणती गेले, ते छावणी मां जती कर पौलुस नु ये बाते चा सनेसा ङिती ङिला।

17हा बात सुणती कर पौलुस ने सूबेदार नु हकारती कर केहले, “ऐ जवाना नु सैनापति चे गोढु गेहली जा, हा जवान ओनु कहीं केहणे चाहवे।”

18ऐवास्ते सूबेदारा ने ओ जवाना नु लारे गेहती कर सैनापति चे गोढु जती कर केहले कि, “गिरफ्तार पौलुस ने मनु हकारती कर हा विनती करली कि ऐ जवाना नु दुधे गोढु गेली आवे कांकि ऐचे कनु दुधे वास्ते हेक सनेसा छै।”

19ऐवास्ते सैनापति ने ओ जवाना चा हाथ पकड़ती कर अलग़ जग़हा मां जती कर ओकनु पूछले कि, “का सनेसा छै दुधे कनु?”

20ओ जवाना ने केहले कि, “यहूदिया ने ऐका करती गेला, कि दुधे कनु विनती करे कि पौलुस नु महासभा मां गेहती आ, कि मनती चाल कि तु ओची ठीक-ठाक जांच-पड़ताल करे। 21पर तु वांची ना मनीयो पला, कांकि वांचे महु चालीस कनु ज्यादा बन्दी पौलुस नु मारणे चे वास्ते तियार छी, वाणे हा ठानती गेले कि जब तक पौलुस नु वे मारती नी नाखे बल्ति तक वे ना कहीं खाये, ते ना ही कहीं पीयें, ते हमा वे तियार छी ते दुधे फैंसले चा इन्तजार करी पले।”

22बल्ति सैनापति ने ओ जवाना नु हा केहती कर विदा करले कि, “कानु वी ये बाते चा पता नी लाग़णा चाही छै कि तु मनु कहीं केहले।”

पौलुस चे कैसरिया शहर सनु भेज़ले जाणे

23बल्ति सैनापति ने ङुंहु सूबेदारा नु हकारती कर केहले कि, “ङोन साऔ सैनिक, ते सत्तर घुड़सवार, ते ङोन साऔ भालै चलाणे आले जवान तियार राखा। कांकि राती चे नवें बजे कैसरिया जाणे। 24ते पौलुस ची सवारी वास्ते घोड़े तियार राखा कि फेलिक्स राज्यपाल चे गोढु पौलुस नु सही सलामत पुचाती ङिऊं।” 25ते सैनापति ने हेक चिठ्ठी वी लिखती कर वानु ङिली विचे मां ईं लिखले पलते कि,

26“महामहिम फेलिक्स राज्यपाल वास्ते

क्लौदियुस लूसियास चा

नमस्कार पुज़ो।

27ऐ बन्दे नु यहूदिया ने पकड़ती कर मारती नाखणा चाह्‍ले, जिसे बेले मनु ये बाते चा पता लाग़ला कि ईं हेक रोमी बन्दे छै। ते मैं आपणी सैना लारे जती कर ऐनू छुड़ाती आला। 28मैं जाणता कि वे ओचे उपर किसी वजह लारे दोष लावी, ऐवास्ते ओनु महासभा मां गेहती गेला। 29ओठे जती कर मनु ये बाते चा पता लाग़ला कि, वे तां व्यवस्था चे नियम लारे ऐचे उपर दोष लावी, पर मारती नाखणे जा कैदखाने मां नाखणे लायक ऐचे मां दोष कोनी। 30जिसे बेले मनु ये बाते चा सनेसा मिड़ला कि यहूदी ऐका करती कर ऐनू मारणे आले छी, तां मैं ऐनू तुरन्त दुधे कनु भेज़ती ङिले। मैं आरोपीया नु वी हा आदेश ङिती ङिला कि ऐचे विरोध जको अरोप लाग़ले वे दुधे सामणे साबित करो।”

31ऐवास्ते सैनिका ने आज्ञा चे अनुसार पौलुस नु लारे गेहती कर रातो-रात अन्तिपत्रिस शहर चे गोढु पुचाती ङिले। 32ङुजे ङिओ घुड़सवार नु पौलुस चे लारे भेज़ती कर, वे सैनिक आप छावणी सनु पुठे आती आले। 33जिसे बेले वे कैसरिया शहर पुज़ले ते वाणे राज्यपाल नु वा चिठ्ठी ङिली, ते पौलुस नु ओचे सामणे पेश करले।

34चिठ्ठी पढ़ती कर राज्यपाल ने पौलुस कनु पूछले कि, “तु किसे प्रदेस चा छी?” 35जिसे बेले ओनु पता लाग़ला कि हा किलिकिया प्रदेस चा छै, ते राज्यपाल ने पौलुस नु केहले कि, “दुधे उपर अरोप लावणे आले जिसे बेले इठे पुज़ती जाये मैं दुधी सुणवाई पिछे करी।” ते बल्ति ओणे पौलुस नु हेरोदेस चे किले मां, पाहरे मां राखणे ची आज्ञा ङिली।

Currently Selected:

प्रेरितां चे काम 23: ODR

Highlight

Copy