LUKAS 9
9
Yesus Kingeng 12 Urag Ipengikot
(Mat 10:5-15; Mrk 6:7-13)
1Yesus Kicereg 12 urag Ipengikot lalu Kiog nu enai kuasa ha peret nyanik ru ha perbor sengoi ju nyaknik. 2Telas ajeh Kingeng enai supaye naiperlei Gah Bor tentang begeiharok Jenang Kimemerintah sebegei Raja ru supaye naiperbor mai nyik. 3Kiurok nu Ipengikot-pengikot, “Wesloh agok en ma-ma pen ku ceknip engkek, baik tungkat, jaben, caknak, duet, ataopen baju kilek. 4Ku belok taleh engkek biterima, mujloh nu imadeg ru geiloh pajeh lei engkedek ju pekan ajeh. 5Amen mai pek naiterima engkek, dekloh ju pekan enai ajeh ru tapesloh habok ku jog engkek sebegei tanda amaran Jenang doh Kihukom enai.”
6Ipengikot-pengikot pen teros naiet nu kampug-kampug ru naiperlei Gah Bor ru naiperbor mai nyik ku belok-belok taleh.
Raja Herodes Antipas Kibingung
(Mat 14:1-12; Mrk 6:14-29)
7Bile Raja Herodes Antipas penguasa lengrik Galilea ajeh kicerngai dikdij pekare ajeh, kek kibingung kerana mong mai de naiurok, “Yohanes Pembaptis ya kisui nij.” 8Mai kilek naiurok, “Nabi Elia kihol nij,” ru mong juga de naiurok, “Numom nabi manah entem ya kisui nij.” 9Raja Herodes Antipas kiurok, “Eng ya ngor koh kui Yohanes Pembaptis. Tapi adeh bok nij? Ya jeoi ngcerngai tentang hal sengoi adeh.” Kek kikerekwat kaha-buruk Yesus.
Yesus Kiog Caknak nu Lima Ribu Urag
(Mat 14:13-21; Mrk 6:30-44; Yoh 6:1-14)
10Bile 12 urag rasul-rasul ajeh naijog, naicerite nu Yesus dikdij hal de ya naibeh. Lalu Yesus Kien enai nu pekan Betsaida. 11Tapi, bile mai jengoi naipanei tentang hal ajeh, enai naijoi ha Yesus. Yesus Kisamut ru Kiajar enai tentang begeiharok Jenang Kimemerintah sebegei Raja, ru juga Kiperbor mai de nyik.
12Bile iarik ya dui, 12 urag Ipengikot naiterbuk nu Yesus ru naiurok, “Orloh dikdij mai adeh naiet nu kampug ru selai de rek supaye naikep caknak ru tempat ginei kerana ku padeh mahentok de mong.”
13Yesus Kiberlag nu Ipengikot-pengikot, “Engkek ogloh caknak nu enai.”
Naiberlag, “Amen pek jibeli caknak ha mai jengoi adeh, jik had mong nek lima kebek ruti ru nar ikor kak taleh.” 14(Ijengoi mong lima ribu urag keral.)
Yesus Kiurok nu Ipengikot-pengikot, “Or mai naigei bekelompok, nukelompok ijengoi 50 urag.”
15Ipengikot-pengikot naijoi engrok Yesus ru naior mai jengoi ajeh gigei. 16Telas ajeh Yesus Kikot lima kebek ruti ru nar ikor kak, Kiceog nu langit, ru Kiucap syukor nu Jenang. Telas ajeh Kiceh ruti ru kak ajeh ru Kiog nu Ipengikot-pengikot supaye naibahagi nu mai jengoi. 17Dikdij mai ku pajeh naicak lei naibakhek. Telas ajeh pengikot-pengikot Yesus naicatuk ilembeh caknak ajeh ijengoi 12 bakol.
Neaku Petrus tentang Yesus
(Mat 16:13-19; Mrk 8:27-29)
18Ku nanek arik, Yesus Kibedoa Kihalei ru Ipengikot-pengikot mong besama ru Kek. Kek pen Kitanya nu enai, “Amen hijoi engrok mai, Eng adeh bok?”
19Naiberlag, “Mong mai de naiurok Enjen Yohanes Pembaptis. Mong mai kilek naiurok Enjen Nabi Elia, ru mong juga mai kilek naiurok Enjen adeh numom nabi manah entem de kisui nij.”
20Yesus Kitanya nij nu enai, “Ku engkek, Eng adeh bok?”
