LUKAS 8

Kekerdor de Naitulog Yesus

1Pek liu ju kenjeh Yesus Kiet nu jap-jap pekan ru kampug. Kek Kiperlei Gah Bor tentang begeiharok Jenang Kimemerintah sebegei Raja. 12 urag Ipengikot mong besama ru Kek, 2ru mong juga memerip urag kerdor de ya biperbor ju kelog-kelog jehat ru nyaknik-nyaknik. Enai ajeh temasok Maria mai Magdalena de biperhol tujoh nyanik ju kek, 3Yohana kenah Khuza, pegawei istane Raja Herodes Antipas, Susana ru jeoi kerdor kilek nij. Enai naitulog ha Yesus ru Ipengikot-pengikot naiguna harta liknai sendiri.#Mat 27:55-56; Mrk 15:40-41; Luk 23:49

Perumpamaan tentang Mai Besepag Mat Beneh

(Mat 13:1-9; Mrk 4:1-9)

4Ku mase jeoi mai jengoi naihol ju jap-jap pekan ru naibekumpol naiha-terbuk nu Yesus, Kek pen Kicerite perumpamaan adeh nu enai: 5“Mong numom mai de beselai kiet kaha-sepag beneh. Mase kek kisepag beneh, mong mat beneh de yog ku nong. Mat beneh ajeh bijebat ya sengoi ru bicak ya cep. 6Mong juga mat beneh de yog ku tik bebatu. Bile beneh ajeh ya kicuai, cengwai ajeh kiselei kerana itik sod. 7Mong juga mat beneh de yog ku engkap semak de bejerlak. Semak bejerlak ajeh kigu-hit lalu kiperip cengwai beneh ajeh. 8Mong juga mat beneh de yog ku tik de bor. Beneh ajeh kicuai ru ikennem lei 100 kali gande.”

Ya telas Kicerite, Kek Kiurok ru suara kuat, “Amen engkek beentag, cerngailoh!”

Sebab Yesus Kiguna Perumpamaan

(Mat 13:10-17; Mrk 4:10-12)

9Ipengikot-pengikot naitanya nu Yesus ma imaksod perumpamaan ajeh. 10Yesus Kiberlag, “Nu engkek ya biog panei rahsie tentang begeiharok Jenang Kimemerintah sebegei Raja. Tapi nu mai kilek, Ngurok Ngguna perumpamaan supaye nainengneng tapi pek naibakek, ru naiceringai tapi pek naireti.”#Yes 6:9-10

Yesus Kipeterang Perumpamaan Mai Besepag Mat Beneh

(Mat 13:18-23; Mrk 4:13-20)

11“Adehloh imaksod perumpamaan ajeh. Mat beneh ajeh engrok Jenang. 12Mat beneh de yog ku nong ajeh begei ha sengoi de naicerngai ha engrok Jenang tapi Ibles kihol ru kikot engrok ajeh ju sengik enai supaye pek naipecaya ru pek bipeselamat. 13Mat beneh de yog ku tik bebatu ajeh begei ha sengoi de naicerngai engrok Jenang ya sengik de suka, tapi engrok ajeh pek kibereis ku kateh sengik enai. Enai pecaya nu engrok ajeh sekejap taleh, ru bile naikep cenuba, enai deras pek naipecaya nij. 14Mat beneh de yog ku engkap semak bejerlak ajeh begei ha sengoi de naicerngai engrok ajeh tapi nerisau, kenaya, ru heknod ha perwas sinui kipebantot enai lei pek naibepelek. 15Mat beneh de yog ku tik de bor ajeh begei ha sengoi de naicerngai ru naidek engrok ajeh ku kateh sengik de bor ru jujor. Enai betekon lei naibehasel.”

Pelite ku Kemil Parak

(Mrk 4:21-25)

16“Pek numom pen de kitod pelite lalu kiserkop ya pasu atao kidek ku kerop katel. Tapi tentu kek doh kidek pelite ajeh ku kemil parak supaye bok imai de mikmuj nu kateh deg kiburuk icahaya de lau.

17Begei ajeh juga, dikdij ma de bicernem doh biperlau ru dikdij ma de bikerdik doh bipasal nu jap-jap mai.

18Kerana ajeh, hunen cerngailoh abor ma de Ngurok adeh: Bok taleh de naiserngik ru naireti ha neajar Eng, Jenang doh Kibeh naireti gulebeh jeoi nij. Tapi bok taleh de pek naiserngik ha neajar Eng, enai doh naisip juga pekara-pekara de ya naipanei.”

