प्रेरितां चे काम 21

पौलुस चे यरुशलेम सनु जाणे

1जिसे बेले अम्ही वांचे कनु अलग़ हुती कर समुन्दरी यात्रा शुरु करली, ते सिधे मार्ग़ कनु कोस टापू मां आले, ते ङुजे ङिओ रूदुस टापू मां, ते उठु पतरा टापू मां, 2ते हेक पाणीया आला जहाज फीनीके शहरा सनु जते मिड़ला, ते अम्ही ओचे उपर चढ़ती कर उठु चलती पले।

3जिसे बेले साइप्रस टापू ङिसला, ते अम्ही ओनु खब़्ब़े हाथ छोड़ती ते सीरिया इलाके कनु चलती कर सूर शहरा मां जहाजा चा समान उतरना हुता, ऐवास्ते अम्ही वी उठी उतरती गेले। 4ते ओठे अम्हानु चैले मिड़ले ते वांचे लारे अम्ही सात ङिहां तक रेहले। पवित्र आत्मा ने वानु केहले पौलुस नु ईं किहा कि यरुशलेम मां ना जा। 5जिसे बेले उठु टुरणे चा समय पूरा हुला तां वे सारे आपणे कुणम्बे समेत अम्हानु शहरा चे ब़ाहरु छोड़ने वास्ते आले ते अम्ही समुन्दर चे किनारे गोङे टेकती कर प्राथना करली। 6बल्ति हेके-ङुजे कनु विदा हुती कर, अम्ही जहाजा उपर चढ़ती कर, ते वे सब आपणे आपणे घरा सनु चाह्‍ली गेली।

7जिसे बेले अम्ही सूर शहरा कनु जहाजा मां चढ़ती कर आपणा सफर पूरा करला ते जती कर पतुलिमयिस शहर मां पुज़ले, ते भावां लारे नमस्कार करती कर वांचे लारे हेक ङिओ रेहले। 8#प्रेरि 6:5; 8:5ङुजे ङिओ अम्ही उठु सफर करती कर कैसरिया मां आले, ते फिलिप्पुस सुसमाचार चा प्रचारक चे घरा मां जको यरुशलेम ची कलीसिया मां साता लारे चुणला आला हेक सेवक हुता, जती कर ओचे इठे रेहले। 9ओचीया चार कुंवारीया धूवा हुतीया, जको भविष्यवाणीया करतीया।

10 # प्रेरि 11:28 जिसे बेले अम्हानु ओठे रेहते घणी ङिहें हुती चुकली, ते अगबुस नांवा चा हेक भविष्यवक्‍ता आला, जको यहूदिया प्रदेस चा हुता। 11ओणे अम्चे गोढु आती कर पौलुस चे रुमाल चले, ते ओचे लारे आपणे हाथ पग़्ग़ ब़ांथी कर केहले, “पवित्र आत्मा हा किहे कि, जिसे बन्दे चे ईं पट्टके छै, ओनु यरुशलेम मां यहूदी यूंही ब़ांधे, ते नेरीया जातिया चे हाथा मां सोंपती ङिये।”

12जिसे बेले अम्ही ये बाता सुणलीया, ते अम्ही ते ऊठला लौका ने पौलुस कनु विनती करली कि यरुशलेम सनु ना जा। 13पर पौलुस ने उत्तर ङिला, “तम्ही ईं का करा पले, यूं रोती-रोती कर माये देल तरोड़ा पले? मैं तां यरुशलेम मां ना हेको ब़झणे चे वास्ते बल्कि, प्रभु ईशु चे नांवा वास्ते मरणे वास्ते वी तियार छै।”

14जिसे बेले ओणे कोनी मनले तां अम्ही हाओ केहती कर चोप हुती गेले कि, “प्रभु ची ही इच्छा पुरी हो।”

