Lukas 19

Yesus mono Sakeos

1Kolehei Yesus ɓanaɗik ta kota Yeriko, na tama manakako pallakawe nna kota. 2Neɗo ta kota ɗaan wu ata kapalad kahhay walkatak kangaranai Sakeos, nyi ata poteyi. 3Nyi nakamaꞌge etay ɓa iyay Yesus, tanyiɗuwe oro butana ata, mono tauna ɓana padakawe, walna ɗaꞌmawe ɓana etay Yesus. 4Nyiwe mana malai hepuy ata buta mono panne ta puyay, tannam kanaɗaꞌwe etay Yesus, ka amna liiɗan naɗe lara. 5Kolei Yesus ɓana ɗik ta puyay hadau panenai Sakeos, Nyi na etay ɗete mono linage tabarana, “Sakeos, gehaw burr! Oroge Nauwa liiɗahowa ta ummam nehe laɗo.”

6Sakeos gegehanage burr mono waige lagahara ate nahibayi Yesus ta ummana. 7Tangngana ata etawe nna kaɗaꞌ ɗakangurka, maliɗage, “Huh! Nyi kakonage ta ummana naɗa ata aika dahha.”

8Kole ɓaɗik ta ummana, Sakeos nadede malinage tabaranai Yesus, “Mori, hameragiid raɗe hapoteg nauwa kag ɓaweɗad ata milla, mono ɓa iyay hapallekag, enga pahaggaɗahoɗad tabaraɗa habata wudad reih buta wal hangalagu.”

9Malinagei Yesus, “Nehe laɗomema yau mono tangngaɗa ole-ɓaim laar ta ummam nahamanemarai Alla, oroge yau ɗummo walla-wunagui Abraham. 10Nyiwe Ana-Na Kaɗaꞌ Ata manamai mayegadi mono hamanemarai ata kajalora.”

Lii-hatuʄa tut amaha rara

(Mat. 25:14-30)

11Yesus mono ata buta manarɗikɗage ta kota Yerusalem, raɗa ata buta ɗahawauge Alla enga gehanage hakakowe hareha-Na ta pan-tana. Ɓatangrahoɗa raɗa ata buta ɓaɗa rangey Yesus ɓana hanewe, nahakitage hanewe-Na wain wu lii-hatuʄa kalinaɗana, 12“Ɗaan wu marabba kakako ta hadau kamarau tannam kahailan ngidna kana ɗaꞌ raja, tabalge neɗa ubna hagga ta hadauna. 13Aina kakoho mana kamaikad kabul ata pahalewana, mana yiid merawud amaha rara. Malinage tabaraɗa, ‘Raɗe amaha kamɗagawaid tangrage ɓag kakowa.’ 14Tanyiɗuwe ata neꞌ ta hadau ɗabutun ate. Kole ɓana kako, yiɗɗa halewa ʄalaɗage ata heka kako kamtakwe, ‘Nam walema auꞌma naɗe ata ɓa nyi rajama.’

15Tanyiɗuwe naɗe marabba engage ɓahailan ngidna. Ta baalge neꞌ mana hagga ta hadauna. Kole ɓanaɗik nakamaikad tangngaɗa ata pahalewana aroni, tannam kagtadayi ɓa pirrad ha utɗa. 16Ata kamai ul linage, ‘Marabba, wu amaha rara hayiimuga, naɗaꞌɓe kabul amaha rara.’ 17Malinage naɗa marabba, ‘Yau, dahhawe harayim mono ata dahhawuǃ Oroge ta harayi ulla kamarraha yau naɗaꞌwe ɓahatenawu, nauwa enga keketagug kamharehayi kabul kota.’ 18Ata pahaɗuɗawai ammin mono linage tabarana, ‘Marabba, wu amaha rara hayiimuga, naɗaꞌɓe lima amaha rara.’ 19Malinage naɗa marabba tabarana ata haɗuɗawai, ‘Yau enga harehamudi lima kota.’ 20Ata hatauɗawai ammin malinage, ‘Marabba, naɗe amaham marabba, nauwa ijalagun ta kaba houp limma. 21Nauwa madautakig, oroge yau marabba ata baan kalawu. Yau ngalawu aiha ɗaum mono yau ɓam kahhayi ngihid walta hadau aiha tadom.’ 22Malinage naɗe marabba tabarana, ‘Yau ata pahalewaw kaɓokalaǃ Ɓaɗokad hatakkimu, yau enga hokgug. Yaum tadawe ɓa atawa kabaanː kangala aiha ɗaug mono nauwag kahhayi ngihid walta hadau aiha tadog. 23Nyiɓatauɗage ahha yau mawalem hatamad raɗe amaha ta bang, tannam ɓag kole hahagga kag hibayi raɗe amaha mowaid ha ut?’ 24Maɓegge, malinage naɗa marabba tabaraɗa raɗa ata kadede neɗo, ‘Ngalai amaha wal tabarana mono yiiy tabarana ata pahalewa kakolena kabul amaha rara.’ 25Tanyiɗuwe maliɗage raɗa ata, ‘Marabba, nyi kabulɓed amahana.’ 26Balehanage marabba, ‘Apewelaː ata kapang ɗauna, enga yiiɗahoni kareih buta. Tabolo ata aikapang ɗauna, agay kaɗaana tabarana enga ngala haggaɗahoyi wal tabarana. 27Nna ɓatauge ngidgad ram muhugu aika baiga ɓaɗa rajaga, hamategadi tangngaɗa ta arogu.’ ”

Ata Yerusalem ɗahibayi Yesus waige lagahara

(Mat. 21:1-11; Mrk. 11:1-11; Yoh. 12:12-19)

