Yohan 20

Yesu zun lú:ngì we

Mat. 28:1-11; Mak. 16:1-11; Luk. 24:1-12

1Wenár nv̀mlat ni taq, shini mvgá dvgvp, Makdala mvrìngmè Mari nø lóngdùng dvgv̀m yv́ngsv̀ng dìá:mì kvt, dvgv̀m shø lóngkø̀m vlúshaq í da we yv̀ng bǿà. 2Wervt àng nø Simon Piter nv̀ng Yesu shóngshì we coqcv́npè yv́ngsv̀ng kvlv̀ngá:mì nø, “Kàngpè sv̀ng àngmaqí dvgv̀m kèní lùa:pmà. Kayv́ng gv̀la:pmà we nøngmaqí mvsháì,” wa àngní lvngà sv̀ng dvtáòe. #Yoh. 13:23 3Wekvt Piter nv̀ng coqcv́n wepè nø dvgv̀m yv́ngsv̀ng búngá:mì. 4Àngní lvngà tiqdø kvlv̀ngá:mì we, coqcv́n wepèí Piter sv̀ng dvjunke bǿà nø, lóngdùng dvgv̀m yv́ng àng vzv̀ng tuqá:mì. 5Àng ngúshì nø̀ dvjaqò nìnø, vzi shv́nàng laqtunrì wa vyálshì we yà:ngòe. Ínìgø vdòng rv́m sv̀ng àng mvgòng. 6Simon Piter nø àng mèpvng tuq ráì kvt, lóngdùng dvgv̀m vdòng sv̀ng gòngá:mì. Wekvt vzi shv́nàng laqtunrì wa vyálshì da we sv̀ng gø, 7Yesu vgo møqò we sømban dùng nø laqtunrì nv̀ng tiqyv́ngø mø̀í dø, rvdulshaq tayv́ng zin da we sv̀ng gø à:ngí yà:ngòe. #Yoh. 11:44 8Dvgv̀m sv̀ng vzv̀ng tuq bǿì we coqcv́n wepè gø gòngá:mì nø yv̀ng bǿà rvt kv́m bǿì. 9Ínìgø Yesu nø shi yv́ngkèní zun ràe, wa we Shànshér Kàru kà sv̀ng àngní lvngàí shini mvrà:lò. #Dzr. 2:24-32; 1Kr. 15:4 10Wekvt coqcv́npèní nø chø̀m sv̀ng loá:mì.

Makdala mvrìngmè Mari sv̀ng dvtánshì we

11Mari nø lóngdùng dvgv̀m vdàm lapmø rip nø ngøe. Wedø ngø sórí, dvgv̀m vdòng sv̀ng ngúshì nø̀ dvjaqò nìnø, 12belaq múng gwashì we muqlàng dvzv́r vnígǿ yà:ngòe. Yesu vnàng vyàla:pmà yv́ngø vgo lap tiqgǿ, hí lap tiqgǿ runge. 13Àngníí, “Svmarémèá, pàwá èngøe?” wa rø:tnòe. À:ngí, “Ngà Kàngpè àngmaqí lùò nø̀ kayv́ng vyàla:pmà we mvshángò,” wa vtá:nòe. 14Wedø shø̀n dá:ngí àng lv́mposhì nìnø, Yesu weyv́ng rip we yv̀ng bǿà. Ínìgø Yesu í we màmvshá:lò. 15Yesuí, “Svmarémèá, pàwá èngøe? Kagǿ sv̀ng èláòe?” wa rø:tnòe. Marií wepè nø kùlwàng vsóngshúpè íe lá:nò rvt, “Vshaqpèá, nàí Àng sv̀ng èlùa:pmà nìnø, kayv́ng nàyàla:pmà we dètángà, ngàí lùlv́m íe,” a:lòe. 16Yesuí, “Mariá,” a:lòe. Mari lv́mposhì sórí Hebru kàí, “Raboni!” wa vtv́nshìe. (Raboni nø “Svrapè” wa kà íe). 17Yesuí àng sv̀ng, “Ngà sv̀ng mèzø̀mànøng, kadø íe wani Ngà nø Vpè yv́ngsv̀ng shini màrvlv́ngshaq ǿngàe. Íwe Ngà vnvmrì yv́ngsv̀ng èdivm nø àngmaq sv̀ng, ‘Ngà nø, Ngà Vpè nv̀ng nàmaq Àngpè gø í pè, Ngà Gvray nv̀ng nàmaq Gvray yv́ngsv̀ng rvlv̀ngvme wae,’ èvlá:mò,” a:lòe. #Rom. 8:29; Heb. 2:11-12 18Makdala mvrìngmè Mari dìá:mì nø coqcv́nrì sv̀ng, “Kàngpè kaq ngàí yv̀ng bǿngà,” a:lòe. Vrá, Yesuí àng sv̀ng vl dá:rà rì shvngbe dvtáòe.

