Mayanzame 11

Pierre amanigôa asi mbumu éaNzambé gô Jérusalem

1Ane amatômukuni na asi mbumu éaNzambé amadigaa gô Judée ahmookô mbe: Ane asaba gô éongo éAjuif, eekédu dôta Ogi aNzambé. 2Vamanika Pierre na gô Jérusalem, asi mbumu éaNzambé gô éongo éAjuif amamôtsundéda. 3Ahngô mbe: Tambô éwe Pierre, gômabaka éwe ômeengéa na gôndé ane asaba Ajuif na ane asigeetuni. Omaa môyakô vavô n’ahngô. 4Vane Pierre amanigôa mabégô metso, na mane mavôni na mane magemage mamabuéani. Angô mbe:

5Nyovo vamabaka me gô môsenge aJoppé namabaka gôévovo na Nzambé. Nameena ébégôe te nandé nani gébé gô vio. Nameena sôma gémasuma g’ôba na vandé me. Sômage géne gémaba ga môkanda ôpikô tabudé. Môkandee ône ômasumbédu gô mapandaka manayi. Omasuma g’ôba na vandé me. 6Namasingégéda mane mava gatse amôkandee. Nameena nyama dindé na éeyo énayi, na nyama yagô pindi na dine dikea migoge, na nyoeye. 7Vane namookô ôgie ômatôma me mbe: Pierre. Timôga. Yôhaka nyama yedi. Aaka. 8Ivô me namakina mbe, Aé, kaka nane Kumu ami. Me madeo tsiaa nyama éasagô na gisigôgééni. 9Ogie ômoomba éviga g’ôba ômasemba me mbe: Okô Nzambé ameenda mbe sôma gegé géndé gémagôgéani, ômbieenda mbe: Me tsaa, gésigôgéé. 10Sômage gémasuma na vandé me kuka ditatô na vane gémanika na g’ôba. 11Tsina na tsina amôgôô atatô amatsiga gô eba ômadigaa me. Amatimôga gô Césarée, amatômu na gôndé me. 12Gédidi SaNzambé gématôma me mbe: Timôga. Kiaka n’atsatsee n’adua na gô Césarée. Pierre amatubéda mbe: Nôeni, ana atétee n’ami, mbangiye môtôba édi. Amakea n’ami na gô Césarée. Tômeengéa muetso na gô eba aCorneille. 13Angô amanigôa we éne émeenangô gô ebedi. Nyovo ameena môsi g’ôba amavigédu na Nzambé amatema va mbene edi. Môsi g’ôba amavovo n’edi mbe: Kudéga oma na gô Joppé gôéwanyéda mômôgôône eendô mbe Simon Pierre. 14Angagônigoa mabégô mavôni. Mangô mangooboo éwe gô ébévee éoo, anye na mbumune yoo nyetso. 15Namabandôa évovo n’ahngô Gédidi SaNzambé gémasuma gôéengéa gô mitéma miaô mônongovo gameengéa sangô na gôndé wa n’anyô v’ebandô. 16Vane te vamabangôa me éne émavovo Kumu Jésus mbe: Jean amanôbatésa na meba. Géé me, nanganôbatésa na Gédidi SaNzambé. 17Vane wa n’anyô tôena mbe Nzambé ameetsa géômbé saCorneille Gédidige ôbiia, mônongovo gameetsô wa n’anyô sangô ôbiia vameetsa wa n’anyo Kumu Jésus-Christ mitémamie gémôtsumé paga. Gôndé me, tsiôngôé ékékôa éne émanyôngéô Nzambé éénda. 18Asi mbumu éaNzambé gô Jérusalem amasuméda mitémamie vamookô ahngô tsangô nene. Amakuméda Nzambé mbe: Tambô na gô pie, Nzambé asabômu ane asibôtu gô éongo éAjuif. Eetsa ahngô ndéô gôékoa mitéma miaô na gôédiia monyo apie.

Asi mbumu éaNzambé gô Antioche

19Gô ndéône émayôhu Etienne, gékuanô gévôni gémabuéa gôndé ane ameetsa Jésus mitémamie. Asiôngôé édigaa gô mbôka yaô. Amapanzangana na gô tsenge diyekani. Avo amakea na gô Phénicie. Avo na gô Chypre. Avo dôta na gô Antioche. N’ahngô ameekéda Mane Mamavovo Nzambé te gôndé Ajuife n’aô atévo. 20Buéyé nane, avo ane ameetsa Jésus mitémamie amatimôga gô Chypre na gô Cyréne gôékea na gô Antioche. Gône ameekéda buéyé n’ane ahsaba gô éongo éAjuif. Amanigôa ahngô Tsangô Eamôsoba éaKumu Jésus. 21Ngudi yaKumu dimeenanô gôndé eekédie ane. Oma ayekani amagéngôga na gôndé Kumu na ameetsa Jésus mitéma miaô.

22Asi mbumu éaNzambé gô Jérusalem amookô tsangône éne émabuéa gô Antioche. Vane amatôma Barnabas mbe: Kiaka. Okebuéa gô Antioche. 23Vamatsiga Barnabas gô Antioche, ameena éne émayanza Nzambé gôéétsa asi mbumu éedi mate. Amatsôkéa. Amoongo ahngô ndongi mbe: Nômbiaagana n’evambee éndé anye na Kumu. Bakani na môvinéné mbe mitéma mianyô misipa. 24Barnabas te môma amôsôba. Môtémedi ômayôa na Gédidi SaNzambé. Gômavambangô na Nzambé asitsumé ngudi yedi paga. Amaweseda oma ayekani gôésinga Kumu.

25Va mbenene vane, Barnabas amakea na gô Tarse gôéwanyéda Saul. 26Vamamôdengangô, ahmanika muetso abaé na gô Antioche. Amanana wangô môpuma amôbongo va gatse ambumu éaNzambé. Ameekéda oma ayekani. Aneengie amatetu mbe oma aChrist. Inee éne émabandôa te gô Antioche.

27Gô ndéône nene, avo apandôédi amatasa maNzambé amatimôga gô Jérusalem gôébuéa gô Antioche. 28Môpandôédi môvo, inedi Agabus, amatômu na Gédidi SaNzambé gôétema na gôéevéda oma ébégôe éngabuéani. Angô mbe: Gôngabôka nzaa épôni gô tsinane nyetso. (Na gô pie, nzaa nene émabôka te gô ndéône ématôma Claude tsengene.) 29Aneengie amavangana anguene gôéwedéa akaô. Angô mbe: We muetso, môma na môma tôngeetsa éne éndéké n’asô gôékudégéa ana aTéta asi mbumu éaNzambé adigaa gô Judée. 30Ameetsa te nane. Amakudéga éne émeetsangô ôbiia na gôndé peeye yambumu éaNzambé gô Judée. Te Barnabas na Saul amatsua dibiiaye dine.

Currently Selected:

Mayanzame 11: TSV

Highlight

Copy