Amek ru Memenang Yesus

(Mat 12:46-50; Mrk 3:31-35)

19Amek ru memenang Yesus naihol naiha-terbuk nu Kek tapi pek dapat kerana ku pajeh mong jeoi mai. 20Numom ju mai jengoi de mong ku pajeh kiurok nu Yesus, “Jen, amek ru memenang Jen naijinjeg ku luar naiha-bakek Jen.”

21Yesus Kiberlag, “Sengoi de naicerngai ru naijoi ha engrok Jenang, sengoi ajehloh amek ru tenek-menang Eng.”

Yesus Kipekerakdik Pinoi Pes ru Umbak de Kuat

(Mat 8:23-27; Mrk 4:35-41)

22Ku nanek arik, Yesus ru Ipengikot-pengikot naitebot perahu. Kek Kiurok nu enai, “Beiloh hiet nu englag tasek ateh.” Jadi, enai pen naiet. 23Ku kateh ceknip ajeh, Yesus Kibukbet. Aleh-aleh pinoi kiberikpes ku tasek ajeh. Teu pen mula kimuj nu kateh perahu ru enai kateh bahaye. 24Ipengikot-pengikot naiberyol Yesus, “Tuan, hik merek hiha-dat!”

Yesus Kikos ru Kitengking pinoi pes ru umbak de kuat ajeh. Pes ajeh pen kibehenti ru tasek ajeh kijadi ihad tenang. 25Lalu Yesus Kiurok nu Ipengikot-pengikot, “Engkek pek engkepecaya ha Engka?”

Dikdij liknai naisengoh ru cengang empag enai ru naibelwal ratak liknai, “Sengoi adeh ihad bekuasa! Pinoi ru teu pen baijoi Iernor!”

Yesus Kiperet Nyanik de Kisangrog Sengoi

(Mat 8:28-34; Mrk 5:1-20)

26Telas ajeh Yesus ru Ipengikot-pengikot teros naibelayar nu daerah Gerasa de ku englag Tasek Galilea. 27Mase Yesus Kiceleh ju perahu ru Kihuj nu darat, mong numom sengoi ju pekan ajeh de bisangrog ya nyanik kiperek nu Yesus. Sengoi ajeh ya liu kicip palak ru pek kigei ku padeg tapi ku kawasan penep. 28Bile kibakek Yesus, kek kiwig ru kikop ku ngar Yesus. Ya suara de kuat kiurok, “Yesus Kenon Jenang de Paleng Tinggi Ikedudukan! Ma de Haha-beh nu eng? Ngmerayu nu Hek, agokloh Hasiksa eng!” 29Kek kiurok begei ajeh kerana Yesus ya Kior nyanik ajeh hol ju kek. Ya jeoi kali nyanik ajeh kikuasai ha sengoi ajeh. Hamapen iteg ru ijog bibeg ya rantei ru ilei betol-betol bijaga ketat, tapi kek dapat kigercat ha rantei ajeh ru nyanik ajeh kien kek nu tempat-tempat de serakngek.

30Yesus Kitanya nu kek, “Ma muh hek?”

Kek kiberlag, “Legiun”#8:30 Legiun: Ku jaman ajeh nanek legiun mong enam ribu urag aska. kerana mong jeoi nyanik de naimuj nu sengoi ajeh. 31Nyanik-nyanik ajeh betol-betol naimerayu nu Yesus supaye pek Kiperet enai nu Terap Danan.#8:31 Terap Danan: Sengoi ku jaman ajeh naipiker nyanik-nyanik jehat bijel ku kateh terap de ihad jerek lei tiba arik nehukom de ipenyudah doh.

32Pek nyak ju kenjeh mong nukenawat lek tengah naicakcak ku beg lod. Nyanik-nyanik ajeh naimerayu nu Yesus supaye Kiog naimuj nu kateh lek-lek ajeh. Yesus pen Kiog. 33Jadi, nyanik-nyanik ajeh pen naihol ju sengoi ajeh lalu naimuj nu kateh lek-lek ajeh. Dikdij lek ajeh naijar nu terap de jerek ru naitau nu kateh tasek lalu naicelog.

