प्रेरितां चे काम 24

फेलिक्स चे सामणे पौलुस

1पाँचा ङिहां चे बाद हनन्याह महायाजक, कई बङका नु ते तिरतुल्‍लुस नांवा चे वकीला नु लारे गेहती कर आला, वाणे राज्यपाल चे सामणे पौलुस चे उपर अरोप पेश करले। 2जिसे बेले पौलुस नु ओठे हकारले गेले राज्यपाल चे सामणे तिरतुल्‍लुस पौलुस चे उपर अरोप लावणे शुरु करती ङिले ते केहले कि, “हे महामहिम फेलिक्स, दुधे जरिये जको अम्हानु बङी शान्ति मिड़ली ते दुधे वजह ऐ देशा चे बन्दा मां घणा सुधार आला। 3ऐ ऐहसान चा अम्ही हर जग़हा ते हर-तरीके लारे धन्यवाद लारे मनु। 4मैं दुधा नेरा समय खराब करना ना चाहवी मैं दुधे कनु हेक छोटा जा उत्तर सुणने ची विनती करे पला।”

5“पर ईं बन्दे अम्चे वास्ते वास्तव मां ङोख ङेणे आले साबित हुवे पले, ईं हेक इसड़े बन्दे छै, जको सारी दुनिया चे यहूदिया चे बीच मां फूट नाखे पले ते हा हेक नासरीया चे कुपंथ चा मुखिया वी छै। 6ऐणे मन्दरा नु अपवित्र करने ची कोशिस करली, ऐवास्ते अम्ही ऐनू पकड़ती गेले, अम्ही तां आपणी ही व्यवस्था चे नियम लारे ऐचा न्यां करने चाहु ले। 7पर सैनापति लूसियास ने जबरदस्ती दखल अंदाजी करती कर ऐनू अम्चे हाथा कनु खोसती गेले। 8अम्ही जको ऐचे उपर दुधे सामणे अरोप लाऊं पले, तु आप ही खौद्द जांच-पड़ताल करती कर ऐकनु पूछ सग़ी।” 9तब यहूदिया ने पौलुस चे उपर अरोप लावणे शुरु करती ङिले, ते ये बाते मां हां मां हां मिलावी कि ये सारे अरोप सही छी।

रोमी राज्यपाल चे सामणे पौलुस चा भाषण

10जिसे बेले फेलिक्स राज्यपाल ने पौलुस नु ब़ोलणे चा इशारा करला, ते पौलुस ने उत्तर मां केहले कि, “मैं हा जाणती कर कि तु ब़ोहत साला कनु ऐ जाति चा न्यां करता आला, ऐवास्ते मैं खुशी लारे आपणे बचाव चे वास्ते ये बाता दुधे सामणे पेश करे पला। 11तु आप खौद्द ही यां बाता ची सच्‍चाई नु जाण सग़ी कि, जिसे बेले मैं यरुशलेम मां अराधना करने चे वास्ते आला, मनु ब़ारहा ङिहां कनु ज्यादा ङिहें कोनी हुली। 12ते यांणे ना तां मनु मन्दरा मां, ते ना ही मनु यहूदी प्राथनाघरा मां, ते ना ही शहरा मां काये लारे बहस-बाजी करते हुले, ते ना ही भीड़ी नु भेले करते हुले सोले। 13ते ना ही ये वा बाता नु, जाये बारे मां ये माये उपर दोष लावी पले, दुधे सामणे सच्‍च साबित कर सग़ी।

14“पर हा मैं दुधे सामणे मनती गिहे कि, मैं आपणे पुरखा चे नरीकारा ची अराधना आपणे ईशु चे पंथ चे अनुसार करे, जानु ये गलत किही। मैं हर हेक वे बाते मां विश्‍वास राखे जको व्यवस्था बावड़े ते जको भविष्यवक्‍ता चा किताबा मां लिखले पले। 15ते मैं नरीकारा उपर आस राखे, जको ये आप वी राखी, कि धर्मी ते अधर्मी ङुंहु चा पुनरुत्थान हुवी। 16ऐचे कनु मैं आप वी जत्तन करे पला कि नरीकारा ची, ते इन्साना ची तरफ माया विवेक सदा निर्दोष रिहो।

17 # प्रेरि 21:17–28 “कई साल गुजरने चे बाद मैं आपणे लौका नु दान ङेणे वास्ते ते मन्दरा मां बलि चढ़ाणे वास्ते यरुशलेम आला। 18ओही बेले यांणे मनु मन्दरा मां शोद्ध हुवणे ची रीति पुरी करते हुले ङेखले, ओठे ना कुई भीड़ हुती ते ना ही कुई शोर शराबा हुता। 19हां एशिया प्रदेस चे कोच्छ यहूदी ओठे मौजुद हुते। वांचे इठे दुधे सामणे हुवणे ठीक हुते कि, अगर माये विरोध मां वांची कुई बात हुवीया तां वे इठे आती कर दुधे सामणे माये उपर दोष लावी हा। 20जको इठे लौक भिले ये आप खौद्द ही बावड़ती ङियो कि महासभा चे सामणे यांणे मनु किसी बाते मां दोषी ङेखले। 21#प्रेरि 23:6ये हेके बाते नु छोड़ती जको मैं यांचे बीच मां भिले रेहती कर ऊंची अवाजी मां केहली हुती, ‘मरले आला महु जीते हुवणे, चे बारे मां आज़ तम्चे सामणे माया मुकदमा हुवे पला।’ ”

22फेलिक्स राज्यपाल जको ईशु चे पंथ चे बारे पुरी तरह जाणता, वानु ईं केहती कर टालती छोड़ले कि, “जिसे बेले सैनापति लूसियास आवी, ओ बेले मैं तम्चीया बाता चा फैंसला करी।” 23बल्ति ओणे सूबेदारा नु हा आज्ञा ङिली, पौलुस नु भीतर कैदखाने मां तां राखले जाओ, पर ओचे दोस्त आती कर ओची सेवा कर सग़ो इतनी तां ओनु छूट छै।

पौलुस ची फेलिक्स ते ओची घराआली लारे बातचीत

24कोच्छ ङिहां चे बाद फेलिक्स राज्यपाल आपणी घराआली द्रुसिल्‍ला नु जको यहूदी हुती, विनु आपणे लारे गेहती आला ते पौलुस नु हकरवाती कर ओ विश्‍वास चे बारे मां जको मसीह ईशु उपर छै, ओचे कनु सुणले। 25जिसे बेले पौलुस धार्मिकता, ते संयम ते आणे आले न्यां चे बारे ची चर्चा करे पलता, तां फेलिक्स ने ङरती कर पौलुस नु उत्तर ङिला, “हमा तां जा, मौका ङेखती कर, मैं तनु बल्ति हकरवावी।” 26फेलिक्स नु पौलुस कनु कोच्छ धन मिलणे ची वी आस हुती ते येही आस मां ओ पौलुस नु बातचीत चे बारे मां बार-बार आपणे गोढु हकरवाता। 27पर जिसे बेले ङोन साल बीतती गेले, तां फेलिक्स ची जग़हा मां ङुजा राज्यपाल पुरकियुस फेस्तुस चुणला गेला, ते फेलिक्स पौलुस नु यहूदिया नु खौश करने ची इच्छा लारे कैदखाने मां छोड़ली गेला।

Currently Selected:

प्रेरितां चे काम 24: ODR

Highlight

Copy