Yohan 19

Bv̀nghǿ vmo shvmoò we

1Wervtnø̀ Yesu sv̀ng shøl dv̀ng sømri mvshi:pmí vdiplv́m Pilatní dvzá:ròe. 2Vrá, cìlcèrìí bv̀nghǿí za:tnò we koqkv́m vmo Àng vgo taq shvmoò sórí shvmoq bèlaq yvnggúng tiqdùng dvgwaòe. 3Àngmaqí, “Yuda vsv̀ngrì Koqkv́mpèá, gǿngzø̀l leq vl dvr,” a:lò nø̀ Àng mvwa vpaqòe. #Yoh. 18:22 4Wekvt Pilat vrá tiqkvt léshìá:mì nø Yuda vsv̀ngrì sv̀ng, “Yalà, Àng taq pà mvrà gø lá mvlúnò we nàmaqí shálv́m rvt, Àng sv̀ng nàmaq yv́ng ngàí shøl dakngòe,” a:lòe. 5Yesu nø bv̀nghǿ vmo shvmoshaq, shvmoq bèlaq gø dvgwashaq léshì daqì. Pilatní àngmaq sv̀ng, “Yapè kaq èyv̀ngnø̀ng!” a:lòe. 6Shvrúngshú vjìrì nv̀ng vsóngshúrìí Àng sv̀ng yv̀ng bǿà chàng, “Nàtaqò! Nàtaqò!” wa vkiq lú:ngì. Íwe Pilatní àngmaq sv̀ng, “Nàmaqí lè Àng sv̀ng èshølnø̀ng nø wurgang taq nàtaq bǿnø̀ng. Ngàí nø Àng taq pà mvrà gø lá mvlúnò,” a:lòe. 7Yuda vsv̀ngrìí, “Nøngmaq dvrá tiqlòng èv́laìe. Àng nø Àng Gvray Àngcèpè vlshì rvtnø̀, dvrá welòng cv̀n nø Àng shí ràe,” wa vtá:nòe. #Lew. 24:16; Yoh. 5:18; 10:33 8Pilatní yakà tá bǿà kvt téwa svre lú:ngì. 9Roma gàmzø̀ chø̀mdø̀ng vdòng sv̀ng vrá tiqkvt gòngá:mì nø Yesu sv̀ng, “Nà nø kayv́ng kèní èíe má?” wa rø:tnòe. Ínìgø Yesuí tiqkà gø màtá:nò. 10Pilatní Àng sv̀ng, “Ngà kaq mènàtv́nà má? Yalà, Nà sv̀ng shvlànglv́m nv̀ng vtaqlv́m vmíng ngà yv́ng vl we Nàí mèsháò má?” a:lòe. 11Yesuí, “Taqlap#19:11 “Gvray kèní” gø rø daqe. kèní mèzí nìnø, nà nø Ngà mvdv̀m pà vmíng gø mèvl. Wervtnø̀ Ngà kaq nà sv̀ng tèle bǿì pè mv̀ng mvrà té tee,” wa vtá:nòe. #Yoh. 10:18; Dzr. 2:23 12Yakà rvtnø̀ Pilatní Àng sv̀ng shvlànglv́m mvtú láòe. Íwe, “Yapè sv̀ng nàí shèlà:ngò nìnø, nà nø Kesar#19:12 “Kesar” nø Roma kàí “dànipè” wa kà íe. rv̀mnvng mèí. Vdè nø koqkv́m ǿnge wa we kagǿ ínìgø Kesar sv̀ng poshú íe,” wa Yuda vsv̀ng shølshúrì vkiq mvnshìe. #Dzr. 17:7 13Pilat nø kà yarì tá bǿà kvt, Yesu sv̀ng vdàm kaq shøl daqà nø, Hebru kàí “Gabbata” a:lò we lóng pvlu tø̀m yv́ng kàngé rúngtv̀ng taq runge. 14Weni nø Shvlé Bóy dvpvt dvgǿshìlv́m àngni í nø, tvné vyáng rvwè#19:14 Heleni kàí nø “vchuq rvtø̀” wae. í ráì. Pilatní Yuda vsv̀ngrì kaq, “Èyv̀ngnø̀ng, nàmaq Koqkv́mpè,” a:lòe. 15Íwe, “Èsha:tnò! Èsha:tnò! Àng sv̀ng nàtaqò!” wa àngmaq vkiq lú:ngì. Pilatní, “Nàmaq Koqkv́mpè sv̀ng ngàí vtakngònø̀ng má?” a:lòe. Shvrúngshúrìí, “Kesar wa mø̀í nìnø dvgá koqkv́m mèv́laì,” wa vtá:nòe. #Yoh. 19:6 16Wervtnø̀ Yesu nø wurgang taq vtaqlv́m, Pilatní àngmaq sv̀ng tvle bǿà. Weyv́ng kèní àngmaqí Yesu sv̀ng shøl bǿà.

