Romains 4

Modigédi aAbraham ôtôékéda

1?Gôndé tétene éasô n’anyô Abraham tôena nayee? Gô mane magô ôtôe wedi amadiia ndé? 2Nzambé ameena Abraham ti eembe asibé n’oési va mbene aNzambé. Amamôena nane, kaka gô mayanza medi mamisôba na gô gékeneo sedi samige na mitôma miaNzambé. Mbe amadiia te gô mayanzame medi, Abraham mbe amaakuméda amuene. 3Endé te ganigôa Matendeo MaNzambé mbe: Abraham asitsumé Nzambé paga. Na Nzambé ameena angô ti eembe asibé n’oési ta n’ovo, gôébégô Abraham asitsumé Nzambé paga. 4One ayanzani eetsô te dode. Môma nône asangabono dodeye dine mbe sôma géétsiô me ôbiia. Asabômu mbe te éne éyanzi me. 5Endé te nane va gatse amôma na Nzambé. Môtsundu aNzambé ôsapengana gôndé wa n’anyô abévie. Okô môma géyanzé ébégô éamôsôba, eetsa Nzambé môtémedi wetso gémôtsumé paga. Nzambé eena môtémedi ôsaba na paga na amôénda mbe: môma etsimama agébé n’oési. 6Tétasô David amavovo gôébégô éagényônga géena môma vangookô angô mbe, Nzambé aseena mayanzame geena angô môtéma amôma ôsatsuma angô paga. Na amôénda mbe: asaba n’ôési. David angô mbe:

7Ti gô gényônga géndé n’ewe ômasingéô na Nzambé kokoo.

Na amagôbusua ébévee éoo.

8Ti gô gényônga géndé n’ewe, Kumu asatangadô mabégôme moo mabévani.

9?Ane eena gényônga te ane amageetu gô gésôga sAjuif atévo-a? ?Tambô gényôngage géne gésaba na gôndé ane asigeetuni-a? Namani énôbeenda mbe Abraham ameetsa Nzambé môtémedi wetso gémôtsumé paga. Na Nzambé ameena angô ti eembe asibé n’oési ta n’ovo. 10?Nzambé amavovo nane te Abraham amamana égeetu-a¿ Vo madeo asigeetu? Amavovo te Abraham madeo asigeetu. 11Va mbenene vane, Abraham amageetu te ndémbô émeetsô angô na Nzambé gôétubéda mbe mômane ôdôô madeo asigeetu ameetsa me môtémedi gétsumé me paga, na asabadô n’oési va mbene ame, Nzambé. T’ebandô Abraham te tétene amuetso ane asageetuni eetsa Nzambé mitéma miaô na Nzambé eena ahngô ti eembe ahsabadô n’oési. 12Na Abraham te tétene dôta éane ageetuni gô gésôga gématsika Abraham. Ivô ahngô asaanda Abraham gô gésôgage gétévo. Aanda angô te na gômeetsangô Nzambé môtémedi gémôtsumé paga, madeo asigeetu.

Ene émavanga Nzambé gôndé oma ?aédiia nayee?

13Nzambé amavangana n’Abraham mbe: Ewe n’anoo, tsinane nyetso te mikuanya mianyô. Ovangee ône, Nzambé asiôvangé ne Abraham tsangô mbe Abraham agobeda ndongi na mige na mitôma miaNzambé. Amavangana gôébégô Nzambé ameena Abraham ti eembe asibé n’oési va mbene edi gômeetsangô Nzambé môtémedi gébé na buétsé. 14Okô mbe mikuanyamie mindé te gôndé agobedi andongi na mige na mitôma miaNzambé atévo, tambô ôvanga ômavanga Nzambé ôsaba na tsoongo gôndé ane asatsuma Nzambé paga. Na ahngô akina paga na eetsa Nzambé mitémamie mbe te bobo. 15Menyani mbe mige na mitôma miaNzambé mibuéda ôpisa na gôndé oma. Okô gôsaba mige na mitôma gôsaba dôta gékékôéô.

16Endé te nane. Nzambé amavanga mbe: Mate mami neetsa ôbiia gôndé ane eetsa me mitéma miaô gétsumé me paga. Ovangee ône ôndé na tsoongo gôndé ana aAbraham muetso. Ane agobeda mige miaNzambé n’ane eetsa Nzambé mitéma miaô gameetsa Abraham ône wedi gébé na paga. Abraham te tétene éasô n’anyô muetso. 17Matendeo MaNzambé matônigôa te nane. Nzambé amavovo mbe: Gô ngudi yami, éwe Abraham te tétene oma ayekani. Abraham te tétasô va mbene aNzambé, ône ameetsangô môtémedi. Nzambé nene te éne ékundua ane amawani na atubéda éne ésienanôni mbe éenanô. 18Abraham asitsumé Nzambé paga buéyé mbe ndéône éaô gôébôta muana émoota. Amabaka na môténdéda. Na éne ématéndéda ahngô émeenanô te gatetu angô mbe tétene éoma ayekani. Endé te gamavovo Nzambé mbe: Otangôe anee woo, ôeni te angôô. 19Abraham amabaka aka môkama amipuma na ôtôe wedi ômabaka ti ga nzumbi. Na môgayedi Sara te mônongovo, géôngôé ébôta muana. Buéyé nane, Abraham asitsumé ôgi na ngudi yaNzambé paga. 20Gô éne émavanga Nzambé n’edi, môténdédedi ôsiniké ngima ivô ômakôndama te kôndama na amakuméda Nzambé. 21Na amamenya na gô pie mbe Nzambé andé na ngudi gôéyanza éne émavangangô mbe: Nangeenda. Asitsumé ôgie wedi paga. 22Endé te nane. Nzambé ameena Abraham ti eembe asibé n’oési, te gô ngudi yamôténdéda ômabaka n’edi, gétsumé Nzambé paga. 23Ivô éné émavovo Nzambé mbe: Andé ti eembe asaba n’oési, kaka gôndé Abraham môtévo. 24Ebégôe éne ématendu na gôndé wa n’anyô te mbe na we tôenanô na Nzambé ti eembe tôsaba n’oési. Gôébégô we tômeetsa mitéma miasô n’anyô gétsumé ngudi yaNzambé paga. Angô amakundua Kumu asô n’anyô Jésus g’ôwa. 25Nzambé ameetsa Jésus gôéwa gô mabégô masô n’anyô mabévani. Amamôkundua gôétôtsimaméda va mbene aNzambé ti eembe tôsaba n’oési.

Currently Selected:

Romains 4: TSV

Highlight

Copy