Luc 22

Peeye amavangéa Jésus gépangô

(Bono na Matt. 26:1–5, Marc 14:1–2, Jean 11:45–53)

1Ndéône éweseyi éne éasuetine éaPâque éaakô mipemba misigésu na levure gôémiaahndéda. 2Tsesu yadeekedi adigondoku, n’anigôi amige miaNzambé amabuta mônongo gôétsôpa Jésus v’esooe te gô gomo oma.

Judas amanyôngéô ékaba Jésus

(Bono na Matt. 26:14–16, Marc 14:10–11)

3Vane Satan ameengéa gô môtéma aJudas eendô mbe Iscariote. Amabaka gô géômbé sanzima n’aneengi abaé. 4Judas amakea na gôndé tsesu yadeekedi adigondoku na tsesu yamigode mimakenea eba aNzambé gôévanga gépangô géngatsôpu Jésus. 5Ahmatsôkéa na ahmavanga gôéétsa Judas dode. 6N’emana évanga gépangôge, Judas amabuta ndéô na gétungu setsôpéda Jésus v’esooe.

Jésus amaa sueti éaPâque n’aneengi edi

(Bono na Matt. 26:17–25, Marc 14:12–21, Jean 13:21–30)

7Pitsi éamôpemba ôsiaahndéni émabuéa. Te pitsine éyôha Ajuif môpaga endombo gôéaa gô suetine éaPâque. 8Jésus amatôma Pierre na Jean mbe: Kiakani nôkékônza we môyakô asô aPâque. 9Ahngô mbe: ?Onyôngéô mbe tôkônza Pâquene gôni? 10Jésus amaabéa ahngô mbe: Nôeni, vangatsiganye gô môsenge nôngawanya na mômôgôô aviga atsua kiekie éameba. Nômôaanda na gô eba ôngeengéahngô. 11Nôbeenda kumu eba mbe: Kumu asô akudégi we mbe ?Wa n’aneengie tôngaa Pâquene gôni? 12Anganôtubéda tsongone épôni gô môgenye agô ngongo éndé na tabudé na dikôndi. Te gône gôngakônzanye Pâquene. 13Ahmakea na ahmadenga éôma éetso gamavovo Jésus. Na ahmakônza Pâquene.

Môyakô evamba na Nzambé

(Bono na Matt. 26:26–30, Marc 14:22–26, 1 Corinthiens 11:23–25)

14Ndéône émabuéa, Jésus n’aneengie edi amadigaa va tabudé. 15Jésus amabeendahngô mbe: N’egépangaka éena panda, me nookô tsôvé gôéaa n’anyô Pâquene nedué. 16Yangô te gégoni. Na me tsangamiaadô ngu na vangeendô suetine éapie g’ôkumu aNzambé. 17Jésus amabongo gébunguge na amakuméda Nzambé gô sangô. N’angô mbe: Bongokoni gébungu gegé, anye nyuakani sangô. 18T’ebandô nanôbeenda mbe me tsangadônyuadô mebame mamiônda éma ngu na vangaviga okumu aNzambé. 19Jésus amabongo môpemba. Amakuméda Nzambé gô angô. Amabukua angô na ameetsa aneengie. Amanigôa ahngô mbe: Odôô te ôtôe ami ôétsiô gôndé anye. Indakani nane gôébangôa me. 20Amoomba ébongo gébungu vamamanahngô éaa na ameetsa aneengie sangô. Angô mbe: Gébungu gegé te gémbégéa gétubéda évamba éamanza éawene mônongo. Nôévambédu te gô nzina yami diaagi gôndé anye.

21Menyani mbe ôgogo amômane akabi me ôndé n’ami va tabudé éva. 22Me Muana Amôma, na gô pie nakea g’ôwa te gamanyôngéô Nzambé mbe éngaba te nane. Ivô ngeba épôni gô maguga mangeena ône akabi me. 23Aneengie ahmabandôa éevôana anguene n’anguene ône andé va gatse aô angakaba Jésus.

?Pene enyangee indaa?

24Aneengie aJésus anguene n’anguene amaagagana mbe: Me te pene enyangee. Oô dôta mbe: Aé, pene enyangee te me. 25Jésus amanigôa ahngô mbe: Gôndé ane asavamba na Nzambé, atômie waô anyôngéô ékumédu mbe: Pene éasô amôsôba, avamba n’asô. 26Esanyepa nane va gatse anyô. One anyôngéô éba pene va gatse anyô abaké ga môdimi anyô, na môtômi abaké môyanzi. 27?Pene indaa? ?Te ône adigaa va tabudé vo, te ône atsua môyakôe-a? ?Kaka ône adigaa va tabudé-ma? Ivô bononi, me gôndé anye te ône anôétsa môyakô.

