Luc 24

Jésus amakunduga g’ôwa

(Bono na Matt. 28:1–10, Marc 16:1–8, Jean 20:1–10)

1Vamageeô manyaa tsono ageto amakea na gô pesi. Amatsua miyombo mimakônzahngô. 2Ahmadenga étaé évôni émakandanganédu na va kôbangô ombee angiine éaJésus. 3Ahmeengéa na asidenge ôtôe aKumu Jésus. 4Ahmatsapéô gô ébégôe éangô. Te vane oma abaé amaata maduani mobébayi amatsiga gôndé agetoe. 5Agetoe ahmeena gomo. Amakôtômô édimôe éaô na gô tsina. Omee abaé ane ameevôa angô mbe: ?Nôbuta ône adôngani va gatse ane amawani nayee? 6Asabadô égô duégô. Akundugi g’ôwa. Bangôani gamavovo angô vamabakangô agébaka gô Galilée. 7Amavovo mbe: Engaba mbe Muana Amôma angakabô gô mogo moma abévani. Angakomedu gô gésumuge na angakunduga g’ôwa pitsine éamôtatô.

8Agetoe amabangôa mavoviame maJésus. 9Vamanôtôgahngô gô pesi amakea gôébeenda mabégô mema metso gôndé nzima na môneengi môvo na gôndé akaô muetso. 10Ane amanigôa aneengie mabégôme te Marie môsi Magdala, na Jeanne, na Marie yeene aJacques, n’avo ageto amabaka n’ahngô. 11Ivô aneengie amatsuma mane mamanigôa agetoe paga. Amamenya mbe amavaka te vakaga. 12Béyé nane, Pierre amatimôga gôékea pita na gô ngiine émagunyuku Jésus. Amakôtômô gôédokiméa. Ameena te mikanda mitévo mimadipôkô Jésus. Na amanika na gô ebedi akea asôbasôbana gô éne émeenangô.

Ebégô émabuéa gô nzéa va kaba aJérusalem na Emmaüs

(Bono na Marc 16:12–13)

13Gô nyee ômakunduga Jésus, aneengi abaé amakea na gô mbôka étetu mbe Emmaüs. Etongoe amôtôô, ôtimôga gô Jérusalem na gô Emmaüs te ôkana anzima na kilometre épo. 14Angô abaé amanigôanaka mane mamabuéaka gô ndéô nene. 15Vamavovoko ahngô na vamanigôana ahngô, amuene Jésus amawesea na vandé ahngô na amakeanédana, ahngô muetso atatô nzéa épo. 16Amôgôôe abaé ameena Jésus na miso maô, ivô asiôngôé ébangôa mbe, ôô te Jésus. 17Jésus ameevôa ahngô mbe: ?Anye nôkea nôvovo ndé? Ahmasikama gôémôbono na mitéma miditani. 18Va gatse angô abaé, môvo inedi Cléopas, amamôaabéa na nyivô mbe: ?Va gatse asi Jérusalem muetso te ômuene na koo ôsiôkô mane mabuéyi wangô pitsi yedi-a? Akoo amookô mangô. 19Jésus angô mbe: ?Ene yebégô ndé? Ahngô amamônigôa mbe: Ebégôe te éne éaJésus, môsi Nazareth. Amabaka môpandôédi amatasa maNzambé na amayanzaka mabégô mamisôba va mbene aNzambé na va mbene oma. 20Ebégôe dôta te gameenda tsesu yadeekedi adigondoku, n’atômi atsenge. Ameeséda Jésus gôéyôhu na amamôyôha va gésumuge. 21We tômaténdéda mbe angô te ône angayuua éongo éaIsraël gô panda yaô, tambô g’eebuéa mabégô mema, deo noo te pitsine éamôtatô. 22Buéyé vane, n’ongôngô avo ageto avigi na tsangô étsapéyiô we. Agetoe amenegéyi n’ongôngôe wetso na gô ngii. 23Ivô asidenga nzumbine. Ahmaviga anigôa mbe: Môsi g’ôba amavigédu na Nzambé amatsutsuga na vandé ahngô gôéahbeenda mbe Jésus andé ti monyo. 24Avo va gatse asô, akeyi anguene na gô ngii na adengi ti mônongovo gavovi agetoe, ivô asiena Jésus.

25Vane Jésus amasemba ahngô mbe: Ah, anye oma agébé n’eodo. Mitéma mianyô mindé na paga gôésinga éetso émavovo apandôédi amatasa maNzambé. 26Christ, ône amatômu na Nzambé ?mbeka awa, mbe ameengéa g’ôndômbedi-a? 27Na vane, amasupua gô Matendeo MaNzambé metso maamuene Jésus, bandôa na meekédu maMoïse na mane mamatenda apandôédi amatasa maNzambé.