Yesu sv̀ng wurgang taq vtaqò we

Mat. 27:31-50; Mak. 15:20-37; Luk. 23:26-46

17Wekvt Yesu nø Àng wurgang Àng baqshì sórí, Vgo Sharø Zàng a:lò yv́ngsv̀ng búngá:mì. (Wezàng nø Hebru kàí “Golgota” tǿòe). 18Weyv́ngø àngmaqí Àng sv̀ng vtaqò nø̀, dvgá vnígǿ gø Àng nv̀ng tiqdø talap tagǿ, Yesu nø dvhø̀ø vtaqòe. 19Pilatní rugø̀m taq, “Yuda Vsv̀ngrìò Koqkv́m, Nazaretpè Yesu,” wa vruò nø̀ wurgang taq dvcaqòe. 20Yuda vsv̀ng mvmeí wegø̀m røòe. Pawá wani Yesu sv̀ng vtaqò zàng nø wamà nv̀ng tvp í nø, rugø̀m taq nø Hebru, Latin,#19:20 Roma kà sv̀ng wae. Heleni kàrìí vrushaq íe. 21Wervtnø̀ Yuda shvrúngshú vjìrìí Pilat sv̀ng, “‘Yuda Vsv̀ngrì Koqkv́mpè,’ wa nø mènàruni. ‘Ngà nø Yuda vsv̀ngrì Koqkv́mpè ǿngàe,’ wa Àng shǿnshìe, wa nø mv̀ng nàruò,” a:lòe. 22Pilatní, “Ngàí kadø vrongònø̀ng nø wedø ídv̀ng wae,” wa vtá:nòe.

23Cìlcèrìí Yesu sv̀ng vtaq bǿà dá:ngí, Àng gónggwárì lushì nø̀ vbì wál wá dv̀ng, tapè tawál vwalshìe. Vdòng bèlaq yvnggúng dùng nø taqmvtú kèní pvngmvtú høq dvpuq màdá vraqshaq íe. 24Wervt, “Laq mvdí:ngì. Yadùng kagǿ vpvtlv́m í we shvwøn dóì,” wa àngmaq vrùnge. Yalòng nø Shànshér Kàru taq, “Ngà góngwárì nø àngmaq vwalshì bǿì. Ngà bèlaqrì dvpvt àngmaq shvwøn doshì bǿì,” wa shøn yà:ngà kà dvhømlv́m dvpvt íe. Wervtnø̀ cìlcèrìí wedø wàòe. #Shz. 22:18

25Yesu wurgang shvnvngø àngmè, àngmè àngnvmmè, Klopa àng chø̀mmè Mari nv̀ng Makdala mvrìng kèní Mari maq ripme. 26Yesuí Àng shvnvng yv́ng rip we àngmè nv̀ng Àng shóngshì we coqcv́npè sv̀ng yv̀ng bǿà kvt, àngmè sv̀ng, “Svmarémèá, èyà:ngò, nvcèpè íe,” a:lòe. #Yoh. 13:23 27Wedá:ngí coqcv́n wepè sv̀ng, “Èyà:ngò, nvmè íe,” a:lòe. Wervtø̀ kèní Mari sv̀ng nø coqcv́n wepèí àng chø̀m sv̀ng shøl bǿà.

