Luc 23
23
Jésus amatsundédu na Pilate
(Bono na Matt. 27:1–2,11–14, Marc 15:1–5, Jean 18:28–38)
1Muetso amatimôga na amakeda Jésus na vandé Pilate. 2Amatsua môsunda na gôndé Pilate mbe: Tôdengi môma noo Jésus, adékéda oma mbe: Nômbienda mane mavovo môtômi atsenge. Ebakanéda oma gôéétsa môtômi atsenge César, depu. Na eenza Nzambé mbe: Me te Christ môtômine wanyô. 3Pilate amatsundéda Jésus mbe: ?Ewe te môtômine aAjuif-a? Jésus amamôaabéa mbe: Te gavovi éwe. 4Pilate amavovo na tsesu yadeekedi adigondoku na géômbége mbe: Me tseena ébégô éeséda Jésus. 5Ivô géômbége gémavovo na gébaki mbe: Ayungéda mitéma miasi tsenge gô éne éékédangô, bandôa gô tsengene nyetso éaJudée, na éaGalilée, ngu n’eva.
Jésus amatsundédu na Hérode
6Vamookô Pilate ina éaGalilée étetu, ameevôa oma mbe: ?Tambô mômôgôône ôdôô te môsi Galilée-a? 7Pilate n’eôkô mbe Jésus andé g’ôtômu aHérode amamôkudéga na gôndé Hérode amabaka dôta gô Jérusalem pitsiye dine. 8Vamatsiga Jésus gô ebedi, Hérode ameena buedi. Va mbeego vamookô Hérode mabégô mameenda Jésus amanyôngéô émôena. Hérode amatasaka mbe: Buétsé nangeena Jésus atubéda émbégéa éangudi yedi. 9Hérode ameevôa Jésus pingô yanyivô ivô Jésus asimôbiké. 10Tsesu yadeekedi adigondoku, n’anigôi amige miaNzambé amabaka vangô. Amasunda Jésus n’oési. 11Hérode na migode miedi amamôénza na amamôseka. Gô dienza yaô amamôaatéda ngoyi éokumaka na amanikéda émôkudéga na gôndé Pilate. 12Pilate na Hérode amabaka adudeo, ivô bandôa nyoone amavamba.
Jésus ameesédu n’oma gôéyôhu
(Bono na Matt. 27:15–26, Marc 15:6–15, Jean 18:39—19:16)
13Pilate amabambéa tsesu yadeekedi adigondoku na peeye yAjuif, n’asi mbôka. Amavovo mbe: 14Nômaviga na gôndé me na mômôgôône ôdôô. Nômôsundi mbe: Abeenda oma gôékina mane mavovo môtômi atsenge. Nôeni, me namôtsundédi va mbene anyô. Na me tsimôena ta n’oési ôvo gô mane masundi anye angô. 15Buéyé na Hérode, te mônongovo. ?Nôseena ganikéyi angô émôkudéga-a? Nôeni, mômôgôô noo asindé ébégô mbe angayôhu. 16Tambô me nangeenda mbe abitô na mibitô na vane nangamônzeegeda. [ 17Gô sueti yetso yaPâque, te gésima samôtômi atsenge gôékuséda môvo môsi gô tsôgôô.] 18Muetso amaadôngana ôgi ôvo mbe: Yôhéda Jésus. Kusédéa we Barabbas. 19(Tambô Barabbas ameengedu gô eba atsôgôô gômakékôangô ôtômu amôtômi atsenge, na gômayôhangô môma.) 20Pilate, gômookôangô tsôvé éenzeegeda Jésus, amoomba évovo na géômbége. 21Muetso amaadôngana mbe: Yôhani angô. Komedani angô gô gésumu sowa. 22Pilate amavovo kukane éamôtatô mbe: ?Ebégô ndé ébévani éendi Jésus ôdôô? Tseena ta n’ebégô évo mbe ayôhu. Tambô namôénda mbe abitô na mibitô na vane anganzeegedu. 23Géômbége asitsiké éadôngana mbe: Komedani angô gô gésumuge. Mindônga miaô mimookano. 24Pilate amasôdôa mbe: Ene ényôngéô anye éngeendô. 25Pilate amakuséda Barabbas. Te ône amabaka gô eba atsôgôô gômakékôangô ôtômu amôtômi atsenge na gômayôhangô môma. Te ône amanyôngéôkô géômbége mbe akusédu. Pilate ameetsa géômbége Jésus gôémôénda gamanyôngéôkô ahngô.
Jésus amakomedu va gésumu sowa
(Bono na Matt. 27:32–44, Marc 15:21–32, Jean 19:17–27)
26Vamakedahngô Jésus na gôngayôhu angô, môma môvo amavigaka gô tsaga yedi, te Simon môsi Cyrène. Oma amabambéa Simon gôétsua gésumuge géngayôhu Jésus. Amagétsua na amaanda Jésus gô ngima.
