Marc 8

Jésus amayekedea mitônisa minayi mioma môyakô

(Bono na Matt. 15:32–39)

1Gô ndéô nene oma ayekani amawanyéa tungu épo. Gôsibaké ahngô na môyakô, Jésus amabambéa aneengi edi. 2Amavovo mbe: Neena omeaa ngeba. Aanakani. Pitsi ditatô dikahngô n’ami asabadô na môyakô. 3Okô me nakeda ahngô na gô mbôka yaô, ahngô géé môyakô, yôtô yaô dingaba dimadeedani n’angakuéa gô nzéa na nzaane. Ayekani va gatse aô ahmaviga gôdagôda. 4Aneengie amamôévôa mbe: Gôéngutéda omeaa muetso ?tôngadenga éne éaakôni gô tsenge émagasani égô nayee? 5Jésus ameevôa aneengie mbe: ?Nôndé na mipemba mikee? Ahngô mbe: Tôndé na tsambué.

6Na vane, Jésus amatôma géômbége mbe: Digaani va tsina. Na amabongo mipemba tsambué. Amaduka Nzambé mate gô miangô. Amamibukua na amamiétsa aneengie. Aneengie amamikabanéa na géômbége. 7Ahmabaka agébaka na tôvo tônyama tagô mbéyi. Jésus amaduka Nzambé mate gô yangô na amatôma aneengie mbe: Ombakani ékabanéa na géômbége. 8Muetso amaa amanguta. Aneengie amadingôa tsaô tsambué dimayôa n’ebéndéké émasanéakani. 9Tambô gômabaka ôkana amitônisa minayi mioma. Jésus angô mbe: Nikakani, te vane. 10Jésus n’aneengie ahmapeka gô mbôngô gôékea na gô tsenge ééndô mbe Dalmanoutha.

Apharisien abuta éena ngudi yaNzambé gô gémbégéa

(Bono na Matt. 16:1–4)

11Apharisien ahmaviga ahmabandôa étsunda na Jésus. Ahmanyôngéô émôkubéda buéyé gô mayanza medi mamisôba. Ahngô mbe: Tônyôngéô éena gémbégéa gétubéda mbe ngudi yoo diviga gôndé Nzambé. 12Jésus amavéguma na gégogomeo. Angô mbe: ?Anye asi pitsi yedi nôbuta gémbégéa sangudi yaNzambé nayee? Nanôbeenda na gô pie mbe: Gôndé ane abuta gémbégéa gôsaba gémbégéa. 13N’angô amatsika ahngô. Amoomba épeka gô mbôngône gôékea na gô dipo tsényé yamubu.

Apharisien na kumu Hérode amabaka na meekédu maô

(Bono na Matt. 16:5–12)

14Aneengie ameeba étsua môyakô. Gômabaka n’ahngô gô mbôngône môpemba ôvo. 15Jésus amakeneda ahngô gô tsava mbe: Nôwema, baani n’ekena gô levure éApharisien na gô levure éaHérode. 16Aneengie ahmavovo anguene n’anguene mbe: Avovo nane te gôsaba we na mipemba. 17Jésus amookô éne émavovo aneengie. Na angô mbe: ?Anye nôvovo mbe, te gôsaba we na mipemba nayee? ?Anye nôsookô‐ma? ?Nôsiditéga‐a? ?G’ôsôbee wanyô mitéma mianyô mindé nayee? 18Anye nôndé na miso ?nôseena‐a? Anye nônde na matô ?nôsookô‐a? ?Nôsabangôa‐a? 19Vamabukua me mipemba mitayi gôéyéséda mitônisa mitaya mioma ?anye nômadingôa tsaô dikee yatsese dimasanéakani? Aneengie amaabéa mbe: Nzima na tsaô dibaé. 20Jésus amoomba éévôa ahngô mbe: Na vamabukua me mipemba tsambué gôéétsa mitônisa minayi mioma ?anye nômadingôa tsaô dikee yatseseye? Aneengie amaabéa mbe: Tsambué. 21Vane Jésus angô mbe: ?Anye madeo nôsiôkô‐ma?