Yesu shì we

28Yesu nø bv̀nlì shvngbe wá dv́ng bǿà we sv̀ng sháshì rvtnø̀, Shànshér Kàru dvgømlv́m dvpvt, “Ngà tì bále,” wae. #Yoh. 13:3; 18:4; Shz. 22:15; 69:21 29Weyv́ng nø mvcattì dv̀n zvng we chúng tiqchv̀ng vle. Wervtnø̀ àngmaqí husop#19:29 Husop nø shøn àngtø̀ngcè tiqpv̀n sv̀ng wae. tvmùm taq mvcattì vzønshaq tìrvmøt#19:29 Nvmukdvra tìrvnip tiqpv̀n sv̀ng wae. tiqpù dvcaqò dá:ngí, Àng nònggøp sv̀ng zùòe. #Shz. 69:21 30Yesuí mvcattì aq bǿà kvt, “Dv́ng bǿngà,” wae. Wekvt Àng vgo køt vngǿm nø shaq dvtná:mì.

31Weni nø Dvgǿshìlv́m Àngni í nø, mèpvng ni nø ring vtvng we Narni íe.#19:31 Shvlé Bóy taq vdú we Narni í rvt ring vtvng we tiqni íe. Yuda vsv̀ng shølshúrì nø Narni taq wurgang yv́ng vnàng vchúng we sv̀ng mvshóngshì rvt, hí giqò nø̀ vnàngrì kalv́m dvpvt àngmaqí Pilat sv̀ng rø:tnòe.#Drd. 21:23 32Wervt cìlcèrì di ráì nø̀, Yesu nv̀ng tiqdø vtaqò we nv̀mlatpè nv̀ng wápè hírì giqòe. 33Íwe Yesu yv́ng tuq ráì nìnø, Àng nø to shi dá:rì we yv̀ng bǿà rvt, Àng hí nø mvgiqò. 34Íwe cìlcè tiqpèí Àng svràm pa sv̀ng mvngjø:ngí yaq bǿà nìnø, shvwi nv̀ng tìshø̀l chàng vyǿ daqì. 35Yarì yv̀ng yà:ngà pèí shvkse wàòe, àng shvksekà nø dìnge. À:ngí shø̀:nò rì dìng we à:ngí sháòe. Nàmaq gø kv́mlv́m dvpvt, à:ngí shvkse wàò we íe. 36Yadv́ng pv̀n íá:mì lòng nø, Shànshér Kàru taq, “Àng sharø tiqtancè gø mvgiqvm,” wa kà dvhømlv́m dvpvt íe. #Bng. 12:46; Dcr. 9:12; Shz. 34:20 37Vrá, Shànshér Kàru dvgá tiqciq taq gø, “Àngmaqí yaq bǿà pè sv̀ng àngmaqí dvjaq lú:ngòe,” wae.#Zek. 12:10

Yesu sv̀ng kǿ:mò we

Mat. 27:57-61; Mak. 15:42-47; Luk. 23:50-55

38Yadv́ng pv̀n mèpvng, Arimatia mvrìngpè Yosep nø, Yesu vnàng rvdalv́m rvt Pilat sv̀ng røtshìe. (Yosep nø Yuda vsv̀ng shølshúrì kaq svre rvt mvyø̀:ní Yesu coqcv́n wáshìe). Pilatní vmíng zí bǿà kvt, àng di nø Yesu vnàng kaòe. 39Vzv̀ng tiqkvt Yesu yv́ng yaqdø̀:ngí di ráì pè Nikodimu gø, mura nv̀ng vjo#19:39 “Vjo” nø gvzà ngór we shǿng tiqpv̀n í nø àng tvnøt wàò dá:ngí lá:ngòe. vshú we ngórcì vnícé joy dv́ngte lá:ngò nø̀ dì ráì. #Mat. 2:11; Yoh. 3:2 40Àngníí Yesu vnàng lùò nø̀, Yuda vsv̀ngrì kǿmshì vtóng vl dø, ngórcì nv̀ng shv́nàng laqtuní dø:pmòe. 41Yesu sv̀ng vtaqò zàng taq nø kùlwàng tiqlòng vle. Kùlwàng welòng taq vsv̀ng tiqgǿ gø shini mvkǿ:mò we lóngdùng dvgv̀mshv́r tiqlòng vle. 42Weni nø, Yuda vsv̀ngrì dvgǿshìlv́m àngni í nø lóngdùng dvgv̀m gø we shvnvng ni vl rvt, àngníí weyv́ngø Yesu sv̀ng kǿ:mòe.

Currently Selected:

Yohan 19: GSM

Highlight

Copy