Petrus kiberlag, “Peselamat de bijanji ya Jenang!”
Yesus Kipasal tentang Iseniksa ru Idanan
(Mat 16:20-28; Mrk 8:30–9:1)
21Tapi Yesus Kiget naipasal hal ajeh nu bok-bok pen, 22ru Kiurok tentang Diri Ilei sendiri, “Eng Kenon Manusia mesti Ngkena jeoi seniksa ru bitentang ya raknak-raknak mai Yahudi, raknak-raknak imam agame Yahudi, ru guru-guru Hukom Taurat. Eng doh biperdat tapi ku inik arik doh Ngkos nij ju danan.”
23Telas ajeh Yesus Kiurok nu mai jengoi, “Bok taleh de kaha-joi Eng, kek hodloh kiwes icare sinui de kipenteng ha diri ilei sendiri ru kek hodloh kitanggong senusah jap arik hamapen hod kidat. 24Bok imai de kihok inyawe, inyawe ajeh dohjeh nyep. Tapi bok imai de nyep inyawe ha Eng, kek doh kikep sinui de lei ditehjeh. 25Pek mong iguna amen numom kikep dikdij kenaya dunia adeh tapi nyep inyawe. 26Bok imai de kiselsel kaha-aku Eng ru neajar Eng ku ngar mai jengoi, Eng Kenon Manusia juga doh Ngselsel Ngha-aku sengoi ajeh bile Eng Nghol nij doh ku kateh kemuliean Eng ru ku kateh kemuliean Menek Eng ru ku kateh kemuliean malikat-malikat de suci. 27Cerngailoh abor! Memerip urag ju engkek doh pek engkedat lei engkeneng Jenang Kimemerintah sebegei Raja.”
Yesus Bipemulie ku Kemil Lod
(Mat 17:1-8; Mrk 9:2-8)
28Kira-kira lapan arik telas Yesus Kiurok begei ajeh, Kek Kien Petrus, Yohanes, ru Yakobus nu kemil lod naiha-bedoa. 29Sementare Yesus Kibedoa, Irenes Kibeubah ru Ileknog kijadi biyeg ru cerengling. 30Aleh-aleh mong nar mom baibelwal ru Kek. Ubai ajeh Nabi Musa ru Nabi Elia. Ubai ajeh inengneng cerengling ya cahaya kemuliean ju serga. 31Naibelwal tentang begeiharok pek liu nij danan Yesus ku kote Yerusalem doh kipegenap nerancang Jenang. 32Petrus ru ikekawat lekat naibukbet. Tapi, bile ya naijaga, naineng cahaya kemuliean Yesus ru mong nar mom baijinjeg besama ru Kek. 33Mase ubai ajeh baiha-et ju Yesus, Petrus kibual nu Yesus, “Tuan, ihad bor jik mong ku padeh. Biarloh jibeh nik kemah, nanek ha Jen, nanek ha Nabi Musa, ru nanek nij ha Nabi Elia.” (Petrus pek kipanei ma de kiurok.)
34Tengah Petrus kibelwal begei ajeh, sagop kiserkop dikdij liknai lei naisengoh. 35Ju sagop ajeh mong suara kiurok, “Adehloh Kenon Eng de Ngpileh. Cerngailoh engrok Kek.”
36Telas suara ajeh kibehenti, Ipengikot-pengikot naineng Yesus Kihalei taleh ku pajeh. Enai pek naipasal tentang hal de ya naineng ajeh nu bok-bok pen ku mase ajeh.
Yesus Kiperet Nyanik ju Sanget
(Mat 17:14-18; Mrk 9:14-27)
37Ku ihuper nij, Yesus ru nik mom Ipengikot ajeh naiceleh ju lod ajeh, lalu jeoi mai jengoi pen naiterbuk nu Yesus. 38Numom ju mai jengoi ajeh kiurok nu Yesus, “Guru, ngmerayu nu Jen. Yayakloh kenon eng de had nanek ninen. 39Bile nyanik kisangrog kenon eng, kek teros kiperwig ru kiperyoh iberog kekejanj lei iempag cekbug. Nyanik ajeh kipesiksa kek ru kinyek pek kaha-hol ju kek. 40Eng ya ngmerayu nu pengikot-pengikot Jen supaye naiperet nyanik ajeh tapi pek dapat naibeh.”
