Lukas 16

Lii-hatuʄa kanarona amaha aika lurha, tanyiɗuwe namania

1Yesus nahanewe tabaraɗa ana hakodo halole-Na, “Ɗaan wu ata pote kapang atana kanaronad amahana, ka urhanadi hapotena. Naɗa ata pote nakolena hanewe tutna ata kanaronad amahana, ɓana wallawainad amahana. 2Nyi mana kamaikani naɗa kanaronad amahana mono linage, ‘Nne harangegu, yau wallawaimugad amahagu. Oro ɓatauɗage, nauwa hangahgug ta ha ullam. Tanyiɗuwe kam rayitogad jurata tagna baleha, tut ourhamugad tangngad hapotegu.’ 3Ma naɗa kanaronad amahana nahangaɗage, ‘Agaɗahona harayigu naɓatauge? Ha ama kab atege pahuuga. Kajakara, waleg kulhaꞌmawa; tag walkage rai, nauwa makkelwa. 4Naɓatauge nauwa tadawe agaɗahona harayigu, tannam kole ɓapahuuga, ka enga ɗaa olegu, ka au hiɓawa ɓag engana ta ummaɗa!’ 5Nyiwe naɗa kanarona amaha nakamaikad tangngaɗa ata kapang wutana tabara morna. Ata hamaika ullu, linani, ‘Pirrad wutamu tabarana mori-gu?’ 6Naɗa ata nabaleha, ‘Ngahu hajaal minya zaitun.’#16.6 Minya zaitun halinawe kawalwe ta wuu zaitun. Puu zaitun katumuyi ta tana Timur Tengah. Minya zaitun ha morrowe mono wuuna ɗaꞌwe ɓa yaan. Kanarona amaha linage tabarana, ‘Nne jurata wutamu. Ngoɗo mono geha tulhay: lima bul hajaal.’ 7Ɓewal nahanewe tabarana haɗuɗa wai, ‘Ɗum, pirradi wutamu?’ Naɗa ata nabaleha, ‘Rata karung gandum.’ Naɗa katag narona amaha linage tabarana, ‘Nne jurata wutamu. Tulhay podopata ngah karung.’

8Morna naɗa ata kanarona amaha aika lurha, naɗaikayi oro harayina kamania. Nyiwei Yesus manahalarawe tabara ana hakodo halole-Na, “Ata kahangaɗa ɗahege morha kadahha ta pan-tana, athodi mania urhawe ha ulla pan-tana walta raɗa ata kahangaɗa ɗahege tutge ha ullanai Alla.”

9Ɓewali Yesus nahanewe pi, lina-Ge, “Rangewe! Waidi hapote nne ta pan-tana kampik kole waina ole, tannam naɗa hapote nne ta pan-tana aihil ɗaaka hiidi, mi enga hibami ta hadau aikaman dukana. 10Ata pahatena lar ta ha ulla kamarraha, ɗaꞌwe ɓahatena ʄalai lar ta ha ulla kamadakka. Tabolo ata aika ɗaꞌ ɓahatenai lar ta ha ulla kamarraha, wale hatena ʄalaꞌmayi lar ta ha ulla kamadakka. 11Nyiɗawe, mi aina ɗaꞌkawe ɓa hatenami ourhay ngawu ta pan-tana, Alla enga walna hatenaꞌmamidi hapote walta sorga. 12Ngawu ata heka baꞌ ai hil hatenami, iyaꞌkay ka au yiigudi agai rakkana haɗaumu?

13Walaꞌma wu ata karayi ulla ta ɗuɗa mor. Oroge nareih manawarani naꞌ wu walta waɗeka, waleka nyi enga athoni manud tabara naɗa wu mor walta mor waɗeka. Tauɗa ʄalanage mi. Mi walna ɗaɗiꞌmawe rayi ulla tabarai Alla mono ta hapote pan-tana.”

Iyai katena ta aronai Alla

(Mat. 11:12-13, 5:31-32; Mrk. 10:11-12)

14Buta ata walta kalibbo Farisi rangewe tangngage hataknai Yesus. Ma yiɗɗa ɗamalha-Ni, oroge ɓaɗa baina amaha. 15Tanyiɗuwe Yesus nahanewe tabaraɗa, “Miyo hatingomige katena ta aro ata heka, taboloi Alla natadamige ngihi atemu. Oroge agawe katena ta pahangaɗa ata, walaꞌma hiige ta aroi Alla.