27Jésus amaandôkô gô ngima na géômbé gévôni. Ageto amakea adéa na abômôa mbôma yaô gôébégô éaJésus. 28Jésus amanikéda misome na gôndé ahngô na amavovo mbe: Ageto agô Jérusalem, nônadéa me. Déani anyene n’anee wanyô. 29Nôeni, pitsiye dingavigani vangeendô mbe: Anye ékômba, ti gô gényônga géndé n’anye. Mabuyi masibôténi na mabéne masinyuésédani, tsôkeani na gényônga. 30Oma angagondo mikôdi mivôni mbe: Pékôgéani we. Na mine migemige mbe: Pikaméani we. 31?Okô oma eenda mabégô mema gô géétété gédôngani angeenda nayee gô géne gémawani?
32Migode mimakeda dôta asi môkôbé abaé gôéyôhu géômbé na Jésus. 33Vamabueahngô gô gétungu gééndô mbe kooko amôtsé, amakomeda Jésus va gésumu sowa. Ahmakomeda dôta asi môkôbé abaé, môvo gésa gémôgôô, môvo gésa gégeto. 34Jésus amasambéda mbe: Téta, singéa ahngô kokoo. Ahsamenya éne ééndahngô. Migode mimatséva na nzéké gôésevoa éduani éaJésus énganyôngéô angô. 35Géômbége amaba vangô na amabono Jésus. Peeye yAjuif amadeta Jésus mbe: Amanôtôa akedi gô panda yaô, anôtôdégôvôdé amuene ôkô mbe angô te Christ amasevou na Nzambé. 36Migodemie dôta mimamôdeta. Mimawesea na gôndé angô gôémôétsa meba manganye. 37Migode mimamôdeta mbe: Okô mbe éwe te môtômine aAjuif, nôtôga gô panda yoo. 38Va ngongo aJésus gômatenduku mbe: Odôô te môtômine aAjuif.
39Môsi môkôbé môvo amakomeduni amamôdeta mbe: ?Ewe, kaka te Christ-a? Nôtôga ômuene gô gésumuge na ônôtôa dôta we. 40Ivô môvo môsi môkôbé amasemba môkedi mbe: ?Tambô éwe, ôseena Nzambé gomo-a? ?Anye na Jésus ôdôô nôsaba gésisédéô gévo-a? 41Môtsundue asô n’oo te kuanakue. Tôdii diési gô mabégô masô n’oo mabévani. Ivô Jésus asiinda ta n’ebégô évo ébévani. 42Na amavovo na Jésus mbe: Vangavigewe n’enyangee yoo yetso gôétôma, ôneeba me. 43Jésus amaabéa angô mbe: Me nagôbeenda na gô pie mbe deo noo ôngaba n’ami g’ôba gô gédigaa samôsôba gékea me.
JĂ©sus amawa
(Bono na Matt. 27:45–56, Marc 15:33–41, Jean 19:28–30)
44-45Emabaka éka ndéône étsakama kômbéne. Evitsie émasuma tsengene nyetso ngu na ndéône étengama kômbéne. Gô eba aNzambé ômbô amôkanda ôebeda tsongo éadisambô édigaa Nzambé, ômaatôga va ngenge. 46Jésus amaadôngana n’ogi atsikanédana mbe: Téta, me nadeekeda gédidi sami gô mogo moo. Vamamana angô évovo nane, amawa. 47Môtômi amôkama amigode amatema va kôbangô agésumuge. Vameenangô mane mabuéni amakuméda Nzambé mbe: Na gô pie, mômôgôô noo asibévéké. 48Géômbé gévôni gémakôvana gôéena gangoota ébégôe, na ameena metso. Ahmanika abômôa mbôma yaô gô panda dimeenahngô. 49Muetso ane amavamba na Jésus, n’agetoe amavigaka n’edi gô Galilée, amatema gôdagôda gôébono mane mamabuéani.
JĂ©sus amagunyu gĂ´ ngii
(Bono na Matt. 27:57–61, Marc 15:42–47, Jean 19:38–42)
50-51Gômabaka gévovi sagô kundu épôni éaJuif. Inedi Joseph, môsi mbôka éAjuif ééndô mbe Arimathée. Asigésangané n’akedi étasevo gô mane mamasunda ahngô Jésus. Amabaka môma amôsôba amavôma. Môtémedi wetso ômaba gôéenéa ôkumu aNzambé. 52Mômôgôô nône amakea na gôndé Pilate gôéduka angô ôtôe aJésus. 53Joseph amapôtôô nzumbine gô gésumuge. Amamidipôa na môkanda avembo amôsôba. Amagunya nzumbine gô éduku éamôdungutu émasigô gô tsina amôkôdie. Gô édukue éangô madeo ésigunyu môma. 54Ebégô éangô émabuéa te gô pitsine ékônza Ajuif mabégô masueti. Nyee edunda Ajuif ômahbuéa.
55Agetoe amaviga na Jésus gô Galilée amakea na Joseph gôéena ngiine na mônogovo gamagunyangô nzumbine. 56Vamanika agetoe na gô yeba yaô amakônza madi na miyombo mingasôgahngô nzumbine.
Na ahmadunda gô nyee edunda gamatômu ahngô gô mitôma miaNzambé.
Currently Selected:
Luc 23: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
