Marc 7

Meekédu mamatsika asi mbeego

(Bono na Matt. 15:1–9)

1Apharisien, n’avo anigôi amige miaNzambé ahmaviga gô Jérusalem amadenganô gô tungune émeekéda Jésus. 2Ahmeena mbe avo aneengi edi ahmaa môyakô mogo maô masigôgédu gamatômu angô gô gésôga saô.

3Te mônongovo gamabaka Apharisien n’avo Ajuif. Ahmagobeda mônongoe ômatsikéô angô na peeye yaô. Gôéaa môyakô géôvôé mogo maô, môge. 4Buéyé mbe ahviga gô eba ekasa, gôéaa môyakô ôvigi n’angô gépangé éokea, môge. Ahmagobeda pingô yaô yesôga émadengangô na peeye yaô. Esôgee te gôégôgéda ébungu éaô na tsôva yaô, na mbéka yaô yakunga.

5Apharisien na anigôi amige miaNzambé ameevôa Jésus mbe: ?Aneengie woo ahsagobeda ésôgee ématsika peeye yaô ahsuméa éaa môyakô gégôgédé mogome maô nayee? 6Jésus amaabéa ahngô mbe: Esaïe amabaka na mitayi vamapandôéda angô matasa maNzambé mawanya na mônongoe wanyô. Anye te anyepi amiônya. Esaïe amatenda mbe:

Nzambé amavovo mbe: Omee adua aneegeda me te na mavovia.

Mitéma miaô mindé gôdagôda n’ami.

7Géneega gétubédu me na omeaa gésaba na tsoongo,

Gôébégô ahngô éékéda ndongi yaô yanguene ahngô mbe te ndongi yaNzambé, tambô.

8Jésus angô mbe: Anye nôkôngéga ndongi yaNzambé na va kôbangô gôégôbeda mane meekédu anye n’oma.

9Na Jésus amasémana, angô mbe: Eé, anye nôdimbanéda ndongi yaNzambé ti pepe, gôégobeda dine yatétee yanyô. 10Te mônongovo gamavovo Moïse mbe: Gobeda tétoo na yoo, na ône atsuava tétedi na yeedi buedi mbe nômôeséda na g’ôwa. 11Ivô anye nôvovo mbe ôkô muana abeenda tétedi na yeedi mbe: Okabô okiti ôndé n’ami gôéwedéa anye te Corban. (Evéndégéô mbe, ôbiia ôngeetsa me na gôndé Nzambé.) 12N’anye nôsasinga angô awedéa tétedi na yeedi. 13Te gô mamônongoe ône nôdimbanéda ôgi aNzambé na nôékéda mane mamatsikéô anye na tétee yanyô. Na mavo mabégô mayekani meendanye mamônongoe ône.

Mane makoa môma aka asigôgéni

(Bono na Matt. 15:10–20)

14Na va mbene amane Jésus amoomba ébambéa géômbége. Angô mbe: Oôkôni me anye muetso vôtanganôni édué. 15Eetso éne éengéa gôndé môma ésamôkoa asigôgéni. Ivô éne ékusa gô môtéma amôma te éne ékoa angô aka môbévani. [ 16Okô mbe gôndé môma na matô gôéôkô, ka te ookôkô‐ma.]

17Vamanôtôga Jésus vandé géômbége ameengéa na gô eba. Aneengie ameevôa angô gô tsavane émagunyangô. 18Amavovo n’aneengie mbe: ?Ti n’anye nôsookô mabégô mema‐a? ?Anye nôsookô mbe éetso éne éengéa gôndé môma ésamôkoa asigôgéni‐a? 19Ene éaa môma ésasutuméa gô môtéma, ésutuméa te gô ébuyi, na ékusa g’ôtô edi na gôseenanô éangô. (Gô mavovia mema, Jésus amapandôa mbe môyakôe wetso te aakaga.) 20Amoomba mbe: Te éne ékusa gô môtéma amôma ékoa angô aka asigôgéni. 21Ti gô gatse, gô môtéma amôma gôkusa matasa mabévani matindéga môma gôéénda éne ébévani; eesua, ayôha, akea gésasô, 22anyima éaanga éôma, abévéda akedi, apata, adigaa ga môma avétsi môkambô. Obonedi abengôa, atsuava akedi, andé na bôpeeo, andé n’odungé. 23Mabégôme metso mane mabévani makusa gô môtéma amôma na momôkoa asigôgéni.

Môgeto amôgenda ameetsa Jésus môtémedi

(Bono na Matt. 15:21–28)

24Vane Jésus amatimôga va tungune émabakangô na amakea na gô tsenge éndé môsenge ôtetu mbe Tyr. Ameengéa na gô eba. Asinyôngéô mbe ta na môma môvo amenya mbe Jésus andé wangô. Ivô asiôngôé ésomo. 25Gômabaka môgeto môvo, muanedi amôgeto amabaka na gédidi gébévani. Môgeto amookô kumane éaJésus. Tsina na tsina amaviga na gôndé Jésus gôégudama va makôdô medi. 26Môgeto nône amabaka môgenda, môsi éongo éAphenicie gô tsenge étetu mbe Syrie. Amagondo Jésus mbe: Kuséda gédidi gébévani gôndé muanami. 27Ivô Jésus amavovo n’edi mbe: Esanyepa gôéwata ana môyakô gôépanga éétsa inzua. Tsika vita anee apanga éaa. 28Môgetone angô mbe: Na gô pie môékédie, ivô buéyé inzuaye didigaa gô tsina atabudé diaa tseseye diaagéda anee. 29Na Jésus amaabéa angô mbe: Gô éne ésiiyi éwe kuanakue kiaka, nika na gô eboo. Gédidi gébévani gékusi gôndé muanoo. 30Môgeto nône amanika na gô ebedi. Amadenga muanedi andé yama na pope v’ekoko. Gédidi gébévani te gémakusa gôndé angô.

Jésus amadôngéda môsi ndiba n’obôbô

31Jésus amatimôga gô tsenge éaTyr gôénika na gô mubu éndé gô Galilée. Amoota gô Sidon na Décapole. 32Oma amatsuéa Jésus mômôgôô amabaka na ndiba na asiôngôé évovo na woo. Ahmagondo Jésus gôétsakéga mogo medi gôndé angô. 33Jésus amakea n’edi na gôdagôda na géômbége. Jésus amasogoo misavi miedi gô matô mamôma nône. Amabanda ômeni na mate mamatuangô. 34Amabôkaméa na g’ôba na amavéguma na gégogomeo. Amavovo na mômôgôô mbe: Ephphatha. Evéndégéô mbe kukuga. 35Tsina na tsina ndibane émanôtôga gôndé môma nône. Omeni ômatatôga n’angô amavovo ti na vede. 36Jésus amavovo na muetso mbe: Nômbiabeenda môma. Vamoomba Jésus édékéda ahngô mbe: Nômbiabeenda oma, ahsiôkô. Amabeenda muetso. 37Oma ahmasôbasôbana ti sôbasôbana. Amavovo mbe: Metso meendangô, mandé ti mamisôba. Akukua ndiba na môma ookô. Anôtôa n’obôbô na môma avovo.

Currently Selected:

Marc 7: TSV

Highlight

Copy