28Kolei Yesus ɓana takkiyi naɗa lii-hatuʄa, Nyi na ulna lara, hakitana ɓaɗa kako aro ta kota Yerusalem. 29Kolehe ɓaɗa ɗahekawe harona Betfage mono harona Betania kaɗaana ta analete Zaitun,#19.29 lete ZaitunNna analetena yoɗawe tabbara laɗo koka walta kota Yerusalem. Madehtage nna analetena ɓakatutkawe 830 meterage. Nne analetena mahangara tauɗage oro ulge butayi yay zaitun katumu. Nyi manahalewayi ɗuɗa ana hakodo halole-Na kako ul. 30Malinagei Yesus tabaraɗa, “Kakom ta harona neꞌ ta aro. Kole ɓam tama neꞌ bal, mi enga etamin wu ana keledai#19.30 Keledai halinawe ranga haleteyi, tauna reih marrahawe walta jara. hapaak. Naɗa keledai walaꞌɗahingmahona ata kaleteyi. Ladanni mono kam ngidgan. 31Ɓaɗaaka ata kanukami, ‘Ahha mam ladan naɗa keledai?’ Limɗage, ‘Kag wain linagei Mori.’ ’’

32Kaɗuɗana ana hakodo halolenai Yesus kakoɗage, mono ɗaɗikkid tangngadi winghege katauna hataknai Yesus. 33Ɓatangraɗa ɓaɗa ladan naɗa ana keledai, morna linage tabaraɗa, ‘Ahha mam ladagan naɗa ana keledaig?’

34Balehaɗage, ‘Wain linai Mori.’ 35Maɓegge maɗa ngidiyi naɗa ana keledai tabaranai Yesus. Maɗa hapelage hingɗa ta ɓedo keledai mono ɗatulluni Yesus panne ta keledai. 36Ata buta ka etai Yesus ɓana kaletei naɗa keledai ɓana aro ta kota Yerusalem, halakaraɗad hingɗa ta lara halinai Yesus, ɗihawuwe tada manutaɗani Yesus.

37Kolehei Yesus ɓa manar ɗiknage ta kota Yerusalem, ta lara kahadoɗona ta Analete Zaitun, tangngaɗa ata buta kaɗoku-Ni halegeɗage hayawuna ɓaɗa ɗaikayi Alla mono waiwu liɗani tabara-Na, oroge tangngad kahekagaina harayi-Na ha etaɓeɗa. 38Maliɗage, “Maringkana Raja ka amna, waige ngaranai Moriǃ Ɓatauge kaɗaꞌ ata naɗaꞌwe moul ɗangani Alla ta sorga. Namahaɗi ɗaikayi Alla ta hadau kahadda madehta.”

39Kapirrana ata walta kalibbo Farisi ta jongaɗa raɗa ata buta maliɗage tabaranai Yesus, “Ama Guru, halewayi tangngaɗa ata kaɗokug Ama, kaɗa ɗanna.”

40Nabalehawei Yesus, “Lugɗage tabaramuǃ Raɗa ata ɓaɗa kaɗannaka, raɗe wat ɗahayawuna.”

Yesus nahooge kota Yerusalem

41Kolehei Yesus ɓana ɗahekawe kota Yerusalem, na etawe neɗa kota, Nyi manahooge. 42Malinage, “Taa ata Yerusalem, oha tahege, odahewe mi tadaɗahowe ɓa Nauwaꞌna kangidwe hamoul ɗanga, tanyiɗuwe mi walem tadaꞌmawe oroge naɓunyhowe tabarami. 43Hadaka rah nim ka amna, raɗa muhum ɗamai kapoungge kotam. Yiɗɗa ɗahangodna tana kilorage kangaal kotam, tannam kanaɗaꞌwe ɓaɗa ruꞌkana tama, mono ɗadaheragim wal ta kalii ta kawana. 44Muhum enga ɗahamatem mono ɗahamauhage kotam; mono walelaꞌma wu ak wat pahalide hatannaɗa ta hadauna. Tangngad raɗe enga naɗaɗiy oroge yau aim hamatarage rahgei Alla ɓana mai hatoulka manemaramiǃ”

Yesus natama ta Ummanai Mʊri ta kota Yerusalem

(Mat. 21:12-17; Mrk. 11:15-19; Yoh. 2:13-22)

45Yesus natama ta Ummnai Mori mono nawugai raɗa ata katangra ɗagana neɗo. 46Malinagei Yesus tabaraɗa, “Nna lar ta Jurata Ɓiha namatulha tauɗageː Alla nahanewe, ‘Umma-Gu, umma hadau habayangwe.’ Tabolo mi haɗaꞌmige rowaka hadau makahhaɗa harampok.”#Yesaya 56:7 dan Yeremia 7:11

47Ɗiha laɗo ɗiha laɗoi Yesus ɓana yii lii-hanuwa lar ta Ummanai Mori. Raɗa kapala imam#19.47 Imam nyiꞌna ata kaledege Alla mono kaɗaꞌ ata. Kapirrana ha ullaɗahona imam katauna yii maaraka waina ranga hatuun mono hatomage habayangna tut ata waɗeka., raɗa gurr agama ata Yahudi, mono raɗa ngora ata Yahudi ɗakab atege hamate-Yi. 48Tanyiɗuwe wale laꞌma laraɗage ɓaɗa rayige nna hakab ateɗa. Oroge ata buta ɗaa hakitad tabara-Na, ɗarangeyi mono namatinguy ateɗa ta tangngage hatak-Na.

Currently Selected:

Lukas 19: lmy

Highlight

Copy