Mayanzame 10

Pierre na Corneille

1Gô tsenge ééndô mbe Césarée, gômabaka mômôgôô inedi Corneille. Angô môtômi agéômbé gévôni samigode mimayanzéa asi Rome. Migode mimatômangô mimeendô mbe, Géômbé asi Italie. 2Corneille amaneegeda Nzambé. Angô na asi ebedi muetso amakea kuka yetso gô éwanyéô gôéneegeda Nzambé. Amawedéa ndéô yetso misuga miAjuif. Amavovo na Nzambé gédundé. 3Nyovo gô ndéô étengama kômbéne ameena ébégôe te andé nani gébé gô vio. Ameena môsi g’ôba amavigédu na Nzambé ameengéa na gô ebedi. Môsi g’ôba amamôbambéa mbe: Corneille. 4Amabono môsi g’ôba na ônzenze na amamôévôa mbe: ?Kumu Nzambé éébé nayee? Môsi g’ôba amamônigôa mbe: Nzambé amookô disambôye yoo. Ameena gawedéa éwe misuga. Na asabômu éwe. 5Tambô, deo noo kudéga oma na gô Joppé gôéwanyéda mômôgôône eendô mbe Simon, ône amoogu mbe Pierre. 6Angamôdenga gô ebee ôndé va kôbangô amubu. Kumu ebee te épo Simon, angô môgémbi egôbôkô éanyama. 7Vamanôtôga môsi g’ôba vandé angô, Corneille amabambéa ayanzi abaé va gatse ayanzie wedi. Amabambéa na môgode môvo amabaka g’ôtômu edi. Môgodee nône amaneegeda Nzambé. 8Corneille amanigôa ahngô metso mamabuéakani na amatôma ahngô mbe: Kiakani na gô Joppé.

9Ovo enyaa ône vamabakahngô aka gôpégôpé na Joppé, te ndéône émabata Pierre na gô môgényé agô ngongo eba gôévovo na Nzambé. Te ndéône étsakama kômbéne. 10Pierre amookô nzaa na amanyôngéô éaa. Vamabaka akedi gôémôaambéa môyakôe, Pierre ameena ébégôe te andé nani. 11Ameena g’ôba ômakukuu na sôma gémasuma wangô. Sômage géne te gandé môkanda ôpikô tabudé. Môkandee ône ômasumbédu gô mapandakame manayi na ômasuma na va tsina. 12Gô angô gômabaka nyama yetso dindé n’eeyo énayi, na nyama yetso yava tsina dikea migoge, na nyoeye. 13Ogi ômatôma Pierre mbe: Pierre, timôga. Yôhaka nyama yedi. Aaka. 14Ivô Pierre amakina mbe: Ae. Kaka nane Kumu ami. Me madeo tsiaa nyama éasagô na disigôgééni. 15Ogi ômoomba évovo mbe: Okô Nzambé ameenda mbe: Sôma gége géndé gémagôgéani, ômbieenda mbe: Me tsaa. Gésigôgéé. 16Sômage gémasuma na vandé Pierre kuka ditatô na vane gémanika na g’ôba.

17Pierre amadigaa gôétanganéda gô môtémedi éne éeni angô na gôémenya gakegea éangô. Vane te vamatsiga agenda v’ombaa. Agendee te ane amatômuku na Corneille. Ameevôa gô môsengee wetso mbe: ?Eba aSimon ôndé vani? Na te ahngô tubédu. 18Madeo asiengéa, ahmabambéa kumu ebee mbe: ?One eendô mbe Simon Pierre adigaa te égô-a? 19Tambô amuene Pierre andé digaa gôétanganéda gakegea ébégôe éeni angô. Gédidi SaNzambé gémavovo n’edi mbe: Oôkô édué. Gôvigi amôgôô atatô abuta éwe. 20Timôgaka. Sutuméa na gô môgényée agô tsina. Ombieena panda gôékea n’agendee. Te me Nzambé natômi ahngô na gôndé éwe. 21Pierre amasutuméa na gôndé agendee na amavovo n’ahngô mbe: One abutanye te me. ?Anye nônyôngéô ndé? 22Agendee amamônigôa mbe: We tôvigi gô ina aCorneille, môtômi amigode. Angô te môma amôsôba aneegeda Nzambé. Ajuif muetso amômekeda. Môsi g’ôba amavigédu na Nzambé gôémôbeenda mbe: Wanyédé Pierre aviga na gô eboo. Ovôtanganô éne énganônigôa angô. 23Pierre ameenda ahngô mbe: Ingéakani. Pitsi nene ahmeeboga gô eba aSimon.

