Lukas 17

Haɗa haɗaꞌɗangage ata rayina doku-jala

(Mat. 18:6-7, 21-22; Mrk. 9:42)

1Malinagei Yesus tabara ana hakodo halole-Na, “Makaɓa tut rayina doku-jala ɗaa ai dukage. Tabolo kahadda liloko naɗe ata karayige hamon ɗangana ata heka ta doku-jala! 2Nadahha ɗahowe naɗa wat ɓonga ɓa teirnani ta kokona, lohho nyi ɓaita ɗahon lar ta ban. Nyiɓatauɗage, nyi walna rayiɗaꞌmage ta ata aika kulhaho hatenana tabara-Gu moun ta jala. 3Oro ɓatauɗage, yapgela!

Naɗa oleɓaim ɓana jalaka, paɗekai, ɓana ʄarraꞌna, hawalkini. 4Ɓana jalaka tabaram pit wudana ɗiha laɗo mono ɓana hapit wuda ʄalana mai tabaram mono ɓalinaka, ‘Ɓaankaga,’ hawalkini.”

Tut hatena

5Maliɗage raɗa ana pahalewa tabarai Yesus, “Mori, hakulhamad hatenama.” 6Nabalehawei Mori, “Nna mi ɓaɗaaꞌge hatenam ka wu wat sesawi marrahana, mi naɗaꞌwe ɓalimini naɗe pu yay, ‘Maɓatuwu mono mateihkaw lar ta ban.’ Naɗa pu yay engana ɗoukguge hareham.”

Harayi ɗahona wu ata pahalewa

7Yesus nahakitage hanewena, “Ɓaɗaaka wu ata walta mi kapang ata pahalewana ka ullana ta oma waleka kaʄawa bebbe. Naɗa ata pahalewa ɓana haggaka morna, enga wale linaɗaꞌmage tabarana, ‘Mai geha kam yaa.’ 8Tabolo nyi enga linaɗage tabarana, ‘Ha inyaga hayaagu. Waina kalabbe murraha mono kam yiiga hayaagu. Remaga ɓagɓe hayaa mono enu; ɓelage kam yaa.’ 9Waikiwu wale linaꞌmage morna tabarana naɗa ata pahalewa, oroge nyiyo ɓana hakakoɓewe ha ullana. 10Tauɗa ɗummonage mi. Mi ɓam ɓeɓewe harayige tangngage paharehanai Alla tabaram, takwela, ‘Nami ata pahalewaɗahema aika marakka ɓa ɗaikayi. Nami duka ɗahege rayige hatagma.’ ”

Yesus nahataggahayi kabul ata katoub

11Ta lara ka aro ta kota Yerusalem, Yesus na liiɗa ta ɗirri tana Samaria mono tana Galilea. 12Ɓana tama ta bat harona, ɗaadi kabulna ata katoub. Yiɗɗa ɗa au mai tabarai Yesus tabolo ɗadede dikorau 13mono ɗakawula, “Yesus! Mori! Millakigama ate!”

14Kolei Yesus ɓana torroyi, malinage, “Kakom hatingo wikim ta imam tannam kaɗa tadaguge haɗam.”

Tangrage ɓaɗa kako, ɗataggaha walta kalawaraɗa. 15Kole wu ata walta jongaɗa tada wikna ɓana taggahaɓe, nyi hagganage waige mageɓora ɗaikayi Alla. 16Lohho ta aroi Yesus, nyi nakawoʄo mono waiwu linan taɓara-Na. Naɗa ata, ata Samariay. 17Maɓegge linagei Yesus, “Wale kabul kaꞌɗa ata pahataggahaɓe? Gikad ka ɓanɗihana? 18Ahhama ai ata Yahudi ɗalkay kahagga waiwu kalina tabarai Alla?” 19Malinagei Yesus tabarana naɗa ata, “Kaɗew, mono kakow. Oroge yau ɓam hatena tabara-Gu, yau taggahaw.”

Yesus nahalarawe tutge aganaɗawei Alla ɓana hareha ɗaꞌ Raja

(Mat. 24:23-28, 37-41)

20Kapirrana ata walta kalibbo Farisi ɗakanukawe tabaranai Yesus, pirrawei Alla ɓana mai hareha ɗaꞌ Raja. Yesus nabalehayi, “Harehanai Alla walna halege waiɗaꞌmage taadka ha etana ata. 21Mono ata wale liɗa ʄalaꞌma, ‘Mai torroi, nyi naɗe!’ waleka, ‘Naɗa bal nyi!’ Orogei Alla nahalegeɓewe hareha-Na ta ateɗa raɗa ata.”

