Marc 6

Asi Nazareth ahmatsuma Jésus paga

(Bono na Matt. 13:53–58, Luc 4:16–30)

1Jésus amanôtôga gô tungune éne. Amakea na gô mbôkane émoongôgakangô. Amakea n’aneengi edi. 2Gô nyee edunda ameekéda gô eba agéwanyéô sAjuif. Ayekani amookôni amasôbasôbana mbe: ?Oô mômôgôô aviga gôni na ôô mônongo amabégô? ?Oô môma amenya mane mabégô vita nayee? ?Ngudiye ditsigéda mabégôme manyônganéôni masoongôa môma énigôa, dindé nayee? 3?Nôsamenya angô‐a? Oô ka te môyanzine atimbe muana aMarie. ?Kaka mônône aJacques na Joses na Jude na Simon? ?Kadi yedi kaka ane andé na wa n’anyô mbôkepo‐a? Matasa mema mamawéa Jésus ngusu na oma amamôtsuma paga. 4T’ebandô Jésus amavovo n’ahngô mbe: Môpandôédi amatasa maNzambé agobedu tsengene nyetso, géé gô mbôkedi asagobedu. Béyé na mbumu éedi na kindedi asamôgobeda. 5Jésus asiôngôé étubéda ngudi yaNzambé na mayanza mamisôba gô mbôkedi, buétsé te vamatsakégangô mogo medi gôndé avo abeeyi. 6Jésus amasôbasôbana mbe: ?Omeaa agétsumaka me paga nane nayee?

Jésus amakeda aneengie abaé abaé

(Bono na Matt. 10:5–15, Luc 9:1–6)

Vane Jésus amakea éékéda gô dipo mbôka yagô kôbangô. 7Amabambéa aneengie edi nzima n’abaé na amakeda ahngô abaé abae gô mbôkaye. Ameetsa ahngô ényanga gôétôma édidi ébévani. 8Jésus amatôma aneengie mbe: Vakeanye môtôôe nômbiakea na sôma buétsé te péndé gôésipéda anye. Nômbiakea ta na môyakô, ta na gébémbé ta na dode bambasanéda gô ébémbé éangoyi yanyô. 9Aatani pondu yanyô. Nônakea na ngoyi dibaé. 10Amabeenda ahngô mbe: Vatsiganye gô mbôka, digaani gô ebee ôngatubédu anye ngu na vanganôtôga anye mbôkane éne. 11Okô kumu yambôka asinôsingéa gôéengéa na asanyôngéô éôkô meekédu manyô, nôtôgani vane. Dumédani makôdôme ébisie. Te géevédéô saô mbe: Nôwema. 12Aneengie ahmakea éékéda gôndé oma mbe: Koani mitéma mianyô gôéba wene mônongo oma. 13Ahmakuséda édidi éyekani ébévani gôndé oma. Ahmabanda madi na ahmatsakéga mogo maô gôndé abeeyi, n’ayekani ahmadônga.

Tsangô éowa aJean‐Baptiste

(Bono na Matt. 14:1–12, Luc 9:7–9)

14Môtômi atsenge Hérode amookô kumane éaJésus gômapaa tsangône éedi tsengene nyetso. Avo oma amavovo mbe: Oô te Jean‐Baptiste amakunduga g’ôwa, t’ebandô andé na ngudi yeenda mabégô manyônganéôni masoongôa môma ésupua. 15N’avo ahmavovo mbe: Te Elie. N’avo dôta ameenda mbe: Te môpandôédi amatasa maNzambé agono n’ane ambeego.