Coqcv́nrì sv̀ng dvtánshì we

Mak. 16:14-18; Luk. 24:36-49

19Nár nv̀mlat ni weni dørø̀m taq, coqcv́nrì nø Yuda vsv̀ng shølshúrì kaq svre rvtnø̀ bv́ngkà kvlaqshì nø̀ vl dvgvp, Yesu di ráì nø̀ àngmaq dvhø̀ø zvng rip sórí, “Mòngzø̀l lòng leq lúnnø̀ng,” a:lòe. 20Wedø a:lò dá:ngí, àngmaq sv̀ng Àng wur nv̀ng svràmpa dvtánshìe. Coqcv́nrì nø Kàngpè sv̀ng yv̀ng bǿà rvt gvzà dvbù lú:ngì. #1Yh. 1:1 21Yesuí rá àngmaq sv̀ng, “Mòngzø̀l lòng leq lúnnø̀ng. Vpèí Ngà sv̀ng dèzv́r dakngà dø, Ngàí gø nàmaq sv̀ng dvzá:rìe,” a:lòe. #Yoh. 17:18 22À:ngí wedø a:lò dá:ngí, àngmaq sv̀ng shaqí vhe:rò nø̀, “Shànshér Pvlàcè nàtonø̀ng. #Nnp. 2:7 23Nàmaqí kagǿ sv̀ng mvrà èchutnanø̀ng nìnø, àng mvrà nø vchutshaq ívme. Nàmaqí kagǿ mvrà mèchutnanø̀ng nìnø, wegǿ mvrà nø màchutshaq íe,” a:lòe.#Mat. 16:19; 18:18

24Íwe Yesu di ráì dvgvp, Tiqcé Vnípè taqkèní Didimu#20:24 “Didimu” nø bvrácè wa ka íe. tǿò we Toma nø àngmaq nv̀ng tiqdø màvl. #Yoh. 11:16; 14:5 25Wervtnø̀ dvgá coqcv́nrìí àng kaq, “Kàngpè sv̀ng nøngmaqí yv̀ng bǿshà,” a:lòe. Tomaí, “Àng wur shv̀mshi dvmmá yv̀ngò nø̀, dvmmá taq ngà wurhàm màrvzǿngshø̀ng dv́ngte, Àng svràmpa dvmmá vdòng sv̀ng ngà wu:rí màmvnokngò dv́ngte, kadø ínìgø ngà mvkv́m,” a:lòe.#Yoh. 19:34

26Tiqnár mèpvng,#20:26 “Wemèpvng vshvt nií” wa nø gø rø daqe. coqcv́nrì nø chø̀m vdòngø vrá mvngushì ke, Toma gø vbáe. Bv́ngkà gø kvlaqshaq í we, Yesu di ráì nø̀ àngmaq dvhø̀ø rip sórí, “Mòngzø̀l lòng leq lúnnø̀ng,” a:lòe. #Yoh. 20:19 27Wekvt Yesuí Toma sv̀ng, “Nà wurhà:mí yayv́ng èshu:pmò nø̀ Ngà wur sv̀ng èyà:ngò. Vrá, nà wur èzúshì ra nø, Ngà svràmpa mènokngà. Mèdètiqshìni, èkv́m,” a:lòe. 28Tomaí, “Ngà Kàngpè nv̀ng Ngà Gvray!” wa vtá:nòe. #Yoh. 1:1 29Wekvt Yesuí, “Nàí Ngà sv̀ng èyv̀ng bǿngà rvt èkv́me má? Mvyà:ngò nìgø kv́mrì àngmaq nø ìshøt ìgv̀n vle,” a:lòe.#1Pt. 1:8

30Kàru yabok taq màru we dvgá dø shálv́m mvshv́lpvrá mvme pv̀n gø Yesuí Àng coqcv́nrì negv̀mø wà yà:ngà. 31Íwe Yesu nø Gvray Àngcèpè Kristu wepè í we sv̀ng nàmaq kv́mlv́m nv̀ng èkv́mnø̀ng yv́ngkèní Àng bø̀ng taq nàmaqí gø̀nshaq lúnlv́m dvpvt yadv́ng pv̀n vrungò we íe. #Rom. 1:17; 1Yh. 5:13

Currently Selected:

Yohan 20: GSM

Highlight

Copy