प्रेरितां चे काम 20

पौलुस चे मकिदुनिया ते यूनान ते त्रोआस मां जाणे

1जिसे बेले हुल्‍लड़ खत्तम हुती गेला तां पौलुस ने चैला नु हकरवाती कर समझाले, ते वांचे कनु विदा हुती कर मकिदुनिया सनु चाह्‍ला गेला। 2बल्ति पौलुस ओ सारे प्रदेसा मां हुती कर नेरा चैला नु मिलती कर वांची हिम्मत ब़न्धवाली, ते यूनान देशा मां जती पुज़ला। 3जिसे बेले तीन मेहने रेहती कर ओ उठु जहाजा उपर सीरिया प्रदेस सनु जाणे आला हुता, ओनु सूचना मिड़ली यहूदी ओचे विरोध षड़यंत्र रचली भिले तां ओणे हा फैंसला करला कि मकिदुनिया हुती कर पुठा चाह्‍ला जाये। 4बिरीया चे पुरूर्स चा पूत सोपत्रुस, ते थिस्सलुनीकियां शहरा चे अरिस्तर्खुस, ते सिकुन्दुस, ते दरबे गयुस ते तीमुथियुस आसीया चा तुखिकुस, ते त्रुफिमुस आसीया तक ओचे लारे टुरती पले। 5पर वे आग़ु जती कर त्रोआस शहरा मां अम्चा इन्तजार करते रेहले। 6ते अम्ही अखमीरी रोटी चे तेंहवार चा ङिहां चे बाद फिलिप्पी कनु जहाजा उपर चढ़ती कर पाँचा ङिहां मां त्रोआस शहरा मां वांचे गोढु पुज़ले, ते साता ङिहां तक उठी रेहले।

त्रोआस शहरा सनु पौलुस ची आखरी यात्रा

7हफ्ते चे पेहले ङिओ जिसे बेले अम्ही रोटी भानणे चे वास्ते भेले हुले, ते पौलुस ने जको ङुजे ङिओ जाणे आला हुता, वांचे लारे बाता करलीया, ते आधी राती तक उपदेश ङिता रेहला। 8ते जिसी अटारी मां अम्ही भेले हुले पलते ले, विचे मां घणे सारे ङीवे ब़ली पलते। 9ते यूतुखुस नांवा चा हेक जवान खिड़की मां ब़ेहला तां गहरी नीङे मां ऊंघे पलता, ते जिसे बेले पौलुस घणी देरी तक बाता करे पलता ते ओ जवान नीङे चे हुलारे लारे तीजी मंजिल कनु तले ढेती पला, ते जिसे बेले ओनु चले तां ओ मरला पलता।

10पर पौलुस उतरती कर ओचे लारे बिलठती गेला, ते गले लाती कर केहले, “घब़रावा ना, कांकि ओची जान ओचे मां छै।” 11ते उपर जती कर रोटी भांली ते खाती कर इतनी देरी तक वांचे लारे बाता करता रेहला कि, पुरा फुटती गेली, बल्ति ओ उठु चाह्‍ला गेला। 12ते वे ओ जवाना नु जीते घरे गेहती गेले, ते घणी खुशी मनाली।

त्रोआस मां मिलेतुस ची यात्रा

13अम्ही पेहले कनु ही जहाजा उपर चढ़ती कर अस्सुस सनु ऐ विचारा लारे आग़ु गेले, कि अम्ही उठु कनु पौलुस नु चढ़ाती गिहुं कांकि ओणे ईं ऐवास्ते ठहराले हुते, कि आप खौद्द ही पैदल जाणे आला हुता। 14जिसे बेले ओ अस्सुस मां अम्हानु मिड़ला ते अम्ही ओनु जहाजा उपर चढ़ाती कर मितुलेने शहर मां आणले। 15ते उठु जहाज खोलती कर अम्ही ङुजे ङिओ खियुस टापू चे सामणे पुज़ले, ते आग़ले ङिओ सामुस टापू जती कर पुज़ले, बल्ति ङुजे ङिओ मिलेतुस शहर मां आले। 16कांकि पौलुस ने इफिसुस चे गोढु हुती ते जाणे ची ठानली, कि कङी इसड़े ना हो, कि ओनु आसीया इलाके मां देर लाग़ो, कांकि ओ जल्दी मां हुता, कि अगर हो सग़े, ते ओ पिन्तेकुस्त चे ङिओ यरुशलेम मां रिहो।

पौलुस ची इफिसुस चे अग़ुवा लारे बातचीत

17ते पौलुस ने मिलेतुस शहरा कनु इफिसुस शहरा चे वास्ते हा सनेसा भेज़ला, ते कलीसिया चे अग़ुवा नु हकरवाले।