16Vamookô Hérode nane, amavovo mbe: Te Jean‐Baptiste, ône amakitséda me môtsée, n’angô amakunduga g’ôwa. 17Gôébégô te amuene Hérode amatôma migode gôétsôpa Jean na gôéengéda angô gô eba atsôgôô. Ebégôe émabaka te nane. Hérode amawata môdimi edi môgetone gôémôbaa. Ina amôgetone te Hérodiade. 18Ivô Jean amadékéda Hérode mbe: Môge gôndé éwe gôéwata môgetone amuanayoo. 19Hérodiade amaba n’opisa na amavikéa Jean gôémôyôha. Ivô Hérode asisingé mbe amôyôha. 20Hérode ameena Jean édita. Asibômu mbe Jean te môma amatsimamani aNzambé. Ameebakanéda angô. Hérode amanyôngéô éôkô mane mameekéda Jean buéyé mbe gameesédu angô na môtémedi gô meekédu maJean.

21Te vane, Hérodiade amadiia ndéô émanyôngéô angô te ndéô éasueti éobôtu aHérode. Kumu atsenge Hérode amakônza sueti gôndé ane andé va ngima otômu edi, na atômi amigode, n’avo oma avôni gô Galilée. 22Muana aHérodiade amôgeto ameengéa na gô tsongo émaakahngô sueti. Amagina. Hérode n’ane amabaka n’edi gô sueti ahmanyôngéô. Hérode amavovo na muanee mbe: Duka me éne ényôngéô éwe, me nangagôétsa éangô. 23Na Hérode amavangana n’edi gémôpatédé môtangô. Angô mbe: Na gô pie nangagôétsa éne éngadukewe buéyé saté sokumu ami. 24Muanamôgeto amakea. Ameevôa yeedi mbe: ?Nangamôduka ndé? Yeedi mbe: Oduka, te môtsé aJean‐Baptiste. 25Muanee amayavôga énika na gôndé Kumu Hérode. Na amamôduka mbe: Nanyôngéô môtsé aJean‐Baptiste gô gépede n’atsatsee. 26Kumu Hérode amasiô na singididi. Asiôngôé émôkékôéa éne émadukangô gôébégô amavangana va mbene oma ahmabaka n’edi gôéaa sueti. 27Nyavô nyavô amatôma môgode môvo amabaka n’edi n’otômu mbe: Bongé môtsé aJean‐Baptiste. Môgode amakea na gô eba atsôgôô. Amakitsa môtsé aJean. 28Amaviga na môtsée tsuaga gô gépede na ameetsa muanamôgeto. Na muanee ameetsa yeedi. 29Vamookô aneengi aJean nane, amaviga gôébongo ôtôe aJean gôéôgunya gô ngii.

Jésus amayekedea mitônisa mitaya mioma môyakô

(Bono na Matt. 14:13–21, Luc 9:10–17, Jean 6:1–14)

30Ane amasevôuni na amatômu na Jésus amaviga na gôndé Jésus na amamôbeenda éetso éne émeendahngô na émeekédahngô. 31Oma ayekani ahmapengana, ahkea ahnika. Jésus na aneengi edi ahsidengé ta na ndéô gôéaa môyakô. Na Jésus amavovo n’aneengi edi mbe: Okani na gô tungu ésaba oma ayekani. Tôkedunda. 32Te vane, ahmakea gô mbôngône anguene na gô tungu ésaba oma ayekani. 33Ivô ayekani ahmatimôga gô mbôkaye yaô. Amakea gô tsina. Jésus n’aneengi edi n’egébuéakage omee ahmapanga étsiga.

34Vamasutuméa Jésus gô mbôngône ameena géômbége géndé na ndaanda. Jésus ameena ahngô ngeba. Ameena ahngô ga mandombo masaba na môkeneyi. Na ameekéda ahngô mabégô mayekani. 35Vamabaka ndéône ééka adikoo, aneengie aJésus ahmaviga na gôndé angô. Ahngô mbe: Nyee ôédi. Tungune édué ésaba oma. 36Panganéda omeaa ahkea akesômba môyakô gô madeke na gô mbôkaye. 37Jésus amaabéa ahngô mbe: Itsani ahngô môyakô. Aneengie ahmeevôa Jésus mbe: ?Onyôngéô nayee? ?Onyôngéô we tôkesômba môyakô tôétsa ahngô aa? Ka buétsé tôba na dode diyanza môma môsaa amôbongo. 38Vane Jésus ameevôa ahngô mbe: ?Nôndé na mipemba mikee? Angô mbe: Keani nôkeena. Vamamanangô éseta gôéena, ahmavovo na Jésus mbe: Tôndé na mipemba mitayi na nyama dibaé yagô mbéyi.

