LUKAS 7
7
Yesus Kiperbor Numom Hambe Raknak Aska Rom
(Mat 8:5-13)
1Telas Yesus Kiajar dikdij hal ajeh nu mai jengoi, Kek pen Kiet nu pekan Kapernaum. 2Ku pajeh mong numom raknak aska Rom. Kek mong numom hambe de ihad kihok. Tapi ihambe ajeh kinyik terok ru kaha-dat. 3Bile raknak aska ajeh kicerngai tentang Yesus, kek kior memerip urag raknak-raknak mai Yahudi naiterbuk nu Yesus ru naisemanj Kek Kihol ru Kiperbor ihambe ajeh. 4Enai pen naiet nu Yesus ru betol-betol naisemanj tenulog ju Kek. Naiurok, “Raknak aska ajeh layak Jentulog 5kerana kek kihok bangse hik ru kibeh deg sembahyang ha jik.”
6Jadi, Yesus pen Kiet ru enai. Mase Yesus Kaha-lei nu madeg, raknak aska ajeh kingeng ikekawat supaye naiurok nu Yesus, “Jen, pek payahloh Jenhol nu madeg eng kerana eng pek layak ngha-terima Jen nu kateh deg eng. 7Eng pek nghol kerana ngrasa juga lieng pek layak ngterbuk nu Jen. Amen Jenurok taleh, tentu hambe eng doh kibor. 8Eng pen ngkerjak ku kerop ernor mai. Ku kerop eng pen mong juga aska-aska kilek. Bile ngor nu numom aska, ‘Et,’ kek pen kiet. Bile ngurok nu numom aska de kilek, ‘Bei,’ kek pen kiderleh! Bile ngurok nu hambe eng, ‘Kerjak adeh,’ kek pen kibeh.”
9Cengang empag Yesus bile Kicerngai ha engrok begei ajeh. Lalu Kiceleg nu mai jengoi de naijoi ha Kek ru Kiurok, “Cerngailoh, pek pernah Ngburuk sengoi de ihad entoi iiman begei adeh ku engkap mai Israel.”
10Bile mai de bingeng ajeh naijog nu madeg raknak aska ajeh, naineng ihambe ajeh ya kibor.
Yesus Kipersui Kenon Numom Kerdor Balu
11Pek liu ju kenjeh nij, Yesus Kiet nu pekan Nain. Ipengikot-pengikot ru mai jengoi mong besama ru Kek. 12Bile Kilei nu pintu gerbang pekan ajeh, mong mai dat de bigandar hol ju pekan ajeh. Mai dat ajeh kenon keral de had nek nanek taleh ha numom kerdor balu. Mong mai jengoi ju pekan ajeh de naijoi ha kerdor balu ajeh. 13Bile Tuhan Yesus Kineng ha balu ajeh, Yesus pen Kiyayak ru Kiurok, “Agok jap.” 14Telas ajeh Kiperek ru Kipep pengandar ajeh ru mai de begandar pen naibehenti. Yesus Kiurok, “Piyog, Ngurok nu hek, kosloh!” 15Mai dat ajeh pen kikos ru mula kibelwal. Lalu Yesus Kiperjog kek nu ikeneng.
16Dikdij mai naijadi sengoh ru naipateh ha Jenang. Naiurok, “Numom Nabi entoi ya Kihol nu engkap hik! Jenang ya Kihol Kaha-peselamat Isengoi-sengoi!”
17Gah tentang Yesus ajeh ya lei nu dikdij lengrik Yudea ru jap-jap tempat de rek ku pajeh.
Sengoi-sengoi de Bingeng ya Yohanes Pembaptis
(Mat 11:2-19)
18Bile Yohanes Pembaptis kikep dikdij gah ajeh ju ipengikot-pengikot, 19kek kior nar mom ju ipengikot-pengikot baiet tanya nu Tuhan Yesus, “Enjenka Peselamat de bijanji ya Jenang? Atao hodka jipoj ha mai kilek nij?”
20Bile baiterbuk nu Yesus, baiurok, “Yohanes Pembaptis kingeng jar untok jartanya nu Jen, ‘Enjenka Peselamat de bijanji ya Jenang? Atao hodka jipoj ha mai kilek nij?’ ”
21Mase ajeh, Yesus tengah Kiperbor mai jengoi de mong bebegei nyaknik ru penghod. Kiperet kelog-kelog jehat ru Kiperbor jeoi mai buta juga. 22Yesus Kiberlag, “Jogloh pasal nu Yohanes Pembaptis ma de jerkecerngai ru jerkeneng: Mai buta ya nainengneng, mai lumpoh ya naicekcip, mai nyik kuste ya naibor, mai pekak ya naiceringai, mai dat ya bipersui, ru Gah Bor ya biperlei nu mai misken.#Yes 35:5-6; 61:1 23Jenang Kiberkat mai de pek naijadi ragu-ragu kerana Eng.”
24Bile pengikot-pengikot Yohanes Pembaptis baiet ju kenjeh, Yesus mula Kipasal nu mai jengoi tentang Yohanes Pembaptis. “Yama engkeet nu padag guron ru ma de engkeha-neng? Engkeha-neng lalag de bipoi ya pinoika? 25Amen pek, engkeet nu majeh engkeha-neng ma? Engkeha-neng mai de beleknog borka? Mai de beleknog bor ru sinui mewah naigei ku istane! 26Amen pek, engkeet nu majeh engkeha-neng ma? Engkeha-neng numom nabika? Hooh, cerngailoh, ilei ajeh lebeh daripade numom nabi. 27Ya mong bicot ku kateh Alkitab tentang kek begei adeh: ‘Eng doh Ngngeng sengoi ernor Eng lebeh canuk daripade Hek. Kek doh kisedia nong ha Hek.’#Mal 3:1 28Cerngailoh! Ku engkap dikdij sengoi de biperyos ku dunia adeh, pek mong numom pen de lebeh entoi daripade Yohanes Pembaptis. Tapi sengoi de paleng macot ikedudukan ku engkap sengoi-sengoi de biperintah ya Jenang sebegei Raja, ilei ajeh lebeh entoi daripade Yohanes Pembaptis.”