41Yesus Kiberlag, “Eng ya cukop liu Nggei ru Ngbesabar ru engkek! Tapi engkek lekat juga pek engkepecaya, lekat jehat, ru pek dapat engkebeh ma de Ngbeh! Enloh kenon hek nu madeh!”
42Bile sanget ajeh kiterbuk nu Yesus, nyanik kiberkol sanget ajeh nu tik ru iberog yahyoh kekejanj. Yesus Kitengking nyanik ajeh supaye kihol lalu sanget ajeh pen kibor ru Yesus Kiperjog kek ajeh nu imenek. 43Mai jengoi naikagom naineng ha kuasa Jenang de entoi.
Yesus Kiurok Nij tentang Iseniksa
(Mat 17:22-23; Mrk 9:30-32)
Mase mai jengoi lekat naikagom tentang hal de Kibeh ya Yesus ajeh, Kek Kiurok nu Ipengikot-pengikot, 44“Cerngai madeh abor-bor ma de Ngha-urok tentang diri LiEng. Eng Kenon Manusia doh biserah nu kuasa manusia.” 45Tapi enai pek naireti Ibengwal ajeh kerana imaksod bikerdik supaye pek naipanei. Tapi naisengoh betanya tentang hal ajeh nu Kek.
Bok de Paleng Entoi?
(Mat 18:1-5; Mrk 9:33-37)
46Ku mase kilek, mong timul kelahi ratak pengikot-pengikot Yesus tentang bok de paleng entoi ratak liknai ajeh. 47Bile Yesus Kipanei ma de naiserngik, Kek Kikot numom sanget ru Kiperjeg ku Ienglag. 48Lalu Kiurok nu enai, “Bok imai de kiterima numom sanget kerana sanget ajeh kipecaya nu Eng, kek kiterima Eng juga. Bok imai de kiterima Eng, kek kiterima Ilei de Kingeng Eng juga. Kerana, sengoi de paleng macot ju engkap engkek ajehloh ilei de paleng entoi.”
Bok de Pek Kilawan Engkek Kibepihak nu Engkek
(Mrk 9:38-40)
49Yohanes kiurok, “Tuan, jik mong jibakek numom sengoi kiperet nyanik-nyanik kiguna muh Enjen. Jik jiget kek kerana kek ajeh pek ju hik.”
50Yesus Kiurok nu enai, “Agok get kek, kerana sengoi de pek kilawan ha engkek kibepihak nu engkek.”
Mai Samaria Pek Naiterima Yesus
51Bile ya merek imase Yesus baha-angket nu serga, Kek Kipetetap Isengik Kaha-et nu kote Yerusalem. 52Kek Kingeng memerip urag cip canuk nu nanek kampug ku lengrik Samaria supaye naibesedia ha Ihelnol. 53Tapi mai ku pajeh pek naiterima Kek kerana Kek Kaha-et nu kote Yerusalem. 54Bile Yakobus ru Yohanes baineng hal ajeh, baiurok, “Guru, Jenhod jarsemanj os kiceleh ju langit supaye kitod enai?”
55Yesus Kiceleg ru Kirok ha ubai. 56Telas ajeh Yesus ru Ipengikot-pengikot naiet nu kampug kilek.
Mai de Naiha-jadi Pengikot-pengikot Yesus
(Mat 8:19-22)
57Ku kateh ceknip enai, mong numom sengoi kiurok nu Yesus, “Eng ya ngbesedia ngha-joi Jen nu belok taleh Jenha-et!”
58Yesus Kiberlag, “Cok lig mong ilubang ru cep mong iengsop tapi Eng Kenon Manusia pek mong tempat Ngha-dakdak.” 59Lalu Yesus Kiurok nu numom de kilek, “Joiloh Eng.”
Tapi sengoi ajeh kinyek pek kaha-joi Yesus, ru kiberlag, “Jen, ogloh ngjog nok ngha-cop danan apak eng.”
60Tapi Yesus Kiurok nu kek, “Biarloh mai dat ajeh naicop sengoi de dat. Tapi hek, etloh ru perlei Gah Bor tentang begeiharok Jenang Kimemerintah sebegei Raja.”
61Mong numom sengoi de kilek kiurok, “Jen, Eng ngha-joi Jen tapi ogloh eng ngjog nok ngha-pasal nu peringak eng.”
62Yesus Kiurok nu sengoi ajeh, “Sengoi de kaha-joi Eng tapi lekat kirisau tentang hal-hal de kilek, kek pek layak kimelayani Jenang sebegei iRaja.”
Currently Selected:
LUKAS 9: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