39Na Jésus amatôma aneengie mbe: Digédaani oma muetso va tsina v’esinga tsôôgô tsôôgô. 40Ahmadigaa muetso tsôôgô épo môkama, tsôôgô épo nzima ditayi. 41Vane, Jésus amabongo mipemba mitayi na nyama dibaé yagô mbéyi. Amabokaméa na g’ôba gôéduka Nzambé mate medi. Amabukua mipemba. Ameetsa aneengie. Ahngô ahmamikaba n’oma muetso. Jésus amakaba nyama dibaé yagô mbéyi gôndé ahngô muetso. 42Môma na môma amaa na amanguta. 43Aneengie ahmadingôa tseseye n’ebéndékée émasanéakani émanikéa éyuéséda nzima éatsaô na tsaô dibaé. 44Tambô va katse amuetso amaakani gômabaka mitônisa mitayi miamôgôô.

Jésus amananga va ngongo ameba

(Bono na Matt. 14:22–33, Jean 6:15–21)

45Vane Jésus amapekeda aneengi edi gô mbôngô gôéôbégéda ahngô na gô dipo tsényé gô mbôka étetu mbe Bethsaïda. Amuene Jésus amasanéa gôépanganéda géômbége. 46Vamaagana Jésus n’omee, amakea na go ngongo amôkôdie amuene gôévovo na Nzambé. 47Vameeda nyee, aneengie ahmabaka gô mbôngô va ngenge amubu na Jésus amabaka va tsényé. 48Jésus ameena mbe aneengie eena panda gôénuga, gékunga gémaviga gô mbene gémasikaméda mbôngône. Ti gô tsôsône éamapanga Jésus amakea na gôndé ahngô yetaga gô ngongo amebame, amabaka mbe oota ahngô. 49Vameena aneengie Jésus akea gô ngongo ameba, ahmamenya mbe buétsé môgési, na ahmaamugana. 50Ahngô muetso ahmamôena na muetso ahmatsôpu na gomo. Vane Jésus amavovo n’ahngô mbe: Sumédani mitémamie. Oô te me, Jésus. Nôneena gomo.

51Amapeka gô mbôngône n’ahngô. Gékunga gémoota. Aneengie ahmatsapéô pepe. 52Gôébégô ahsikôngédé ndongi yavamayekeda Jésus môyakô. Mitéma miaô misiôngôé émenya éne émeenda Jésus te g’ôsôbee waô.

Jésus amadôngéda abeeyi agô Génésareth

(Bono na Matt. 14:34–36)

53Ahmatsegeda mbôngône gô tsényé yaGénésareth. Ahmaditéga mbôngône v’ehbôngô. 54Vamasutuméa ahngô gô mbôngône, oma ameena mbe: Oô te Jésus. 55Oma amakea pitapita tsengene nyetso gôéwanyéda abeeyi andé yama gô étavaô. Ahmatsua abeeyie na gôndé Jésus tungu yetso dimakea angô. 56Tunguye yetso dimabuéa Jésus, béyé mbe gô mbôka, béyé mbe gô misenge, béyé mbe gô madeke, oma amayaméda abeeyie gô mikii na gô yeba yamakasa. Ahmaduka Jésus mbe: Singa adua ahsuméa ébanda môkandee ôata éwe. Muetso amabandani amadônga.

Currently Selected:

Marc 6: TSV

Highlight

Copy