34Mai de bejaga lek naineng dikdij hal de tejadi ajeh. Enai naijar naipasal hal ajeh nu sengoi-sengoi de ku pekan ru selai. 35Mai jengoi pen naihol naiha-neng ma de tejadi. Bile naihol nu majeh, naiterbuk nu Yesus ru naibakek sengoi de bisangrog ya nyanik ya kibor, kigigei beg jog Yesus, ya mong ileknog, ru ipeniker pen ya bor. Jadi, dikdij liknai ajeh naisengoh. 36Mai de ya naineng pekare ajeh ju imula naipasal nu mai jengoi begeiharok sengoi de bisangrog ajeh ya kibor. 37Lalu dikdij mai ku daerah Gerasa naisemanj Yesus Kidek ju kenjeh kerana ihad naisengoh. Jadi, Yesus Kihuj perahu Kaha-jog. 38Sengoi de bor ju senangrog nyanik ajeh kimerayu kaha-joi Yesus.

Tapi Yesus Kior kek jog. Yesus Kiurok, 39“Jogloh madeg ru pasalloh ma de Jenang ya Kibeh nu hek.”

Sengoi ajeh pen kiet nu jap-jap tempat ku pekan ru kipergah dikdij ma de bibeh ya Yesus nu kek.

Yesus Kipersui Kenon Yairus ru Kiperbor Kerdor de Jekjot

(Mat 9:18-26; Mrk 5:21-43)

40Bile Yesus Kijog nu lengrik Galilea, mai jengoi naisamut Kek kerana tengah naipoj ha Kek. 41Lalu numom sengoi imuh Yairus kihol nu Kek. Kek ajeh pemimpen deg sembahyang. Kek kisujod ku ngar jog Yesus ru kisemanj Yesus hol nu imadeg 42kerana ikenon kerdor de had nanek ninen, iumur 12 tahut, kinyik terok kaha-dat.

Tengah Yesus Kicip nu deg Yairus, mai jengoi de ku Isekelileg naihapet Kek. 43Ku pajeh mong numom kerdor de ya 12 tahut kitanggong jekjot behip de pek behenti-henti de bepunca ju kibebehip. Hamapen ya kiperdij iharta kibakek dokte, tapi pek mong numom pen de dapat beperbor ha kek. 44Kek kiperek nu celod Yesus ru kipep mol jubah Yesus. Ku sarik jijeh juga, ijeknot behip pen nyot. 45Yesus Kitanya, “Bok de pep Eng?”

Bile bokhentok de aku, Petrus kiberlag, “Tuan, mai ku padeh ihad jengoi ru naibekerumun. Enai ajehloh de behapet Jen!”

46Tapi Yesus Kiurok, “Mong mai de kipep Eng. Ngpanei mong kuasa de ya hol ju Eng.” 47Kerdor ajeh kisedar ma de kibeh ya bipanei. Kek kihol kerog iberog ru kisujod ku ngar Yesus. Ku ngar mai jengoi kipasal yama kipep jubah Yesus ru begeiharok nyaknik kek ya bor ku sarik jijeh. 48Yesus Kiurok nu kek, “Bong, kerana hapecaya nu Eng, hek ya habor. Ciploh ru sengik de aman.”

49Tengah Yesus Kibelwal, hol numom sengoi ju deg Yairus. Kek kipasal nu Yairus, “Kenon kerdor jen ya kidek hik. Wesloh agok jenpesusah ha Guru nij.”

50Yesus Kicerngai ru Kiurok nu Yairus, “Agok sengoh. Pecayaloh taleh. Kenon hek doh kibor.”

51Bile Yesus Kilei nu madeg Yairus, Kiget muj mai kilek. Kien muj Petrus, Yohanes, Yakobus, ru keneng-menek sanget ajeh taleh. 52Dikdij mai kilek tengah naijinjap ru naikenang ha sanget ajeh. Yesus Kipasal nu enai, “Agok jap! Sanget adeh pek kidat. Kek kibukbet taleh!”

53Tapi dikdij mai nailog ha Kek kerana naipanei sanget ajeh ya dat. 54Tapi Yesus Kicap teg sanget ajeh ru Kicereg, “Bong, kosloh!” 55Lalu, kelog sanget ajeh kijekjog nij ru sanget ajeh pen kikos ku sarik jijeh. Yesus Kior og caknak nu sanget ajeh. 56Keneng-menek sanget ajeh ihad baikagom tapi Yesus Kiget baipasal nu bok-bok pen tentang hal ajeh.

Currently Selected:

LUKAS 8: AEH

Highlight

Copy