28Vamatsigahngô gô mbôka, Jésus amabaka mbe oota. 29Ivô akedi abaé amamôsikéga mbe: Dunda n’asô éva, évitsie évigi, nyoo ôédi. Angô ameengéa gôédigaa n’ahngô. 30Vamadigaahngô va tabudé, Jésus amabongo môpemba na amakuméda Nzambé gô angô. Amabukua angô, na ameetsa akedi. 31Miso maô mamapôga na amamenya mbe te Jésus. Ivô Jésus amadimbana vandé ahngô. 32Amavovo anguene n’anguene abaé mbe: Vamatônigôana gô nzéa ?we tôsiôkô gényônga na géviôviô ga soto gô mitéma miasô-a? Emabaka ti gényônga vamasupuéangô wa n’oo Matendeo MaNzambé.

33Ahngô abaé amatimôga na dikooye dine gôénika na gô Jérusalem. Amadenga nzima na môneengi môvo, n’avo amabaka n’ahngô vavo. 34Ahmavovo n’ane amaviga gô Emmaüs mbe: Na gô pie, Kumu akundugi g’ôwa, ameenanô na Simon. 35N’ahngô abaé dôta amanigôa éne émabuéa vamabahngô gô nzéa na gamabukuangô môpemba gôébangôéda aneengie mbe: Aakani, ôô te me Jésus.

Jésus amatsutsuga vandé nzima na môneengi môvo

(Bono na Matt. 28:16–20, Marc 16:14–18, Jean 20:19–23, Mayanzame 1:6–8)

36Vamabakangô andé gôénigôana, amuene Jésus amatsutsuga vandé ahngô. Amavovo mbe: Gétabé gébaké gôndé anye. 37Onzenze ômatsôpa angô na amookô ti gomo mbe te môma amawani anikini. 38Ivô Jésus amasuméda ahngô mitémamie mbe: ?Anye nôkebangana ndé? ?Mitéma mianyô migébaka na paga gôndé? 39Bononi mogome mami na makôdôme mami. Nôngeena mbe na gô pie ôô te me Jésus. Bandakani na eenakani. ?Môma amawani anikéenanô andé n’otô na épa-a? Me nandé n’otô na épa. 40Amavovo nane te andé gôétubéda mogome na makôdôme medi. 41Aneengie amabaka te agébaka na paga n’etsapéô n’ekasôga. Vane Jésus amaduka ahngô mbe: Itsani me môyakô, naa. 42Ahmamôétsa gébéndéké sanyama éagô mbéyi gémabéku môganga. 43Jésus amagébongo na amagéaa va miso maô. 44Te vane Jésus amabangôéda ahngô mbe: Nôeni, metso mane mamavovo me vamabaka me n’anye, mane mamatendu gô miganda miaMoïse na mine miapandôédi, na mine miamimbô, mimeevédaka anye mbe gôndé Jésus éngaba te nane. Menyani mbe mamani éenanô. 45Jésus amakôndéga éodoe éaô mbe ahnganigôgéô Matendeo MaNzambé. 46Amanigôa ahngô mbe: Oôkôni éne ématenduni. Ematendu mbe: Christ, ône angasevou na Nzambé angeena maguga na angakunduga g’ôwa pitsine éamôtatô. 47Tsangône éedi éngatsuaô na gô tsengeye yetso gôéékédu te gô ngudi yainedi, bandôa gô Jérusalem. Tsangône éedi te mbeea éazambé ébambéa angô oma gôékoa mitéma miaô na mônongoe waô, gôsingéô ahngô na Nzambé kokoo gô ébévee éaô. 48Anye te mbangiye yamane mameenanye na mamookô anye gôndé me. 49Memuene nanganôkudégéa muene môwedi, ône amavanga Nzambé gôénôétsa géenza. Anye nômbianôtôga gô môsenge ôdôô buétsé te ngudi yone andé g’ôba dipanga ésutuméa na gôndé anye.

Jésus amabata na g’ôba

(Bono na Marc 16:19–20, Mayanzame 1:9–11)

50Jésus n’aneengi edi amanôtôga gô Jérusalem gôékea na gô gésa saBéthanie. Jésus amakonyo mogome na ameetsa aneengie mate gô mavovia medi. 51Jésus agébaka gôéénda nane, na amatômbu na g’ôba. Amaagana na amatsika aneengie. 52Anguene aneengie asiene panda. Amamôneegeda na amanika na gô Jérusalem n’ekasôga éagényônga gévôni. 53Amabaka gô eba aNzambé na pitsi n’omanda gôékuméda na gôéneegeda Nzambé.

Currently Selected:

Luc 24: TSV

Highlight

Copy