Mayanzame 12
12
Oma amayôha Jacques ameengéda Pierre gô tsôgôô
1Gô ndéô nene môtômi atsenge Hérode, amakuana avo asi mbumu éaNzambé. 2Amayôhéda Jacques na yeenga. Jacques te muanaya aJean. 3Vameena Hérode mbe Ajuif atsôkéa ôwa aJacques, amatsôpéda Pierre. Te ndéô éasueti éaakô môpemba ôsigésu na lévure. 4Vamatsôpu Pierre, Hérode ameengéda angô na gô eba atsôgôô. Gône amakeneo na éômbé énayi éamigode. Géômbé gévo, migode minayi minayi. Hérode amabaka n’etasa mbe Pierre angatsundédu va mbene oma muetso, te Pâquene émoota. 5Emabaka te nane. Pierre amabaka digaa gô eba atsôgôô amakeneo na migodemie. Asi mbumu éaNzambé amavovo na Nzambé na pitsi n’omanda gôémôduka gôndé Pierre.
Pierre amakusédu gô tsôgôô
6Vamoota Pâquene, te pitsine émabambana na nyoo ôngatsundédu Pierre na Hérode va mbene oma muetso. Pierre ameeboga vio va gatse amigode mibaé gô eba atsôgôô. Amabaka amakatô na panga dibaé. Avo akeneyi atsôgôô amabaka mitie va kôbangô ombee eba atsôgôô. 7Môsi g’ôba amavigédu na Kumu Nzambé amatsiga tsina na tsina. Gévede gévôni gématana gô tsongone émabaka Pierre. Môsi g’ôba amaginya Pierre va tsungu mbe: Timôgaka. Yavôga étema môtie. Vane pangaye dimabaka gô mogo maPierre dimatsôbôga na va tsina. 8Môsi g’ôba amamôtôma mbe: Ditéga môkôdie woo v’oninge. Aataka ponduye. Pierre ameenda gamabeendu angô. Môsi g’ôba amoomba mbe: Aata ngoyine yoo épôni. Aanda me. 9Pierre amakusa gô eba atsôgôô. Môsi g’ôba amoota gô mbene, Pierre amaanda va ngima. Asibangôé mbe: Te môsi g’ôba ôdôô akuséda me na gô pie gô tsôgôô. Amamenya mbe: Me neena te ndoti. 10Ahmoota va mbene amigode miava ngenge eba. Ahmoota na va mbene amigode miagô môkii. Ahmatsiga v’okuké amianga agô môgômba ôseta eba wetso atsôgôô. Okukée ône ôkusa na gô môsenge. Omakukuga amuene na ahngô amoota. Vamakeahngô gô nzéa éamôsenge, tsina na tsina môsi g’ôba amatsika Pierre akea amuene.
11Vane te vamamenya Pierre mbe: Tambô éé kaka ndoti éena me. Endé ti na gô pie. Kumu Nzambé amavigéda môsi g’ôba na gôndé me. Ayuui me gô maguga mabaki me mbe natubédu n’Ajuif. Awaati me gô mogo maHérode.
12Vamabangôa Pierre ébégôe na vede, amayavôga ékea na gô eba aMarie, yeene aJean ône amoogu mbe Marc. Oma ayekani amabaka gô ebee ône gôévovo na Nzambé. 13Pierre amabôkéda v’okuké amôgômba. Môgetone inedi Rhode, môyanzine akumu eba, amawesea v’ombaa gôémôkukuéa. 14Amabangôa ôgie mbe te ône aPierre. Na asimôkukué môgômba. Amanika na va gatse eba atsôkéa mbe: Akasôni, Pierre aka v’ombaa. 15Akedi amamôdékéda mbe: Tsika. Apatéda nane. Ivô tômbône amoomba mbe: Me tsapatéda. Te na gô pie andé v’ombaa. Akedi ahngô mbe: Eé-éé, ôeni te môsi g’ôba avigédiô na Nzambé gôékenea angô. 16Andé gôévovo nane, Pierre amoomba ébôkéda v’okuké. Vamagogo ahngô étsumana pagaye amakea gôékanéga ékukua. Ameena Pierre te andé vangô. Ahmakuadima na amasôbasôbana. 17Pierre amadékéda ahngô n’ogogo ôtévo mbe: Kôdani. Amanigôa akedi gamakusédu angô na Kumu Nzambé gô tsôgôô. Ameenda mbe: Beendani Jacques na ana a Tétee n’ami muetso. Te angô keaga na gô nyene tungu.
18Vamaagiia nyee, migodemie miagô tsôgôô mimakumbuga gôébuta Pierre. Ahmatsapéô gémenye éne émabuéa gôndé Pierre. 19Amuene Hérode amatôma omedi gôémôbuta. Pierre asieenanô. Vane Hérode amatsundéda migodemie. Ameetsa ôtômue mbe: Yôhani migodemi mine. Hérode amatimôga gô Judée gôékea môtôô na gô Césarée. Amadunda wangô ôkana apitsi.
HĂ©rode amawa
20Hérode amabaka ti n’opisa ôvôni n’asi mbôkaye diindô mbe Tyr na Sidon. Asidigéé n’ahngô n’evamba. Tambô asi Tyr na Sidon amabôngôku te na môyakôe agô tsenge éaHérode. Omeaa amavangana gôébuéa na vandé Hérode gôémôduka mbe: Singéa wa n’anyô tôomba évamba. Tôbaké na gétabé. Amavooto môma môvôni, inedi Blastus, gôésungéa ahngô va mbene aHérode. Tambô Blastus te môgode agô eba amuene Hérode. Vane oma amakea n’edi gôévovo na Hérode.
21Gô nyee ômasevouni, Hérode amaata maduani medi mokumaka. Amadigaa gô gédigaa sedi sagéneega v’ekanga gôévovo na omee. 22Oma muetso amamôkuméda mbe: One avovoni kaka môma. One te nzambéne éasô avovoni. 23Oma andé gôémôkuméda nane, môsi g’ôba amavigédu na Kumu Nzambé amamôétsa tsina na tsina ébeea évôni. Otô aHérode wetso ômakaaô na pingô yamikiyô na amawa. Amasisédu nane gômawaatangô Nzambé kumane yedi mbe angô môma akumédu yangô.
24Ogi aNzambé ômatsanzabana gô mbene na gô mbene.
25VamagĂ´ga Ă©yanzee Ă©aBarnabas na Saul gĂ´ JĂ©rusalem, amanika na gĂ´ Antioche. Amakea na Jean atetu mbe Marc.
Currently Selected:
Mayanzame 12: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