15कोच्छ ङिहां चे बाद अम्ही तियारी करली ते यरुशलेम सनु टुरती पले। 16कैसरिया शहर चे कोच्छ चैले वी अम्चे लारे टुरती पले ते मनासोन नांवा चा हेक पुराणा चैला जको साइप्रस शहरा चा हुता ओनु वी आपणे लारे गेहली आले कि अम्ही ओचे घरा मां टेक्‍क सग़ु।

पौलुस चे याकूब लारे मिलणे

17जिसे बेले अम्ही यरुशलेम पुज़ले, ते विश्‍वासी भावां ने बङी खुशी लारे अम्चा स्वागत करला। 18ङुजे ङिओ पौलुस अम्हानु लारे गेहती कर याकूब चे गोढु गेला, जिठे सारे अग़ुवे भेले हुले पलते। 19स्वागत चे बाद पौलुस ने हेक-हेक करती कर वे सारीया बाता बावड़नीया शुरु करती ङिलीया, जको काम नरीकारा ने ओची सेवकाई चे जरिये नेरीया जातिया मां करले हुते।

20वाणे ईं सुणती कर नरीकारा ची महिमा करली ते बल्ति ओनु केहले कि, “हे भऊ पौलुस, तु ङेखी पला, कि यहूदिया महु कई हजार लौका ने विश्‍वास करला। वे सारे व्यवस्था चे पक्‍के समर्थक वी छी। 21ते वानु दुधे बारे मां सिखाले गेले कि तु नेरीया जातिया मां रेहणे आले यहूदिया नु मूसा ची व्यवस्था कनु फिरती जाणे वास्ते सिखावी, ते ईं किही कि, ‘ना तां आपणे ब़ाला चा खतना करा ते ना ही रिति-रिवाजा उपर चला।’

22“हमा बावड़, अम्ही का करु? वानु जरुर ईं तां पता लाग़ती जई कि तु इठे आला, आला छी। 23ऐवास्ते जको अम्ही तनु किहुं, तु ऊंही कर, अम्चे इठे चार बन्दी छी, जेह्णे मनत मनली आली छै। 24वानु लारे गेहती कर आपणे आप नु शोद्ध कर, ते वांचे वास्ते खर्चा ङे कि वे गन्जे हो, बल्ति सारी बन्दी जाणती जाये, कि जको बाता दुधे बारे मां सिखालीया गेलीया, वांचे मां कुई वी सच्‍चाई कोनी, बल्कि तु आप वी व्यवस्था नु मनती कर विचे अनुसार चलणे आला छी।

25 # प्रेरि 15:29 “पर वां नेरीया जातिया चे बारे मां जेह्णे विश्‍वास करला, अम्ही हा फैंसला करती कर लिखती भेज़ले कि ‘मूर्तिया उपर चढ़ले आले खाणे तम्हानु नी खाणे चाही छै। गिच्‍ची घुटले आली मवेशी चा मांस खाणे कनु दूर रिहा ते वांचे लुहीं ना पीयो। ते व्यभिचार कनु बचले रिहा।’ ”

मन्दरा मां पौलुस ची गिरफ्तारी

26आग़ले ङिओ पौलुस वा बन्दा नु लारे गेहती कर शोद्ध हुवणे ची रीति ची शुरुआत करली। ऐचे बाद ओ मन्दरा मां गेला कि ओठे वे तरीख ची सूचना ङियो, जिसे बेले वांची शोद्ध हुवणे चा समय खत्तम हुवी, ते वांचे महु हर-हेक वास्ते भेंट चढ़ाली जई।