28Anye nômadenganô gôébibéda n’ami maguga mami. 29T’ebandô me nanôétsa ôkumu gameetsô me angô na Téta. 30Gômbe nôngaa na nônganyua va tabudé éami g’ôkumu ami. N’anye nôngadigaa gô édigaa éokumaka gôétsundéda nzima na mabôta mabaé maIsraël.

Jésus ameevéda gétônéô saPierre

(Bono na Matt. 26:31–35, Marc 14:27–31, Jean 13:36–38)

31Kumu Jésus ameenda mbe: Simon, Simon. Satan aduki me éwe gôéginya éwe mônongovo gaginyô géétété na gékunga gôébôkôa sangô.#22:31 Jésus amagoneda ébégôe na mibie miwanzôni. 32Ivô me nasambédi gôndé éwe kabaga môtémoo ôba na paga gôénôtôga gôndé me. N’ewe vangakoga éwe na gôndé me, ôodeda ana aTétee noo agô mbumu éaNzambé. 33Pierre amavovo mbe: Kumu nangakea n’ewe buéyé na gô eba atsôgôô buéyé na g’ôwa. 34Ivô Jésus amamôévéda mbe: Pierre, nagôbeenda mbe deo noo tsôsône madeo ésikôka, éwe ôngatôna me kuku ditatô mbe: Me tsamenya angô.

Tsuani na dode na gébémbé na yenga

35Jésus amoomba évovo n’aneengi edi mbe: Vamakudéga me anye gébé na dode, na gébé n’ebémbé na gébé na pondu ?anye nômabuta sôma-a? Ahmaabéa mbe: Aé, we tôsibuté sôma. 36Na amatôma ahngô mbe: Ivô bandôa deo noo ésabadô nane. One andé na dode, atsué yangô. One andé na gébémbé atsuéké. One asaba na yenga, asômbédé maduani medi asômba yenga. 37Me nanôbeenda mbe, na gô pie Matendeo mema mangeenanô gôndé me. Matendeome, te mbe: Amabaka g’ôtangôe agéômbé soma abévani. Jésus angô mbe: Ebégôe éne te éne éami éngeenanô n’atsatsee. 38Aneengie amavovo mbe: Bonoko Kumu, ôéni yenga dibaé. Jésus angô mbe: Te kuedô.

Jésus amavovo na Nzambé gô môkôdi ôtetu mbe Olivier

(Bono na Matt. 26:36–46, Marc 14:32–42)

39Vamakusa Jésus gô eba amakea gamabaka gésima sedi na gô môkôdi ôtetu mbe Olivier. Aneengi edi amamôaanda. 40Vamabuéahngô gô tungune yangô, Jésus amoongô ahngô ndongi mbe: Dukani Nzambé gômbe vangakanégu anye na yabédé gô mabégô mabévani, kabaga anye nôsaba na ngudi yemôkinéa. 41Vane amuene Jésus amatongonéa n’ahngô pesu akaba. Amasiba mabongo medi na amavovo na Nzambé mbe: 42Téta, ôkô ônyôngéô, nôtôa gébunguge samaguga egé. Ivô béyé mbe nane, kaka éne ényôngéô me ééndôni, ivô te éne ényôngéô éwe. 43Na vane môsi g’ôba amavigédu na Nzambé na vandé angô gôémôodeda. 44Gô pievia épôni émookô Jésus gô môtémedi, amaduka Nzambé na gébaki. Géyuku sedi gémakoga nzina. Gémadénda na gô tsina.

45Vamamanangô évovo na Nzambé amatimôga. Amabuéa na vandé aneengi edi. Amadenga ahngô andé gô vio gôgogi ahngô na gégeebage. 46Amavovo n’ahngô mbe: ?Nôeboga nayee? Timôgani na vovoni na Nzambé gômbe vangakanégu anye na yabédé gô mabégô mabévani nôngamakôa.