Jésus amadôngéda môsi pogu

22Ahmabuéa gô mbôka étetu mbe Bethsaïda. Oma ahmatsuéa Jésus môsi pogu. Ahmamôénda mbe: Banda angô. 23Jésus amasumbéda môsi pogu g’ôgogo gôékea n’edi na gô étumba éambôka. Vane amatuéa mate gô mogo medi na amabanda mogome va miso. Jésus amamôévôa mbe: ?Ewe te ôena sôma‐a? 24Môsi pogu amabono na amaabéa mbe: Neena oma ga éététée. Namenya mbe oma te vakeahngô. 25Jésus amoomba ébanda mogo medi gô miso mamôma nône. Môma amabono na nzôô. Amadônga na ameena éetso ti na vede. 26Vane Jésus ameenda angô mbe: Kiaka na gô eboo. Ombianika na gô mbôka.

Pierre amapandôéda mbe: Jésus te Christ

(Bono na Matt. 16:13–20, Luc 9:18–21)

27Jésus na aneengi edi ahmakea gô nzéa éagésa satsenge ééndô mbe Césarée étômu na Philippe. Vamakeahngô gô nzéa, Jésus ameevôa ahngô mbe: ?Gô matasa moma me ndaa? 28Amamôaabéa mbe: Avo amenya mbe éwe te Jean‐Baptiste. Avo dôta amenya mbe éwe te Elie. N’avo mbe éwe te môvo va gatse apandôédi amatasa maNzambé. 29Jésus ameevôa ahngô mbe: ?Gatasanye, me nda‐vo? Pierre amamôaabéa mbe: Ewe te Christ, ômatômu na Nzambé. 30Vane Jésus amadékéda ahngô mbe: Nômbiayeega ébeenda môma.

Jésus amabeenda ôwedi na gékundugéô sedi

(Bono na Matt. 16:21–28, Luc 9:22–27)

31Na vane Jésus amabandôa éékéda aneengie mbe: Engaba mbe me, Muana Amôma nangeena maguga mamootéani. Peeye na tsesu yadeekedi adigondoku n’anigôi amige miaNzambé angatseda me. Nangayôhu. Gô mbene apitsi dibaé, éne éamôtatô nangakunduga. 32Amavovo mabégô mema ti na vede. Na Pierre amabambéa Jésus na v’anguene. Amasungéa Jésus mbe: Ombiavovo. Esangaba nane. 33Ivô Jésus amanikéda misome na gôndé aneengie muetso. Amakangéa Pierre mbe: Nôtôga na gôdagoda n’ami, Satan. Ewe ôsatasa éne ényôngéô Nzambé. Otasa te éne ényôngéô oma.

34Na Jésus amabambéa géômbége n’aneengie na amavovo mbe: Okô môma anyôngéô ékea nzéepo n’ami, aviié mane maamuene ngima. Atsué gésumuge sedi sowa na akéé géômbé gévo n’ami. 35One akebangana ôwa angô angawa. One asabusuga ôwa gô inami na gô Tsangô Eami Eamôsôba andé na monyo. 36?Tsoongo ndé ôkô môma adiia éôma éetso éava tsina na adimbanéda monyoe wedi apie‐a? 37?Môma angavana monyo na sôma ndé? 38Okô môma eena tsoyi gôndé me na mabégô mami va mbene oma andé n’edi ane anôtôga gôndé Nzambé gôémôviia ngima, na andé abévani; menyani mbe me, Muana Amôma nangeena tsoyi gôndé angô vangaviga me g’ôkumaka ondômbee a Téta Nzambé n’asi g’ôba ayanzie wedi.

Currently Selected:

Marc 8: TSV

Highlight

Copy