प्रेरितां चे काम 19

इफिसुस शहर मां पौलुस

1जिसे बेले अपुल्‍लोस कुरिन्थुस शहर मां हुता, ते पौलुस सारे प्रदेसा महु हुती कर इफिसुस शहर मां आला ते ओठे कोच्छ चैले मिड़ले। 2पौलुस ने वानु केहले, “का जिसे बेले तम्ही विश्‍वास करला हुता ओ बेले पवित्र आत्मा नु ग्रहण करले ते?”

वाणे उत्तर ङिला, “कोनी अम्ही ईं तां सुणले वी कोनी कि पवित्र आत्मा वी कोच्छ छै।”

3पौलुस ने वानु केहले, “ते बल्ति तम्ही काया बपतिस्मा गेहला हुता?”

वाणे उत्तर ङिला, “यूहन्‍ना चा बपतिस्मा।”

4 # मत्ती 3:11; मरकु 1:4,7,8; लूक 3:4,16; यूह 1:26,27 बल्ति पौलुस ने केहले, “यूहन्‍ना चा बपतिस्मा तां मन फिराव चा हुता। ओणे केहले हुते कि, ‘जको माये बाद आणे आला छै, ओचे उपर विश्‍वास करा,’ यानिकि ईशु उपर विश्‍वास करा।”

5ईं सुणती कर वाणे प्रभु ईशु मसीह चे नांवा लारे बपतिस्मा गेहला। 6ते जिसे बेले पौलुस ने वांचे उपर हाथ मेहले, ते वांचे उपर पवित्र आत्मा उतरती आला, ते वे अलग़-अलग़ भाषा ब़ोलु लाग़ती गेले ते भविष्यवाणीया करु लाग़ले। 7ये लगभग ब़ारहा जणे हुते।

8पौलुस यहूदी प्राथनाघरा मां गेला। ओठे ओ तीन मेहना तक बेधड़क हुती कर ब़ोलता रेहला। नरीकारा चे राज़ चे बारे मां बहस-बाजी करता ते वानु आच्छी रीति लारे समझाता रेहला। 9पर जिसे बेले कोच्छ बन्दा ने आपणे मना नु कठोर करती गेले ओची कोनी मनली यां बाता नु बुरे-भले किहुं लाग़ले, ऐवास्ते पौलुस आपणे चैला नु लारे गेहती उठु चाह्‍ला गेला, ओ तुरन्‍नुस चे स्कूला मां गेला, जिठे ओ हर ङिओ भीड़ लारे नरीकारा चे वचना लारे बहस-बाजी करता। 10ङोन साला तक यूंही हुते रेहले, इठे तक कि एशिया प्रदेस चे रेहणे आले का यहूदी, का यूनानी सारा ने प्रभु चा वचन सुणती गेहला।

स्कीवा चे पूत

11ते नरीकारा ने पौलुस चे हाथु अचम्भे ची अदभोत कामे ङिखाणली। 12इठे तक कि कन्दुरीया ते रुमाले ओचे शरीरा नु लवाती जब बिमारा उपर नाखते, ते वांची बिमारीया ठीक हुती जतीया। ते दुष्टात्मा वी वांचे महु निकलती जतीया।

13पर कोच्छ यहूदी जको दुष्टात्मा नु काढ़ते फिरते, वे ईं करु लाग़ले जिसा बन्दा मां दुष्टात्मा हुतीया, वांचे उपर प्रभु ईशु चे नांवा चा इस्तेमाल करने ची कोशिस करते तां केहते, “मैं तम्हानु ईशु चे नांवा लारे जाया प्रचार पौलुस करे, आज्ञा ङिये पला।” 14ते स्क्‍किवा नांवा चा हेक यहूदी प्रधान याजक हुता, ते ओचे सात पूत, जको इसड़े करते।

15हेक ङिओ दुष्टात्मा ने वानु केहले, “ईशु नु मैं जाणे, ते पौलुस नु वी पिछाणे, पर तम्ही कूण छिवा?”

16ते ओ बन्दे ने जाये मां दुष्टात्मा हुती, वांचे उपर झपटा मारती कर वानु सारा नु आपणे वशा मां करती कर वांची इसड़ी कुटाई करली कि वे ओ घरा कनु उघाड़े ते जखमी हुती कर द्रोड़ले।

17ते हा बात इफिसुस शहरा चे रेहणे आले यहूदी ते यूनानी वी सारे जाणती गेले, ते वांचे सारा उपर हा ङर पड़ती गेला, ते प्रभु ईशु चे नांवा ची बढ़ाई हुली। 18ते जिसा बन्दा ने विश्‍वास करला हुता, वांचे महु घणा सारा ने आपणे आपणे गन्दा कामा नु मनती गेले ते उजागर करले। 19ते जादू-टूणे करने आला महु घणा सारा ने आपणीया-आपणीया पोथीया भेलिया करलीया ते सारा चे सामणे ब़ालती नाखलीया। ते जिसे बेले वांची कीमत जोड़ली गेली तां कम से कम पंजहा हजार चान्दी चे सिक्‍का चे बराबर हुती। 20यूं करती कर प्रभु चा वचन ताकती लारे फैलता गेला ते मजबूत हुता गेला।