27जिसे बेले सात ङिहें पुरी हुली तां, एशिया इलाके कनु कोच्छ यहूदी ओठे आले ते पौलुस नु मन्दरा मां ङेखती कर सारा लौका नु भड़काले, ते ओठे अफरा-तफरी मचाती कर ईं केहती कर पौलुस नु पकड़ती गेले कि, 28“हे इस्राएली, अम्ची सहायता करा, ईं ऊंही इन्सान छै, जको लौका नु, ते व्यवस्था चे नियम नु ते ऐ मन्दरा चे विरोध मां शिक्षा ङिता फिरे, ऐचे बावजूद वी ईं बन्दे यूनानिया नु वी मन्दरा मां गेहती आले, हमा हा पवित्र मन्दर अपवित्र हुती गेला।” 29#प्रेरि 20:4वाणे ईं ऐवास्ते केहले कि पेहले, इफिसुस शहरा चा बसन्दा त्रुफिमुस नु ओचे लारे शहरा मां ङेखती गेले हुते, ते वाणे समझले कि पौलुस ओनु आपणे लारे मन्दरा मां गेहती आला।

30सारे शहरा मां अफरा-तफरी मचती गेली ते लौका ने द्रोड़ती कर पौलुस नु पकड़ती गेले, ते मन्दरा कनु ओनु घींसती आले, ते ओही बेले मन्दरा चे दरवाजे बन्द करती नाखले। 31जिसे बेले वे पौलुस नु मारणे ची योजना बणावी पलते, ते ओही बेले रोमी सैनापति कनु हा सूचना पुज़ली कि, सारे शहरा मां अफरा-तफरी मचली पली। 32सैनापति कोच्छ सैनिका नु ते अधिकारीया नु आपणे लारे गेहती कर वे जग़हा उपर द्रोड़ला जिठे पौलुस उपर हमला हुवे पलता जती कर पुज़ला। जिसे बेले यहूदिया ने सैनापति ते सैनिका नु ङेखले तब वाणे पौलुस नु मारणे-कोटणे बन्द करती ङिले।

33बल्ति सैनापति उग़ते हुती कर पौलुस नु पकड़ती गेले ते ङुंहु संगला लारे ब़न्धावणे ची आज्ञा ङिली। ते पूछु लाग़ला कि, “हा कूण छै, ते ऐणे का करले?” 34पर भीड़ महु कुई कोच्छ ते कुई कोच्छ रौल मचाते रेहले। जब हुल्‍लड़ चे मारले सैनापति ठीक सच्‍चाई ना जाण सग़ला, तां पौलुस नु किले मां गेहती जाणे ची आज्ञा ङिली। 35जिसे बेले ओ पोड़ीया तक पुज़ला, ते गुस्से चे वजह भीड़ बलवा करु लाग़ली, ते सैनिक पौलुस नु चती कर भीतर चाह्‍ले गेले। 36भीड़ वांचे भांसु-भांसु ईं केहती हुली जाये पलती ली कि, “ओनु मारती नाखा।”

37जिसे बेले वे पौलुस नु छावणी मां गेहती जाणे आले हुते, पौलुस ने सैनापति नु केहले कि, “का मैं तनु कोच्छ केह सग़े?”

सैनापति हैरान हुती कर ओकनु पूछले, “का तु यूनानी भाषा जाणी? 38ऐचा मतलब हा छै का तु ओ मिस्री कोनी, जेह्णे कोच्छ ङिहें पेहले विद्रोह करती ङिलता ला, ते चार हजार आतंकवादिया नु अगवा कराती कर बरब्यान मां गेहती गेला हुता?”

39पौलुस ने केहले, “मैं तां तरसुस शहरा चे यहूदी छै! किलिकिया इलाके चा बसन्दा छै। ते मैं दुधे कनु विनती करे पला, कि मनु यां लौका लारे बाता करु ङे।”

40जिसे बेले सैनापति ने पौलुस नु आज्ञा ङिली, ते पौलुस पोड़ीया उपर भिले रेहती कर लौका नु हाथा लारे इशारा ङिला। जिसे बेले वे चोप हुती गेले, तां ओ इब्रानी ब़ोली मां ब़ोलु लाग़ला।

Currently Selected:

प्रेरितां चे काम 21: ODR

Highlight

Copy