18ते जिसे बेले वे ओचे गोढु आले, वानु केहले कि, “तम्ही जाणा, पेहले ही ङिओ कनु जिसे बेले मैं एशिया मां पुज़ला, कि मैं हर समय तम्चे लारे किवें रेहला। 19यानिकि बङी नरमाई लारे, ते हींजवे बाहती-बाहती, ते वा परीक्षा महु जको यहूदिया ने षड़यंत्र रचने ची वजह माये उपर आली, मैं प्रभु ची सेवा करता रेहला। 20ते जको-जको बाता तम्चे फायदे चा हुतीया, वानु बावड़ने ते बन्दा चे सामणे ते घरा-घरा मां सिखावणे कनु कङी मुँह कोनी फेरले। 21बल्ति मैं यहूदिया नु ते यूनानिया नु चिताता रेहला कि नरीकारा सनु मन फिरावा, ते अम्चे प्रभु ईशु मसीह उपर विश्‍वास करा।

22“ते हमा, मैं पवित्र आत्मा मां हुती कर यरुशलेम सनु जाये पला, ते ना जाणी, कि ओठे माये लारे का-का बिती। 23सेर्फ हा कि पवित्र आत्मा हर शहरा मां ग़वाही ङिती-ङिती कर मनु बावड़ता रेहला कि कैदखाने ते क्लेश दुधे वास्ते तियार छै। 24#2 तीमु 4:7पर मैं आपणे प्राणा नु कहीं वी ना समझी कि आपणे प्राणा नु प्यारे जाणे, बल्ति ईं कि मैं आपणी दोड़ नु, ते वे सेवा नु पुरी करे, जको मैं नरीकारा चे अनुग्रह चे सुसमाचार ची ग़वाही ङेणे चे वास्ते प्रभु ईशु ने जको मनु ङिली।

25“हमा ङेखा, मैं जाणे कि तम्ही सब जाये मां मैं नरीकारा चे राज़ चा प्रचार करता फिरला, माये मुँह बल्ति नी ङेखा। 26ऐवास्ते आज़ चे ङिओ कनु मैं ग़वाही ङिती कर किहे पला, मैं तम्चे महु काये वी नाश हुवणे चा दोषी कोनी। 27कांकि मैं नरीकारा ची सारी मनसा नु पुरी रीति लारे तम्हानु बावड़ने कनु कोनी झिझकला। 28ऐवास्ते आपणी ते पुरे झुन्डा ची ङेख-रेख करा, जाये मां पवित्र आत्मा ने तम्हानु नु मुखिया ठहराले कि तम्ही नरीकारा ची कलीसिया ची रखवाली करा, ओणे तम्हानु आपणे पूता चे लुहींया लारे मोल गेहती गेले। 29मैं जाणे पला कि, माये जाणे चे बाद फाड़ने आले भेड़िये तम्चे बीच मां आवे, जको झुन्डा नु नी छोड़े। 30तम्चे बीच महु इसड़ी शक्स खड़े हुवे, जको चैला नु आपणे भांसु आवणे वास्ते टेढीया-मेढीया बाता सिखावे। 31ऐवास्ते जाग़ते रिहा, ते याद करा कि मैं तीन साला तक रात-ङिओ करती कर हींजवे बाहती-बाहती कर, हर हेक नु चिताणे कोनी छोड़ले।

32“ते हमा मैं तम्हानु नरीकारा नु, ते ओचे अनुग्रह चे वचना नु सोंपती ङिये पला, जको तम्ची बढ़ोतरी कर सग़ी, ते सारे पवित्र करले गेले लौका मां सहभागी हुती ते विरासत ङे सग़े। 33मैं काई चान्दी, सोने जा ओढ़णा चा लालच कोनी करला। 34तम्ही आप खौद्द ही जाणा कि माये यां हाथा ने माई ते माये साथीया ची जरुरता नु पुरे करले। 35मैं तम्हानु सब कोच्छ करती ङिखाणले, कि ये रीति लारे मेहनत करते हुले बेबस लौका नु सम्भालणे, ते प्रभु ईशु चा बाता नु याद राखणे जरुरी छै, कि ओणे आप ही खौद्द केहले, ‘गेहणे कनु ङेणे भले छै।’ ”

36ईं केहती कर पौलुस ने गोङे टेकले ते वां सारा लारे प्राथना करली। 37बल्ति वे सारे घणे रोले ते पौलुस चे गले लाग़ती कर ओनु मिठ्ठीया ङिऊं लाग़ले। 38वे खास करती कर ये बाते चा ङोख करी पलते, जको पौलुस ने वानु केहले हुते कि तम्ही माये मुँह बल्ति नी ङेखा। तब वाणे ओनु जहाजा तक पुचाले।

Currently Selected:

प्रेरितां चे काम 20: ODR

Highlight

Copy