21जिसे बेले ये बाता हुती चुकलीया, ते पौलुस ने आत्मा मां ईं ठानले कि मकिदुनिया ते अखाया कनु हुती कर यरुशलेम सनु जाये, ते केहले, “ओठे जाणे चे बाद मनु रोम नु वी ङेखणे जरुरी छै।” 22ऐवास्ते आपणी सेवा करने आला महु तीमुथियुस ते इरास्तुस नु मकिदुनिया मां भेज़ती कर आप कोच्छ ङिहें एशिया मां रेहती गेला।

इफिसुस मां बङा हुल्‍लड़

23ओ समय मां ईशु चे पन्थ चे बारे मां बङा हुल्‍लड़ मचती गेला। 24कांकि देमेत्रियुस नांवा चा हेक सुनारा अरतिमिस चे चान्दी चे छोटे-छोटे मन्दर बणवाणे वास्ते, कारीगरा नु ब़ोहत काम ङिवाती ङिता।

25ओणे वानु ते नेरे इसड़े काम करने आले कारीगरा नु भेले करती कर केहले, “हे माये भऊ, तम्ही जाणा कि ऐ कामा कनु अम्हानु कितना धन मिले। 26ते तम्ही ङेखा ते सुणा वी हुवा कि सेर्फ इफिसुस मां ही कोनी बल्कि सारे एशिया प्रदेसा मां वी हा केहती कर पौलुस ने घणा लौका नु समझाले ते भरमाले वी छै, ते जको हाथा चा बणलीया आलीया मूर्तिया छी, वे ईश्‍वर कोनी। 27ते सेर्फ येही बाते चा ही ङर कोनी कि, अम्चा काम धन्धा बन्द हुती जई, बल्कि बङी देवी अरतिमिस चा मन्दर तोच्छ समझला जई ते बल्ति जको सारा एशिया ते पूरा संसार विची पूजा करे ऐचा महत्व वी जता रिही।”

28ईं सुणते ही वे सारे गुस्से लारे भरीती गेले ते जोरा-जोरा आलीकर रौल मचाऊं लाग़ले ते किहुं लाग़ले, “इफिसिया ची अरतिमिस, देवी बङी छै।” 29ते सारे शहरा मां बङी हलचल मचती गेली ते लौका ने गयुस ते अरिस्तर्खुस, मकिदुनिया कनु आले जको पौलुस चे लारे रेहणे आला बन्दा नु पकड़ती गेले, ते सारा नु हेक रंगशाला मां गेहती गेले। 30जिसे बेले पौलुस ने लौका चे गोढु भीतर जाणे चाह्‍ले ते चैला नु ओनु जऊं कोनी ङिले। 31एशिया चे हाकिमा महु वी ओचे कई दोस्ता ने ओचे कनु ईं किहवाती भेज़ले ते विनती वी करली कि, रंगशाला मां जती कर जोखिम मां जान ना नाखजा।

32ओठे कुई कोच्छ रौल मचाते ते कुई कोच्छ। कांकि सभा मां बङी गड़बड़ी हुवे पलती, ते ब़ोहत से लौक तां ईं जाणते वी ना कि अम्ही के वास्ते भेले हुले। 33बल्ति वाणे सिकन्दर नु, जानु यहूदिया ने खड़े करले हुते, भीड़ महु आग़ु बढ़ाले, ते सिकन्दर हाथा चे इशारे लारे बन्दा चे सामणे हा उत्तर ङेणे चाहवे ला। 34पर जिसे बेले वाणे जाणती गेले कि वे यहूदी छी, ते सारे चे सारे लौक हेक अवाज मां कुई ङोन घण्टा तक रौल मचाते रेहले, “इफिसिया ची अरतिमिस, देवी बङी छै।”

35बल्ति शहर चे मंत्रीया ने बन्दा नु शान्त करती कर केहले, “इफिसुस शहरा मां रेहणे आली बन्दी, कूण ना जाणी कि इफिसुस वासीया चा शहर बङी देवी अरमितिस चे मन्दर, ते आसमाना कनु ढेली आली मूर्ति चा रखवाला छै? 36कांकि जिसे बेले यां बाता चा कुई मतलब ही ना निकली, ते ठीक ईं छै कि, तम्ही चोप-चाप रिहा ते बिना सोचले समझले कोच्छ वी ना करा।

37“कांकि तम्ही इसड़ा बन्दा नु गेहती आले, जको ना तां मन्दरा नु लूटले, ते ना ही अम्ची देवी अरमितिस ची निन्दा करली। 38अगर देमेत्रियुस ते ओचे साथी कारीगरा नु काये लारे बहस-बाजी करनी तां अदालत खुली छै, ते ओचे मां हाकिम वी छै। वे हेके ङुजे उपर अरोप ला सग़ी। 39पर अगर तम्ही कुई नेरी बाते चे बारे मां पूछणे चाहवा तां, अदालती मां फैंसला करला जई। 40कांकि आज़ चे दंगे चे वजह अम्चे उपर दोष लाग़णे चा ङर छै। ऐवास्ते कि ऐचा कुई ठोस वजह ना ङिसी ऐ मामले मां अम्ही ये भीड़ चे भेले हुवणे चा कुई वी उत्तर ना ङे सग़ु।” 41ते ओणे ईं केहती कर सभा नु विदा करती ङिले।

Currently Selected:

प्रेरितां चे काम 19: ODR

Highlight

Copy