N’ongôngôe ône, Pierre amakea n’ahngô na gô mbôka yaô. Ana atétee n’edi asi mbumu éaNzambé avo agô Joppé amakea gôémôveegeda. 24Ovo inyaa ône ahmatsiga gô Césarée. Corneille amakôva kindedi n’avo oma amabaka n’edi n’evamba na vitoo gôéenéa Pierre. Amabaka muetso gôémôenéa. 25Vamatsiga Pierre gô môkii, Corneille amakusa gô eba gôéwanya n’edi. Amagudama na gô tsina na amakotomo va makôdô maPierre. 26Ivô Pierre amamôtôma mbe: Timôgaka. Me nandé te môma gandé éwe. 27Amakea avovo, angô na Corneille. Ameengéa na gô ebedi na amadenga oma muetso andé na ndaa ndaa gôévengéa angô. 28Pierre amavovo n’ahngô mbe: Anye nôsabômu mbe Môjuif adékédu na mige miesôga égobedango mbe: Gévambé na môgenda na géengéé gô ebedi. Tambô Nzambé amatubéda me mbe, ômbiabono môma mbe andé asigôgééni na asagô. 29T’ebandô tsikina éviga vamabambéanye me. Me nanyôngéô émenya éne ébambéyiô me.

30Corneille amanigôa Pierre mbe: Oeni, ôka pitsi ditatô, ndéône te épo. Namabaka gô ebami gôévovo na Nzambé disambôye yandéône événdama kômbéne. Tsina na tsina môma amaduani mobébayi amatema môtie va mbene ami. 31Amavovo n’ami mbe: Corneille, Nzambé amookô disambôye yoo. Asabômu gawedéa éwe misuga. 32Kudéga oma na gô Joppé gôéwanyéda Simon Pierre. Angamôdenga adigaa na épo Simon. Ebedi ôndé va kôbangô amubu. Simon nene andé môgémbi egôbôkô éanyama. 33Me tsidingé étôma oma gôéwanyéda éwe. Na éwe ôsikina éviga. Nôeni, we tôangôaa. Tôndé muetso va mbene aNzambé gôéôkô éne émabeendu éwe na Kumu gôénigôa we.

Pierre ameekéda Mabégô MaNzambé gô eba aCorneille

34Vane te vamasiia Pierre mbe: Tambô na gô pie, nanigôgéyiô deo noo mbe Nzambé asatatôa oma. 35Môma te môma, éongo te éongo, ôkô môma ookô Nzambé gomo na éénda éne ényôngéô amuene Nzambé, angô anyônganéô na Nzambé. 36Anye nôsabômu ôgi ômakudéga Nzambé na gôndé oma aIsraël. Amakudégéa ahngô Tsangô Eamôsôba mbe môma oongôa évamba na Nzambé na gétabé gô ngudi yaJésus-Christ, ône andé Kumune oma muetso. 37Nômookô mane mamabuéa gô tsengene nyetso éaJudée, bandôa gô Galilée gô ndéô émeekéda Jean ébégô éabateme. 38Nômookô gamakudéga Nzambé Gédidi Sedi na gôndé Jésus môsi Nazareth, gôémôétsa ényanga. Nôsabômu gamakénga Jésus gô tsengene nyetso. Amayanza mabégô manyônganéôni. Na amadôngéda ane amadigaa gô tsina otômu ayabédé. Gôébégô Nzambé asiaaganéké n’edi. 39We avo tôndé mbangi éametso mamayanza Jésus gô tsenge édigaa Ajuif na gô Jérusalem. Amamôbôkéda va gésumu sowa gôémôyôha. 40Ivô pitsine éamôtatô, Nzambé amamôkundua g’ôwa. Nzambé asimôsingéé atsutsuga gôndé oma muetso. 41T’ebandô Jésus amatsutsuga gôndé we tômasevou na Nzambé na mbeego, gôéba mbangi yedi. We avo tômaa na tômanyua tabudé épo n’edi vamamana Nzambé émôkundua g’ôwa. 42Jésus amatôma we mbe: Kiakani. Ikédani oma muetso. Nigôani ahngô ômbanzee wami mbe: Jésus te ône amasevou na Nzambé gôétsundéda ane adôngani n’ane amawani. 43Apandôédi muetso amatasa maNzambé amanigôa mane maJésus. Amanigôa mbe: Okô môma eetsa angô môtémedi wetso, gétsumé angô paga, angasingéô kokoo gô ébévee éedi gô ngudi yaina aJésus.

Gédidi SaNzambé gémayuéséda mitéma miane asibôtu gô éongo éAjuif

44Vamabaka Pierre andé gôévovo, Gédidi SaNzambé gémasuma na gôndé ane amabaka gôéôkô meekédume mamaviga n’edi. 45Ane amaviga na Pierre gô Joppé gôémôveegeda na gô Césarée te oma aChrist agô éongo éAjuif. Amatsapéô ti v’ekôdéô éatsapéô vameenahngô mbe Nzambé ameetsa Gédidi Sedi na gôndé ane asibôtu gô éongo éAjuif. 46Amatsapéô nane te vamookô ahngô géômbé saCorneille avovo yaanga yôgi disiikédu ahngô gôéneegeda Nzambé n’okumakedi wetso. Vane Pierre amavovo mbe: 47We tôsoongôa ékina éétsa omeaa batemene éagô mbéyi gôébégô Nzambé amani éyuéséda mitéma miaô na Gédidi Sedi mônongovo gamayuésédu mine miasô. 48Pierre amasingéa géômbé saCorneille mbe eetsô bateme gô ina aKumu Jésus. Corneille ameenda angô mbe: Nômbiakea. Digaani n’asô pitsi yedi. Ahmadigaa.

Currently Selected:

Mayanzame 10: TSV

Highlight

Copy