Lukas 18

Hanuwa dut habayang mono ilam loʄamawalaka

1Ɓa ɓewe neɗoge Yesus nahalarai wu lii-hatuʄa ɓana hanuwadi ana hakodo halole-Na tannam yiɗɗa kaɗa dut habayang mono ilaɗa loʄamawalaka. 2Malinagei Yesus, “Ta ɗiha wu kota ɗaan wu ata katag pohta palakara aika madautani Alla, mono walna hiꞌmai langɓa iyahingkay. 3Neɗo ta kota ɗaa ɗummoni wu lawai ɓalu kahadu-du mai ta ata katag pohta palakara karaiwe tullunage palakarana. Malinage naɗa lawai ɓalu, ‘Kam tulkiga, rayige katijana ta palakaragu arodi gaɓɓagu.’ 4Kawungage naɗa ata katag pohta palakara walna auꞌma tullun naɗa lawai ɓalu. Tanyiɗuwe ɗajalage nahangaɗage, ‘Loko aig madautaɗuni Alla, mono aig hiiɗuyi langka iyahingkayi, 5dahha ɗahowe ɓag yiinage katijana ta palakarana naɗe lawai ɓalu. Ai tauɗage, nyi enga namai hakitana mono naha ojawa.’ ”

6Lohho linage Yesus, “Hamatarage hatakna naɗa ata katag pohta palakara aika tijana! 7Alla enga natulludi ata hapede-Na kamaraino tabara-Na gaɗi-laɗo. Nyi enga nageha ɓana tulludi. 8Hatenawela: Nyi enga nageha yiiwe katijana tabaraɗa! Tabolo ta rahge nim ɓana mai Ana-Na Kaɗaꞌ Ata, Nyi naɗaꞌkaꞌhowe ɓana taɓoka ata ka engana hatena tabara-Na?”

Lii-hatuʄa tut habayangɗa ata walta kalibbo Farisi mono ata kakahha walkatakku

9Yesus nahalara ʄalayi lii-hatuʄa paha aro-Na ta ata kaɗaika wikna ɓa nyi kahadda tena mono kahaɓawayi ata waɗeka. 10Malinagei Yesus, “Ɗaadi ɗuɗa ata kakako ta Ummanai Mori lo habayangna. Naɗa wu, ata Farisiyi, wu wali, ata kakahha walkatakkuyi. 11Naɗa ata walta kalibbo Farisi nadede meha mono nahabayangna, ‘O Alla Ama, nauwa wai lugug tabara-Mu, oro nauwa aig tuʄaɗamoyi ata waɗeka, kadadara, kapalleka, waleka kajala ɗangana ata heka. Nauwa wailugge aig tuʄaɗamoyi naɗa ata kakahha walkatakku. 12Nauwag haduna aig yaa-enuwa ɗiha miggu, mono nauwag yiiwa maaraka wu walta bul tabara-Mu wal hakolegu.’ 13Tabolo naɗa ata kakahha walkatak nadede dikorau mono walna keketaꞌmawe matana. Waige milla ate mono molung, nyi napal-palwe kurna ɓana kahugla mono na habayangna linage, ‘O Alla Ama, manawarakiga, nauwa ata doku-jalawa!’ ”

14Malinagei Yesus, “Hatenawelaǃ Kole raɗa kaɗuɗana ata ɓaɗa hagga ta ummaɗa ɗiha-ɗiha, habayangna ata kakahha walkatak nyiꞌna pahibanai Alla, wale ata Farisiꞌma. Oro tangngana ata kahamadehta wikna enga haɓawayi; mono tangngana ata kahaɓawa wikna enga hamadehtayi.”

Yesus nahamaringiyi lakawa

(Matius 19:13-15; Markus 10:13-16)

15Ɗaadi ata kangidi lakawa kamarrahaho tabarai Yesus tannam kana tauyi limma-Na tabaraɗa mono hamaringiyi. Kole ana hakodo halole-Na etawe nna, yiɗɗa baanɗad raɗa ata. 16Tabolo Yesus nakamaikadi raɗa lakawa mono linage ta ana hakodo halole-Na, “Nyammadi raɗa lakawa kaɗa mai tabara-Gu! Ilam heirkadi yiɗɗa, oroge ata katauna raɗa lakawa marraha yiɗɗaꞌna kaɗaꞌ ana-huhnai Alla. 17Katautakkanage Nauwa lugɗage tabaramu, ata aika hibayi Alla ɓana hareha ta mourhana katauna naɗe lakawa marraha kamanud tabara inya-amana, walna ɗaɗiꞌmawe ɓana ɗaꞌ ana-huhnai Alla.”

Tut ata pote

(Mat. 19:16-30; Mrk. 10:17-31)

18Wu ha ama Yahudi nakanuka tabarai Yesus, “Ha ama Gurr kadahha, agaɗahona harayigu tannam kag kolege mourha aikaman dukana?”