Jésus amatsôpu

(Bono na Matt. 26:47–56, Marc 14:43–50, Jean 18:3–11)

47Vamabangô agévovoko, géômbége gémaviga. One atetu mbe Judas, môvo va gatse anzima n’abaé amakea va mbene agéômbége. Amawesea na gôndé Jésus gôésambanéa n’edi. 48Jésus amamôévôa mbe: ?Judas vasambanéa éwe n’ami te gôékaba me, Muana Amôma-a? 49Aneengie amabaka na Jésus ameena éne émahbuéani. Ameevôa Jésus mbe: ?Kumu tôbetaka omeaa na yenga-a? 50Môvo va gatse aô amakitsa éatô éagéeyo gémôgôô éamôyanzine apene éadeekedi adigondoku. 51Ivô Jésus amadékéda ahngô mbe: Tsikani. Nômbieendani. Na Jésus amabanda éatô éamôma nône na ameedôngéda.

52Jésus amavovo na tsesu yadeekedi adigondoku, n’atômi amigode amakenea eba aNzambé na peeye yAjuif, ahngô muetso amaviaka gôétsôpa Jésus. Jésus angô mbe: Anye nôvigi na mabaga na péndé gandé ane atsôpa môsi môkôbé. 53Namabaka n’anyô minya mietso gô eba aNzambé. Nôsibandé me. Ivô ndéô nedué te gôndé anye na gôndé ône anôtôma nôndé gô ngudi yedi yevitsi.

Pierre amatôna Jésus

(Bono na Matt. 26:57–58,69–75, Marc 14:53–54,66–72, Jean 18:12–18,25–27)

54Vamatsôpahngô Jésus, ahmakea n’edi na gô eba apene éadeekedi adigondoku. Pierre amaanda Jésus gôdagôda. 55Oma amadumua gébéké na amadigaa. Pierre amadigaa vavo n’ahngô. 56Môyanzi môvo amôgeto ameena Pierre andé digaa gôéôkô épiô. Amamôbono na nzôô. Amavovo mbe: Mômôgôô noo amabaka na Jésus. 57Ivô Pierre amatôna mbe: Môgeto noo, me tsamenya Jésus. 58Pesu andéô môvo ameena Pierre na amavovo mbe: Ewe dôta môvo va gatse omeaa. Na Pierre amatôna mbe: Mômôgôô noo, kaka me. 59Vamoota pesu andéô, muene amamôbakéga mbe: Na gô pie, ôdôô amabaka na Jésus. ?Odôô dôta, kaka môsi Galilée-ma? 60Pierre amatôna mbe: Mômôgôô noo, me tsamenya éne évovo éwe. Andé gôévovo nane tsina na tsina tsôsône émakôka. 61Kumu Jésus amanikéda misome gôébono Pierre. Vane Pierre amabangôa éne émavovo Jésus n’edi mbe: Deo noo, tsôsône madeo ésikôka, éwe ôngatôna me kuka ditatô. 62Pierre amakusa na amadéa gégeto.

Jésus amatokou

(Bono na Matt. 26:67–68, Marc 14:65)

63Amôgôô amasumbéda Jésus amamôdeta na amamôbômôa. 64Amamôkata môkanda va miso na amamôévôa mbe: Ewe, ômenya mabégô metso. Beenda we ône agôbômôéni. 65Na amamôtoko pingô yamatoki.

Jésus ameesédu n’asi kundu épôni éAjuif

(Bono na Matt. 26:59–66, Marc 14:55–64, Jean 18:19–24)

66Vamaagiia nyee géômbé satsesu yadeekedi adigondoku, n’anigôi amige miaNzambé gémawanya. Géômbége géne sakundu épôni éAjuif gémavigéda Jésus na va gatse akundune yaô. 67Ahngô mbe: Okô mbe ôndé Christ, ône amasevôu na Nzambé beenda we mbe: Me te Christ. Jésus amaabéa ahngô mbe: Okô nanôbeenda mbe me te Christ, anye nôngatsuma te paga. 68Okô nanôévôa nyivô, anye nôsangamiaabéa. 69Mene na ngima amene, me Muana Amôma nangadigaa gô géeyo gémôgôô saNzambé, Kumu angudi yetso. 70Muetso amamôévôani amavovo mbe: ?Tambô éwe te Muana ANzambé-a? Jésus amanikéda mbe: Te geevôyi anye. Ii, te me. 71Te vane, géômbé gémavovo mbe: Tôsabutadô mbangi. Tôôkiô gamemi amuene mbe: Me te Muana ANzambé.

Currently Selected:

Luc 22: TSV

Highlight

Copy