22Kole neꞌge linagei Yesus tabaraɗa ana hakodo halole-Na, “Enga amge rahge mi kamaꞌhingge etayi langka ɗiha laɗoka walta laɗo-Gu Ana-Na Kaɗaꞌ Ata,#17.22 Hatakna mi kamaꞌhingge etayi langka ɗiha laɗoka walta laɗo-Na Ana-Na Kaɗaꞌ Ata ngihna “Kamaꞌ takkage rah mainai Yesus haduwaina, ta rah ta aro, kabanna kamanadana mono kamaringna.” tabolo mi walna ɗaɗiꞌmawe ɓam etay. 23Nim ata enga liɗa tabaram, ‘Torroy neɗo!’ waleka, ‘Torroy nne!’ Tabolo mi ilam ɗoukage hatakɗa. 24Ta laɗo ɓag maiwa, Nauwa Ana-Na Kaɗaꞌ Ata meranan kamilaka kayaleka ta langta, ha etana tangngana ata ta pan-tana. 25Tabolo Nauwa ulɗahowe ɗitawe mayilla kabuta, mono walɗa hibaꞌmawa ata nne ɓatauge. 26Ta laɗo-Gu, Nauwa Ana-Na Kaɗaꞌ Ata ɓag ɗedowa nimla, haɗage natuʄawe kaɗaꞌ ɓana mourhaho lede liiy Nuh nutna. 27Ata ɗa yaa-enu, kaha anana kaɓaani ɗangalad ole-ummaɗa, kaha anana lawai ɗahalai ana lawaiɗa katauna kadamma. Tauɗa hakitaɗage kahha lede liiy Nuh ɓana tama ta tena mono amini lai wee kalla puɗahayi tangngaɗa ata. 28Tauɗa ʄalage kaɗaꞌ ɓana mourhahoi Lot nutna. Ata yaa mono enu, malajana mono hii, rayina oma mono hadede umma katauna kakaldamma. 29Tabolo kolei Lot huuna walta kota Sodom, Alla nahaburudi latti belerang#17.29 Na belerang nakuntawe mono nagehawe mut. Ɓana mutkawe paɗage bau aika dahha mono kamayilla ɗangawe. tuʄai urra kalla walta langta kapuɗaha kahhayi. 30Tauɗaɗage haɗage nimla ta laɗo-Gu, Nauwa Ana-Na Kaɗaꞌ Ata ɓag haɗedala wikna.

31Ta laɗo naɗa ata katangrana ngoɗo ta lenang, ilana tamaka ɓana ngalayi ngawuna lar ta umma. Tauɗa ɗummoge ata katangrana ta oma ilana haggaka ta ummana. 32Apewela agawe kaɗaꞌ ta ole-ummanai Lot!#17.32 Yesus nahanamɗage ana hakodo halole-Na tannam ka ilaɗa rayige kajala kahamera katauna harayina ole-ummanai Lot. Nyi walna ɗoukmage harehanai Mori tut ia gillaka ta lira. Oro namuyi ngawu-hapotena nyiwe managilaka ta lirana, ɗajalage nyi ɗaꞌ harii mahhi. Yitta ʄala ɗaɗouk ɗahodi harehanai Yesus, ila gelagagaka. Oroge ɓana gillage lirana, nyiwe mana mate. 33Ata karun ge karawawe mourhana, enga bungage mourhana. Tabolo ata kabunga mourhana oroge ɓana ɗouk-Ga, enga kolenage mourha aikaman dukana. 34Hatenawela: Ta laɗo ɓag maiwa, Nauwa Ana-Na Kaɗaꞌ Ata, ɓatangraɗa dura gaꞌ ɗuɗa ata ta wu pinya, wu enga ngidiyi mono wu wal enga tannani. 35Ɗuɗa lawai katangrana ɓai, wu enga ngidiyi mono wu wal enga tannani. [36Ɗuɗa ata katangrana ullana ta oma, wu enga ngidiyi mono wu wal enga tannani.”]

37Ana hakodo halolenai Yesus ɗakanukawe, “Gii nna dau ɗaꞌge, Mori?”

Nabalehawei Yesus, “Gige dauɗage karogo, neɗo yoɗa ʄalai gaka. Tauɗa ʄalage nimla ta laɗo rahge Nauwa, Ana-Na Kaɗaꞌ Ata ɓa am-Ga hagga, Nauwa enga waleg kaɓunyiꞌmage. Tabolo tangngana ata enga etawe mono tadawe.”

Currently Selected:

Lukas 17: lmy

Highlight

Copy