29Mai jengoi temasok pengutep cukei naicerngai ha engrok Yesus ajeh. Enai naiaku care Jenang ajeh betol kerana enai entem bibaptis ya Yohanes Pembaptis. 30Tapi mai Farisi ru guru-guru Hukom Taurat nainyek beterima heknod Jenang ha diri liknai kerana entemjeh nainyek bibaptis ya Yohanes Pembaptis.
31Yesus Kiurok, “Begei ha ma Ngha-pesama sengoi-sengoi ku jaman adeh? Begeiharokka enai ajeh? 32Enai ajeh begei sesanget de naimuman. Nanek kumpulan naiurok nu kumpulan de kilek: ‘Jimain lagu runggen ha engkek tapi pek engkeberunggen. Jimain lagu sedeh pen pek engkejinjap!’ 33Bile Yohanes Pembaptis kihol, kek selalo kibepuase ru pek kingut teu wain. Engkeurok kek bisangrog ya nyanik. 34Tapi bile Eng Kenon Manusia Nghol, Eng selalo Ngcakcak ru Ngngekngut. Engkeurok, ‘Neng, Kek nekcaknak ru nekngeknut. Kek Kibekawat ru mai bekutep cukei ru mai bedosa!’ 35Tapi mai de naijoi cerendeg Jenang naisedar tentang hal adeh: Bahneh Jar Yohanes Pembaptis iasal ju Jenang.”
Yesus ku Deg Simon
36Numom Farisi imuh Simon kipelawe Yesus cakcak nu imadeg. Yesus pen Kimuj nu imadeg ajeh ru Kigei cerner ku mije Kaha-cakcak.#7:36 Kigei cerner ku mije Kaha-cakcak: Begei adehloh icare mai Yahudi ku jaman ajeh naicakcak ku mije. 37Ku pekan ajeh, mong numom kerdor de bipanei isinui bedosa. Kek kicerngai Yesus mong Kicakcak ku deg mai Farisi ajeh, jadi kek pen kiet ru kien nubutol marmar iisi minyak wangi de mahal. 38Kek kijinjeg ku kenog rek beg jog Yesus ru kijinjap. Kikeraj jog Yesus ajeh ya iteu mat ru kigit ya isog. Telas ajeh kinyui jog Yesus ajeh ru kikoh ya minyak wangi. 39Bile hal ajeh bineng ya mai Farisi de bepelawe Yesus, kiserakngik ku kateh inos, ‘Amen Kek adeh betol-betol numom nabi, ya tentu Kipanei kerdor de pekpep ha Kek ajeh sengoi bedosa!’
40Yesus Kiberlag nu kek, “Simon, Eng mong hal de Ngha-urok nu hek.” Simon kiberlag, “Urokloh, Guru.”
41Yesus Kiurok, “Mong nar mom de baiberikdes nu sengoi de engog des. Numom kiberikdes 500 kepeg duet perak ru numom de kilek kiberikdes 50 kepeg duet perak. 42Ubai rimnar pek lalu baiha-bayar des ajeh nek. Kerana ajeh, sengoi de engog des kipebatal des ubai. Kek belok ju ubai ajeh doh de lebeh kihok ha sengoi de kipebatal des ajeh?”
43Simon kiberlag, “Ku peniker eng, kek de bipebatal ides lebeh jeoi.”
Yesus Kiurok nu kek, “Peniker hek ajeh betol.” 44Yesus Kingar nu kerdor ajeh ru Kiurok nu Simon, “Hek neng kerdor adeh? Eng Ngmuj nu kateh deg hek ru pek haog teu siknuj jog#7:44 Teu siknuj jog: Ku jaman ajeh, mai Yahudi naisuj jog enai mase naimuj nu madeg. ha Eng. Tapi, kerdor adeh kisuj jog Eng ya iteu mat ru kigit jog Eng ya isog. 45Hek pek hanyui ming Eng tapi kerdor adeh kinyui jog Eng pek behenti-henti sejak Nghol. 46Hek pek hakoh minyak ku kemil kui#7:46 Koh minyak ku kemil kui: Begei adehloh icare mai Yahudi naisamut tetamu enai nu madeg. Eng, tapi kerdor adeh kikoh minyak wangi ku jog Eng. 47Jadi, Ngurok nu hek begei adeh: Ihaknok de entoi ajeh kiperneng idosa de jeoi ajeh ya biampon. Bok imai de kikep neampon dosa gek, kek kihok gek juga.”
48Lalu Yesus Kiurok nu kerdor ajeh, “Dosa hek ya biampon.”
49Mai de gigei cakcak besama ru Kek naiurok ratak liknai, “Bokka Ilei adeh de dapat Kiampon dosa?”
50Tapi Yesus Kiurok nu kerdor ajeh, “Kerana hapecaya nu Eng, hek ya bipeselamat. Etloh ru sengik de aman!”
Currently Selected:
LUKAS 7: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