16Wal ulge yitta ata Yahudi ɗokudi hanuwa houk hayiina lede-liinai Alla kangaranai Musa mono jurataɗa lede-liinai Alla waɗeka. Tauɗa hakitage ɓahanuwadi kahha ɓanamai Yohanis Pembaptis. Wal neɗo Lii Dahha tutge aganaɗawei Alla ɓana hareha ɗaꞌ Raja, hakitage ɓatakwe. Mono buta ata run ge kapik morha ɗoukge hakab atenai Alla. 17Langta mono tana engana bungawe, tabolo Uk-Parehanai Alla hatulha, wale laꞌma wu ak hapunga.

18Ɓa iyai kapahewa ɗangani ole-ummana mono ngala lawai heka, nyi jala ɗangaɓenan. Tauɗa ʄalage ɓa iyai ka ole-ummana wu lawai hatannana laina, jala ɗangaʄalaɓenan.”

Ata pote monoi Lasarus

19Yesus nahanuwa waige lii-hatuʄa waɗeka tabaraɗa, “Ɗaan wu ata pote, kalabbena walta kaba kaɓiꞌta hiina, mono mourhana ɗiha laɗo-ɗiha laɗo namajaɓolawe. 20Ta ɓau ɓinna ummana ɗaan wu ata milla kangaranai Lasarus. Ngihna ban ge katoub. 21Nakab atege hangihge tiina waidi ka mum hayaa kamoun walta hadau yaana naɗa ata pote. Am walid ɓaggage ʄalnad katoubna.

22Naɗa ata milla hadage namate mono malaikat ɗangidiyi ta hadau kamanadana tabara tiɓnai Abraham ta sorga. Naɗa ata pote namate ʄala mono taanini. 23Ta lat aika baɗa naɗa ata pote wale anaꞌmanage mayillana. Mono ɓana tangarawe ɗete, na etai Abraham ta hadau kamarau mono Lasarus ɗaan tabara tiɓnai Abraham. 24Mono naɗa ata pote kawulanage, ‘Ama Abraham! Manawarakiga. Halewai Lasarus paꞌlan karak limmana lar ta wee mono kanamai hamaglagage lammagu. Mayilla takkawa nne lar ta latti!’

25Taboloi Abraham nabaleha, ‘Anagu namwela: nna ɓam mourhawu yau baɗa kolemuge tangngage kadahha, tanyiɗuwe Lasarus kolege aika dahha. Naɓatauge nyi nalagahara nehe, mono yau mayillawu. 26Helelge, ta jongam mono nami hadahaɓewe wu lirra kalla, tannam ata wal nne ilana ɗaꞌwe kako bal, mono ata wal bal ilana ɗaꞌwe mai nne!’ 27Malinage ata pote, ‘Ɓatauge, ama, nauwag karaiwe waige ha oha ama halewayi Lasarus ta umma amagu. 28Ɗaahod lima angwugu neɗo. Halewai Lasarus kana kako lo takɗage tannam kaɗa ʄarra walta doku-jalaɗa. Mono nim ɓaɗa mateka tannam ilaɗa moun ʄala nne ta hadau kamayilla.’

29Nabalehai Abraham, ‘Raɗa juratanai Musa mono jurataɗa lede-liinai Alla ɗaaɓedi tabaraɗa, nyammadi kaɗa ɗoukge agawe kamatulha lar!’ 30Tanyiɗuwe naɗa ata pote nabaleha, ‘Raɗa jurata walna tangaꞌmage, ama Abraham. Tabolo ɓaɗaaka ata mate kamourha hagga mono kamai tabaraɗa, yiɗɗa enga ɗaʄarra walta jalaɗa.’ 31Malinagei Abraham, ‘Aiɗa ihlikage raɗa juratanai Musa mono jurataɗa lede-liinai Alla waɗeka, yiɗɗa engage aiɗa hatena ʄalawe, langka ɓaɗaaka ata mate kamourha hagga.’ ”

Currently Selected:

Lukas 16: lmy

Highlight

Copy