Romains 5

Gôédigaa na Nzambé na gétabé

1Endé te nane. Wa n’anyô tômeetsa Jésus mitéma miasô n’anyô gémôtsumé paga, tôenanô na Nzambé ti eembe tôsaba n’oési. Na tôdigaa n’edi na gétabé gô ngudi yaKumu Jésus-Christ. 2Gô ngudi yaJésus, ône ameetsa wa n’anyô mitémamie, tôndé tômasipéduni gô nzéane éedi na tôwesea gôédiia mate maNzambé. Tsoongone éasô n’anyô étôtsôkéani te mbe tôngaba vavo n’edi g’ôndômbedi. 3Na va ngongone vane, tôtsôkékéni buéyé gô magugame masô n’anyô. Gôébégô tôsabômu mbe maguga meena wa n’anyô matsigéda gô mitéma miasô n’anyô ôbibo na môvinéné. 4Obibo na môvinéné dôta ôtsigéda we ngudi gôédiia gô mane makanégu wa n’anyô kabaga tôtsedu gô mangô. Na vadiia wa n’anyô gô éne ékanégu wa n’anyô, éne éténdéda wa n’anyô éngeenanô. 5Tôsangabômédu n’ene étôténdédani gôébégô Nzambé amatôétsa Gédidi sedi. Na te sangô gétsuéa wa n’anyô étondo éaNzambé gôékuya éangô gô mitéma miasô n’anyô.

6Ekegea te nane. Vamabaka wa n’anyô tôgébaka gébé na ngudi. Christ amaviga gô ndéône émasavoa Nzambé. Gô ndéône éopôpéa asô n’anyô amawa gôndé wa n’anyô abévie muetso. 7Ti gôéwa gôndé môma buéyé mbe andé amatsimamani te édagani. Mavooe môma te asinga éwa gôndé môkedi, môma amôsôba. 8Ivô Jésus-Christ amasinga éwa gôndé wa n’anyô tômabaka tôgébaka abévie. Tôéna étondo éena Nzambé gôndé wa n’anyô oma te gô éne. 9Gô ngudi yowa aJésus, wa n’anyô tôka gébé n’oési va mbene aNzambé. Na va ngongone vane, atôyuua g’ôpisa aNzambé. 10Vamabaka wa n’anyô tôgébaka adudeo aNzambé, ôwa aJésus ômatôvambéda na Nzambé. Tambô na ndéône edué éka wa n’anyô évambevo na Nzambé, monyo aJésus ôndé gô mitéma misaô n’anyô ôtôôboo. 11Na ésakôdéa na mane. Wa n’anyô tôtsôkéa Nzambé gô ina aKumu asô n’anyô Jésus-Christ, ône amatôvambéda na Nzambé.

Ebégô eAdam na Christ

12Ebéva éndé n’oma gô tsina, ébandôe te môma môvo, Adam. Na ébévee émakôva ôwa. Na ôwa ôtsôpa oma muetso gôébégô muetso eenda mabégô mabévani. 13Nzambé madeo asikitséa Moïse migemie, ébéva émadenganô va tsina. Ivô vamabaka oma madeo asiba na mige, Nzambé asitende mabégô maô mabévani. 14Eébéyée nane, ôwa ômatsôpa oma muetso bandôa n’Adam ngu na gô ndéône éaMoïse, buéyé mbe asiindé muetso éne ébévani émeenda Adam gôékina môtôma aNzambé.

Adam te gégoni sone angavigani. 15Gékinéô sAdam gô môtôma aNzambé géndé ébégô évôni. Ivô éne émeetsa Nzambé ôbiia éndé ti éôtéa évôni. Na gô pie ayekani amawa gô ôési ômeenda mômane amapanga, Adam. Ivô gô ngudi yamômane amôbaé, Jésus-Christ, ayekani ameetsô na Nzambé ôbiia ôvôni gô ngeba yedi. Na ébégôe éamôbaé éôtéa éne éamapanga. 16Ene émeetsa Nzambé ôbiia ésagono n’ene émeetsa mômane amapanga. Mômane amapanga amatsigéda ébéva. Ebévee éne ématsigéda môtsundu. Na môtsundue ômatsigéda géesédéô soma. Géé ôbiie ômatsigéda ône amôbaé, ôsingéa môma kokoo gô mabégô medi mabévani mayekani, na ôtsigéda génzeegédéô samôma gô éne émakatôkô angô. 17Ekegea te mbe ébéva éamôma môvo, Adam ématsigéda ôwa gôétôma oma muetso. Ivô te môvo, Jésus-Christ amatsigéda monyo mbe ôtôma we. Okô tôsingi éetsô n’edi ngeba n’etsimama éaNzambé te monyoe ôtôtômani.

18Géesédéô soma muetso gématsiga te gô ébévee éamôma môvo, Adam. Gékusédéô sagô môtsundu gôéba na monyo, gématsiga gô étsimama éamôma môvo asaba n’oési, te Jésus-Christ. 19Vamakékôa Adam akékôa ôgi aNzambé, ameengéda oma ayekani gô tsôgôô amabégô mabévani. Vamagobeda Jésus-Christ, agobeda ôgi aNzambé amakuséda oma ayekani gô tsôgôô éamabégô mabévani gôéba gébé n’oési va mbene aNzambé.

20Mige miaNzambé mimakitsô gômbe ébévee éamôma éngeenanô mbe émaata évanga. Ivô vayeka ébévee, menyani mbe na ngeba yaNzambé dingootéa éaata évanga. 21Va mbeego ébéva émabaka n’otômu gôétôétsa ôwa. Ivô ndéô yedi ngeba yaNzambé dindé n’otômu gô étsimama éedi gôétôétsa monyo amôbô na môbô. Monyoe ône ôndéké gôndé Kumu asô n’anyô Jésus-Christ.

Currently Selected:

Romains 5: TSV

Highlight

Copy