19Malinagei Yesus, “Ahha yau mam takkiwe Nauwa ɓag dahhawa? Dukaɗahenai Alla kadahha, laꞌma waɗeka. 20Yau tadaɓeyi parehanai Alla: ‘Ilam jala ɗangana ata heka, ilam hamatewu, ilam keꞌkau, ilam ɗaꞌkaw hakahi palleka, mono manutayi amam mono inyam.’ ”

21Balehana naɗa ata, “Tangngadi raɗa pareha ɗouk kahaɓedi wal ɓodigu.”

22Ɓana rangewe hatakna naɗa ata malinagei Yesus, “Ɗaaɗahoge wu harayimː malajad tangngadi haɗaum, yiiy amahadi ta ata milla, mono enga kolemuge hapote ta sorga. Ɓelage kammai ɗouk-Ga.” 23Tabolo kole ɓana rangewe naɗa ata, nyi namaropowe atena oro ɓana butahinguyi hapotena.

24Yesus na etayi naɗa ata ɓana maropohingwe atena, nyiɗawe malinagei Yesus, “Mayilla takkawe wu ata pote ɓanaɗaꞌ ana-huhnai Alla! 25Namayillawe wu unta#18.25 ‘Unta’ halinawe ranga madakkayi pahaila waiyi ata waleka ngawu. ɓana tama ta ɓonga kariha, tabolo reih mayillage wu ata pote ɓana yii wikna tannamuy Alla kana hareha ta mourhana.”

26Ata karangeyi Yesus, maliɗage, “Nyiɓatauɗage, enga iyaɗayi pahatoulka?”

27Yesus nabalehawe, “Ai kakalɗaɗi tabara kaɗaꞌ ata, tabaranai Alla naɗaꞌwe!”

28Malinage Petrus, “Nami agalinaɗawe! Matannaɓedi ummama ɓamaɗokug Ama.”

29Malinagei Yesus, “Hatenawela! Ata katannaɓege ummana, waleka ole-ummana, oleɓaina, amana-inyana, waleka anana oro ha ullanai Alla, 30naɗa ata enga kolenage upage kamajaɓola nehe ɓatauge mono ta rahi nim ka amna, Alla enga nayiini mourha aikaman dukana.”

Yesus natakwe hadalwudawai tut mate-Na

(Mat. 20:17-19; Mrk. 10:32-34)

31Yesus nakamaikadi kabul ɗuɗa ana hakodo halole-Na makahha, malinage, “Rangewe! Ɓatauge yitta arodage ta Yerusalem. Neɗa bal enga ɗaɗige ɗoukge agawe ulge hatulhaɓeɗa lede-liinai Alla tutu-Gu Ana-Na Kaɗaꞌ Ata.” 32Nyi enga harakaɗani tabara ata aika ata Yahudina, enga terekayi, hamakkeyi, mono Nyi ɗatarumuyi. 33Yiɗɗa ɗahamayilla-Yi mono ɗahamate-Yi, tabolo hatauɗa laɗo wai, enga namourha hagga.”

34Tangngad raɗa hatak-Na walɗa yappahingmayi hoꞌak ana hakodo halole-Na. Oroge ngihge hatak-Na naɓunyhowe tabaraɗa. Yiɗɗa walɗa tadaꞌmawe ɓa agawe hatak-Na.

Yesus nahataggahayi wu ata moro

(Mat. 20:29-34; Mrk. 10:46-52)

35Yesus mono ata kaɗoku-Ni ɓaɗa manarɗik ta kota Yeriko, ɗaan wu ata moro katangra ngoɗo karai ta hup lara. 36Kole nyi ɓana rangeyi ata buta ɓaɗa pallaka, nakanukawe, “Agawe kaɗaꞌ?”

37Maliɗage tabarana, “Yesus, ata Nasaret, pallakanage.”

38Nyiwe naɗa ata moro mana kawula, “Yesus, anai Daud!#18.38 Anai Daud halinawe ngara galenage tutnai Mesias, nyiꞌna ‘Raja Kahatoulka manemara’. Millakiga ate Mori!”

39Ma raɗa ata kakako ul waltai Yesus, ɗabaanin mono ɗahalewai kaɗanna. Tabolo nyi kii-kii kawulanage, “Anai Daud! Millakiga ate Mori!”

40Yesus nangahu mono nahaleway ata kaɗa ngidiyi naɗa ata moro tabara-Na. Kole ɓana ɗikki, Yesus nakanukayi, 41“Agawe hakab atemu harayi-Gu tabaram?”

Balehana naɗa ata moro, “Nauwag baige eta.”

42Malinagei Yesus, “Ɓatauɗage, etawu! Oro ɓamhatenawu tabara-Gu, yau taggahawu.”

43Nna mema ʄala na eta, lohho nyi naɗokuni Yesus mono nahaɗi-ɗaikayi Alla. Kole ata buta ɓaɗa etawe nna kaɗaꞌ, yiɗɗa tangngaɗa ɗahaɗi-ɗaikayi Alla.

Currently Selected:

Lukas 18: lmy

Highlight

Copy